مرکزی کابینہ میں میرے ساتھی اشونی ویشنو جی ، دہلی کی وزیر اعلی ریکھا گپتا جی ، اڈیشہ کے وزیر اعلی موہن چرن ماجھی جی ، مرکزی وزیر مملکت جیتین پرساد جی ، ایس ای ایم آئی کے صدر اجیت منوچا جی ، ہندوستان اور بیرون ملک سے سیمی کنڈکٹر صنعت کے سی ای اوز  اور ان کے ساتھی ، مختلف ممالک سے یہاں آئے  ہمارے  معزز مہمان ، اسٹارٹ اپس سے وابستہ کاروباری افراد  اورمختلف ریاستوں کے میرے نوجوان  طلباء دوست ، خواتین اور معزز افراد!

ابھی کل رات ہی میں جاپان اور چین کے اپنے دورے سے واپس آیا ہوں ۔   میں آگیا ہوں اس لیے آپ تالی بجا کر میرا استقبل کر رہے ہیں یا اس لیے کی میں وہاں گیا تھا ؟   اور آج میں آپ کے درمیان یشو بھومی کے اس ہال میں موجود ہوں ، جو امنگوں اور اعتماد سے بھرا ہوا ہے ۔  جیسا کہ آپ سب جانتے ہیں ، مجھے ٹیکنالوجی کا فطری  طور پرشوق ہے ۔  حال ہی میں ، جاپان کے اپنے دورے کے دوران ، مجھے جاپان کے وزیر اعظم شیگیرو اشیبا سین کے ساتھ ٹوکیو الیکٹران فیکٹری کا دورہ کرنے کا موقع ملا ۔  اور ان کے سی ای او بھی ابھی ہمیں بتا رہے تھے کہ مودی صاحب آ گئے ہیں ۔

دوستوں ،

ٹیکنالوجی میں میری یہ دلچسپی مجھے بار بار آپ کے درمیان لاتی ہے ۔  اس لیے آج بھی میں آپ کے درمیان آکر بہت خوش ہوں ۔

دوستوں ،

دنیا بھر سے سیمی کنڈکٹر سے وابسطہ ماہرین  یہاں موجود ہیں ، 40-50 سے زیادہ ممالک کے نمائندگان یہاںموجود ہیں  اور ہندوستان کی اختراع اور نوجوانوں کی طاقت بھی یہاں نظر آ رہی ہے    اور  یہ جو امتزاج تشکیل دیا گیا ہے اس کا صرف ایک ہی پیغام ہے-دنیا ہندوستان پر بھروسہ کرتی ہے ، دنیا ہندوستان پر یقین رکھتی ہے ، اور دنیا ہندوستان کے ساتھ سیمی کنڈکٹر کا مستقبل بنانے کے لیے تیار ہے ۔

سیمیکون انڈیا میں آنے والے آپ تمام معزز مہمان  کا میں خیر مقدم کرتا ہوں ۔  آپ سب ترقی یافتہ ہندوستان کے سفر میں ، خود کفیل ہندوستان کے سفر میں ہمارے بہت اہم شراکت دار ہیں ۔

دوستوں ،

ابھی کچھ دن پہلے ہی اس سال کی پہلی سہ ماہی کے مجموعی گھریلو پیداوار  (جی ڈی پی) کے اعداد  وشمار جاری کیے گئے تھے ۔  ایک بار پھر ہندوستان نے ہر امید ، ہر توقع ، ہر تشخیص سے بہتر کارکردگی کا مظاہرہ کیا ہے ۔  ایک طرف ، جب دنیا بھر کی معیشتوں میں خدشات ہیں اور معاشی خود غرضی سے پیدا ہونے والے چیلنجز ہیں ، تو اس صورت حال میں بھی  ہندوستان نے 7.8 فیصد کی ترقی حاصل کی ہے ۔  اور یہ ترقی ہر شعبے میں ہے ، مینوفیکچرنگ ، سروسز ، زراعت  اور تعمیرات وغیرہ۔  جوش و خروش ہر جگہ نظر آتا ہے ۔  آج ہندوستان جس رفتار سے ترقی کر رہا ہے ، اس سے ہم سب میں ، صنعت میں ، ملک کے ہر شہری میں نئی توانائی پیدا ہو رہی ہے ۔  یہ ترقی کی سمت ہے ، جو یقینی طور پر ہندوستان کو تیسری سب سے بڑی معیشت بنانے کی طرف تیزی سے آگے بڑھے گی ۔

دوستوں ،

سیمی کنڈکٹر کی دنیا میں ایک کہی جاتی ہے ، تیل سیاہ سونا تھا ، لیکن چپس ڈیجیٹل ہیرے ہیں ۔  ہماری پچھلی صدی تیل سے تشکیل پائی تھی۔   دنیا کی قسمت کا تعین تیل کے کنوؤں سے ہوتا تھا ۔  عالمی معیشت میں اتار چڑھاؤ اس بات پر منحصر ہے کہ ان تیل کے کنوؤں سے کتنا پٹرولیم پیدا ہوتا ہے ۔  لیکن اکیسویں صدی کی طاقت ایک چھوٹی چپ تک محدود رہی ہے ۔  یہ چپس چھوٹے ہو سکتے ہیں ، لیکن ان میں دنیا کی ترقی کو بڑا فروغ دینے کی طاقت ہے ۔  اور یہی وجہ ہے کہ آج سیمی کنڈکٹر کا عالمی بازار 600 ارب ڈالر تک پہنچ رہا ہے ۔  اور اگلے چند سالوں میں یہ ایک کھرب ڈالر سے تجاوز کر جائے گا ۔  اور مجھے یقین ہے کہ جس رفتار سے ہندوستان سیمی کنڈکٹر کے شعبے میں ترقی کر رہا ہے ، اس ایک ٹریلین مارکیٹ شیئر میں ہندوستان کا نمایاں حصہ بننے والا ہے ۔

دوستوں ،

میں آپ کے سامنے یہ بھی پیش کرنا چاہتا ہوں کہ ہندوستان کی رفتار کتنی ہے ۔  سال 2021 میں ، ہم نے  سیمی کون انڈیا پروگرام شروع کیا ، سال 2023 تک ، ہندوستان کے پہلے سیمی کنڈکٹر پلانٹ کو منظوری دی گئی ۔  سال 2024 میں ہم نے کچھ اور پلانٹس کو منظوری دی ، سال 2025 میں ہم نے مزید 5 پروجیکٹوں کو منظوری دی ۔  مجموعی طور پر ،  10 سیمی کنڈکٹر پروجیکٹوں میں اٹھارہ بلین ڈالر یعنی ڈھیڑ لاکھ کروڑ روپے  سے زیادہ کی سرمایہ کاری کی جا رہی ہے ۔  یہ ہندوستان پر دنیا کے بڑھتے ہوئے اعتماد کو ظاہر کرتا ہے ۔

دوستوں ،

آپ جانتے ہیں ، سیمی کنڈکٹر میں رفتار اہمیت رکھتی ہے ۔  فائل سے فیکٹری تک کا وقت جتنا کم ہوگا ، کاغذی کارروائی اتنی ہی کم ہوگی ، ویفر کا کام اتنی ہی جلدی شروع ہو سکے گا ۔  ہماری حکومت اسی نقطہ نظر سے کام کر رہی ہے ۔  ہم نے نیشنل سنگل ونڈو سسٹم نافذ کیا ہے۔  اس کے ذریعے مرکز اور ریاستوں سے تمام منظوریاں ایک ہی پلیٹ فارم پر حاصل کی جا رہی ہیں ۔  اس نے ہمارے سرمایہ کاروں کو بہت زیادہ کاغذی کارروائی سے آزاد کر دیا ہے ۔  آج ملک بھر میں سیمی کنڈکٹر پارک پلگ اینڈ پلے انفراسٹرکچر ماڈل پر بنائے جا رہے ہیں ۔  ان پارکوں میں زمین ، بجلی کی فراہمی ، بندرگاہیں ، ہوائی اڈے ، ان سب سے رابطہ اور ہنر مند ورکر پول جیسی سہولیات موجود ہیں   اور جب ان میں ترغیبات بھی شامل کی جائیں گی تو صنعت کا پھلنا پھولنا یقینی ہوگا ۔  چاہے وہ پی ایل آئی مراعات ہوں یا ڈیزائن سے منسلک گرانٹ ، ہندوستان ہر طرح کی صلاحیت اور سہولیات  کی پیش کش کر رہا ہے ۔  اس لیے سرمایہ کاری بھی مسلسل آ رہی ہے ۔  ہندوستان اب بیک اینڈ سے فل اسٹیک سیمی کنڈکٹر نیشن بننے کی طرف بڑھ رہا ہے ۔  وہ دن دور نہیں جب ہندوستان کی سب سے چھوٹی چپ دنیا کی سب سے بڑی تبدیلی لائے گی ۔ بلا شبہ ہمارا سفر دیر سے شروع ہوا لیکن اب ہمیں کوئی نہیں روک سکتا ۔  مجھے بتایا گیا ہے کہ سی جی پاور کا پائلٹ پلانٹ 4-5 دن پہلے ہی  شروع ہوا ہے  یعنی  28 اگست سے  شروع ہوا ہے۔   کینز کا پائلٹ پلانٹ بھی کام شروع کرنے والا ہے ۔  مائکرون اور ٹاٹا کے ٹیسٹ چپس پہلے ہی تیار کیے جا رہے ہیں ۔  جیسا کہ میں پہلے کہہ چکا ہوں ، تجارتی چپس کی پیداوار اسی سال سے شروع ہو جائے گی ۔  اس سے ظاہر ہوتا ہے کہ سیمی کنڈکٹر کے شعبے میں ہندوستان کتنی تیزی سے ترقی کر رہا ہے ۔

دوستوں ،

ہندوستان میں سیمی کنڈکٹر کی کامیابی کی کہانی کسی ایک دائرہ یا کسی ایک ٹیکنالوجی تک محدود نہیں ہے ۔  ہم ایک مکمل ماحولیاتی نظام بنا رہے ہیں ، ایک ایسا ماحولیاتی نظام جہاں ڈیزائننگ ، مینوفیکچرنگ ، پیکیجنگ اور ہائی ٹیک ڈیوائسز ، سب کچھ یہاں ہندوستان میں دستیاب ہے ۔  ہمارا سیمی کنڈکٹر مشن صرف ایک  فیب یا ایک چپ بنانے تک محدود نہیں ہے ۔  ہم ایک سیمی کنڈکٹر ایکو سسٹم بنا رہے ہیں جو ہندوستان کو خود کفیل اور عالمی سطح پر مسابقتی بناتا ہے ۔

دوستوں ،

ہندوستان کے سیمی کنڈکٹر مشن کی ایک اور خاص خصوصیت ہے ۔  ہندوستان دنیا کی جدید ترین ٹیکنالوجی کے ساتھ اس شعبے میں آگے بڑھ رہا ہے ۔  یہ ہماری توجہ  اور محنت ہے کہ ابھرتی ہوئی ٹیکنالوجی ہندوستان میں بنی چپس سے نئی طاقت حاصل کرے ۔  نوئیڈا  اور بنگلور میں بنائے جانے والے ہمارے ڈیزائن سینٹر دنیا کے کچھ جدید ترین چپس بنانے پر کام کر رہے ہیں ۔  یہ وہ چپس ہیں جن میں اربوں ٹرانجسٹر جمع کیے جا رہے ہیں ۔  یہ چپس 21 ویں صدی کی عمیق ٹیکنالوجیز کو نئی طاقت دیں گے ۔

دوستوں ،

آج ہندوستان دنیا کے سیمی کنڈکٹر سیکٹر کو درپیش چیلنجوں پر مسلسل کام کر رہا ہے ۔  آج ہم شہروں میں فلک بوس عمارتیں اور شاندار ساختیاتی بنیادی ڈھانچہ دیکھتے ہیں ۔  اس طرح کے بنیادی ڈھانچے کی بنیاد اسٹیل ہے ۔  اور ہمارے ڈیجیٹل انفراسٹرکچر کی بنیاد اہم معدنیات ہیں ۔  یہی وجہ ہے کہ ہندوستان آج نیشنل کریٹیکل منرل مشن پر کام کر رہا ہے ۔  ہم اپنے ملک میں نایاب معدنیات کی اپنی مانگ کو پورا کرنے کے لیے کام کر رہے ہیں ۔  پچھلے چار سالوں میں ، ہم نے اہم معدنیات کے منصوبوں پر بڑے پیمانے پر کام کیا ہے ۔

دوستوں ،

ہماری حکومت سیمی کنڈکٹر سیکٹر کی ترقی میں اسٹارٹ اپس اور ایم ایس ایم ایز کے لیے بھی بہت اہم کردار دیکھتی ہے ۔  آج دنیا کے سیمی کنڈکٹر ڈیزائن صلاحیت میں ہندوستان کا حصہ 20 فیصد ہے ۔  ہندوستان میں نوجوان سیمی کنڈکٹر صنعت کا سب سے بڑا انسانی سرمایہ کارخانہ ہیں ۔  میں اپنے نوجوان کاروباریوں ، اختراع کاروں اور اسٹارٹ اپس سے کہنا چاہوں گا کہ آگے آئیں ، حکومت آپ کے ساتھ کندھے سے کندھا ملا کر چل رہی ہے ۔  ڈیزائن سے منسلک ترغیبی اسکیم اور چپس ٹو اسٹارٹ اپ پروگرام آپ کے لیے ہیں ۔  حکومت ڈیزائن سے منسلک ترغیبی اسکیم کو بھی نئی شکل دینے جا رہی ہے ۔  ہماری کوشش اس شعبے میں ہندوستانی دانشورانہ املاک (آئی پی) کو فروغ دینا ہے ۔  حال ہی میں شروع کیے گئے انوسندھان نیشنل ریسرچ فنڈ کے ساتھ معاہدہ کرنے سے بھی آپ کو مدد ملے گی ۔

دوستوں ،

کئی ریاستیں بھی یہاں  اس پروگرام میں حصہ لے رہی ہیں ، کئی ریاستوں نے سیمی کنڈکٹر سیکٹر کے لیے خصوصی پالیسیاں بنائی ہیں ، یہ ریاستیں اپنی ریاستوں میں خصوصی بنیادی ڈھانچے پر زور دے رہی ہیں ۔  میں ملک کی تمام ریاستوں سے بھی درخواست کرنا چاہوں گا کہ وہ اپنی ریاستوں میں سیمی کنڈکٹر ایکو سسٹم کو فروغ دینے اور اپنی ریاستوں میں سرمایہ کاری کے ماحول کو بڑھانے کے لیے دیگر ریاستوں کے ساتھ صحت مند مقابلہ کریں ۔

دوستوں ،

اصلاح ، کارکردگی اور تبدیلی کے منتر پر چل کر ہندوستان یہاں پہنچا ہے ۔  آنے والے وقت میں ہم اگلی نسل کی اصلاحات کا ایک نیا مرحلہ شروع کرنے جا رہے ہیں ۔  ہم انڈیا سیمی کنڈکٹر مشن کے اگلے مرحلے پر بھی کام کر رہے ہیں ۔  میں یہاں موجود تمام سرمایہ کاروں کو بتانا چاہوں گا کہ ہم کھلے دل سے آپ کا استقبال کرنے کے لیے تیار ہیں   اور اگر میں آپ کی زبان میں کہوں ، ڈیزائن تیار ہے ، ماسک  ہم آہنگ  ہے ۔  اب درستگی کے ساتھ عمل درآمد کرنے اور  ایک پیمانے پر انجام دینے کا وقت ہے ۔  ہماری پالیسیاں قلیل مدتی اشارے نہیں ہیں ۔ وہ طویل مدتی وعدے ہیں ۔  ہم آپ کی ہر ضرورت کو پورا کریں گے ۔  وہ دن دور نہیں جب پوری دنیا کہے گی-ہندوستان میں ڈیزائن کیا گیا ، ہندوستان میں بنایا گیا  اور دنیا  نے اس پر بھروسہ کیا ۔  ہماری ہر کوشش کامیاب ہو ، ہر چیز اختراع سے بھرپور ہو  اور ہمارا سفر ہمیشہ غلطی سے پاک اور اعلی کارکردگی سے بھرپور ہو ۔  اسی جذبے کے ساتھ  میں  آپ سب کو نیک خواہشات پیش کرتا ہوں!

آپ کا بہت بہت شکریہ!

***

ش ح۔م م ع۔خ م

U.NO.5570