U Myntri Sorkar Pdeng ba dei khmih ia ka tnad kam pohiing uba dei ruh u myntri ka Tnad treilang u Amit Shah, u la pyniaid ia ka jingialang kaba ar jong ka Consultative Committee jong ka Tnad iatreilang halor ki jingthmu jong ka tnad ban pynkhlain ia ka kam iatreilang ha New Delhi mynta ka sngi. Ha kane ka jingialang la don lang ki myntri khynnah jong ka tnad kam iatreilang u Krishan Pal bad u Murlidhar Mohol, ki dkhot jong ka Committee, u Secretary ka tnad iatreilang, bad ki ophisar ba kham heh kyrdan jong ka tnad.

Haba ai jingkren ha kane ka jingialang, u Myntri kam pohiing jong ka sorkar pdeng uba dei ruh u Myntri ka tnad iatreilang u Amit Shah u la ong ba hapoh ka jingialam jong u Myntri Rangbah duh ka ri u Narendra Modi, ka tnad iatreilang ka kut jingmut ban pynkylla ia ki seng iatreilang sha ki jaka treikam kiba khlain bad kiba jop. U la ong ba ha ka thong ba heh jong ki ban thaw 2 lak tylli ki seng iatreilang ba trei bun jait ki kam ha ka ri ha ki 5 snem, la thaw haduh mynta haduh 35,395 tylli ki seng iatreilang kiba thymmai, kiba kynthup ia 6,182 tylli ki Multipurpose Primary Agricultural Credit Societies (MPACS), 27,562 tylli ki dei kiba trei ha ki kam dud bad 1,651 ki dei ki kynhun iatreilang kiba trei ha ki kam ri dohkha.

U Amit Shah u la ong ba ka tnad iatreilang ka lah ban plie lad ia ka roi ka par na ka bynta ki paidbah bym don jaka bad kiba duk. U la ong ba la thaw lai tylli ki national level cooperative society na ka bynta ka roi ka par jong ka kam iatreilang, ka rep ka riang bad ki nongrep. U la ïathuh ba ka National Cooperative Organic Limited (NCOL) ka pynthikna ïa ka jingai syrnot, ka jingpynrung kyrteng, ka jingsong bad ka jingpynïaid iew ïa ki mar rep jong ki nongrep khnang ba ki nongrep kin ïoh ïa ka dor kaba biang ïa ki mar rep jong ki. U la ong ba ka National Cooperative Export Limited (NCEL) ka pynbiang lut ia ki jingdonkam baroh kiba iadei bad ka jingshalan ia ki mar rep jong ki nongrep sha ki iew ki hat ha kylleng ka pyrthei, ha kaba ka jingmyntoi kaba pura ka leit sha ki nongrep. U Shah u la ong ba ka Bharatiya Beej Sahkari Samiti Limited (BBSSL) ka trei na ka bynta ban pynneh pynsah, ban buh bad ban pynmih ia ki symbai tynrai jong ka Ri India. U Myntri ka tnad iatreilang jong ka sorkar pdeng u la ong ba ka Sorkar jong u Modi kan iakut bad ki nongrep rit na ka bynta ki symbai tynrai khnang ba kin ioh ruh ia ka jingmyntoi na kane.

U Myntri ka tnad iatreilang jong ka sorkar pdeng u la kyrpad ia baroh ki dkhot jong ka consultative committee ban pynkhlain ia ka kam dud ha la ki jong ki jong ki jylla ban ai jingkyrshan ia ki seng iatreilang. U la ïathuh ba ka tnad iatreilang ka la shim palat 100 tylli ki sienjam ha kine ki saw snem ban pynkhlaiñ ïa ki Primary Agricultural Credit Societies (PACS), ki kam dud, ka kam ri dohkha, ki bank iatreilang, ki seng kiba trei ha ki kam kiba iadei bad ka shini bad ki rukom synshar. U la ong ba ka National Cooperative Policy-2025 ka ai ia ka rukom treikam kaba bniah na ka bynta ka roi ka par kaba neh ha ka ri. Kane ka rukom treikam ka kynthup ruh ia ka jingiatreilang bad ki skhim jong ka Sorkar India, kum ka Pradhan Mantri Matsya Sampada Yojana (PMMSY), National Dairy Development Program (NPDD) bad kiwei kiwei ban pynkhlain ia ka kam iatreilang ha ki jaka nongkyndong. U la ong ba la pyrshang ban kyntiew ia ka jingthied dud da 50% ha kine ki san snem ban wan hapoh ka White Revolution 2.0 ba la ialam da ki seng iatreilang.

Ha kane ka jingialang, ka tnad iatreilang ka la ai ia ka jingpynshai ha kane ka Committee halor ki sienjam bapher bapher kiba la shim ha kine ki saw snem ba la dep. La pyntip da ka tnad ba la buh ïa ki lad treikam kum ka Inter-Ministerial Committee (IMC), National Level Coordination Committee (NLCC), State Cooperative Development Committees (SCDC), bad District Cooperative Development Committees (DCDC) ban pyntreikam bad buddien bha ia ki kam. Palat 100 tylli ki sienjam la shim da ka tnad iatreilang ha kine ki saw snem ba la dep ban pynkhlain ia ki PACS, ki kam dud, ki kam ri dohkha, ki bank iatreilang, ki kynhun kiba trei ha ki kam kiba iadei bad ka shini bad ki rukom synshar kynthup ia ki jingpynkylla ha ka kam digital, ki jingkylla ha ka polisi, ka jingkyrshan pisa bad ka jingpynkhlain ia ka bor jong ki jaka treikam.

Ka tnad treilang ka la pyntip ba ïa ka Tribhuvan Sahkari University, kaba la seng lyngba ka aiñ jong ka Parliament la pynbna kum ka jaka pule kaba donkam bha ha ka ri. Kane ka skulbah kan pyniasoh bad pynbeit ryntih ia ka jinghikai ha ka kam iatreilang ha India bad kan ai ia ki briew kiba tbit na ka bynta ka kam iatreilang. Hapoh ka White Revolution 2.0 ba la ialam da ki seng iatreilang, la pyrshang ban kyntiew ia ka jingthied dud da 50% ha kine ki san snem ban wan. Haduh mynta la pynrung kyrteng thymmai haduh 15,691 tylli ki Dairy Cooperative Society bad la pynkhlain shuh shuh ia 11,871 tylli ki DCS kiba la don lypa. Ka National Dairy Development Board (NDDB) bad ki 25 tylli ki kynhun ba trei ha ka kam dud ha kylleng ki 15 tylli ki jylla ki la ia soi ia ki jingiakut ban buh ia ki karkhana pynmih dud ha ki seng iatreilang ha ka kam dud. Ki la bynrap ruh ba la seng ïa lai tylli ki Multi-State Cooperative Society kiba thymmai ha ki bynta jong ki mar rep, ki mar ban shalan shabar ri bad ki symbai, da ka jingthmu ban kyntiew ïa ka jingair jong ka kam, ka jingbha bad ka jingpynpaw kyrteng ia ka kam iatreilang.

Ka Consultative Committee ka la ai jingmut ban pynkhlain shuh shuh ia ka kam treilang. Ka Tnad ka la pynskhem biang ia ka jingkut jingmut jong ka ban pynkup bor ia ki seng iatreilang kum ki kor jong ka roi ka par, ka jingiaryngkat kyrdan bad ka jinglah ban shaniah halade ha ki jaka nongkyndong jong ka ri India.

*****