প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা বিহারগী গায়াদা লুপা করোর ১২,০০০রোমগী চাউখৎ-থৌরাংগী প্রোজেক্ত কয়ামরুম উরেপ-উয়ুং তমখ্রে, শঙ্গাখ্রে
গায়াজীগী স্পিরিচুএল অমসুং কলচরেল হেরিতেজ অসি অরিবা অমসুং য়াম্না ইনাক খুনবা অনিমক ওইরি: পি.এম.
ওপরেসন সিন্দুরনা ভারতকী ঙাকশেলগী লালোংদা অনৌবা লয়ি অমা য়েকখ্রে: পি.এম.
বিহারবু খোঙজেল য়াংনা চাউখৎহনবা অসি কেন্দ্রদা লৈরিবা NDA সরকারগীদমক খ্বাইদগী মরু ওইবা অমনি: পি.এম.
লৈবাক অসিদগী ইনফিলত্রেতর পুম্নমক খেন্নবা থমদনা তান্থোক্কনি: পি.এম.
Posted On:
22 AUG 2025 1:52PM by PIB Imphal
প্রধান মন্ত্রী শ্রী নরেন্দ্র মোদীনা ঙসি বিহারগী গায়াদা লুপা করোর ১২,০০০গী চাউখৎ-থৌরাংগী প্রোজেক্ত কয়ামরুম উরেপ উয়ুং তমখ্রে অমসুং শঙ্গাখ্রে। প্রধান মন্ত্রীনা জ্ঞান অমসুং নীংখা তম্বগী শেংলবা শহর গায়াজীদা ইকায় খুম্নবা উৎখি অমসুং বিষ্ণুপদ লাইশঙগী মতিক ময়াই লৈরবা লমদম অসিগী মীপুম খুদিংমক্তা য়াইফ-পাউজেল পীখি। গায়া জীগী লম অসি স্পিরিচুএলিতি অমসুং শান্তিগী লমনি হায়না শ্রী মোদীনা ফোংদোকখি। মহাক্না হায়খি মদুদি ভগৱান বুদ্ধনা মঙাল ফংখিবা মফম অসি শেংলবা লমদমনি। “গায়া জীগী স্পিরিচুএল অমসুং কলচরেল হেরিতেজ অসি অরিবা মতমগী অমসুং য়াম্না ইনাক খুনবা ওই হায়না শ্রী মোদীনা ফোংদোকখি। লমদম অসিগী মীয়াম্না শহর অসি 'গায়া' হায়না খক কৌবতা নত্তনা 'গায়া জী' হায়না ইকায় খুম্নবা উৎপা পাম্মি হায়বা ৱাফম থম্লদুনা প্রধান মন্ত্রীনা বিহার সরকারবু মসিগী ইকায় খুম্নবা অসিগীদমক থাগৎপা ফোংদোকখি। কেন্দ্র অমসুং বিহারগী সরকারনা গায়াগী চাউখৎ-থৌরাংগী মায়কৈদা লেপ্পা লৈতনা থবক পায়খৎলিবা অসিদা মহাক্না নুংঙাইবা ফোঙদোকখি।
ঙসি গায়া জীগী অশেংবা লমদমদগী লুপা করোর ১২,০০০গী প্রোজেক্তশিং শঙ্গাখ্রে অমসুং উরেপ উয়ুংসু তমখ্রে হায়না পল্লদুনা শ্রী মোদীনা হায়খি মদুদি প্রোজেক্তশিং অসি ইনর্জী, হেল্থকেয়র অমসুং অর্বান দিবেলপমেন্ত য়াওনা মরুওইবা সেক্তরশিংদা শন্দোক্লি। থৌরাংশিং অসিনা বিহারগী ইন্দস্ত্রীএল কেপাসিতী মপাঙ্গল কনখৎহল্লগনি অমসুং নহারোলশিংগীদমক থবক ফংবগী অনৌবা খুদোংচাবশিং ফংহল্লগনি হায়না মহাক্না ফোংদোকখি। ত্রান্সফোর্মেতিব প্রোজেক্তশিং অসিগীদমক্তা বিহারগী মীয়াম্বু মহাক্না থাগৎখি। প্রধান মন্ত্রীনা মখা তানা হায়খি মদুদি রাজ্য অসিদা হেল্থকেয়র ফেসিলিতী হেনগৎহন্নবা হোস্পিতাল অমসুং রিসর্চ সেন্তর অমা ঙসি শঙ্গাখ্রে। মসিগা লোয়ননা বিহারগী মীয়ামদা কেন্সরগী লাইয়েংগী অহেনবা খুদোংচাবা ফংলে হায়না মহাক্না ফোংদোকখি।
লায়রবশিংগী পুন্সিদগী অৱাবা লৌথোকপা অমসুং নুপীশিংগী পুন্সি লায়থোকহনবা অসি মীয়ামগী সেবা তৌরিবা অমা ওইনা খ্বাইদগী হেন্না অপেনবা পোকপা ওই হায়না ফোংদোক্লদুনা প্রধান মন্ত্রীনা লায়রবশিংদা পক্কা য়ুমশিং ফংহনবা অসি মহাক্কী মরুওইবা থৌদাং অমনি হায়না অমুক হন্না ফোংদোকখি। মহাক্না হায়খি মদুদি অৱাবা তারবা মীওই খুদিংমকপু পক্কা য়ুম অমা ফংহন্দ্রিবা ফাওবা মহাক্না পোত্থবা তৌরোই। মহাক্না হায়খি মদুদি, ৱারেপ অসি ঙাক্না চৎতুনা হৌখিবা চহি ১১ অসিদা লৈবাক শিনবা থুংনা লায়রবশিংগীদমক পক্কা য়ুম করোর ৪ শাখ্রে। বিহার খক্তদা য়ুম লাখ ৩৮ হেন্না শাখ্রে অমসুং গায়া দিস্ত্রিক্তকী ইমুং লাখ ২গী মথক্তা মখোয় মশাগী পক্কা য়ুম ফংখ্রে হায়না পল্লদুনা শ্রী মোদীনা হায়খি মদুদি মসি য়ুম খক্তমক নত্তে, মসি লায়রবশিংগী ইকাই খুম্নবগী খুদম্নি। মহাক্না হায়খি মদুদি য়ুমশিং অসিদা মৈ, ঈশিং, তোইলেত অমসুং গ্যাস কনেক্সন য়াওরি - মসিনা লায়রবা ইমুংশিংদসু খুদোংচাবশিং, সেফতী অমসুং ইকাই খুম্নবা লৈহল্লি।
প্রধান মন্ত্রীনা হায়খি মদুদি খোঙথাং অসিবু মখা চত্থদুনা বিহারগী মগধ লমদমদা লৈবা ইমুং ১৬,০০০ হেনবনা হৌজিক মখোয়গী পক্কা য়ুমশিং ফংখ্রে। মহাক্না হায়খি মদুদি চহি অসিদা, দীপাবলী অমসুং ছথ পুজাগী থৌরমশিং অসি হায়রিবা য়ুমথোংশিং অসিদা হেন্না চাউনা পাংথোক্লগনি। য়ুম ফংলবা বেনিফিসরীগী ইমুং খুদিংমক্তা নুংঙাইবা ফোংদোক্লদুনা শ্রী মোদীনা প্রধান মন্ত্রী অৱাস য়োজনাগী মখাদা কান্নবা ফংনবা ঙাইরিবা মীওইশিংদা লায়রবা নাগরিক খুদিংমক্তা পক্কা য়ুম অমা ফংহন্নবা কেম্পেন অসি মখা চত্থখিগনি হায়না থাজবা পীখি।
“বিহার অসি চন্দ্রগুপতা মৌর্য় অমসুং চানক্যগী লমনি। ভারতনা মাগী য়েক্নবশিংগী মায়োক্তা শিংনবশিং থেংনরকপা মতম খুদিংদা বিহারনা লৈবাক অসিগী ঙাক্লৌ অমা ওইদুনা লাক্লি,” হায়না শ্রী মোদীনা ফোংদোক্লদুনা হায় মদুদি বিহারগী লমদমদগী শকখিবা ৱাশক থুংদবা য়াওদে। কাশ্মীরগী পহলগামদা তেরোরিস্ত এতেক থোকখিবগী মতাংদা পল্লদুনা প্রধান মন্ত্রীনা হায়খি মদুদি বিহারগী লমদম অসিদগী মহাক্না তেরোরিজম মুত্থৎনবা ৱাশক লৌখি। মহাক্না হায়খি মদুদি ঙসিদি মালেম অসিনা বিহারগী লৈমায়দা লৌখিবা ৱারেপ অদু মপুং ফারকপা উবা ফংলি। শ্রী মোদীনা লৈবাক মীয়ামদা নীংশিংখি মদুদি পাকিসস্তান্না দ্রোন অমসুং মিসাইল লান্দারকপা মতমদা, ভারতনা চরুগুম্না মিজাইলশিং অদু থুগাইদুনা ন্যুত্রেলাইজ তৌখি। মহাক্না পাকিস্তানগী মিসাইল অমত্তনা ভারতপু শোকহনবা ঙমখিদে হায়না ফোংদোকখি।
শ্রী মোদীনা হায়খি, "ওপরেসন সিন্দুরনা ভারতকী ঙাকশেলগী স্ত্রেতেজীদা অনৌবা খোঙথাং অমা হৌদোক্লে।" ভারত্তা তেরোরিস্তশিং থারকপা নৎত্রগা এতেকশিং থৌরাং তৌরবা মতুংদা কনাগুম্বা অমত্তনা নান্থোক্তুনা চৎখিবা ঙমলোই হায়না মহাক্না ফোংদোকখি। তেরোরিস্তশিংনা লৈনুংদা লোৎলবসু, ভারতকী মিসাইলশিংনা মখোয়বু মফম অদুদা ফুমজিনগনি হায়না মহাক্না ফোংদোকখি।
বিহারগী খোংজেল য়াংনা চাউখৎপা অসি কেন্দ্রদা লৈরিবা এন.দি.এ. সরকারগী মরুওইবা পান্দম অমনি হায়না প্রধান মন্ত্রীনা অকনবা ৱাফম থমখি। বিহার অসি হৌজিক অপুনবা চাউখৎপগী লম্বীদা খোংজেল য়াংনা চংশিল্লি হায়না মহাক্না ফোংদোকখি। মহাক্না হায়খি মদুদি হৌখিবা চহিশিংদা, মতম শাংনা লৈরক্লবা প্রোব্লেমশিংগী সোলুসনশিং ফংখ্রে, অমসুং প্রোগ্রেসকী অনৌবা লম্বীশিং শেমখ্রে। "লেন্তর্ন লৈঙাক" মতমদা ওইখিবা অৱাবা ফিভমশিং অদু নৌহৌননা নীংশিংলদুনা শ্রী মোদীনা হায়খি মদুদি মতম অদুদা, লমদম অসি রেদ তেররনা শোকহল্লম্মি অমসুং মাওইস্তকী থবক থৌরমশিং অসিনা মরম ওইদুনা নুমিৎ তারবা মতুংদা চৎথোক চৎশিন তৌবদা য়াম্না খুদোংচাদবা ওইখি। মহাক্না হায়খি গায়া জীগুম্বা শহরশিং অসি লেন্তর্ন রেজিম মখাদা অৱাবা মওংদা লৈখি। প্রধান মন্ত্রীনা হায়খি মদুদি খুঙ্গং লিশিং কয়াদা ইলেক্ত্রিসিতীগী পোলশিংগুম্বা মরুওইবা ইনফ্রাস্ত্রকচর লৈতে। মহাক্না হায়খি মদুদি লেন্তর্ন মতম অদুদা লৈঙাক পায়বশিংনা বিহারগী তুংলমচৎপু অমমম্বদা পুশিল্লকখি। মহাক্না মখা তানা হায়খি মদুদি মহৈ তম্বা অমসুং থবক ফংবগী খুদোংচাবসু লৈতে, অমসুং বিহারীশিংগী মীরোন কয়া অমা অসিগুম্বা ফিভমশিং অসিনা মরম ওইদুনা মাইগ্রেৎ তৌখি।
শ্রী মোদীনা হায়খি মদুদি ওপোজিসন অমসুং মখোয়গী মরী লৈনবশিংনা বিহারগী মীয়াম্বু ভোৎ বেঙ্ক অমা ওইনা খল্লি। মহাক্না হায়খি মদুদি মখোয়না লায়রবশিংগী নুংঙাইবা অমসুং অৱাবা, মখোয়গী ইকাই খুম্নবগী মতাংদা করিসু খল্লমদে। প্রধান মন্ত্রীনা নিংশিংখি মদুদি পার্তী অমগী হান্নগী মুখ্য মন্ত্রী অমনা বিহারদগী লাকপা মীওইশিং মহাক্কী রাজ্যদা চঙহল্লোই হায়না ফোংদোকখি। অসিগুম্বা লুচিংবশিংনা বিহারগী মীয়াম্বু নুংশিদবা অমসুং য়েংনীংদবগী মরমদা অকনবা ৱাফম থম্লদুনা, শ্রী মোদীনা হায়খি মদুদি অসিগুম্বা ফত্তবশিং অসি উবা ফংলবসু, ওপোজিসন পার্তীগী লুচিংবশিংনা তুমিন্না লৈখি।
প্রধান মন্ত্রী শ্রী নরেন্দ্র মোদীনা হায়খি মদুদি বিহারগী হৌজিক লৈরিবা সরকার অসিনা ওপোজিসনগী এল্লাইয়ন্সশিংগী দিভিসিব কেম্পেন অদু রেস্পোন্স তৌরি। বিহারগী মচানুপা অমসুং মচানুপীশিংনা রাজ্য অসিগী মনুংদা থবক ফংহন্নবা হোৎনরি হায়না মহাক্না অকনবা ৱাফম থমখি। বিহার শিনবা থুংনা হৌজিক মরু ওইবা প্রোজেক্তশিং শেমগৎলক্লি হায়না পল্লদুনা শ্রী মোদীনা হায়খি মদুদি বিহারগী খ্বাইদগী চাউবা ইন্দস্ত্রীএল এরিয়া অসি গায়াজী দিস্ত্রিক্তকী দোভিদা শেমগৎলি অমসুং গায়াজীদা তেক্নোলোজী সেন্তর অমসু শেমগৎলি। ঙসি বক্সর থর্মেল পাৱর প্লান্ত শঙ্গাখিবা অদুগী মতাংদসু মহাক্না পনখি। থা খরনিগী মমাংদা মহাক্না ঔরঙ্গবাদতা নবিনগর সুপর থর্মেল পাৱর প্রোজেক্তকী উরেপ উয়ুং তমখিবা অদু নীংশিংলদুনা শ্রী মোদীনা হায়খি মদুদি অনৌবা থর্মেল পাৱর প্লান্ত অমা ভাগলপুরগী পীরপান্তিদা শাগনি। মহাক্না মখা তাখি মদুদি হায়রিবা পাৱর প্লান্তশিং অসিনা বিহারদা ইলেক্ত্রিসিতী সপ্লাই য়াম্না হেনগৎহনগনি। মৈ পুথোকপগী চাং হেনগৎলকপনা ইমুংশিংদা মৈ ফংহনবগী চাং হেনগৎহল্লি অমসুং ইন্দস্ত্রীশিংদা মৈ ফংহনবগী চাং হেনগৎহল্লি হায়না পল্লদুনা শ্রী মোদীনা হায়খি মদুদি ইনর্জী ইনফ্রাস্ত্রকচর পাকথোক চাউথোকহনবনা অনৌবা থবক ফংহন্নবা খুদোংচাবসু পীগনি।
মুখ্য মন্ত্রী শ্রী নিতিশ কুমারনা বিহারগী নহারোলশিংদা লেপ্পা লৈতনা সরকারগী থবক পীনবা অচৌবা কেম্পেন অমা হৌদোকখ্রে হায়না পল্লদুনা শ্রী মোদীনা হায়খি মদুদি শ্রী নিতিশ কুমারগী লুচিংবনা মরম ওইদুনা রাজ্য অসিদা ওজাশিং লৌবগী থবক মপুং ফানা ত্রান্সপরেন্সীগা লোয়ননা পাংথোক্লি। মহাক্না অকনবা ৱাফম থমখি মদুদি বিহারদা লৈরিবা নহারোল মশিং য়াম্বনা থবক ফংনবগীদমক্তা রাজ্য অসিগী মনুংদা থবক ফংহন্নবা হোৎনরি। কেন্দ্র সরকারনা লৌখৎলিবা অনৌবা খোংথাং অসিনা মসিগী পান্দম অসিদা য়াম্না মতেং পাংগনি হায়না পল্লদুনা, প্রধান মন্ত্রীনা হায়খি মদুদি মহাক্কী নীংতম্বা নুমিৎকী ৱারোলদা প্রধান মন্ত্রী বিক্সিত ভারত রোজগার য়োজনাগী মতাংদা ফোংদোকখি। স্কিম অসিগী মখাদা, নহাশিংনা প্রাইবেৎ সেক্তরদা মখোয়গী অহানবা থবক পায়বা মতমদা, কেন্দ্র সরকারনা মখোয়দা হকথেংননা লুপা ১৫,০০০ পীগনি। মহাক্না মখা তাখি মদুদি নহাশিংদা থবক পীরিবা প্রাইবেৎ কম্পনীশিংদসু শেলগী তেংবাং ফংলগনি। স্কিম অসিনা বিহারগী নহারোলশিংদা চাউনা কান্নবা ফংহল্লগনি হায়না প্রধান মন্ত্রীনা ফোংদোকখি।
পব্লিক মনী অসি মমল লৈনা খন্দে হায়না ওপোজিসন পার্তীশিং অমসুং মখোয়গী সরকারশিংবু মরাল শিদুনা শ্রী মোদীনা হায়খি মদুদি মখোয়গীদমক্তদি মীয়ামগী শেল অসি মখোয় মশাগী শেন্দোং মরাং কায়না থম্নবগী পাম্বৈ অমনি। মহাক্না হায়খি মদুদি ওপোজিসনগী লৈঙাক্কী মখাদা, প্রোজেক্তশিং অসি চহি কয়া লোইশিন্দনা লৈখি। স্কিম অমা মতম শাংনা লেপ্লিবমখৈ, মখোয়না মসিদগী হেন্না শেল তানখি। প্রধান মন্ত্রীনা হায়খি মদুদি অশোয়বা ৱাখল্লোন অসি হৌজিক মহাক্কী সরকারনা হোংদোক্লে। মহাক্না হায়খি মদুদি য়ুম্ফম থোনখ্রবা মতুংদা, থবক অদু অথুবা মতমদা লোইশিন্নবা হোৎনরি। ঙসিগী থৌরম অসি মসিগী থৌওং অসিগী খুদম অমনি হায়না পল্লদুনা শ্রী মোদীনা মহাক্না আউন্তা সিমরিয়া সেক্সনগীদমক উরেপ উয়ুং তমখিবা অদু নীংশিংখি। মহাক্না হায়খি মদুদি থোং অসিনা লম্বীশিং শম্নহনবতা নত্তনা অৱাং অমসুং খা বিহারবু শম্নহনগনি। মহাক্না হায়খি মদুদি হান্ননা গান্ধী সেতুগী থোংদা কিলোমিতর ১৫০গী লম্বী চৎপা মথৌ তাবা হেভী ভেহিকলশিংদি হৌজিক্তি হকথেংননা চৎপা ঙম্লগনি। প্রধান মন্ত্রীনা হায়খি মদুদি মসিনা ললোন-ইতিকপু খুমাং চাউশিলহল্লগনি, ইন্দস্ত্রীশিংবু মপাঙ্গল কনখৎহল্লগনি অমসুং তীর্থ য়াত্রাগীদমক্তা চৎথোক-চৎশিন তৌবদা লাইথোকহল্লগনি। মহাক্কী সরকারগী মখাদা পায়খৎলিবা চাউখৎ-থৌরাংগী প্রোজেক্তশিং অসি মপুং ফাহনগনি হায়না মহাক্না ফোংদোকখি।
প্রধান মন্ত্রীনা হায়খি মদুদি কেন্দ্র অমসুং রাজ্য সরকারনা বিহারদা রেলৱেজ চাউখৎহন্নবা খোঙজেল য়াংনা হোৎনরি। অমৃত ভারত স্তেসন স্কিমগী মখাদা গায়াজী রেলৱে স্তেসন অসি অয়াবা ফংহন্নবা মোদর্নাইজ তৌরি হায়না মহাক্না ফোংদোকখি। শ্রী মোদীনা হায়খি মদুদি গায়া অসি হৌজিক রাজধানি, জন শাতাবদি অমসুং মেদ-ইন-ইন্দিয়া ভন্দে ভারত ত্রেনগী খুদোংচাবা লৈবা শহর অমা ওইরে। মহাক্না হায়খি মদুদি গায়া জীদগী সাসরাম, প্রয়াগরাজ অমসুং কানপুরগী খুত্থাংদা দিল্লীগা হকথেংননা রেলগী কনেক্তিবিতী অসিনা বিহারগী নহাশিং অমসুং ওন্তপ্রিন্যুওরশিংগীদমক অনৌবা খুদোংচাবা কয়া অমা পীরি।
মখোয়গী য়াইফ-মঙ্গোল অমসুং লৈবাক অসিগী থাজবা অদুগীদমক থাগৎপা ফোংদোক্লদুনা শ্রী মোদীনা হায়খি মদুদি চহি কয়া অসিদা মহাক্কী সরকারদা করপ্সনগী মরাল অমত্তা লৈতে। মসিগী ওন্ন-তৈনবদা, মহাক্না হায়খি মদুদি নীংতম্লবা মতুং দিকেদ তরুকদগী তরুক মখায় ফাওবা লৈঙাক পায়খিবা ওপোজিসনগী সরকারশিংদা করপ্সনগী কেসশিংগী অশাংবা লিস্ত অমা লৈরি। বিহারগী অঙাং খুদিংমক্না ওপোজিসন পার্তীশিংনা তৌরিবা করপ্সন অদু খঙই। প্রধান মন্ত্রীনা ময়েক শেংনা ফোংদোকখি মদুদি করপ্সনগী মায়োক্তা লান্থেং অসি ৱারোইশিন পুরক্নবা, কনাগুম্বা অমত্তনা থবক পায়খৎপগী লমদমদগী লাপ্না লৈরোইদবনি। হৌজিক চৎনরিবা আইনগী মতুং ইন্না জুনিয়র গবর্নমেন্ত ইমপ্লোয়ী অমা ফাওবা পুং ৪৮গী ওইনা কস্তদিদা থম্লবদি মহাকপু মশানা সস্পেন্দ তৌবা তাই হায়না মহাক্না পনখি। মহাক্না হংখি মদুদি করিগীদমক মুখ্য মন্ত্রী নৎত্রগা মন্ত্রী অমনা জেলদা লৈরিঙৈদা শক্তিগী খুদোংচাবা ফংবা ঙম্লিবনো। মহাক্না হন্দক থোকখিবা ফাইলশিংদা খুৎয়েক পীখিবা অমসুং জেলদগী হকথেংননা ওফিসিএল ওর্দরশিং থোকখিবা থৌদোকশিং পনখি। শ্রী মোদীনা হায়খি মদুদি রাজনিতীগী লুচিংবশিংগী ৱাখল্লোন অসি অসিগুম্বা ওইরবদি, করপ্সনগী মায়োক্তা লান্থেং অসি মতৌ করম্না ইফেক্তিব ওইনা চত্থবা ঙমগনি।
ভারতকী সংবিধান্না মীয়ামগী মীহুৎ খুদিংমক্তগী অচুম-অরান অমসুং ত্রান্সপরেন্সী পাম্মি হায়বা ৱাফম থম্লদুনা প্রধান মন্ত্রীনা হায়খি মদুদি সংবিধানগী মগুন অসি থুগাইবা য়াদে। মহাক্না মখোয়গী সরকারনা লৈবাক অসিগী প্রধান মন্ত্রী ফাওবা চৎনগদবা অকনবা এন্তি করপ্সন লো অমা পুরক্লগনি হায়না লাউথোকখি। প্রধান মন্ত্রীনা হায়খি মদুদি মুখ্য মন্ত্রী অমসুং মন্ত্রীশিংসু আইন অসিগী মখাদা লৈগনি। মসিগী মতাংদা মখা তানা শন্দোক্না তাক্লদুনা শ্রী মোদীনা হায়খি মদুদি আইন অসি চৎনরবা মতুংদা, প্রধান মন্ত্রী, মুখ্য মন্ত্রী, নৎত্রগা মিনিস্তর অমহেক্তবু ফাজিনবা মতমদা নুমিৎ ৩০গী মনুংদা বেল লৌবা মথৌ তাই। করিগুম্বা বেল পীদ্রবদি, মখোয়না নুমিৎ ৩১ শুবদা মখোয়গী পোজিসন অদু থাদোক্কদবনি। অসিগুম্বা অকনবা আইন অমা শেম্নবা সরকারনা হোৎনরি হায়না মহাক্না ফোংদোকখি।
মসিগী আইন অসি য়ানিংদবা ফোংদোকপগীদমক ওপোজিসন পার্তীশিংবু মরাল শিদুনা শ্রী মোদীনা হায়খি মদুদি মখোয়গী অকিবা অসি মখোয়না তৌখিবা থবকশিং অদু অতোপ্পশিংদগী লোৎশিনবা য়াই, অদুবু মখোয় মশামক্না মখোয়গী থবকশিং অদু খঙই। মহাক্না হায়খি মদুদি ওপোজিসন পার্তীশিংগী লুচিংবা খরদি বেলদা থাদোকখ্রে, অদুগা অতোপ্পশিংদি স্কেমগা মরী লৈনবা লিগেল প্রোসীদিংশিং চত্থরি অমসুং মীওইশিং অসিনা করিগুম্বা মখোয়বু জেলদা চংলবদি মখোয়গী রাজনিতীগী মঙলানশিং অদু মাংলগনি হায়না থাজৈ। মহাক্না হায়খি মদুদি মসিনা মরম ওইদুনা মখোয়না প্রপোজ তৌরিবা আইন অসিগী মায়োক্তা লৈরিবনি। প্রধান মন্ত্রীনা হায়খি মদুদি রাজেন্দ্র বাবু অমসুং দোক্তর বাবাসাহেব অম্বেকরগুম্বা লুচিংবশিং অসিনা কৈশুমশঙদা লৈরবসু শক্তি পামজবা মীওইশিংনা করপ্সন তৌগনি অমসুং ওফিস পাইদুনা লৈগনি হায়না খল্লমদে। অনৌবা আইন অসিগী মখাদা, করপ্সন তৌবা মীওইশিং অসি জেলদা থম্বতা নত্তনা মখোয়গী পোজিসনশিংসু লৌথোক্লগনি হায়না মহাক্না ফোংদোকখি। প্রধান মন্ত্রীনা হায়খি, "ভারতপু করপ্সনদগী মনীং তমহন্নবা ৱারেপ অসি লৈবাক অসিগী নাগরিক করোর কয়াগী অপুনবা ৱাশক অমনি। ৱারেপ অসি মপুং ফাহনগনি।"
বিহারদসু ইথিল পীরিবা লাল কিলাদগী য়াম্না মরু ওইবা ৱাফম থমখিবা অদু পল্লদুনা শ্রী মোদীনা হায়খি মদুদি লৈবাক অসিদা খুদোংথিবা থোকহল্লিবা ইনফিলত্রেতরশিংগী মশিং হেনগৎলকপা অসি নুংনাংনীংঙাই ওইবা ৱাফম অমনি। বিহারগী ঙমখৈগী দিস্ত্রিক্তশিংগী দেমোগ্রাফিক প্রোফাইল অসি য়াম্না থুনা হোংলক্লি হায়না মহাক্না ফোংদোকখি অমসুং মখোয়গী সরকারনা লৈবাক অসিগী তুংলমচৎকী ৱারেপ ইনফিলত্রেতরশিংনা লৌবা য়াহল্লোই হায়না ৱাশকখি। প্রধান মন্ত্রীনা অকনবা ৱাফম থমখি মদুদি বিহারগী নহারোলশিংগী থবক্কী খুদোংচাবশিং ইনফিলত্রেতরশিংনা লৌথোকপা য়ারোই। মহাক্না অকনবা ৱাফম থমখি মদুদি ভারতকী নাগরিকশিংগীদমক শেম্লবা ফেসিলিতীশিং অসি ইনফিলিতরশিংনা লুৎ তৌবা য়ারোই। মসিগী খুদোংচাদবশিং অসি থেংন্ননবা, প্রধান মন্ত্রীনা য়াম্না থুনা থবক হৌগদবা দেমোগ্রাফি মিসন অমা হৌদোক্লগনি হায়না লাউথোকখি। মহাক্না হায়খি মদুদি ইনফিলিত্রেতর খুদিংমক লৈবাক অসিদগী তান্থোক্কনি। মহাক্না বিহারগী মীয়ামদা লৈবাক অসিগী মনুংদা ইনফিলত্রেতরশিংবু মতেং পাংলিবা মীওইশিংগী মায়োক্তা চেকশিন্না লৈনবা তকশিনখি। শ্রী মোদীনা বিহারীশিংগী হকশিং লৌথোক্নবা অমসুং মখোয়বু ইনফিলিত্রেতরশিংদা পীনবা হোৎনরিবা ওপোজিসন পার্তীশিংবু অকনবা মওংদা য়ানীংদবা ফোংদোকখি। মহাক্না হায়খি মদুদি পুকচেল শেংদবা অমসুং ভোৎ বেঙ্ক পোলিসীগীদমক্তা, পার্তীশিং অসিনা করিগুম্বা খরা তৌনবগীদমক শেম-শারি। প্রধান মন্ত্রীনা বিহারগী মীয়ামদা য়াম্না চেকশিন্না লৈনবা হায়খি।
বিহারবু ওপোজিসন পার্তীশিংগী ফত্তবা ৱাখল্লোনশিংদগী ঙাকথোক্কদবনি হায়না পল্লদুনা শ্রী মোদীনা হায়খি মদুদি বিহারগী ওইনা মসি য়াম্না মরু ওইবা মতম অমনি। বিহারগী নহারোলশিংগী মঙলানশিং অদু মপুং ফাহনগনি হায়না মহাক্না থাজবা থমখি। বিহারগী মীয়ামগী অপাম্বশিং অদুদা অনৌবা শাফু পীগদবনি হায়না মহাক্না মখা তাখি। মসিগীদমক কেন্দ্র সরকারনা শ্রী নিতিশ কুমারগা খুৎশম্নদুনা থবক তৌমিন্নরি, বিহারগী চাউখৎ-থৌরাংগী খোংজেল অসি লেপ্তনা চৎথনবা কেন্দ্র অমসুং রাজ্য সরকারনা কন্না হোৎনরি হায়না পল্লদুনা মহাক্না হায়খি। ঙসিগী চাউখৎ-থৌরাংগী প্রোজেক্তশিং অসি মাইকৈ অসিদা মরুওইবা খোংথাং অমনি হায়না পল্লদুনা প্রধান মন্ত্রীনা লোইশিনখি।
থৌরম অদুদা বিহারগী গভর্নর শ্রী আরিফ মোহমদ খান, বিহারগী মুখ্য মন্ত্রী শ্রী নিতিশ কুমার, কেন্দ্রগী মন্ত্রীশিং শ্রী রাজীব রঞ্জন সিংহ, শ্রী জিতেন রাম মঞ্জি, শ্রী গিরিরাজ সিংহ, শ্রী চিরাগ পাসৱান, শ্রী নিত্যানন্দ রাই, শ্রী রাম নাথ থাকুর, দা. রাজ ভুশন চৌধরী, শ্রী সতীশ চন্দ্র দুবে অমসুং অতৈ মকোক থোংবা মীওইশিংসু শরুক য়াখি।
বেকগ্রাউন্দ
লম্বী থোংগী ফীভম ফগৎহন্নবা মহাক্কী ৱাশক মতুং ইন্না, প্রধান মন্ত্রীনা লুপা করোর ১,৮৭০ হেন্না চঙনা শেমগৎ শাগৎখিবা গঙ্গা তুরেল মথক্তা শাবা কিমি ১.৮৬ শাংবা লেন তরুক্কী থোং য়াওনা NH-৩১দা শাখিবা কিমি ৮.১৫ শাংবা ওন্তা – সিমারিয়া থোংগী প্রোজেক্ত শঙ্গাগনি। মসিনা পত্নাগী মোকমা অমসুং বেগুসরাইবু হকথেংননা শম্নহনগনি।
থোং অসি ফীভম ফত্তনা লৈরিবা পোৎলুম পুবা গারীশিং লম্বী থৈদুনা চৎহল্লিবা অরিবা লেন ২ গী রেল-কম-রোদ থোং “রাজেন্দ্র সেতু” গা খমব্রাংননা শাগৎপনি। অনৌবা থোং অসিনা অৱাং বিহার (বেগুসরাই, সুপোল, মধুবানি, পুর্নিয়া, অরারিয়নচিংবা) অমদি খা বিহারগী মফমশিং (সৈখপুরা, নৱাদা, লখিসরাইনচিংবা) অনিগী মরক্তা পোৎলুম পুবা গারীশিংনা কিমি ১০০ রোম কোইদুনা চৎলম্বা অদু হন্থহল্লগনি। অসুম্না লম্বী কোইদুনা চৎলম্বা অদুনা মরম ওইরগা লমদম অদোমগী অতৈ মফমশিংদা লম্বী চিল্লম্বা অদুসু হন্থহন্বদা মতেং ওইরগনি।
মসিনা মনাক নকপা মফমশিংদা, মরুওইনা মথৌ তাবা রো মেতরিএলশিং লৌননবা খা বিহার অমদি ঝার্খন্দদা তাংদুনা লৈরম্বা অৱাং বিহারগী মফমশিংদা শেন্মিৎলোন চাওখৎহনবদা মতেং ওইরগনি। মসিনা মমিং লৈরবা লৈখিদ্রবা ৱাকম শ্রী রামধারী সিংহ দিনকরগী পোক্নফম লমদমসু ওইরিবা সিমারিয়া ধামগী মমিং লৈরবা লাই খুরুম্ফমদসু হেন্না ফবা কন্নেক্তিবিতী ফংহল্লগনি।
প্রধান মন্ত্রীনা লুপা করোর ১,৯০০ রোম চঙনা শেমগৎখিবা NH-৩১গী লেন মরিগী বখতিয়ারপুরদগী মোকমা সেক্সনসু শঙ্গাগনি, মসিনা লম্বী চিনবা হন্থহল্লগনি, খোঙচৎকী মতম তেনশিনহল্লগনি, অমদি পেসেঞ্জর অমদি পোৎ পুথোক পুশিন্দা নুংঙাইহল্লগনি। মখা তানা, বিহারগী NH-১২০গী বিক্রমগঞ্জ-দৱথ-নৱানগর-দুমরাও সেক্সন লেন অনিদা পেব সোল্দরগা লোয়ননা শেমগৎলিবা অসিনা খুঙ্গংগী লমদমদা লম্বী থোং ফগৎহনবগা লোয়ননা লমদমদুগী মীয়ামদা অনৌবা শেন্মিৎলোনগী খুদোংচাবা কয়া ফংহনগনি।
বিহারগী পৱার সেক্তর মপাঙ্গল কনখৎহন্দুনা, প্রধান মন্ত্রীনা লুপা করোর ৬,৮৮০ রোম চঙনা শেমগৎপা বুক্সার থর্মেল পৱার প্লান্ত (৬৬০x১ MW) শঙ্গাখ্রে। মসিনা মৈ পুথোকপগী চাং নীংথিনা হেনগৎহল্লগনি, ইনর্জী সিক্যুরিতী হেনগৎহনগনি, অমদি লমদম অদুগী হেনগৎলক্লিবা ইনর্জীগী দিমান্দ ফংহনগনি।
হকশেলগী ইনফ্রাস্ত্রকচরদা অচৌবা ইনোৎ অমা পীবা ওইনা, প্রধান মন্ত্রীনা মুজফ্ফরপুরদা হোমি ভাভা কেন্সর হোস্পিতাল এন্দ রিছর্চ সেন্তর শঙ্গাখ্রে। সেন্তর অসিদা এদভান্স ওনকোলোজী OPD, IPD ৱার্দ্স, ওপরেসন থিএতর, মোদর্ন লেব, ব্লদ বেঙ্ক, অমদি ফমুং ২৪ লৈবা ICU (ইন্তেন্সিব কেয়র য়ুনিৎ) অমদি HDU (হায় দিপেন্দেন্সী য়ুনিৎ) য়াওরি। স্তেত-ওফ-দি-আর্ত ফেসিলিতী অসিনা বিহার অমদি য়ুমলোন্নবা স্তেতশিংগী অনাবা মীওইশিংদা খুমাঙ চাওশিল্লবা অমদি অতাবা মমলদা কেন্সর লায়েং ফংহন্দুনা অরাপ্পা মেত্রোশিংদা লায়েংনবা চৎপগী মথৌ তাবা হন্থহল্লগনি।
স্বছ্চ ভারতকী মঙলান মখা তানা পাকথোক চাউথোকহল্লদুনা অমদি গঙ্গা তুরেলগী অভিরল অমদি নির্মল ধারা লু নান্না থম্ননবা, প্রধান মন্ত্রীনা লুপা করোর ৫২০ হেন্না চঙনা নমামি গঙ্গেগী মখাদা মুঙ্গেরদা শাগৎখিবা সিৱরেজ ত্রীতমেন্ত প্লান্ত (STP) অমদি সিৱরেজ নেতৱর্ক শঙ্গাখ্রে। মসিনা গঙ্গাদা মোৎশিলহনবগী চাং হন্থহন্দুনা লমদম অদুদা সেনিতেসন ফেসিলিতীগী ফীভম ফগৎহল্লগনি।
প্রধান মন্ত্রীনা লুপা করোর ১,২৬০ রোমগী ওইগদবা অর্বান ইনফ্রাস্ত্রকচর প্রোজেক্ত কয়াগী উরেপ উয়ুংসু তমখ্রে। মসিদা দৌরনগর, ঔরঙ্গবাদ, অমদি জেহানাবাদতা STP অমদি সিৱরেজ নেতৱর্ক; লখিসরাইগী বরাহিয়া, অমদি জমুইদা STP অমদি ইন্তরসেপ্সন অমসুং দাইভর্জনগী থবকশিং য়াওরি। AMRUT ২.০ গী মখাদা, মহাক্না ঔরঙ্গবাদ, বোধগায়া, অমদি জেহানাবাদতা ৱাতর সপ্লাই প্রোজেক্তশিংগী উরেপ উয়ুং তমখ্রে। প্রোজেক্তশিং অসিনা অরুবা থক্নবা ঈশিং, মতমগা চুনবা সিৱরেজ সিস্তেম, অমদি ফীভম ফগৎলবা সেনিতেসন ফংহন্দুনা লমদম অদুদা হেল্থ স্তেন্দর্দ অমদি ক্বালিতী ওফ লাইফ হেনগৎহনগনি।
লমদম অদুগী রেল কন্নেক্তিবিতীদা ইনোৎ হাপ্তুনা, প্রধান মন্ত্রীনা ত্রেন অনি লমথাখ্রে। গায়া অমদি দিল্লীগী মরক্তা চেনগদৌরিবা অমৃত ভারত এক্সপ্রেসনা মোদর্ন ফেসিলিতী, কমফোর্ত অমদি সেফ্তীগা লোয়ননা পেসেঞ্জরদা নুংঙাইবা হেনগৎহনগনি। অদুগা বাইসলি অমদি কোদর্মাগী মরক্তা চেনগদবা বুদ্ধিস্ত সর্কিত ত্রেন্না লমদম অসিগী মরুওইবা বুদ্ধিস্ত মফমশিং থুংনা তুরিজম অমদি লাইনিংগী খোঙচত্তা অচৌবা ইনোৎ অমা হাপ্লগনি।
PMAY-গ্রামিনগী মখাদা খুঙ্গংগী বেনিফিসরী ১২,০০০ অমদি PMAY-অর্বানগী মখাদা বেনিফিসরী ৪,২৬০ গী য়ুম শঙ্গাবগী থৌরমসু প্রধান মন্ত্রীনা বেনিফিসরী খরদা শো খুৎশিন্নদুনা পাঙথোক্তুনা ইমুং লিশিং কয়াদা য়ুম অমা ফংজবগী মঙলান মঙফাওনহনগনি।
***
(Release ID: 2159977)
Visitor Counter : 6
Read this release in:
English
,
Urdu
,
Marathi
,
हिन्दी
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam