ভারতকী রাস্ত্রপতি শ্রীমতি দ্রৌপদি মর্মুনা ঙসি (সেপ্তেম্বর ৮, ২০২৫) নই দিল্লীদা ইঞ্জিনীয়রিং এক্সপোর্ত প্রমোসন কাউন্সিল (ই.ই.পি.সি.) গী প্লেতিনম জুবিলী সেলেব্রেসনদা শরুক য়াখ্রে।

থৌরম অদুদা ৱা ঙাংলদুনা রাস্ত্রপতিনা হায়খি মদুদি অরিবা মতমদা, ভারতনা স্পিরিচুএলিতী অমসুং ত্রেদ অনিমক্তা মালেমগী লুচিংবা ওইরম্মি। ভারতপু অমুক হন্না লৌশিং অমসুং ললোন-ইতিক্কী মকোক থোংবা মফম অমা ওইহন্নবা মীপুম খুদিংমক্কী ৱারেপ লৌগদবনি। ইকোনোমিক সেক্তরদা মরুওইবা স্তেকহোল্দর অমা ওইনা, ই.ই.পি.সি.না মসিগী ৱারেপ অসি য়াম্না কন্না লৌখৎকদবনি।

হৌখিবা চহি ১০ রোম অসিদা ভারতকী ইঞ্জিনীয়রিং এক্সপোর্ত অসি দোল্লর বিল্লিয়ন ৭০দগী দোল্লর বিল্লিয়ন ১১৫ হেনগৎলে হায়না রাস্ত্রপতি নুংঙাইবা ফোংদোকখি। মহাক্না হায়খি মদুদি এক্সপোর্ত হেনগৎলকপা অসি ঐখোয়না হৌখিবা চহী তরা অসিদা ইন্তর্নেস্নেল ত্রেদকী লমদা অৱাবা কয়া থেংনরকপশিং য়েংলুবদা হেন্না থাগৎনিংঙাই ওই। মহাক্না মসিগী মাইপাকপসিদা ই.ই.পি.সি.না শরুক য়াখিবগীদমক থাগৎপা ফোংদোকখি।

ই.ই.পি.সি.না মালেমগী কৈথেল অমসুং ভারতকী পোত্থোক পুথোক্লিবশিংগী মরক্তা থোং অমা ওইনা থবক তৌরি হায়না রাস্ত্রপতিনা হায়খি। মহাক্না ই.ই.পি.সি.দা গ্লোবেল ভেল্যু চেনদা ভারতকী থৌদাং অমসুং ভারতকী ইন্ত্রপ্রিনরশিংগী থৌদাং লেপ্পা লৈতনা হেনগৎহন্নবা তকশিনখি। মহাক্না হায়খি মদুদি ৱার্ল্দ ত্রেদ ওর্দর অমসুং ইন্তর্নেস্নেল ইকোনোমিক ওর্দরদা অহোংবা লাকপদগী মসিগী থৌদাং অসি হেন্না মরু ওইরক্লি।

গ্লোবেল ত্রেদকী শিংনবশিং অসি ঐখোয়গী লৈবাক অসিদা লৈরিবা অখন্নবা কেপাসিতীশিং শীজিন্নদুনা খুদোংচাবদা ওন্থোকপা মথৌ তাই হায়না রাস্ত্রপতিনা হায়খি। হৌখিবা চহী তরেৎ অসিদা ভারতকী ইঞ্জিনীয়রিংগী এক্সপোর্তকী মফমশিং অসি য়াম্না চাউনা হোংখ্রে। ই.ই.পি.সি.না অহোংবা পুরকপা অসিদা লৌরিবা থৌদাং অসি মখা তানা চত্থগদবনি অমসুং 'নেসন ফার্ষ্ট'কী ৱাখল্লোনগা লোয়ননা ভারতকী শেন্মিৎলোন অসিবু মখা তানা মপাঙ্গল কনখৎহন্নবা থবক পায়খৎকদবনি।

অৱাংবা থাক্কী ইঞ্জিনীয়রিং সর্বিসশিং অমসুং মমল হোংবা পোত্থোকশিং অসি ভারতকী অচৌবা মপাঙ্গল অমনি হায়না রাস্ত্রপতিনা হায়খি। মালেমগী খ্বাইদগী চাউবা কম্পেনীশিংগী গ্লোবেল কেপবিলিতী সেন্তরশিং ভারত্তা লৈরি। ই.ই.পি.সি.গুম্বা স্তেকহোল্দরশিংনা মতিক চাবা ইন্সেন্তিবশিং অমসুং ইকোসিস্তেম অমা পীদুনা ভারতপু গ্লোবেল ইন্নোবেসন সেন্তর অমা ওইহন্নবগী ৱাখল্লোনগা লোয়ননা মাংলোমদা চংশিনগদবনি। মালেমগী শেন্মিৎলোন অমসুং ললোন-ইতিক্কী অখঙ-অহৈশিংনা ইনোবেসন ইকোনোমী অমসুং ক্যাচ-অপ ইকোনোমীগী মতাংদা খন্ন-নৈনৈ। ইন্নোবেসন ইকোনোমীশিং অসি মালেমদা খ্বাইদগী কম্পিতিতিব অমসুং চাউখৎপা ইকোনোমীশিংনি। মহাক্না ই.ই.পি.সি.গী স্তেকহোল্দর পুম্নমকপু ঐখোয়গী লৈবাক অসিদা লৈরিবা তেলেন্ত অমসুং ইনর্জী অদুগীদমক খুদোংচাবা পীরবা ইকোসিস্তেম অমা পীদুনা ভারতপু মকোক থোংবা ইন্নোবেসন ইকোনোমী অমা ওইহন্নবগীদমক অচেৎপা ৱাফম থম্নবা তকশিনখি।

রাস্ত্রপতিগী ৱারোল য়েংনবগীদমক্তা মফমসিদা ক্লিক তৌবীয়ু-

***