প্রধান মন্ত্রী শ্রী নরেন্দ্র মোদীনা ওগষ্ট ২ গী অয়ুক পুং ১১ রোম তাবদা উত্তর প্রদেসকী বারানাসীদা লুপা করোর ২২০০ রোমগী তোঙান তোঙানবা চাউখৎ থৌরাংগী প্রোজেকশিং উরেপ-উয়ুং তমগনি অমসুং শঙ্গাগনি। থৌরম অদুদা মহাক্না মীয়ামদসু ৱা ঙাংগনি।

সহরগী অওনবা পুরক্নবা, নাৎ অমুক হন্না হিঙ্গৎহন্নবা, লম্বী-থোং ফগৎহন্নবা অমসুং বারানসীদা পুন্সি মহিং ফগৎহন্নবা পান্দমদা প্রোজেকশিং অদুদা য়াওরিবা হিরমশিংগী মনুংদা ইনফ্রাষ্ট্রকচর, লাইরিক-লাইশু, অনা-লায়য়েং, তুরিজম, সহর শেমগৎপা, নাৎ অমসুং চৎনবীশিংনি য়াওরি।

বারানসীগী লম্বী-থোং ফগৎহন্নবা মহাক্না থাজবা পীখিবগী মতুংইন্না, প্রধান মন্ত্রীনা মরুওইবা ইনফ্রাষ্ট্রকচর প্রোজেকশিং শঙ্গাগনি অমসুং উরেপ-উয়ুং তমগনি। মহাক্না বারানসী-ভাদোহি লম্বী অমসুং ছিতৌনি-সুল তঙ্কেস্বর লম্বী পাকথোকপা অমসুং ফগৎহনবা অমসুং হারদাতপুরদা রেলৱে ওভরব্রিজ, লম্বী চিনবা ফনবা মোহান সারাই-অদালপুর লম্বী শঙ্গাগনি। মহাক্না দালমান্দি, লাহারতানা-কোতৱা, গঙ্গাপুর, বাবাতপুর য়াওনা লেভেল ক্রোসিং ২২সি অমসুং খাসিপুর য়ার্দতা রেলৱে ওভরব্রিজ য়াওনা তোঙান তোঙানবা খুঙ্গং অমসুং সহরগী লম্বী পাকথোকপা অমসুং ফগৎনবা উরেপ-উয়ুং তমগনি। 

লমদম অসিগী পৱার ইনফ্রাষ্ট্রকচর ফগৎহন্নবা, লুপা করোর ৮৮০ হেনবগী স্মার্দ দিষ্ট্রিব্যুসন প্রোজেক অমসুং হৌজিক পায়খৎলিবা ইলেক্ত্রিক্কী ইনফ্রাষ্ট্রকচরগী মখাদা প্রধান মন্ত্রীনা তোঙান তোঙানবা থবকশিংগী উরেপ-উয়ুং তমগনি।

তুরিজম চাউখৎহন্নবা, প্রধান মন্ত্রীনা রিভরফ্রন্ত কচ্ছা ঘাত ৮ অমুক হন্না শেমগৎপা, কলিকা থাম শেমগৎপা,, রঙ্গিলদাস কুতিয়া, সিবপুরদা পুখ্রি অমসুং ঘাত ফজহনবা অমসুং দুর্গাকুন্দগী ঈশিং শেংদোকপগী থবকশিং শঙ্গানগনি। প্রধান মন্ত্রীনা কারদামেশ্বর মহাদেব লাইশঙ অমুক শেমজিনবা; নিংতম লান্মী কয়াগী পোক্নফম কারখিয়াওন শেমগৎপা; সরনাথ, রিসি মন্দবী অমসুং রামনাগর জোনশিং সিতি ফেসিলিতি সেন্তরশিং; লামহিদা মুন্সি প্রেমচান্দগী মপা-মপুগী য়ুম অমুক হন্না শেমগৎপা অমসুং মসি ম্যুজিয়ম অমা ওইনা শেমগৎনবা থবকশিং উরেপ-উয়ুং তমগনি। কাঞ্জনপুরদা অর্বান মিয়াৱাকি ফোরেষ্ট অমা শেমগৎনবা অমসুং সহিৎ উরান অমসুং অতোপ্পা পার্ক ২১ অমুক হন্না শেমগৎনবা প্রধান মন্ত্রীনা উরেপ-উয়ুং তমগনি।

মসিগী মথক্ত, নাৎকী ওইনা মরুওইবা ঈশিং লৈবা মফমশিং য়োকখৎনবা পান্দমদা, রামকুন্দ, মন্দাকিনি সনকুলধারা অমসুং অতোপ্পশিং য়াওনা ঈশিং শেংদোক্নবা অমসুং শেমজিন শাজিন্নবা অমসুং অতাওবা পুজন প্লেতফোর্ম ৪ থম্নবা প্রধান মন্ত্রীনা উরেপ-উয়ুং তমগনি। খুঙ্গংগী মফমশিংদা অফবা থক্নবা ঈশিং ফংহন্নবা, জল জিবন মিসনগী মখাদা প্রধান মন্ত্রীনা খুঙ্গংগী থক্নবা ঈশিং পীনবা স্কিম ৪৭ শঙ্গাগনি। 

মীওই খুদিংমক্ত অফবা গুন লৈনবা লাইরিক-লাইশু তম্বা ফংহন্নবা মহাক্কী পান্দমগী শরুক অমা ওইনা, প্রধান মন্ত্রীনা ম্যুনিসিপাল ঙমখৈগী মনুংদা স্কুল বিল্দিং ৫৩ ফগৎহন্নবা থবক শঙ্গাগনি। মহাক্না অনৌবা দিস্ত্রিক লাইব্রেরি অমা শাবা য়াওনা অমসুং জাখিনি, লালপুরদা সরকারগী হায় স্কুলশিং অমুক হন্না শেমজিন্নবা থবকশিং উরেপ-উয়ুং তমগনি।

হকশেলগী ইনফ্রাষ্ট্রকচর ফগৎহন্নবা খোঙথাং অমা ওইনা, রোবোতিক সর্জরি অমসুং সি.তি স্কেনগী খুদোংচাবশিং য়াওনা অফবা মখলগী মেদিকেলগী খুৎলায়শিং মহামানা পন্দিৎ মদন মোহন মালবিয়া কেন্সর সেন্তর অমসুং হোম ভাভা কেন্সর হোস্পিতালদা শঙ্গাগনি। মহাক্না হোমিওপেথি কলেজ অমসুং হোস্পিতাল অমগী উরেপ-উয়ুং তমগনি। মখা তানা মহাক্না এনিমেল বার্থ কন্ত্রোল সেন্তর অমসুং দোগ কিয়ার সেন্তর অমা শঙ্গাগনি।

বারানসীদা মালেম থাক্কী শানবগী ইনফ্রাষ্ট্রকচর লৈহন্নবা মহাক্কী পান্দম ফগৎহল্লদুনা, প্রধান মন্ত্রীনা দোক্তর ভিমরাও অম্বেদকার স্পোর্তস ষ্টদিয়মদা সিন্থেতিক হোক্কি তর্ফ অমা শঙ্গাগনি। লো ঙাক্না চৎনবা থৌদাং লৌরিবা মীওইশিংদা খুদোংচাবশিং হেন্না ফংহন্নবা, প্রধান মন্ত্রীনা প্রাদেসিক আর্মদ কন্সতাবুলারি(পি এ সি) রামনাগরদা মীওই ৩০০ চনবা মলতিপর্পজ হোল অমা শঙ্গাগনি অমসুং কুইক রেসপোন্স তিম (ক্বিউ আর তি) বেরেকশিংগী উরেপ-উয়ুং তমগনি।

লৌমীশিংগী য়াইফনবা মাইকৈদা থাংজিনবা মরুওইবা খোঙথাং অমা ওইনা, প্রধান মন্ত্রীনা পি.এম-কিষানগী ২০শুবা ইন্সতোলমেন্ত থাদোক্কনি। লৈবাক শীনবা থুংবগী লৌমী করোর ৯.৭ হেনবগী বেঙ্ক একাউন্তশিংদা লুপা করোর ২০,৫০০ হেন্না হকথেংননা হাপচিনগনি। মসিগী শেনফম অসি থাদোকপগা লোয়ননা, স্কিম অসি চৎনবা হৌবদগী হৌজিক ফাওবদা পি.এম কিষানগী মখাদা থাদোকখিবা শেনফম পুন্না লুপা করোর লাখ ৩.৯০ হেল্লে।

স্কেতচিং কম্পিতিসন, লাইয়েকপা চাংদম্নবা, ফোতোগ্রাফি চাংদম্নবা, খেল-খুদ প্রাতিয়োগিতা, গ্যান প্রোতিয়োগিতা অমসুং রোজগার মেলা য়াওনা কসি সংসদ প্রাতিয়োগিতাগী মখাদা তোঙান তোঙানবা থৌরমশিং অমসুং চাংদম্নবশিংগী রেজিষ্ট্রেসন পোর্তেল প্রধান মন্ত্রীনা শঙ্গাগনি। প্রধান মন্ত্রীনা তোঙান তোঙানবা দিবয়াংজিন অমসুং অহল ওইরবা বেনিফিসরিশিংদা এসিস্তিভ এদস ৭,৪০০ হেন্না য়েন্থোক্কনি।

***