প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা মনিপুরগী চুরাচান্দপুরদা লুপা করোর 7,300রোমগী তোঙান-তোঙানবা চাউখৎ-থৌরাংগী প্রোজেক্তশিংগী উরেপ-উয়ুং তমখ্রে
মনিপুরদা রেল কন্নেক্তিবিতী পাকথোক-চাউথোকহল্লি: পি.এম.
ঐখোয়না মনিপুরদা প্রো-পোর দিবেলপমেন্তগী থৌশিলশিংদা খুমাং চাউশিল্লি: পি.এম.
মনিপুরদা আশা অমসুং থাজবগী অনৌবা অয়ুক অমা লাক্লি: পি.এম.
ঐখোয়না মনিপুরবু শান্তি, নুংঙাই-য়াইফবা অমসুং চাউখৎপগী খুদম অমা ওইহন্নবা পান্দমগা লোয়ননা থবক তৌরি: পি.এম.
Posted On:
13 SEP 2025 2:17PM by PIB Imphal
প্রধান মন্ত্রী শ্রী নরেন্দ্র মোদীনা ঙসি মনিপুরগী চুরাচান্দপুরদা লুপা করোর 7,300 হেনবগী তোঙান-তোঙানবা চাউখৎ-থৌরাংগী প্রোজেক্তশিংগী উরেপ উয়ুং তমখ্রে। থৌরম অদুদা তিনখিবা মীয়ামদা ৱা ঙাংলদুনা প্রধান মন্ত্রীনা হায়খি মদুদি মনিপুর অসি থৌনা অমসুং অখাং কনবগী গুন চেনবা লমনি। মহাক্না হায়খি মদুদি মনিপুরগী চীংশিং অসি মহৌশাগী মমল নাইদ্রবা খুদোল অমনি। মহাক্না মখা তারদুনা হায়খি মদুদি চীংশিং অসিনা মীয়ামনা লেপ্পা লৈতনা কন্না হোৎনবগী খুদম অমসু ওইরি। মনিপুরগী মীয়ামগী থৌনা লিংজেল অদু থাগৎলদুনা, শ্রী মোদীনা মশিং য়াম্লবা মীয়াম্না লাকপগীদমক থাগৎপা ফোংদোকখি অমসুং মখোয়গী মীনুংশিগীদমক থাগৎপা ফোংদোকখি।
লমদম অসিগী নাৎ, চৎনবী, মখল-মখা কয়া অমসুং মপাঙ্গল অসি ভারতকী মরুওইবা পাঙ্গল অমনি হায়না পল্লদুনা শ্রী মোদীনা হায়খি মদুদি মনিপুরগী মমিং অসিমক্তদা “মনি” হায়বা ৱাহৈ অসি য়াওরি, মসিনা লাক্কদৌরিবা মতমশিংদা অৱাং-নোংপোক পুম্নমক্কী মগুন হেনগৎহনগদবা মনি অমা তাক্লি। প্রধান মন্ত্রীনা হায়খি মদুদি ভারত সরকারনা মনিপুরগী চাউখৎ-থৌরাংগী খোঙচৎ অসি খুমাং চাউশিলহন্নবা লেপ্পা লৈতনা হোৎনরি। মহাক্না হায়খি মদুদি হায়রিবা ৱাখল্লোন অসিগা লোয়ননা মহাক্না ঙসি মনিপুরগী মীয়ামগী মরক্তা লাকখি। শ্রী মোদীনা হায়খি মদুদি চাউরাক্না লুপা করোর 7,000গী প্রোজেক্তশিং শঙ্গাখ্রে। প্রোজেক্তশিং অসিনা মনিপুরগী মীয়ামগী মরুওইনা চীংগী লমদা লৈবা ত্রাইবেল কম্ম্যুনিতীশিংগী পুন্সি মহিং ফগৎহনগনি। মহাক্না হায়খি মদুদি প্রোজেক্তশিং অসিনা লমদম অসিদা হকশেল অমসুং এজুকেসনগী অনৌবা খুদোংচাবশিং ফংহল্লগনি। অনৌবা খোঙথাংশিং অসিগীদমক মহাক্না মনিপুর অমসুং চুরাচান্দপুরগী মীয়ামদা থাগৎপা ফোংদোকখি।
মনিপুর অসি ঙমখৈদা লৈবা রাজ্য অমনি অমসুং মসিদা কন্নেক্তিবিতী অসি মতম পুম্নমক্তা অচৌবা শিংনবা অমা ওইদুনা লাক্লি হায়না পল্লদুনা প্রধান মন্ত্রীনা অফবা লম্বী লৈতবনা মরম ওইদুনা মীয়াম্না থেংনরিবা খুদোংচাদবশিং অদু খঙখি অমসুং মখোয়গী অৱাবা অদু মহাক্না খঙই হায়না ফোংদোকখি। মহাক্না অকনবা ৱাফম থমখি মদুদি 2014দগী হৌরগা মহাক্না মনিপুরদা কন্নেক্তিবিতী ফগৎহনবদা লেপ্পা লৈতনা মীৎয়েং চংদুনা লাকখি অমসুং ভারত সরকারনা ইসু অসিবু কোকহন্নবা থাক অনিদা থবক তৌরি। শ্রী মোদীনা হায়খি মদুদি অহানবদা, মনিপুরদা রেল অমসুং লম্বীগী ইনফ্রাস্ত্রকচরগীদমক বজেৎ অসি মশিং য়াম্না হেনগৎহনখি। অনিশুবদা, শহর খক্তদা নত্তনা খুঙ্গংশিংদসু লম্বীগী কন্নেক্তিবিতী শন্দোক্নবা হোৎনখি।
হৌখিবা চহিশিংদা লমদম অসিদা নেস্নেল হায়ৱেজদা লুপা করোর 3,700 কাইথখ্রে হায়না পল্লদুনা শ্রী মোদীনা হায়খি মদুদি লুপা করোর 8,700গী অনৌবা হায়ৱে প্রোজেক্তশিং খোঙজেল য়াংনা মাংলোমদা চংশিল্লি। মহাক্না হায়খি মদুদি মমাংদা, লমদম অসিগী খুঙ্গংশিংদা চৎপা অসি য়াম্না অৱাবা ওইরম্মি। মসি মীয়াম্নসু খঙই। প্রধান মন্ত্রীনা হায়খি মদুদি লম্বীগী কন্নেক্তিবিতী অসি হৌজিক্তি খুঙ্গং চাম্মরোমদা য়ৌহনখ্রে। মসিনা চীংগী খুঙ্গংশিং অমসুং ত্রাইবেল কম্ম্যুনিতীশিংদা চাউনা কান্নবা ফংহল্লে হায়না মহাক্না অকনবা ৱাফম থমখি।
“ঐখোয়গী সরকারগী মখাদা, মনিপুরদা রেল কন্নেক্তিবিতী পাকথোক চাউথোকহল্লে, জিরিবাম-ইম্ফাল রেলৱে লাইননা অথুবা মতমদা কোনুং ওইরিবা ইম্ফালবু নেস্নেল রেল নেৎৱার্ক্কা শম্নহল্লগনি," হাবনা প্রধান মন্ত্রীনা ফোংদোক্লদুনা হায় মদুদি সরকারনা প্রোজেক্ত অসিদা লুপা করোর 22,000 ইনভেস্ত তৌরি। লুপা করোর 400গী শেনফম চংনা শাবা অনৌবা ইম্ফাল এয়রপোর্ত অসিনা লমদম অসিদা এয়র কন্নেক্তিবিতী হেনগৎহল্লে হায়না মহাক্না ফোংদোকখি। মহাক্না মখা তাখি মদুদি এয়রপোর্ত অসিদগী লৈবাক অসিগী অতোপ্পা মফমশিংদা হেলিকোপ্তর সর্বিসশিংসু হৌদোক্লে। শ্রী মোদীনা অকনবা ৱাফম থমখি মদুদি হেনগৎলক্লিবা কন্নেক্তিবিতী অসিনা মনিপুরগী মীয়ামগীদমক খুদোংচাবশিং ফগৎহল্লি অমসুং নহারোলশিংগীদমক অনৌবা থবক ফংবগী খুদোংচাবশিং শেমগৎলি।
“ভারত অসি য়াম্না থুনা চাউখৎলক্লি অমসুং অথুবা মতমদা মালেমগী খ্বাইদগী চাউবা অহুমশুবা ইকনোমী ওইগদৌরি। চাউখৎপগী কান্নবা অসি লৈবাক অসিগী মফম খুদিংমক্তা ফংহন্নবা ঐখোয়না লেপ্পা লৈতনা হোৎনরি", হায়না শ্রী মোদীনা ফোংদোকখি। মহাক্না নিংশিংখি মদুদি মতম অমদা দিল্লীদা লাউথোকখিবা ৱাফমশিং অসি মনিপুরগুম্বা মফমশিংদা য়ৌনবা চহী কয়া চঙখি। ঙসিদি চুরাচান্দপুর অমসুং মনিপুর অসি লৈবাক অসিগী অতৈ মফমশিংগা লোয়ননা খুমাং চাউশিল্লি হায়না মহাক্না ফোংদোকখি। সরকারনা লৈবাক শীনবা থুংনা লায়রবশিংগীদমক্তা পুক্কা য়ুম শাবগী স্কিম অমা হৌদোক্লে হায়না প্রধান মন্ত্রীনা ফোংদোকখি। মহাক্না হায়খি মদুদি মনিপুরদা ইমুং লিশিং কয়া অমা মসিগী খুদোংচাবা ফংখ্রে। য়ুম 60,000 রোম শাবগী থবক চত্থখ্রে। শ্রী মোদীনা হায়খি মদুদি লমদম অসিনা মমাংদা মৈগী অৱাবা মায়োক্নখি। মহাক্না হায়খি মদুদি সরকারনা মীয়াম্বু অৱাবা অসিদগী কোকহন্নবা ৱারেপ লৌখি অমসুং মসিগী মহৈ ওইনা মনিপুরদা ইমুং লাখ অমা হেন্না লেম্না মৈ ফংহনখ্রে।
মনিপুরদা মমাশিং অমসুং ইচিল-ইনাওশিংনা ঈশিং ফংদবগী অৱাবা কয়া মায়োক্নরি হায়না পল্লদুনা প্রধান মন্ত্রীনা হায়খি মদুদি সরকারনা হীরম অসি কোকহন্নবা 'হার গর নাল সে জল' স্কিম হৌদোক্লে। হৌখিবা চহি খরা অসিদা লৈবাক অসিগী নাগরিক করোর 15 হেনবদা থক্নবা ঈশিং ফংহনখ্রে হায়না মহাক্না ফোংদোকখি। শ্রী মোদীনা মখা তারদুনা হায়খি মদুদি চহি 7-8গী মমাংদা, মনিপুরদা ইমুং 25,000দগী 30,000 ফাওবদা পাইপকী ঈশিং ফংখি। ঙসিদি, রাজ্য অসিগী ইমুং লাখ 3.5 হেন্না তেপ ৱাতর ফংলি হায়না মহাক্না ফোংদোকখি। মহাক্না থাজবা ফোংদোকখি মদুদি য়াম্না থুনা মনিপুরগী ইমুং খুদিংমক্না মখোয়গী য়ুমদা পাইপকী ঈশিং ফংলগনি।
সোসিএল ইনফ্রাস্ত্রকচরগী মতাংদা খন্ন-নৈনদুনা, প্রধান মন্ত্রীনা হায়খি মদুদি মমাংগী মতমশিংদা, অফবা স্কুলশিং, কোলেজশিং অমসুং হোস্পিতালশিং অসি চীংগী অমসুং ত্রাইবেল লমদমশিংদা শুপ্নগী মঙলান খক্তা ওইরম্মি। মহাক্না হায়খি মদুদি করিগুম্বা কনাগুম্বা অমনা নারবদি, হোস্পিতাল য়ৌবদা মতম শাংনা চঙলমখি। শ্রী মোদীনা হায়খি মদুদি ভারত সরকারনা হোৎনরিবশিংগী মতুং ইন্না হৌজিক ওইরিবা ফীভম অসি হোংলক্লি অমসুং চুরাচান্দপুরদা মেদিকেল কোলেজ অমা লিংখৎলে। মহাক্না হায়খি মদুদি অনৌবা দোক্তরশিং হৌজিক মফম অসিদা ত্রেনিং পীরি অমসুং হেল্থকেয়র সর্ভিসশিং ফগৎলক্লি। প্রধান মন্ত্রীনা মীয়ামদা নীংতম্লবা মতুং দিকেদ কয়াগী মমাংদগী মনিপুরগী চীংগী লমশিংদা মেদিকেল কোলেজ অমত্তা লৈখিদবগী মতাংদা পনখি। মহাক্না ফোংদোকখি মদুদি মসিগী মাইপাকপা অসি হৌজিক লৈরিবা সরকার অসিনা ওইথোকহল্লে। পি.এম.-দিভাইন স্কিমগী মখাদা সরকারনা চীংগী জিলা মঙাদা মোদর্ন হেল্থ সর্ভিসশিং দিবেলপ তৌরি হায়না মহাক্না হায়খি। শ্রী মোদীনা হায়খি মদুদি আয়ুশ্মান ভারত স্কিমগী মখাদা সরকারনা লায়রবা ইমুংশিংগীদমক লুপা লাখ 5 ফাওবগী লেম্না লায়েংলি। মহাক্না হায়খি মদুদি মনিপুরদা অনাবা মীওই লাখ 2.5 রোম্না স্কিম অসিগী মখাদা লেম্না লায়েংলি। মসিগী খুদোংচাবা অসি লৈরমদ্রবদি, রাজ্য অসিগী লাইরবা ইমুংশিংনা মখোয়গী পেকেৎতগী লুপা করোর 350 চাদিং তৌরমগনি হায়না মহাক্না ফোংদোকখি। শেনফম পুম্নমক ভারত সরকারনা পুথোক্লে হায়না প্রধান মন্ত্রীনা অকনবা ৱাফম থমখি। মহাক্না মখা তাখি মদুদি লায়রবা নাগরিক খুদিংমক্কী অৱাবা কোকহনবা অসি সরকারগী খ্বাইদগী মরুওইবনি।
প্রধান মন্ত্রীনা হায়খি মদুদি “মনিপুরগী লম অমসুং লমদম অসি আশা অমসুং অপাম্বগী লমদম অমনি”। মহাক্না হায়খি মদুদি মতম খরগী মমাংদা, মহাক্না কেম্পশিংদা লৈবা শোকহল্লবা মীওইশিংগা উনখি। মহাক্না ৱারী শারবা মতুংদা, প্রধান মন্ত্রীনা থাজবা ফোংদোকখি মদুদি আশা অমসুং থাজবগী অনৌবা অয়ুক অমা মনিপুরদা লাক্লি।
প্রধান মন্ত্রীনা হায়খি, "অৱাং-নোংপোক লমদম অমা হেক্তদা চাউখৎ-থৌরাংগীদমক্তা শান্তি লৈহনবা অসি তঙাইফদে অমসুং হৌখিবা চহি 11 অসিদা অৱাং-নোংপোক লমদমদা মতম শাংনা লৈরক্লবা অৱাং-নোংপোক লমদমগী ৱাথোক অমসুং চয়েৎনবা কয়া অমা লোইশিনখ্রে।" মহাক্না হায়খি মদুদি মীয়াম্না শান্তিগী লম্বী খনখ্রে অমসুং চাউখৎ-থৌরাংবু মরুওইনা লৌরি। শ্রী মোদীনা হন্দক্তা চীং অমসুং তম্পাক্কী মফমশিংদা লৈরিবা তোঙান তোঙানবা কাংলুপশিংগা ৱারী শানবগী থৌরম পাঙথোকপদা নুংঙাইবা ফোংদোকখি। মহাক্না হায়খি মদুদি মসিগী খোঙথাং অসি ভারত সরকারগী এপ্রোচকী শরুক অমনি, মসিদা শান্তি লৈহন্নবা ৱারী শানবা, ইকায় খুম্নবা অমসুং অমনা অমবু খঙমিন্নবা অসি মরুওই। শান্তিগী লম্বীদা মাংলোমদা চংশিন্নবা অমসুং মখোয়গী অপাম্বশিং মপুং ফাহন্নবগীদমক প্রধান মন্ত্রীনা লুপ খুদিংমক্তা আপিল তৌখি। মহাক্না মীয়ামগা লোয়ননা লৈরি অমসুং ভারত সরকারনা মনিপুরগা লোয়ননা লৈরি হায়না ফোংদোক্লদুনা মহাক্কী মতেং পাংগনি হায়না থাজবা পীখি।
ভারত সরকারনা মনিপুরদা পুন্সি মহিং অমুক হন্না শেমগৎনবা হোৎনরি হায়না ফোংদোক্লদুনা শ্রী মোদীনা হায়খি মদুদি সরকারনা দিস্প্লেস ওইরিবা ইমুংশিংগীদমক্তা অনৌবা য়ুম 7,000 শানবা তেংবাং পীরি। প্রধান মন্ত্রীনা হায়খি মদুদি চাউরাক্না লুপা করোর 3,000গী অখন্নবা পেকেজ অমা হন্দক্তা অয়াবা পীখ্রে। মহাক্না মখা তাখি মদুদি দিস্প্লেস ওইরবা মীওইশিং মতেং পাংনবা লুপা করোর 500 অখন্ননা থাদোকখ্রে।
মনিপুরদা লৈরিবা ত্রাইবেল নহারোলশিংগী মঙলান অমসুং অৱা-অনাশিং অদু মহাক্না খঙই হায়না পল্লদুনা, প্রধান মন্ত্রীনা হায়খি মদুদি মখোয়গী অৱা-অনাশিং অদু কোকহন্নবা সোল্যুসন কয়া অমা থবক ওইনা পাংথোক্লি। সরকারনা লোকেল গবর্নান্স বোদীশিংবু মপাঙ্গল কনখৎহন্নবা থবক পায়খৎলি হায়না মহাক্না অকনবা ৱাফম থমখি।
প্রধান মন্ত্রীনা ফোংদোকখি মদুদি “ত্রাইবেল কম্ম্যুনিতী খুদিংমক্কী চাউখৎপা অসি নেস্নেল প্রাইওরিতি অমনি”। অহানবা ওইনা, ত্রাইবেল লমদমশিংগী চাউখৎনবগীদমক ধরাতি আবা জনজাতিয়া গ্রাম উতকার্শ অভিয়ান পায়খৎলি। মসিগী খোঙথাং অসিগী মখাদা, মনিপুরগী খুঙ্গং 500 হেনবদা চাউখৎ থৌরাংগী থবক পায়খৎলি। মহাক্না হায়খি ত্রাইবেল এরিয়াশিংদা একলব্য মোদেল রেসিদেন্সিএল স্কুলশিংগী মশিং হেনগৎলক্লি। শ্রী মোদীনা হায়খি মদুদি মনিপুরদা এক্লব্যা মোদেল রেসিদেন্সিএল স্কুল 18 শাগৎলি। মহাক্না হায়খি মদুদি স্কুল অমসুং কোলেজগী মোদর্নাইজেসন অসিনা চীংগী জিলাশিংদা এজুকেস্নেল ফেসিলিতীশিং য়াম্না হেনগৎহনগনি।
মনিপুরগী চৎনবীনা মতম পুম্নমক্তা নুপীশিংদা শক্তি পীনবা হোৎনরি হায়না পল্লদুনা শ্রী মোদীনা হায়খি মদুদি সরকার অসিনা নুপীশিংদা শক্তি পীনবা হোৎনরি। মহাক্না হায়খি মদুদি সরকারনা মনিপুরগী ইচানুপীশিংবু মতেং পাংনবা ৱার্কিং ৱুমেন হোস্তেলশিং শাগৎলি।
প্রধান মন্ত্রীনা হায়খি, "ঐখোয়না মনিপুরবু শান্তি, নুংঙাই য়াইফবা অমসুং চাউখৎপগী খুদম অমা ওইহন্নবা পান্দমগা লোয়ননা থবক তৌরি।" মহাক্না মীয়ামদা থাজবা পীদুনা লোইশিনখি মদুদি মনিপুরগী চাউখৎ-থৌরাংগীদমক, দিস্প্লেস ওইরবা ইমুংশিংগী রিসেত্তলমেন্ত তৌনবা অমসুং শান্তি লৈহন্নবা, ভারত সরকারনা মনিপুর সরকারদা পাংবা য়াবা মওং পুম্নমক্তা মতেং পাংগনি।
থৌরম অদুদা মনিপুরগী রাজ্যপাল, শ্রী অজয় কুমার ভল্লা অমদি অতোপ্পা দিগ্নিতরীশিংনা শরুক য়াখি।
বেকগ্রাউন্দ
প্রোজেক্তশিং অসিদা লুপা করোর 3,600রোমগী মনিপুর অর্বান রোদস, দ্রেনেজ অমসুং এসেৎ মেনেজমেন্ত ইমপ্রুবমেন্ত প্রোজেক্তশিং; লুপা করোর 2,500গী নেস্নেল হায়ৱে প্রোজেক্ত 5; মনিপুর ইনফোতেক দিবেলপমেন্ত (MIND) প্রোজেক্ত, মফম 9দা ৱার্কিং ৱুমেন হোস্তেলশিং য়াওরি।
***
(Release ID: 2166267)
Visitor Counter : 2