പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗം, ആഭ്യന്തര എൽപിജി വിൽപ്പനയിൽ ഉണ്ടായ നഷ്ടപരിഹാരത്തിന് മൂന്ന് പൊതുമേഖലാ എണ്ണ വിപണന കമ്പനികൾക്ക് (ഐഒസിഎൽ, ബിപിസിഎൽ, എച്ച്പിസിഎൽ) 30,000 കോടി രൂപയുടെ നഷ്ടപരിഹാരം അംഗീകരിച്ചു. ഒഎംസികൾക്കുള്ളിൽ നഷ്ടപരിഹാര വിതരണം പെട്രോളിയം, പ്രകൃതിവാതക മന്ത്രാലയം നടത്തും. നഷ്ടപരിഹാരം പന്ത്രണ്ട് തവണകളായി നൽകും.

പൊതുമേഖലാ എണ്ണ വിപണന കമ്പനികളായ ഐ‌ഒ‌സി‌എൽ, ബി‌പി‌സി‌എൽ, എച്ച്‌പി‌സി‌എൽ എന്നിവയാണ് ഗാർഹിക എൽ‌പി‌ജി സിലിണ്ടറുകൾ ഉപഭോക്താക്കൾക്ക് നിയന്ത്രിത വിലയ്ക്ക് വിതരണം ചെയ്യുന്നത്.

2024-25 കാലയളവിൽ അന്താരാഷ്ട്ര എൽപിജി വില ഉയർന്ന നിലയിലാവുകയും, ഇപ്പോഴും ഉയർന്ന നിലയിൽ തുടരുകയും ചെയ്യുന്നു. എന്നിരുന്നാലും, അന്താരാഷ്ട്ര എൽപിജി വിലയിലെ ഏറ്റക്കുറച്ചിലുകളിൽ നിന്ന് ഉപഭോക്താക്കളെ സംരക്ഷിക്കുന്നതിനായി, വില വർദ്ധനവ് ആഭ്യന്തര എൽപിജിയുടെ ഉപഭോക്താക്കളിലേക്ക് കൈമാറിയില്ല, ഇത് മൂന്ന് ഒഎംസികളേയും ഗണ്യമായ നഷ്ടത്തിലേക്ക് നയിച്ചു. നഷ്ടങ്ങൾ ഉണ്ടായിരുന്നിട്ടും, പൊതുമേഖലാ എണ്ണ വിപണന കമ്പനികൾ രാജ്യത്ത് താങ്ങാനാവുന്ന വിലയിൽ ആഭ്യന്തര എൽപിജിയുടെ തുടർച്ചയായ വിതരണം ഉറപ്പാക്കിയിട്ടുണ്ട്.

ഈ നഷ്ടപരിഹാരം ഒ‌എം‌സികൾക്ക് അസംസ്കൃത എണ്ണ, എൽ‌പി‌ജി സംഭരണം, കടം വീട്ടൽ, മൂലധന ചെലവ് നിലനിർത്തൽ തുടങ്ങിയ നിർണായക ആവശ്യങ്ങൾ നിറവേറ്റുന്നത് തുടരാൻ അനുവദിക്കും, അതുവഴി രാജ്യത്തുടനീളമുള്ള വീടുകളിലേക്ക് എൽ‌പി‌ജി സിലിണ്ടറുകളുടെ തടസ്സമില്ലാത്ത വിതരണം ഉറപ്പാക്കും.

ആഗോള ഊർജ്ജ വിപണികളിലെ ചാഞ്ചാട്ടങ്ങളിൽ നിന്ന് ഉപഭോക്താക്കളെ സംരക്ഷിക്കുന്നതിനൊപ്പം ഈ പൊതുമേഖലാ ഒ‌എം‌സികളുടെ സാമ്പത്തിക സുസ്ഥിതി നിലനിർത്താനുമുള്ള ഗവൺമെൻ്റിൻ്റെ പ്രതിബദ്ധത ഈ നടപടി അടിവരയിടുന്നു. പിഎം ഉജ്ജ്വല യോജന പോലുള്ള മുൻനിര പദ്ധതികൾക്ക് കീഴിലുള്ളവർ ഉൾപ്പെടെ, ഗാർഹിക എൽ‌പി‌ജിയുടെ എല്ലാ ഉപഭോക്താക്കൾക്കും ശുദ്ധമായ പാചക ഇന്ധനത്തിന്റെ വ്യാപകമായ ലഭ്യത ഉറപ്പാക്കുക എന്ന ലക്ഷ്യത്തെയും ഇത് ശക്തിപ്പെടുത്തുന്നു.

***

NK