تجرباتی طور پر مسافر کوچز میں سی سی ٹی وی کیمروں کی تنصیب کے مثبت نتائج کی بنیاد پر ریلوے نے تمام کوچز میں سی سی ٹی وی کیمرے نصب کرنے کا فیصلہ کیا ہے۔ یہ اقدام مسافروں کی سلامتی کو نمایاں طور پر بہتر بنائے گا۔ شرپسند عناصر اور منظم گروہ سادہ لوح مسافروں کو نشانہ بناتے ہیں۔ کیمروں کی موجودگی میں ایسے واقعات میں نمایاں کمی آئے گی۔ مسافروں کی نجی زندگی کے احترام کو مدنظر رکھتے ہوئے، سی سی ٹی وی کیمرے کوچز میں صرف دروازوں کے قریب عام گزرگاہوں میں نصب کیے جائیں گے۔

مرکزی وزیر ریلوے جناب اشونی ویشنو اور وزیر مملکت برائے ریلوے جناب رونیت سنگھ بٹّو نے لوکوموٹیوز اور کوچز میں سی سی ٹی وی کیمروں کی تنصیب کی پیش رفت کا جائزہ لیا۔ یہ جائزہ اجلاس سنیچر، یعنی 12 جولائی 2025 کو منعقد ہوا، جس میں ریلوے بورڈ کے اعلیٰ افسران نے شرکت کی۔

360 ڈگری مکمل نگرانی

ریلوے حکام نے مطلع کیا کہ شمالی ریلوے کے لوکوموٹیوز اور کوچز میں سی سی ٹی وی کیمروں کے کامیاب تجربات کیے جا چکے ہیں۔ مرکزی وزیر ریلوے نے تمام 74,000 کوچز اور15,000 لوکوموٹیوز میں کیمرے نصب کرنے کی منظوری دے دی ہے۔ ہر کوچ میں4 ڈوم طرز کے سی سی ٹی وی کیمرے لگائے جائیں گے،جن میں سے دو ہر دروازے کے داخلی راستے پر لگیں گے۔ ہر لوکوموٹیو میں6 سی سی ٹی وی کیمرے نصب کیے جائیں گے جن میں ایک ایک کیمرہ اگلی، پچھلی اور دونوں جانب، جبکہ لوکو کے ہر کیب (سامنے اور پیچھے) میں ایک ڈوم کیمرہ اور دو مائیکروفونز نصب ہوں گے۔

جدید مسائل کا جدید نگرانی سے حل

حکام نے بتایا کہ نصب کیے جانے والے کیمرے جدید ترین خصوصیات کے حامل ہوں گے اور ایس ٹی کیو سی تصدیق یافتہ ہوں گے۔ مرکزی وزیر ریلوے نے اس بات پر زور دیا کہ اعلیٰ معیار کا ساز و سامان استعمال کیا جائے اور اس بات کو یقینی بنایا جائے کہ 100 کلومیٹر فی گھنٹہ سے زائد رفتار اور کم روشنی میں بھی ویڈیو کی کوالٹی متاثر نہ ہو۔ انہوں نے اس ڈیٹا پر مصنوعی ذہانت (اے آئی) کے استعمال کے امکانات کو بھی تلاش کرنے کی ہدایت دی، تاکہ بھارت اے آئی مشن کے تحت مزید سمارٹ نگرانی کو فروغ دیا جا سکے۔

ڈیٹا پرائیویسی مقدم

کوچز کے عام گزرگاہوں میں کیمرے نصب کرنے کا مقصد مسافروں کی سلامتی اور تحفظ کو بہتر بنانا ہے۔ پرائیویسی (نجی زندگی) کے تقاضوں کا خیال رکھتے ہوئے یہ کیمرے شرپسند عناصر کی شناخت میں مدد دیں گے۔ ریلوے کی یہ جدید کاری کی کوششیں ایک محفوظ، بااعتماد اور مسافر دوست سفری تجربے کی جانب اس کے عزم کی عکاس ہیں۔

******

ش ح۔ ش ا ر۔ ول

Uno- 2705