ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଘରୋଇ ଏଲପିଜି ବିକ୍ରୟରେ ହୋଇଥିବା କ୍ଷତି ପାଇଁ ତିନୋଟି ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀ (ଆଇଓସିଏଲ, ବିପିସିଏଲ ଏବଂ ଏଚପିସିଏଲ)କୁ ୩୦ ହଜାର କୋଟି ଟଙ୍କାର କ୍ଷତିପୂରଣ ମଞ୍ଜୁର କରିଛନ୍ତି। ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଏହି କ୍ଷତିପୂରଣ ଅର୍ଥରାଶିକୁ ତୈଳ ବିପଣନ କମ୍ପାନୀଗୁଡ଼ିକ ମଧ୍ୟରେ ବିତରଣ କରିବ । କ୍ଷତିପୂରଣ ବାରଟି ପର୍ଯ୍ୟାୟରେ ପ୍ରଦାନ କରାଯିବ।

ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀ ଆଇଓସିଏଲ, ବିପିସିଏଲ ଏବଂ ଏଚପିସିଏଲ ନିୟନ୍ତ୍ରିତ ମୂଲ୍ୟରେ ଉପଭୋକ୍ତାମାନଙ୍କୁ ଘରୋଇ ଏଲପିଜି ସିଲିଣ୍ଡର ଯୋଗାଇ ଦିଅନ୍ତି।

୨୦୨୪-୨୫ରେ ଏଲପିଜିର ଅନ୍ତର୍ଜାତୀୟ ମୂଲ୍ୟ ଉଚ୍ଚ ସ୍ତରରେ ରହିଥିଲା ଏବଂ ବର୍ତ୍ତମାନ ମଧ୍ୟ ଏହା ଉଚ୍ଚ ରହିଛି। ତଥାପି, ଅନ୍ତର୍ଜାତୀୟ ଏଲପିଜି ମୂଲ୍ୟରେ ଅସ୍ଥିରତାରୁ ଉପଭୋକ୍ତାମାନଙ୍କୁ ରକ୍ଷା କରିବା ପାଇଁ ମୂଲ୍ୟ ବୃଦ୍ଧିର ପ୍ରଭାବ ଘରୋଇ ଏଲପିଜିର ଉପଭୋକ୍ତାଙ୍କ ଉପରେ ପଡ଼ିବାକୁ ଦିଆଯାଇନଥିଲା। ଫଳରେ ତିନୋଟି ଓଏମସି ପାଇଁ ଯଥେଷ୍ଟ କ୍ଷତି ହୋଇଥିଲା। କ୍ଷତି ସତ୍ତ୍ୱେ, ସରକାରୀ କ୍ଷେତ୍ରର ତୈଳ ବିପଣନ କମ୍ପାନୀଗୁଡ଼ିକ ଦେଶରେ ସୁଲଭ ମୂଲ୍ୟରେ ଘରୋଇ ଏଲପିଜିର ନିରନ୍ତର ଯୋଗାଣ ସୁନିଶ୍ଚିତ କରିଛନ୍ତି।

ଏହି କ୍ଷତିପୂରଣ ଦ୍ୱାରା ଓଏମସିଗୁଡ଼ିକ ଅଶୋଧିତ ଗ୍ୟାସ ଏବଂ ଏଲପିଜି କ୍ରୟ, ଋଣ ପରିଶୋଧ ଏବଂ ସେମାନଙ୍କର ପୁଞ୍ଜି ଖର୍ଚ୍ଚ ବଜାୟ ରଖିବା ଭଳି ଗୁରୁତ୍ୱପୂର୍ଣ୍ଣ ଆବଶ୍ୟକତା ପୂରଣ କରିପାରିବେ, ଯାହାଦ୍ୱାରା ଦେଶବ୍ୟାପୀ ପରିବାରଗୁଡ଼ିକୁ ଏଲପିଜି ସିଲିଣ୍ଡରର ନିରନ୍ତର ଯୋଗାଣ ସୁନିଶ୍ଚିତ ହେବ।

ଏହି ପଦକ୍ଷେପ ଏହି ତୈଳ ବିପଣନ କମ୍ପାନୀଗୁଡ଼ିକର ଆର୍ଥିକ ଦୃଢ଼ତା ବଜାୟ ରଖିବା ସହିତ ବିଶ୍ୱ ଇନ୍ଧନ ବଜାରରେ ଅସ୍ଥିରତାରୁ ଉପଭୋକ୍ତାମାନଙ୍କୁ ସୁରକ୍ଷା ଦେବା ପାଇଁ ସରକାରଙ୍କ ପ୍ରତିବଦ୍ଧତାକୁ ମଧ୍ୟ ରେଖାଙ୍କିତ କରେ। ଏହା ମଧ୍ୟ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ପରି ପ୍ରମୁଖ ଯୋଜନା ଅଧୀନରେ ଥିବା ସମସ୍ତ ଘରୋଇ ଏଲପିଜି ଗ୍ରାହକଙ୍କ ପାଇଁ ସ୍ୱଚ୍ଛ ରୋଷେଇ ଇନ୍ଧନର ବ୍ୟାପକ ଉପଲବ୍ଧତା ସୁନିଶ୍ଚିତ କରିବାର ଉଦ୍ଦେଶ୍ୟକୁ ମଧ୍ୟ ପୁନର୍ବାର ପ୍ରମାଣିତ କରେ।

*******

P.S