য়োর এক্সিলেন্সী, ঐগী নুংশিরবা মরুপ রাস্ত্রপতি লুলা,

লৈবাক অনিমক্কী দেলিগেৎশিং,

মীদিয়াগী মরুপশিং,

খুরুমজরি

“বাও তারদে”!

রিও অমসুং ব্রাজিলিয়াদা ঐহাকপু তরাম্না ওকপগীদমক্তা ঐহাক্না ঐহাক্কী মরুপ, রাস্ত্রপতি লুলাবু থাগৎচরি। এমাজোনগী ফজবা অমসুং অদোমগী পুকচেল চাউবা মতৌ অদুনা ঐখোয়বু তশেংনা থম্মোয় পেলহল্লি।

ঙসি, ব্রাজিলগী রাস্ত্রপতিনা ঐবু ব্রাজিলগী খ্বাইদগী ৱাংবা নেস্নেল এৱার্দ পীদুনা ইকায় খুম্নবা উৎখিবা অসি ঐহাক্কীদমক্তা নত্তনা ভারত মচা করোর 140গীদমক্তসু চাউথোকচনীংঙাই অমসুং নুংঙাইবা তাঞ্জা অমনি। ঐহাক্না রাস্ত্রপতি, ব্রাজিল সরকার অমসুং ব্রাজিলগী মীয়ামবু মসিগী ইকায় খুম্নবা অসিগীদমক্তা থাগৎপা ফোংদোকচরি।

মরুপশি,

ঐহাক্কী মরুপ রাস্ত্রপতি লুলানা ভারত অমসুং ব্রাজিলগী মরক্তা স্ত্রেতেজিক পার্তনরশিপকী চীফ আর্কিতেক্তনি। ঐখোয়গী মরী হেন্না চেৎশিলহনবদা মহাক্না মরু ওইবা থৌদাং অমা লৌখি।

মহাক্কা উন্নবা খুদিংগী ঐহাকপু ঐখোয়গী লৈবাক অনিগী চাউখৎপা অমসুং য়াইফনবগীদমক হেন্না কন্না হোৎননবা পুক্নিং থৌগৎলি। ঐহাক্না মসিগী ইকাই খুম্নবা অসি ভারতকীদমক মহাক্কী অচেৎপা ফিরেপ অমসুং ঐখোয়গী অচেৎপা মরুপ-মপাং ওইবগী মরীদা কত্থোকচরি।

মরুপশিং,

ঙসিগী খন্ন-নৈনবদা, ঐখোয়না সেক্তর পুম্নমক্তা মতেং পীনবা হেনগৎনবা য়ানখি। লাক্কদৌরিবা চহি মঙা অসিদা ঐখোয়না লৈবাক অনিগী ওইবা ললোন-ইতিক অসি দোল্লর বিল্লিয়ন 20দা হেনগৎহন্নবা পান্দম থম্লি।

ভারতকী মীয়াম্না ক্রিকেৎপু নুংশিবা অদুগুম্না ফুৎবোল অসিসু ব্রাজিলগী পামজবনি। বোল অদু ঙমখৈগী ৱাংবদা কাউবা নত্ত্রগা গোল চনবা ওইরবসু, মখোয় অনিমক চপ মান্নবা তীম অমদা লৈরবা মতমদা, দোল্লর বিল্লিয়ন 20গী পার্তনরশিপ অসি ফংবদা অৱাবা লৈরোই। ঐখোয় পুন্না ইন্দিয়া-মেরকোসুর প্রিফরেন্সিয়েল ত্রেদ এগ্রীমেন্ত (PTA) পাকথোক চাউথোকহন্নবা থবক তৌমিন্নগনি।

মরুপশিং,

ইনর্জী সেক্তরদা ঐখোয়গী কোওপরেসন অসি লেপ্পা লৈতনা হেনগৎলক্লি। ঐখোয়গী লৈবাক অনিমক্না অকোইবগী ফিভম অমসুং ক্লিন ইনর্জীদা অৱাংবা প্রাইওরিতি পীরি। সেক্তর অসিদা তেংবাং পীনবা হেনগৎহন্নবা ঙসি খুৎয়েক পীনখিবা এগ্রীমেন্ত অসিনা ঐখোয়গী গ্রীনগী পান্দমশিংদা অনৌবা মাইকৈ অমসুং ইথিল পীরগনি। চহি অসিগী অরোইবা শরুক্তা ব্রাজিলদা পাংথোক্কদৌরিবা COP-30 সম্মিতকীদমক ঐহাক্না রাস্ত্রপতি লুলাবু য়াইফ-মঙ্গোল পীজরি।

মরুপশিং,

ঙাকশেলগী লমদা ঐখোয়গী মতেং পীনবা হেনগৎলক্লিবা অসিনা ঐখোয়গী লৈবাক অনিগী মরক্তা লৈনরিবা অচেৎপা পারস্পরিক থাজবা অদু উৎলি। ঐখোয়না ঐখোয়গী দিফেন্স ইন্দস্ত্রীশিংবু শম্নহন্নবা অমসুং পার্তনরশিপ অসিবু হেন্না মপাঙ্গল কনখৎহন্নবা হোৎনরিবশিং মখা তানা মখা চত্থখিগনি।

আর্তিফিসিএল ইন্তেলিজেন্স অমসুং সুপরকম্প্যুতরগী লমদা ঐখোয়গী তেংবাং পীনবা অসি হেনগৎলক্লি। মসিনা ইনক্লুসিব দিবেলপমেন্ত অমসুং হ্যুমেন-সেন্ত্রিক ইন্নোভেসনগীদমক ঐখোয়গী মান্নবা মীৎয়েং অদু উৎলি।

নাকল অনিমক্না ব্রাজিলদা UPI শিজিন্ননবা পুন্না হোৎনরি। দিজিতেল পব্লিক ইনফ্রাস্ত্রকচর অমসুং স্পেসকুম্বা হিরমশিংদা ভারতনা ব্রাজিলগা মায় পাক্না থবক তৌমিন্নবা ঐখোয়না নুংঙাইবা পোক্কনি।

লৌউ-শিংউ অমসুং শা-ষন য়োকপগী লমদা ঐখোয়গী তেংবাং পীনবা অসি দিকেদ কয়াগী মমাংদগী লৈরক্লি। হৌজিক ঐখোয়না এগ্রিকলচরেল রিসর্চ অমসুং ফুদ প্রোসেসিংগুম্বা লমশিংদা পুন্না থবক তৌমিন্নরি। হকশেলগী সেক্তরদসু, ঐখোয়না ঐখোয়গী ৱিন-ৱিন কোলাবোরেসন হেনগৎহল্লি। ঐখোয়না ব্রাজিলদা আয়ুর্বেদ অমসুং ত্রেদিস্নেল মেদিসিন পাকথোক চাউথোকহনবদা মরুওইবা মীৎয়েং থম্মি।

মরুপশিং,

পিপল-তু-পিপলগী মরী অসি ঐখোয়গী মরীগী মরুওইবা য়ুম্বীনি। লৈবাক অনিমক্তা শান্ন-খোৎনবগীদমক ঐখোয়গী মান্নবা অপাম্বা অসিনা ঐখোয়বু শম্নহল্লিবা অচেৎপা মরী অমা ওইনা মথৌ তৌরি।

ঐখোয়না ভারত-ব্রাজিলগী মরীশিং অসি কার্নিভেলগুম্না থোইদোক হেন্দোকপা, ফুৎবোলগুম্না পুক্নিং থৌগৎপা, অমসুং সমবাগুম্না হার্ত-কনেক্তিং ওইহনবা পাম্মি - পুম্নমক অসি ভিজা কাউন্তরদা অশাংবা ক্যু লৈতনা!  মসিগী ৱাখল্লোন অসিগা লোইননা, ঐখোয়না ঐখোয়গী লৈবাক অনিগী মরক্তা মরুওইনা তুরিস্ত, মহৈরোয়, শান্নরোই অমসুং বিজিনেস মেনশিংগী মরক্তা মীয়ামগী মরক্তা চৎথোক-চৎশিন তৌবদা মতেং পাংনবা পুন্না থবক তৌমিন্নগনি।

মরুপশিং,

থাক্তা, ভারত অমসুং ব্রাজিলনা মতম পুম্নমক্তা চাউনা মতেং পাংনদুনা থবক তৌরি। মরুওইবা দেমোক্রেসী অনি ওইনা, ঐখোয়গী মতেং পীনবা অসি গ্লোবেল সাউথকীদমক্তা নত্তনা মীওইবা খুন্নাইগীদমক্তসু মরী লৈনৈ। গ্লোবেল সাইথকী অৱাবা অমসুং মরুওইবশিং মালেমগী থাক্তা পুখৎপা অসি ঐখোয়গী ইথিলগী থৌদাংনি হায়না ঐখোয়না চেৎনা থাজৈ।

ঙসি, মালেম অসিনা তেন্সন অমসুং চয়েৎনবগী মতম অমা থেংনরিঙৈদা... ঐহাক্কী মরুপনা মসিগী মতাংদা অকুপ্পা মরোল কয়া ফোংদোকখ্রে মরম অদুনা ঐহাক্না অমুক হন্না হায়ররোই... ভারত-ব্রাজিল পার্তনরশিপ অসি স্তেবিলিতী অমসুং বেলেন্সকী মরুওইবা য়ুম্বী অমা ওইনা লৈরি। দাইলোগ অমসুং দিপ্লোমেতিক্কী খুত্থাংদা ৱাথোক খুদিংমক কোকহন্নবা ঐখোয়না অপুনবা ৱাখল্লোন অমা থম্লি।

তেরোরিজমগা লান্থেংনবদা ঐখোয়না মান্নবা এপ্রোচ অমা শেয়র তৌই - জিরো তোলরেন্স অমসুং জিরো দবল স্তেন্দর্দ। তেরোরিজমগা মরী লৈননা দবল স্তেন্দর্দশিং লৈহন্দবা হায়বসি ঐখোয়গী অচেৎপা থাজবনি। ঐখোয়না তেরোরিজম অমসুং তেরোরিজমবু শৌগৎপশিংবু অকনবা মওংদা য়ানীংদবা ফোংদোক্লি।

এক্সিলেন্সী,

অমুক্কা হন্না, ভারত মচা বিলিয়ন 1.4কী মায়কৈদগী, লৈবাক অসিগী খ্বাইদগী ৱাংবা ইকাই খুম্নবা অমসুং অদোমগী অচেৎপা মরুপ-মপাং ওইবগী মরীগীদমক ঐহাক্না অদোমগী মফমদা থাগৎপা ফোংদোকচরি। ঐহাক্না মসিগী খুদোংচাবা অসি লৌদুনা অদোমবু ভারত্তা লাক্নবা কৌজরি।

থাগৎচরি।

“মুইতো ওব্রিগাদো”!

*****