ମହାମହିମ, ମୋର ପ୍ରିୟ ଘନିଷ୍ଠ ବନ୍ଧୁ ରାଷ୍ଟ୍ରପତି ଲୁଲା,

ଉଭୟ ଦେଶର ପ୍ରତିନିଧିମାନେ,

ଗଣମାଧ୍ୟମର ବନ୍ଧୁଗଣ

ନମସ୍କାର

"ବୋଆ ତାର୍ଡେ"!

ରିଓ ଏବଂ ବ୍ରାସିଲିଆରେ ଭବ୍ୟ ସ୍ୱାଗତ ପାଇଁ ମୁଁ ମୋର ପ୍ରିୟ ବନ୍ଧୁ ରାଷ୍ଟ୍ରପତି ଲୁଲାଙ୍କୁ ଆନ୍ତରିକତାର ସହ ଧନ୍ୟବାଦ ଜଣାଉଛି । ଆମାଜନର ସୌନ୍ଦର୍ଯ୍ୟ ଏବଂ ଆପଣଙ୍କ ସୌଜନ୍ୟତା ଦ୍ୱାରା ଆମେ ପ୍ରକୃତରେ ଅତ୍ୟନ୍ତ ପ୍ରଭାବିତ ।

ଆଜି, ବ୍ରାଜିଲ ରାଷ୍ଟ୍ରପତିଙ୍କ ଦ୍ୱାରା ବ୍ରାଜିଲର ସର୍ବୋଚ୍ଚ ଜାତୀୟ ପୁରସ୍କାରରେ ସମ୍ମାନିତ ହେବା କେବଳ ମୋ ପାଇଁ ନୁହେଁ, ବରଂ ୧୪୦ କୋଟି ଭାରତୀୟଙ୍କ ପାଇଁ ଗର୍ବ, ଗୌରବ ଓ ଭାବପ୍ରବଣତାର ଏକ ଦୁର୍ଲଭ ମୁହୂର୍ତ୍ତ । ଏହି ସମ୍ମାନ ପାଇଁ ମୁଁ ରାଷ୍ଟ୍ରପତି, ବ୍ରାଜିଲ ସରକାର ଏବଂ ବ୍ରାଜିଲର ଜନସାଧାରଣଙ୍କୁ ଆନ୍ତରିକତାର ସହିତ ଧନ୍ୟବାଦ ଜଣାଉଛି ।

ବନ୍ଧୁଗଣ,

ମୋର ବନ୍ଧୁ ରାଷ୍ଟ୍ରପତି ଲୁଲା ଭାରତ ଏବଂ ବ୍ରାଜିଲ ମଧ୍ୟରେ ରଣନୈତିକ ସହଭାଗୀତାର ମୁଖ୍ୟ ପ୍ରତିଷ୍ଠାତା । ସେ ଆମର ସମ୍ପର୍କକୁ ଆହୁରି ନିବିଡ଼ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛନ୍ତି ।

ତାଙ୍କ ସହ ପ୍ରତ୍ୟେକ ସାକ୍ଷାତ ମୋତେ ଆମ ଉଭୟ ରାଷ୍ଟ୍ରର ପ୍ରଗତି ଏବଂ କଲ୍ୟାଣ ପାଇଁ କଠିନ ପରିଶ୍ରମ କରିବାକୁ ପ୍ରେରଣା ଦେଇଆସିଛି । ମୁଁ ଏହି ସମ୍ମାନକୁ ଭାରତ ପ୍ରତି ତାଙ୍କର ଦୃଢ଼ ପ୍ରତିବଦ୍ଧତା ଏବଂ ଆମର ସ୍ଥାୟୀ ବନ୍ଧୁତ୍ୱ ପ୍ରତି ଉତ୍ସର୍ଗ କରୁଛି ।

ବନ୍ଧୁଗଣ,

ଆଜିର ଆଲୋଚନାରେ, ଆମେ ସମସ୍ତ କ୍ଷେତ୍ରରେ ସହଯୋଗକୁ ସୁଦୃଢ଼ ​​କରିବାକୁ ସହମତ ହୋଇଛୁ । ଆମେ ଆଗାମୀ ପାଞ୍ଚ ବର୍ଷ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟକୁ ୨୦ ବିଲିୟନ ଡଲାରକୁ ବୃଦ୍ଧି କରିବାର ଲକ୍ଷ୍ୟ ରଖିଛୁ ।

ଫୁଟବଲ୍ ପାଇଁ ବ୍ରାଜିଲରେ ଉତ୍ସାହ ଦେଖିବାକୁ ମିଳେ, ଯେପରି କ୍ରିକେଟକୁ ଭାରତର ଲୋକମାନେ ଭଲ ପାଆନ୍ତି । ସୀମା ପାର କରି ବଲ ପଠାଇବା ହେଉ କିମ୍ବା ଗୋଲ ଭିତରକୁ ଯିବା, ଯେତେବେଳେ ଉଭୟ ଗୋଟିଏ ଦଳରେ ଥାଆନ୍ତି, ୨୦ ବିଲିୟନ ଡଲାରର ସହଭାଗୀତା ହାସଲ କରିବା କଷ୍ଟକର ନୁହେଁ । ଏକତ୍ରିତ ଭାବରେ, ଆମେ ଭାରତ-ମର୍କୋସୁର ପ୍ରିଫରେନ୍ସିଆଲ୍ ବାଣିଜ୍ୟ ଚୁକ୍ତିନାମା (ପିଟିଏ) କୁ ବିସ୍ତାର କରିବା ଉପରେ ମଧ୍ୟ କାମ କରିବୁ ।

ବନ୍ଧୁଗଣ,

ଶକ୍ତି କ୍ଷେତ୍ରରେ ଆମର ସହଯୋଗ ନିରନ୍ତର ବୃଦ୍ଧି ପାଇବାରେ ଲାଗିଛି । ଉଭୟ ଦେଶ ପରିବେଶ ଏବଂ ସ୍ୱଚ୍ଛ ଶକ୍ତିକୁ ପ୍ରମୁଖ ପ୍ରାଥମିକତା ଦେଇଆସିଛୁ । ଏହି କ୍ଷେତ୍ରରେ ସହଯୋଗ ବୃଦ୍ଧି କରିବା ପାଇଁ ଆଜି ସ୍ୱାକ୍ଷରିତ ଚୁକ୍ତିନାମା ଆମର ସବୁଜ ଲକ୍ଷ୍ୟକୁ ନୂତନ ଦିଗ ଏବଂ ଗତି ପ୍ରଦାନ କରିବ । ଚଳିତ ବର୍ଷ ଶେଷରେ ବ୍ରାଜିଲରେ ଆୟୋଜିତ ହେବାକୁ ଥିବା ଆଗାମୀ COP-30 ଶିଖର ସମ୍ମିଳନୀ ପାଇଁ ମୁଁ ରାଷ୍ଟ୍ରପତି ଲୁଲାଙ୍କୁ ମୋର ଶୁଭକାମନା ଜଣାଉଛି ।

ବନ୍ଧୁଗଣ,

ପ୍ରତିରକ୍ଷା କ୍ଷେତ୍ରରେ ଆମର ବର୍ଦ୍ଧିତ ସହଯୋଗ ଆମ ଉଭୟ ଦେଶ ମଧ୍ୟରେ ନିବିଡ଼ ପାରସ୍ପରିକ ବିଶ୍ୱାସକୁ ପ୍ରତିଫଳିତ କରେ । ଆମେ ଆମର ପ୍ରତିରକ୍ଷା ଶିଳ୍ପଗୁଡ଼ିକୁ ସଂଯୋଗ କରିବା ଏବଂ ଏହି ସହଭାଗୀତାକୁ ଆହୁରି ସୁଦୃଢ କରିବା ପାଇଁ ଆମର ଉଦ୍ୟମ ଜାରି ରଖିବୁ ।

କୃତ୍ରିମ ବୁଦ୍ଧିମତ୍ତା ଏବଂ ସୁପରକମ୍ପ୍ୟୁଟର କ୍ଷେତ୍ରରେ ଆମର ସହଯୋଗ ବ୍ୟାପକ ହେଉଛି । ଏହା ସମାବେଶୀ ବିକାଶ ଏବଂ ମାନବ-କୈନ୍ଦ୍ରିକ ନବସୃଜନ ପାଇଁ ଆମର ସମାନ ଦୃଷ୍ଟିକୋଣକୁ ପ୍ରତିଫଳିତ କରୁଛି ।

ଉଭୟ ପକ୍ଷ ବ୍ରାଜିଲରେ ୟୁପିଆଇ ଗ୍ରହଣ ଉପରେ ମଧ୍ୟ ଏକାଠି କାମ କରୁଛୁ । ଡିଜିଟାଲ୍ ସାର୍ବଜନୀନ ଭିତ୍ତିଭୂମି ଏବଂ ମହାକାଶ ଭଳି କ୍ଷେତ୍ରରେ ବ୍ରାଜିଲ ସହିତ ଭାରତର ସଫଳ ଅଭିଜ୍ଞତା ବାଣ୍ଟିଲେ ଆମେ ଖୁସି ଅନୁଭବ କରିବୁ ।

କୃଷି ଏବଂ ପଶୁପାଳନ କ୍ଷେତ୍ରରେ ଆମର ସହଯୋଗ ଅନେକ ଦଶନ୍ଧି ଧରି ଜାରି ରହିଛି । ଆମେ ଏବେ କୃଷି ଗବେଷଣା ଏବଂ ଖାଦ୍ୟ ପ୍ରକ୍ରିୟାକରଣ ଭଳି କ୍ଷେତ୍ରରେ ମଧ୍ୟ ଏକାଠି କାମ କରୁଛୁ । ସ୍ୱାସ୍ଥ୍ୟ କ୍ଷେତ୍ରରେ ମଧ୍ୟ, ଆମେ ଆମର ବିଜୟୀ ସହଯୋଗକୁ ବୃଦ୍ଧି କରୁଛୁ । ଆମେ ବ୍ରାଜିଲରେ ଆୟୁର୍ବେଦ ଏବଂ ପାରମ୍ପାରିକ ଔଷଧର ପ୍ରସାର ଉପରେ ମଧ୍ୟ ଗୁରୁତ୍ୱ ଦେଇଛୁ ।

ବନ୍ଧୁଗଣ,

ଲୋକ-ଲୋକ ମଧ୍ୟରେ ସମ୍ପର୍କ ଆମ ସମ୍ପର୍କର ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ । ଉଭୟ ଦେଶରେ କ୍ରୀଡା ପ୍ରତି ଆମର ସମନ୍ୱିତ ଆଗ୍ରହ ଆମକୁ ସଂଯୋଗ କରୁଥିବା ଏକ ନିବିଡ଼ ବନ୍ଧନ ଭାବରେ ମଧ୍ୟ କାର୍ଯ୍ୟ କରେ ।

ଆମେ ଭାରତ-ବ୍ରାଜିଲ ସମ୍ପର୍କ କାର୍ନିଭାଲ ପରି ସ୍ପନ୍ଦନଶୀଳ, ଫୁଟବଲ୍ ପରି ଉତ୍ସାହପୂର୍ଣ୍ଣ ଏବଂ ସାମ୍ବା ପରି ହୃଦୟ-ସଂଯୋଜିତ ହେଉ ବୋଲି କାମନା କରୁଛୁ - ଭିସା କାଉଣ୍ଟରର ଲମ୍ବା ଧାଡ଼ି ବିନା ! ଏହି ମନୋଭାବ ସହିତ, ବିଶେଷକରି ପର୍ଯ୍ୟଟକ, ଛାତ୍ର, କ୍ରୀଡାବିତ୍ ଏବଂ ବ୍ୟବସାୟୀଙ୍କ ପାଇଁ ଆମେ ଆମର ଦୁଇ ରାଷ୍ଟ୍ର ମଧ୍ୟରେ ଲୋକ-ଲୋକ ମଧ୍ୟରେ ଥିବା ସମ୍ପର୍କ ଆଦାନପ୍ରଦାନକୁ ସୁଗମ କରିବା ପାଇଁ ଏକାଠି କାମ କରିବୁ ।

ବନ୍ଧୁଗଣ,

ବିଶ୍ୱ ସ୍ତରରେ, ଭାରତ ଏବଂ ବ୍ରାଜିଲ ସର୍ବଦା ଘନିଷ୍ଠ ସମନ୍ୱୟରେ କାମ କରିଆସିଛନ୍ତି । ଦୁଇଟି ପ୍ରମୁଖ ଗଣତନ୍ତ୍ର ଭାବରେ, ଆମର ସହଯୋଗ କେବଳ ଗ୍ଲୋବାଲ୍ ସାଉଥ୍ ପାଇଁ ନୁହେଁ, ବରଂ ସମଗ୍ର ମାନବଜାତି ପାଇଁ ମଧ୍ୟ ପ୍ରାସଙ୍ଗିକ । ଆମେ ଦୃଢ଼ ଭାବରେ ବିଶ୍ୱାସ କରୁ ଯେ, ଗ୍ଲୋବାଲ୍ ସାଉଥ୍ ର ସମସ୍ୟା ଏବଂ ପ୍ରାଥମିକତାକୁ ବିଶ୍ୱ ମଞ୍ଚ ସମ୍ମୁଖକୁ ଆଣିବା ଆମର ନୈତିକ ଦାୟିତ୍ୱ ।

ଆଜି, ଯେତେବେଳେ ବିଶ୍ୱ ଉତ୍ତେଜନା ଏବଂ ଅନିଶ୍ଚିତତାର ସମୟ ଦେଇ ଗତି କରୁଛି ... ମୋର ବନ୍ଧୁ ଏହା ଉପରେ ବିସ୍ତୃତ ଭାବରେ ବର୍ଣ୍ଣନା କରିସାରିଛନ୍ତି ତେଣୁ ମୁଁ ଏହାକୁ ପୁନରାବୃତ୍ତି କରିବି ନାହିଁ ... ଭାରତ-ବ୍ରାଜିଲ ସହଭାଗୀତା ସ୍ଥିରତା ଏବଂ ସନ୍ତୁଳନର ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ ଭାବରେ ଠିଆ ହୋଇଛି । ଆମେ ସମ୍ପୂର୍ଣ୍ଣ ସହମତ ଯେ, ସମସ୍ତ ବିବାଦ ଆଲୋଚନା  କୂଟନୀତି ମାଧ୍ୟମରେ ସମାଧାନ କରାଯିବା ଉଚିତ ।

ଆତଙ୍କବାଦ ବିରୋଧ ଲଢ଼େଇରେ ଆମେ ଏକ ସାଧାରଣ ଆଭିମୁଖ୍ୟ ଗ୍ରହଣ କରୁ - ଶୂନ୍ୟ ସହନଶୀଳତା ଏବଂ ଶୂନ୍ୟ ଦ୍ୱୈତ ମାନଦଣ୍ଡ । ଆମେ ଦୃଢ଼ ଭାବରେ ବିଶ୍ୱାସ କରୁ ଯେ ଆତଙ୍କବାଦ କ୍ଷେତ୍ରରେ ଦ୍ୱୈତ ମାନଦଣ୍ଡର କୌଣସି ସ୍ଥାନ ନାହିଁ । ଆମେ ଆତଙ୍କବାଦ ଏବଂ ଏହାକୁ ସମର୍ଥନ କରୁଥିବା ଉଭୟଙ୍କୁ ଦୃଢ଼ ବିରୋଧ କରୁଛୁ ।

ମହାମହିମ,

ପୁଣି ଥରେ, ୧.୪ କୋଟି ଭାରତୀୟଙ୍କ ପକ୍ଷରୁ, ମୁଁ ଆପଣଙ୍କୁ ଏହି ସର୍ବୋଚ୍ଚ ଜାତୀୟ ସମ୍ମାନ ଏବଂ ଆପଣଙ୍କ ସ୍ଥାୟୀ ବନ୍ଧୁତା ପାଇଁ ହୃଦୟର ସହିତ କୃତଜ୍ଞତା ଜଣାଉଛି । ମୁଁ ଆପଣଙ୍କୁ ଭାରତ ଗସ୍ତ ପାଇଁ ନିମନ୍ତ୍ରଣ କରିବାର ଏହି ଅବସରର ସୁଯୋଗ ନେଉଛି ।

ଧନ୍ୟବାଦ।

"ମୁଇଟୋ ଓବ୍ରିଗାଡୋ!"

*****

MT