صدر جمہوریہ ہند محترمہ دروپدی مرمو نے آج (یعنی 5 ستمبر 2025 کو) یوم اساتذہ کے موقع پر نئی دہلی میں منعقدہ ایک تقریب کے دوران ملک بھر کے اساتذہ کو قومی ایوارڈس  پیش کیے۔

اجتماع سے خطاب کرتے ہوئے صدر جمہوریہ ہند نے کہا کہ خوراک، لباس اور رہائش کی طرح تعلیم بھی انسان کے وقار اور سلامتی کے لیے ضروری ہے۔ سمجھدار اساتذہ بچوں میں وقار اور تحفظ کا احساس پیدا کرنے کا کام کرتے ہیں۔ انہوں نے بطور استاد اپنے وقت کو یاد کیا اور اس وقت کو اپنی زندگی کا ایک بہت ہی بامعنی دور قرار دیا۔

صدر جمہوریہ نے کہا کہ تعلیم انسان کو قابل بناتی ہے۔ غریب ترین پس منظر کے بچے تعلیم کی طاقت سے ترقی کے آسمانوں کو چھو سکتے ہیں۔ بچوں کی پرواز کو طاقت دینے میں شفیق اور کلی طور پر وقف اساتذہ سب سے اہم کردار ادا کرتے ہیں۔ اساتذہ کے لیے سب سے بڑا انعام یہ ہے کہ ان کے طلباء انہیں زندگی بھر یاد رکھیں اور خاندان، معاشرے اور ملک کے لیے قابل ستائش خدمات انجام دیں۔

صدر جمہوریہ نے کہا کہ طلبا کی کردار سازی استاد کا اولین فرض ہے۔ حساس، ذمہ دار اور سرشار طلبا جو اخلاق کی پیروی کرتے ہیں وہ ان طلبا سے بہتر ہیں جو صرف مقابلہ بازی، کتابی علم اور خود غرضی میں دلچسپی رکھتے ہیں۔ ایک اچھے استاد میں جذبات اور ذہانت دونوں ہوتے ہیں۔ جذبات اور ذہانت کا تال میل طلبا پر بھی اثر انداز ہوتا ہے۔

صدر جمہوریہ نے کہا کہ اسمارٹ بلیک بورڈز، اسمارٹ کلاس رومز اور دیگر جدید سہولیات کی اپنی اہمیت ہے۔ لیکن سب سے اہم چیز ذہین اساتذہ ہیں۔ ذہین اساتذہ وہ اساتذہ ہیں جو اپنے طلباء کی ترقی کی ضروریات کو سمجھتے ہیں۔ ہوشیار اساتذہ پیار اور حساسیت کے ساتھ مطالعہ کے عمل کو دلچسپ اور موثر بناتے ہیں۔ ایسے اساتذہ طلبا کو معاشرے اور قوم کی ضروریات پوری کرنے کے قابل بناتے ہیں۔

صدر جمہوریہ نے کہا کہ لڑکیوں کی تعلیم کو انتہائی اہمیت دی جانی چاہیے۔ لڑکیوں کی تعلیم میں سرمایہ کاری کرکے، ہم اپنے خاندان، معاشرے اور قوم کی تعمیر میں انمول سرمایہ کاری کرتے ہیں۔ انہوں نے کہا کہ لڑکیوں کو بہترین تعلیم فراہم کرنا خواتین کی قیادت میں ترقی کو فروغ دینے کا سب سے مؤثر طریقہ ہے۔ انہوں نے روشنی ڈالی کہ قومی تعلیمی پالیسی 2020 کستوربا گاندھی بالیکا ودیالیوں کو وسعت دینے اور پسماندہ طبقوں کی لڑکیوں کو خصوصی تعلیم کی سہولیات فراہم کرنے پر زور دیتی ہے۔ لیکن تعلیم سے متعلق کسی بھی اقدام کی کامیابی کا انحصار بنیادی طور پر اساتذہ پر ہوتا ہے۔ انہوں نے اساتذہ سے کہا کہ وہ لڑکیوں کو تعلیم دینے میں جتنا زیادہ تعاون دیں گے، اساتذہ کے طور پر ان کی زندگی اتنی ہی بامعنی ہوگی۔ انہوں نے اساتذہ پر زور دیا کہ وہ لڑکیوں سمیت تمام طلباء پر خصوصی توجہ دیں جو نسبتاً شرمیلی ہیں یا کم مراعات یافتہ پس منظر سے ہیں۔

صدر جمہوریہ نے کہا کہ قومی تعلیمی پالیسی کا مقصد ہندوستان کو عالمی علم کی سپر پاور بنانا ہے۔ اس کے لیے ہمارے اساتذہ کو دنیا کے بہترین اساتذہ کے طور پر پہچانا جانا چاہیے۔ ہمارے اداروں اور اساتذہ کو تعلیم کے تینوں شعبوں یعنی اسکول کی تعلیم، اعلیٰ تعلیم اور ہنر کی تعلیم میں فعال کردار ادا کرنا ہوگا۔ انہوں نے یقین ظاہر کیا کہ ہمارے اساتذہ اپنی اہم شراکت سے ہندوستان کو عالمی علم کی سپر پاور کے طور پر قائم کریں گے۔

صدر جمہوریہ کی تقریر ملاحظہ کرنے کے لیے برائے مہربانی یہاں کلک کریں

**********

(ش ح –ا ب ن)

U.No:5712