খুরুমজরি!

নহারোলশিং কেন্দ্র সরকারগী থবক পীনবা ঐখোয়গী খোঙজং মখা চৎথরি। ঐখোয়গী পান্দমদি শ্লিপ অমতা য়াওদনা, চাদিং অমতা তৌদনা থবক ফংহনবনি। ঙসি নহারোল লিশিং ৫১ হেনবদা এপোইন্তমেন্ত লেত্তরশিং য়েন্থোক্লে। অসিগুম্বা রোজগার মেলাশিংগী খুৎথাংদা, নহারোল লাখ ভারত সরকারগী থবকশিং ফংলে। হৌজিক হায়রিবা নহারোলশিং অসিনা লৈবাক শেমগৎপদা অচৌবা থৌদাং অমা লৌরে। ঙসি নহারোক কয়া ভারত রেৱেজদা মখোয়গী মথৌশিং পাংথোক্লে, মরুপ কয়া লৈবাক অসি ঙাক্নবা গার্দশিং ওইরে, পোস্তেল দিপার্তমেন্তদা থবক ফংলবা মরুপশিংনা সরকারগী কান্নবশিং খুঙ্গং খুদিংমক্ত য়ৌহনগনি, মরুপ খরনা মীওই খুদিংমক হকচাং ফহন্নবা মিসনগী লান্মীশিং ওইগনি, নহারোল কয়ানা মীওই খুদিংমক শেন-থুমগী থবকশিংনা কোনশিন্নবা য়াংখৎনবা ইঞ্জিন ওইগনি অমসুং মরুপ কয়ানা ভারতকী উদ্যোগ চাউখৎপা য়াংখৎহনগনি।

অদোমগী দিপার্তমেন্তশিং তোঙান তোঙাল্লি, অদুবু পান্দমদি অমতনি অমসুং পান্দম অদুদদি লৈবাক্কী থবক তৌবা হায়বা অসিনি। অমতা ঙাইরবা পান্দমদি-মীয়ামগী থবক্না হান্না পাংথোকপা অসিনি। লৈবাক অসিগী মীয়ামগী সেবা তৌনবা অচৌবা মফম অমা অদোম্না ফংলে। পুন্সিগী মরুওইবা তাঙ্কক অসিদা অসিগুম্বা অচৌবা থবক অমা ফংবা অসিদা ঐনা ময়াম পুম্নমক হরাওবা ফোঙদোকচরি। অদোমগী অনৌবা খোঙচৎ অসিগীদমক ঐনা অদোমগী মফমদা য়াইফ পাউজেল পীজরি।

মরুপশিং,

ভারতকী মপান নাইদ্রবা শক্তি অনি লৈরি হায়বা ঙসিগী মালেম্না য়ানরে। অমনা অপুনবা মীশিং অমসুং অমনা গনতন্ত্রনি। লৈবাক অসিদা মশিং খ্বাইদগী য়াম্বা নহারোল লৈরি অমসুং মালেমদা খ্বাইদগী চাউবা গনতন্ত্র চৎপা লৈবাক অমনি। মসিগী নহারোলগী শক্তি অসি ঐখোয়গী খ্বাইদগী চাউবা লন্নি অমসুং ভারতকী অফবা তুংলমচৎকী খ্বাইদগী চাউবা গরেন্তিনি। নুংঙাই য়াইফনবা ফোর্মুলা অসি শেম্নবগীদমক সরকারনা অহিং-নুংথিল অনিমক থবক শুরি। লৈবাক মঙাগী খোঙচৎ মতুংদা নোংমগী মমাঙদা ঐ হল্লক্লে হায়বা মীয়াম্না খঙলে। ভারতকী নহারোলগী শক্তিগী খোন্থাং অসি লৈবাক খুদিংমক্না তারে। খোঙচৎ মনুংদা লৈনখিবা য়ানখিবা খুদিংমক্না লৈবাক অসিদা অমসুং মপান লৈবাকশিংদা লৈরিবা ভারতকী নহারোল খুদিংমক কান্নবা ফংগনি। দিফেন্স, ফার্মা, দিজিতেল তেক্নোলোজি, ইনর্জি, মমল য়াম্লবা মিনিরেলশিংগুম্বা হিরমশিংগী য়ানচেশিংনা তুংদগী ভারতকী কান্নবা ওইরগনি, ভারতকী মেনুফেকচরিং অমসুং সর্বিস সেক্তরশিং মপাঙ্গল য়াম্না কনখৎলগনি।

মরুপশিং,

মতমগী অহোংবা মতুংইন্না, ২১শুবা চহিচাদা থবকশিংগী মওংসু হোংলে, অনৌবা থবক কয়া থোক্লক্লে। মরম অদুনা হৌখিবা চহি ১০ অসিদা, লৈবাক অসিগী নহারোলশিং থৌরাং তৌনবা ভারতনা মীৎয়েং চঙলে। মসিগীদমক হৌজিক মরুওইবা ৱারেপশিং লৌরে, অনৌবা মতমগী দরকার ওইবশিং য়েংলগা অনৌবা থৌশিলশিসু শেম্লে। ঙসি লৈবাক অসিদা স্তার্দ-অপশিং, ইন্নোবেসন অমসুং থিজিনবগী থবকশিং পায়খৎপদগী লৈবাক অসিগী নহারোলশিংগী তৌবা ঙম্বসু হেনগৎলে। নহারোলশিংনা মখোয় মশাগী স্তার্দ-অপ লিংখৎনিংবগী অপাম্বা উবদা ঐগী থাজবসু হেনগৎলে অমসুং স্তার্দ অপশিংগী মতাংদা দোক্তর জিতেন্দ্র সিংহনসু মশিং খর পীরে। অচৌবা পান্দম  অমগা লৌয়নান পাঙ্গল অমসুং খোঙজেলগা লোয়ননা ঐগী লৈবাক্কী নহারোলশিংনা মাংলোমদা চঙশিনবদা ঐ হরাওই।

মরুপশিং,

প্রাইভেদ সেক্তরদা অনৌবা থবকশিং ফংহন্নবা ভারত সরকারনা মীৎয়েং চঙলি। হন্দক সরকারনা ইমপ্লাইমেন্ত লিঙ্ক ইন্সেন্তিপ স্কিম কৌবা অনৌবা স্কিম অমা অয়াবা পীখ্রে। স্কিম অসিগী মখাদা প্রাইভেদ সেক্তরদা অহানবা ওইনা থবক ফংবা নহারোল অমদা সরকারনা লুপা লিশিং ১৫ পীগনি। অহানবা থবক্কী অহানবা ফংবা তোলোবতা সরকারনা মতেং পাংগনি। মসিগীদমক সরকারনা লুপা করোর লাখ অমগী বজেত অমা শেম্লে। স্কিম অসিনা অনৌবা থবক করোর ৩.৫ ফংহনবদা মতেং পাংগনি।

মরুপশিং,

ঙসি, ভারতকী অচৌবা মপাঙ্গল অমদি ঐখোয়গী মেনুফেকচরিং সেক্তর অসিনি। মেনুফেকচরিং সেক্তর চাউখৎনবা চহি অসিগী বজেত্ত মিসন মেনুফেকচরিং লাউথোকখ্রে। হৌখিবা চহিশিংদা, ঐখোয়না মেক ইন ইন্দিয়াগী খোঙচং মপাঙ্গল কনখৎহল্লে। পি.এল.আই স্কিমগী মখাদা লৈবাক অসিদা অনৌবা থবক লাখ ১১ হেন্না ফংহনখ্রে। হৌখিবা চহিশিংদা ইলেক্ত্রোনিক্স অমসুং মোবাইল শাবগী সেক্তরশিং পাকথোক-চাউথোকহল্লে। ঙসি, ইলেক্ত্রোনিক্স মেনুফেকচরিং অসি লুপা করোর লাখ ১১ য়ৌরে। মসি হৌখিবা চহি ১১ দগী শরুক ৫ হেনগৎলে। হান্না লৈবাক অসিদা মোবাইল ফোন শাবা য়ুনিত ২ খক্ত লৈরমখি, হৌজিক লৈবাক অসিদা য়ুনিত ৩০০ হেন্না লৈরে। মসিদা নহারোল লাখ কয়া থবক ফংলে। ওপরেসন সিন্দুরগী মতুংদা দিফেন্স মেনুফেকচরিংগী মতাংদা য়াম্না খন্ন-নৈরে। দিফেন্স মেনুফেকচরিং সেক্তরদা ভারতনা অনৌবা রেকোর্দশিং থম্লে। ঐখোয়গী দিফেন্সকী পোৎথোকশিং অসি লুপা করোর লাখ ১.২৫ হেল্লে। লোকোমোতিপ সেক্তরদসু ভারতনা অতোপ্পা অচৌবা মাইপাকপা অমা ফংলে। ভারত মালেমদা লোকোমোতিপ খ্বাইদগী য়াম্না পুথোকপা লৈবাক ওইরে। লোকোমোতিপশিং ওইগেরা, রেল কোচশিং ওইগেরা, মেত্রো কোচশিং ওইগেরা, ঙসি মালেমগী মশিং য়াম্লবা লৈবাকশিংদা মখোয় ভারতনা য়োল্লে।

ঐখোয়গী ওতোমোবাইল সেক্তরসু মমাঙদা অমুক্ত ওইখিদ্রিবা মওংদা চাউখৎলকপা ঐখোয়না উরে। হৌখিবা চহি ৫ দা সেক্তর অসিদা দোল্লার বিল্লিয়ন ৪০ রোমগী এফ.দি.আই লাকখি। মসিনা তাকপদি অনৌবা কম্পেনিশিং লাক্লে, অনৌবা ফেক্তরিশিং লিংখৎলে, নৌবা থবকশিং পীরে হায়বনি অমসুং গারিশিং লৈবা মশিং য়াম্না হেনগৎলে অমসুং ভারত্ত শাবা গারিশিং মশিং য়াম্না য়োল্লে। নহারোলশিং মশিং য়াম্না শরুক য়াবদগী হিরম কয়াদা লৈবাক অসি চাউখৎলকপা ঙম্বনি। মখোয়গী হুমাং, মখোয়গী হোৎনবা কনবা অসিনা লৈবাক অসিগী নহারোলশিং থবক ফংবনি, মসিগী মাইপাকপা অসি মখোয়না উৎলে। লৈবাক অসিদা মেনুফেকচরিং সেক্তর মখা তানা চাউখৎনবা সরকারগী থবক তৌবা মীওই ওইনা অদোম্না পাংথোকপা য়াবা থবক খুদিংমক পাংথোক্কদবনি।

মরুপশিং,

মালেমদা অহুমসুবা খ্বাইদগী চাউবা ইকোনোমি ওইনবা মাইকৈদা ঙসি ঐখোয়গী লৈবাক য়াংনা চঙশিল্লি অমসং মসি ভারতমচা অমনা য়াম্না চাউথোকচনা হায়বা ঙমগনি। মসি ঐগী নহারোলশিংনা থবক কন্না শুবগী অঙকপনি। হৌখিবা চহি ১১ দা হিরম খুদিংমক্ত লৈবাক অসি চাউখৎলে। হন্দক, ইন্তরনেসনেল লেবর ওর্গনাইজেসনগী অঙকপা রিপোর্ত অমা লাকলে। হৌখিবা চহি ১০ দা, ভারতকী মীওই করোর ৯০ হেন্না য়াইফ-থৌরাংগী স্কিমশিংনা কোনশিনখি হায়না রিপোর্ত অসিদা হায়খি। অমরোমদা মসি খুন্নাইগী ঙাক্লৌ পীবনি। স্কিমশিং অসিনা য়াইফনবা থবক পায়খৎপা খক নত্তনা মসিনা মশিং য়াম্লবা থবকশিংসু ফংহল্লে। খুদম ওইনা, প্রধান মন্ত্রী অৱাস য়োজনাগী মখাদা অনৌবা য়ুম করোর ৪ হেন্না শাখ্রে অমসুং হৌজিক অনৌবা য়ুম করোর ৩ শাবগী থবক চৎথরি। অসুক য়াম্বা য়ুমশিং অসি শাবদা মশিং য়াম্লবা শীন্মীশিং থবক শুরি। স্কিম অসিনা থবক কয়া পীরিবা অদু অদোম খন্দুনা য়েংউ। মসিদা খ্বাইদগী অপেনবা পোক্লিবদি থবক অয়াম্বা ঐখোয়গী খুঙ্গংশিংদা ফংবা অসিনি, কনাগুম্বা অমতা খুঙ্গং থাদোক্তুনা চৎত্রে। মসিগা লোয়ননা, লৈবাক অসিদা অনৌবা তোইলেত করোর ১২ শারে। তোইলেতশিং অসি শাবদা, উশুবশিং অমসুং প্লম্বরশিং য়াওনা শীন্মী কয়া থবক পীরে। উজৱালা স্কিমগী মখাদা লৈবাক অসিদা অনৌবা এল.পি.জি কন্নেক্সনশিং পীরে। মসিগীদমক হৌজিক মশিং য়াম্লবা বোত্তলিং প্লান্তশিং লিংখৎলে। গ্যাস সিলিন্দর শাবশিং অমসুং গ্যাস সিলিন্দর এজেন্সিশিং থবক পীরে। য়ুমশিংদা গ্যাস সিলিন্দরশিং থিনবা চৎপা মীওইশিং অনৌবা থবকশিং ফংলে। অনৌবা হিরমশিং অসিদা অনৌবা থবক লাখ কয়া ফংলে।

মরুপশিং,

অতোপ্পা স্কিম অমা খন্নবা ঐনা পাম্মী। অদোম স্কিম অসি খঙলে, মসি খুৎশা মঙা মক ঘীদা লুপ্পা নত্ত্রগা খুৎ অনিমক্ত লদু পায়বগুম্বনি। স্কিম অদুদি পি.এম সুর্য়া ঘর ফ্রি ইলেক্ত্রিসিতি স্কিমনি। স্কিম অসিগী মখাদা ইমুং অমগী য়ুম মথক্ত সোলার রুপ তোপ পেনেল থম্বদা সরকারনা ইমুং অমদা লুপা ৭৫,০০০ হেন্না পীরে। মওং অসিদা, মীওই অমগী য়ুম পৱার ফেক্তরি অমা ওইরে, মৈ পুথোক্লে অমসুং মৈ অদু মশামক শীজিন্নরে, করিগুম্বা অহেনবা মৈ পুথোক্লবদি, মদু মহাক্না য়োল্লে। মসিনা মৈগী বিল হন্থহনবদা নত্তনা, মীওই অদুগী শেন কনবা ঙম্লে। সোলার প্লান্তশিং অসি থম্বদা ইঞ্জিনিয়ারশিং অমসুং তেক্নিসিয়ানশিং দরকার ওই। সোলার পেনেলশিং শানবা ফেক্তরিশিং লিংখৎলে, রো মেতরিএলশিংগীদমক ফেক্তরিশিং লিংখৎলে, পোৎলমশিং পুথোক-পুশিন তৌনবা ফেক্তরিশিং লিংখৎলে। স্কিম অমনা মীয়ামগী য়াইফনবা থবক পায়খৎলি অমসুং স্কিম অমনা অনৌবা থবক লাখ কয়া ফংহল্লে।

মরুপশিং,

নমো দ্রোন দিদি অভিয়ান্না খুঙ্গংশিংদা অনৌবা থবকশিং ফংহল্লে অমসুং ইচলশিং অমসুং ইচানুপীশিংগী শেন্থোক হেনগৎহল্লে। স্কিম অসিগী মখাদা, খুঙ্গংগী ইচল লাখ কয়া দ্রোন পাইলোতশিং ওইনা ত্রেনিং পীরে। ঐখোয়গী খুঙ্গংশিংগী দ্রোন দিদিশিং, ইমাশিং অমসুং ইচলশিংনা লৌ উবদা দ্রোনশিংনা মতেং পাংবগী পাউ তারে অমসুং লৌরোক অমদা লুপা লাখ কয়া তাল্লে। মসি খক নত্তনা, মসিনা লৈবাক অসিদা দ্রোন শাবগা মরী লৈনবা অনৌবা হিরম মপাঙ্গল কনখৎহল্লে। লৌউ-শিংউ নত্ত্রগা দিফেন্স ওইবা য়াই, ঙসিদি লৈবাক অসিগী নহারোলশিংদা দ্রোন মেনুফেকচরিংনা অনৌবা খুদোংচাবশিং পীরে।

মরুপশিং,

লৈবাক অসিদা লাখপতি দিদি করোর ৩ পুথোক্নবা খোঙচৎ চৎথরি। মখোয়গী মনুংদা লাখপতি দিদি করোর ১.৫ হান্না পুথোকখ্রে। লাখপতি দিদি অমা ওইবা হায়বসি চহি অমদা মহাক্কী শেন্থোক অদু লুপা লাখ ১ দগী তাদবা ওইগদবনি হায়বা অদোম খঙলে। অদোম্না খুঙ্গংশিংদা চৎপা মতমদা, অদোম্না বেঙ্ক শখিশিং, ইন্সুরেন্স শখিশিং, কৃষি শখিশিং, পাসু শখিশিং ঐখোয়গী খুঙ্গংশিংদা থবক ফংবা উবা ফংগনি। অহানবা ওইনা,  পি.এম শ্বানিধি য়োজনাগী মখাদা লম্বী মতাইদা পোৎ য়োল্লিবা মীওইশিং মতেং পাংলে। স্কিম অসিগী মখাদা, মীওই লাখ কয়া দিজিতেল পেমেন্ত শীজিন্নরে, হোকরশিং হৌজিক শেন শীজিন্নদ্রে, মখোয় য়ু.পি.আই শীজিন্নরে। করিগী?  মখোয়না বেঙ্কদগী খুদক্ত শেন ফংলে। বেঙ্কগী থাজবা হেনগৎলে। মহাক্না চে শীজিন্নবা দরকার ওইদ্রে। মসিনা তাকপদি লম্বী মতাইদা পোৎ য়োল্লিবা মীওইশিং থাজবগা লোয়ননা চাউখৎলে হায়বনি। পি.এম বিশ্বকর্মা স্কিমগী মখাদা, মমাংঙৈদগী লৈরক্লবা শীন্মীশিং, মখোয়গী থবকশিং মতমগা চুনবা থবকশিং ওইহল্লে, অনৌবা তেক্নোলোজি, অনৌবা খুৎলায়শিং শীজিন্নরে অমসুং খুৎহৈবশিং ত্রেনিং পীরে। মখোয়দা লোনশিং পীরে, মতমগী অনৌবা খুৎলায়শিং পীরে। ঐনা অদোমদা মশিং থিঙমদ্রবা স্কিমশিং হায়বা ঙমগনি। লায়রবশিং খুদোংচাবা পীবা  অমসুং মখোয় থবক পীবা অসিগুম্বা স্কিম কয়া লৈরি। অসিগুম্বা স্কিমশিং অসিনা হৌখিবা চহি ১০ অসিদা মীওই করোর ২৫ হেন্না লায়রবা কোকহনখিবনি। করিগুম্বা থবক ফংদ্রবদি, ইমুং অমগী শেন্থোক লম্বী লৈত্রবদি, মীরোল অহুম-মরি লায়রবা হিংলিবা ঐগী লায়রবা ইনাওশিং অমসুং ইচলশিং য়াম্না ৱানা হিংগনি। অদুবু ঙসিদি মখোয় ফিবম য়াম্না ফরে, ঐখোয়গী মীওই করোর ২৫ লায়রবা কোক্লে। লায়রবা ইনাও অমসুং ইচল করোর কয়া লায়রবা মাইথিবা পীরে। লায়রবা মাইথিবা পীখিবা ইনাও অমসুং ইচল করোর ২৫ গী থৌনা ঐনা থাগৎপা ফোঙদোক্লি। মখোয়না সরকারগী স্কিমশিং কান্নবা লৌরে অমসুং থৌনাগা লোয়ননা মাঙলোমদা চঙশিল্লে। মখোয়না লায়রবা মাইথিবা পীরে। মীওই করোর ২৫ অসিনা মখোয় মশানা মশাবু কয়া য়াম্না থাজবগে হায়বা অদোম খন্দুনা য়েংউ। অসিগুম্বা মীওই অমা লায়রবা কোকপা মতমদা, অনৌবা থৌনা অমা পোক্লে। সরকারনা পায়খৎলিবা থবকশিং অসি ঙসিদি ৱার্ল্দ বেঙ্কগুম্বা অচৌবা ইন্সতিতুসনশিংনা থাগৎলে। মালেমগী লৈবাকশিংদা মখোয়না ভারত নমুনা অমা ওইনা উৎলে। মালেমদা খ্বাইদগী থোং মান্নবা লৈবাকশিংগী মনুংদা ভারতনা মকোক্ত লৈরে। লায়রবা অমসুং ইনাকখুনবা অনিগী মরক্ত খেন্নবা য়াংনা হন্থরক্লে। থোং মান্নবগী মাইকৈদা ঐখোয় য়াংনা চঙশিল্লি। মসি হৌজিক মালেমগী লৈবাকশিংনা খঙলে।

মরুপশিং,

লায়রবগী য়াইফনবা অমসুং থবক পীনবা মিসন অসি মাঙলোমদা পুখৎপা অসি অদোমগী থৌদাংনি। সরকারনা খূরৌ থাংবা অমা ওইরোইদবনি, সরকারনা চাউখৎপগী থবক পুক্নিং থৌগৎপা অমা ওইগদবনি। মীওই খুদিংমক চাউখৎনবগী খুদোংচাবা লৈ। খুৎশম্নদুনা চৎমিন্নবা হায়বসি ঐখোয়গী থৌদাংনি। নহা ওইরিবা মরুপশিং, অদোমগী মফমদা ঐনা থাজবা কয়া থম্লি। মীয়ামগী অৱাবশিং কোকহন্নবা অদোম্না মখোয়গী মতেং পাংগদবনি। অদোম ভারতকী অমৃত কালগী শরুক অমা ওইগদবনি। লাক্লিবা চহি ২০-২৫ অসি অদোমগী শীনফম অসিগী য়াম্না মরুওই, হায়রিবা চহি ২০-২৫ গী মতম অসি লৈবাক অসিগী ওইনা য়াম্না মরুওই। বিকসিত ভারত অমা শেমগৎনবগীদমক চহি ২৫ গী মতম অসি য়াম্না মরুওই। মরম অদুনা বিকসিত ভারত অমগী পান্দমশিংগা লোয়ননা অদোম থবক তৌগদবনি। মীয়াম্না ঈশ্বরনি হায়বসি ঐখোয়গী লাইৱানি। মসি ঐখোয়গী শিংলিশিং, ঐখোয়গী থম্মোয় অমসুং পুক্নিংদা চেনহলগদবনি, ঐখোয়গী লমচৎতা উহনগদবনি। নহারোলশিংগী শক্তিনা হৌখিবা চহি ১০ দা লৈবাক অসি মাঙলোমদা পুখৎলে। অদোমগী খুদোংচাবা ফংলে, অদোমদগী থাজবা য়াংনা থম্লি। অদোমগী থৌদাং য়াম্না চাউরি, মসি থবক ওইনা পাংথোক্কনি হায়বগী থাজবা ঐনা থম্লি। ঐনা অমুক হন্না অদোম থাগৎপা ফোঙদোকচরি। তুংগী অফবা পুন্সি অমগীদমক ঐনা অদোমগী ইমুংগী মীওইশিংদা য়াইফ পাউজেল পীজরি। আইগোত প্লেতফোর্মদা চঙদুনা অদোম মখা তানা ফগৎহনগদবনি। অনৌবা কয়া তমদুনা অনৌবা ফলশিং পুরক্কদবনি। অদোমগী চাউখৎপদা লৈবাক অসিনা চাউথোকচবা ফাওরি। অদোমগী অনৌবা পুন্সি অমা হৌনবা, অদোমগা ৱারি শানবা, মঙলান কয়া মঙফাওনবা ঙম্নবা অদোমদা য়াইফ পাউজেল পীনবা ঙসি ঐ মফম অসিদা লাক্লিবনি। হৌজিক অদোম ঐগী মরুপ অমা ওইরে। ঐগী অচেৎপা খোঙলোই অমা ওইনা ঐনা অদোম তরাম্না ওক্লি। ময়াম পুম্নমক থাগৎপা ফোঙদোকচরি। য়াইফ পাউজেল পীজরি।

****