മധ്യപ്രദേശ് ഗവർണർ ശ്രീ മംഗുഭായ് പട്ടേൽ; നമ്മുടെ ബഹുമാന്യ മുഖ്യമന്ത്രി ശ്രീ മോഹൻ യാദവ് ജി; സാങ്കേതികവിദ്യയിലൂടെ ഞങ്ങളോടൊപ്പം ചേർന്ന കേന്ദ്രമന്ത്രിമാർ; വേദിയിൽ സന്നിഹിതരായ ഇൻഡോറിൽ നിന്നുള്ള തോഖൻ സാഹു ജി; ദാതിയയിൽ നിന്നുള്ള റാം മോഹൻ നായിഡു ജി; സത്‌നയിൽ നിന്നുള്ള മുരളീധർ മോഹോൾ ജി; സംസ്ഥാന ഉപമുഖ്യമന്ത്രിമാരായ ശ്രീ ജഗദീഷ് ദേവദാ ജി, ശ്രീ രാജേന്ദ്ര ശുക്ല ജി; ലോക്‌സഭയിലെ എന്റെ സഹപ്രവർത്തകൻ ശ്രീ വി ഡി ശർമ്മ ജി; മറ്റ് മന്ത്രിമാരേ, പൊതു പ്രതിനിധികളേ,  ഇവിടെ വൻതോതിൽ ഒത്തുകൂടിയിട്ടുള്ള എന്റെ പ്രിയപ്പെട്ട സഹോദരീ സഹോദരന്മാരേ! 

ഒന്നാമതായി, ഭാരതാംബയ്ക്കും ഭാരതത്തിന്റെ സ്ത്രീകൾക്കും മുന്നിൽ ഞാൻ പ്രണാമം അർപ്പിക്കുന്നു. ഇന്ന്, അമ്മമാരുടെയും സഹോദരിമാരുടെയും പെൺമക്കളുടെയും ഇത്രയും വലിയ ഒരു സമ്മേളനം ഞങ്ങൾക്ക് അനുഗ്രഹം നൽകാൻ ഇവിടെ എത്തിയിരിക്കുന്നു. നിങ്ങളെയെല്ലാം കാണാൻ അവസരം ലഭിച്ചതിൽ ഞാൻ ശരിക്കും ഭാഗ്യവാനാണ്. 

സഹോദരീ സഹോദരന്മാരേ,

ലോക്മാതാ ദേവി അഹല്യഭായ് ഹോൾക്കറുടെ 300-ാം ജന്മവാർഷികമാണിന്ന്. 140 കോടി ഇന്ത്യക്കാർക്ക് പ്രചോദനം ഉൾക്കൊണ്ട് രാഷ്ട്രനിർമ്മാണത്തിന്റെ മഹത്തായ ദൗത്യത്തിൽ സംഭാവന നൽകാനുള്ള ഒരു സുപ്രധാന അവസരമാണിത്. ജനങ്ങളെ സേവിക്കുന്നതിലും അവരുടെ ജീവിതം മെച്ചപ്പെടുത്തുന്നതിലുമാണ് യഥാർത്ഥ ഭരണം സ്ഥിതിചെയ്യുന്നതെന്ന് ദേവി അഹല്യഭായ് പറയാറുണ്ടായിരുന്നു. ഇന്നത്തെ പരിപാടി അവരുടെ ആഴമേറിയ ദർശനം മുന്നോട്ട് കൊണ്ടുപോകുന്നു. ഇൻഡോർ മെട്രോ ഇന്ന് ഉദ്ഘാടനം ചെയ്യപ്പെട്ടു, ദാതിയയിൽ നിന്നും സത്‌നയിൽ നിന്നും ഇപ്പോൾ വിമാന സർവീസുകൾ ആരംഭിച്ചു. ഈ പദ്ധതികൾ മധ്യപ്രദേശിലെ പൊതു സൗകര്യങ്ങൾ മെച്ചപ്പെടുത്തുകയും വികസനം ത്വരിതപ്പെടുത്തുകയും നിരവധി പുതിയ തൊഴിലവസരങ്ങൾ സൃഷ്ടിക്കുകയും ചെയ്യും. ഈ ശുഭദിനത്തിൽ, ഈ സുപ്രധാന വികസന മുന്നേറ്റങ്ങൾക്ക് നിങ്ങൾക്കും മുഴുവൻ മധ്യപ്രദേശ് സംസ്ഥാനത്തിനും ഞാൻ എന്റെ ഹൃദയംഗമമായ അഭിനന്ദനങ്ങൾ അറിയിക്കുന്നു.

സുഹൃത്തുക്കളേ,

ലോക്മാതാ ദേവി അഹല്യഭായ് ഹോൾക്കറിന്റെ പേര് തന്നെ ആഴമായ ആദരവ് ഉണർത്തുന്നു. അവരുടെ വ്യക്തിത്വത്തിന്റെ മഹത്വം വിവരിക്കാൻ വാക്കുകൾ പര്യാപ്തമല്ല. എത്ര പ്രതികൂല സാഹചര്യങ്ങൾ ഉണ്ടായാലും ഇച്ഛാശക്തിയും ഉറച്ച ദൃഢനിശ്ചയവും ഉണ്ടെങ്കിൽ ശ്രദ്ധേയമായ ഫലങ്ങൾ കൈവരിക്കാൻ കഴിയുമെന്ന ആശയത്തിന്റെ പ്രതീകമാണ് ദേവി അഹല്യഭായ്. 2.5 - 3 നൂറ്റാണ്ടുകൾക്ക് മുമ്പ്, നമ്മുടെ രാഷ്ട്രം കൊളോണിയൽ ഭരണത്തിൻ കീഴിലായിരുന്നപ്പോൾ, അവർ കൈവരിച്ച അസാധാരണമായ നേട്ടങ്ങളെക്കുറിച്ച്, തലമുറകൾക്ക് ശേഷവും  സംസാരിക്കുന്നത് തുടരുന്നു. ഇന്ന് അത്തരം നേട്ടങ്ങളെക്കുറിച്ച് പറയാൻ എളുപ്പമാണെങ്കിലും, ആ വെല്ലുവിളി നിറഞ്ഞ സമയങ്ങളിൽ അവ എളുപ്പമായിരുന്നില്ല.

സുഹൃത്തുക്കളേ, 

ലോകമാതാ അഹല്യബായ് ഒരിക്കലും ദൈവസേവനവും ജനസേവനവും വെവ്വേറെ കടമകളായി കണ്ടിരുന്നില്ല. അവർ എപ്പോഴും ഒരു ശിവലിംഗം കൂടെ കൊണ്ടുനടന്നിരുന്നുവെന്ന് പറയപ്പെടുന്നു. ഇത്രയും പ്രക്ഷുബ്ധമായ ഒരു കാലഘട്ടത്തിൽ ഒരു സംസ്ഥാനം നയിക്കുന്നത് മുൾക്കിരീടം ധരിക്കുന്നതിന് തുല്യമായിരുന്നു - ആ ഉത്തരവാദിത്തത്തിന്റെ ഭാരം ഒരാൾക്ക് ഊഹിക്കാവുന്നതേയുള്ളൂ. എന്നിരുന്നാലും, ലോക്മാതാ അഹല്യബായ് തന്റെ സംസ്ഥാനത്തിന്റെ വികസനത്തിന് ഒരു പുതിയ ദിശാബോധം നൽകി. ദരിദ്രരിൽ ഏറ്റവും ദരിദ്രരെപ്പോലും ശാക്തീകരിക്കുന്നതിനായി അവർ സ്വയം സമർപ്പിച്ചു. ഭാരതത്തിന്റെ പൈതൃകത്തിന്റെ ഉറച്ച സംരക്ഷകയായിരുന്നു ദേവി അഹല്യബായ്. നമ്മുടെ ക്ഷേത്രങ്ങൾ, തീർത്ഥാടന കേന്ദ്രങ്ങൾ, സാംസ്കാരിക സ്മാരകങ്ങൾ എന്നിവയ്ക്ക് ഭീഷണിയായ ഒരു സമയത്ത്, അവ സംരക്ഷിക്കാൻ ലോകമാതാ മുൻകൈയെടുത്തു. കാശി വിശ്വനാഥ ക്ഷേത്രം ഉൾപ്പെടെ ഇന്ത്യയിലുടനീളമുള്ള നിരവധി ക്ഷേത്രങ്ങളും പുണ്യസ്ഥലങ്ങളും അവർ പുനഃസ്ഥാപിക്കുകയും പുനർനിർമ്മിക്കുകയും ചെയ്തു. ലോകമാതാ അഹല്യഭായി വിവിധ വികസന പ്രവർത്തനങ്ങൾ വ്യാപകമായി നടത്തിയ കാശി നഗരത്തെ ഇപ്പോൾ സേവിക്കാൻ അവസരം ലഭിച്ചതിൽ ഞാൻ ഭാഗ്യവാനാണ്. ഇന്ന്, നിങ്ങൾ കാശി വിശ്വനാഥ ക്ഷേത്രം സന്ദർശിക്കുകയാണെങ്കിൽ, അവിടെ ദേവി അഹല്യഭായിയുടെ ഒരു പ്രതിമയും നിങ്ങൾക്ക് കാണാൻ കഴിയും.

സുഹൃത്തുക്കളേ,

ദരിദ്രർക്കും അരികുവൽക്കരിക്കപ്പെട്ടവർക്കും ഏറ്റവും മുൻഗണന നൽകുന്ന ഒരു മാതൃകാപരമായ ഭരണ മാതൃകയാണ് മാതാ അഹല്യബായി സ്വീകരിച്ചത്. തൊഴിലും സംരംഭകത്വവും പ്രോത്സാഹിപ്പിക്കുന്നതിനായി അവർ വിവിധ പദ്ധതികൾ ആരംഭിച്ചു. കൃഷിയെയും വനം അടിസ്ഥാനമാക്കിയുള്ള കുടിൽ വ്യവസായങ്ങളെയും കരകൗശല വസ്തുക്കളെയും അവർ പ്രോത്സാഹിപ്പിച്ചു. കൃഷിയെ പിന്തുണയ്ക്കുന്നതിനായി, അവർ ചെറിയ കനാലുകളുടെ ഒരു സങ്കീർണ്ണമായ ശൃംഖല നിർമ്മിച്ചു - മൂന്ന് നൂറ്റാണ്ടുകൾക്ക് മുമ്പ് അവർക്കുണ്ടായിരുന്ന ദീർഘവീക്ഷണം സങ്കൽപ്പിക്കുക. ജലസംരക്ഷണം പ്രോത്സാഹിപ്പിക്കുന്നതിനായി അവർ നിരവധി കുളങ്ങളും നിർമ്മിച്ചു. ഇന്ന്, "മഴവെള്ളം ശേഖരിക്കുക , ഓരോ തുള്ളിയും സംരക്ഷിക്കുക" എന്ന സന്ദേശം ഞങ്ങൾ ഊന്നിപ്പറയുന്നു. എന്നിരുന്നാലും, 250 മുതൽ 300 വർഷങ്ങൾക്ക് മുമ്പ് തന്നെ ദേവി അഹല്യബായി ഈ സന്ദേശം ഞങ്ങൾക്ക് നൽകിയിരുന്നു. കർഷകരുടെ വരുമാനം വർദ്ധിപ്പിക്കുന്നതിനായി അവർ പരുത്തിയും സുഗന്ധവ്യഞ്ജനങ്ങളും കൃഷി ചെയ്യുന്നതിനെ പ്രോത്സാഹിപ്പിച്ചു. ഇന്നും, നെല്ലിലോ കരിമ്പിലോ മാത്രം ഒതുങ്ങരുതെന്നും വിളകൾ വൈവിധ്യവത്കരിക്കണമെന്നും കർഷകരോട് ഞങ്ങൾ ആവർത്തിച്ച് അഭ്യർത്ഥിക്കുന്നു. രാജ്യത്തിന് ആവശ്യമായതെല്ലാം നാം വളർത്തണം. ആദിവാസി, നാടോടി സമൂഹങ്ങൾക്ക്, ഒഴിഞ്ഞുകിടക്കുന്ന ഭൂമി കൃഷിക്കായി ഉപയോഗിക്കുന്നതിനുള്ള പദ്ധതികൾ അവർ ആവിഷ്കരിച്ചു. ഇന്ന് ഇന്ത്യയുടെ രാഷ്ട്രപതിയായ ഒരു ആദിവാസി മകളുടെ നേതൃത്വത്തിൽ എന്റെ ആദിവാസി സഹോദരീസഹോദരന്മാരെ സേവിക്കാൻ കഴിഞ്ഞത് ഞാൻ ഭാഗ്യമായി കരുതുന്നു. ലോകപ്രശസ്തമായ മഹേശ്വരി സാരികളെ പ്രോത്സാഹിപ്പിക്കുന്നതിനായി ദേവി അഹല്യഭായി പുതിയ വ്യവസായങ്ങൾ സ്ഥാപിച്ചു. വൈദഗ്ധ്യത്തോടും കരകൗശല വൈദഗ്ധ്യത്തോടും അവർക്ക് അതിയായ വിലമതിപ്പുണ്ടായിരുന്നുവെന്ന് ചുരുക്കം ചിലർക്ക് മാത്രമേ അറിയൂ. ഗുജറാത്തിലെ ജുനാഗഡിൽ നിന്ന് ഏതാനും കുടുംബങ്ങളെ മഹേശ്വരിലേക്ക് കൊണ്ടുവന്ന് അവരെ ഒന്നിപ്പിച്ചു, മഹേശ്വരി സാരികളുടെ കരകൗശലവിദ്യ വികസിപ്പിച്ചെടുത്തു. 250 മുതൽ 300 വർഷങ്ങൾക്ക് മുമ്പ് അവർ സ്ഥാപിച്ച പാരമ്പര്യം നിരവധി കുടുംബങ്ങളുടെ ജീവിതത്തെ സമ്പന്നമാക്കിക്കൊണ്ടിരിക്കുകയാണ്, കൂടാതെ നമ്മുടെ നെയ്ത്തുകാർക്ക് അത് വളരെയധികം പ്രയോജനം ചെയ്തിട്ടുണ്ട്.

സുഹൃത്തുക്കളേ,

ദേവി അഹല്യഭായി ദൂരവ്യാപകമായ നിരവധി സാമൂഹിക പരിഷ്കാരങ്ങളുടെ പേരിൽ എന്നെന്നേക്കും ഓർമ്മിക്കപ്പെടും. ഇന്ന്, പെൺമക്കളുടെ നിയമപരമായ വിവാഹ പ്രായം ഉയർത്തുന്നതിനെക്കുറിച്ച് നമ്മൾ സംസാരിക്കുമ്പോൾ, നമ്മുടെ രാജ്യത്തെ ചില വ്യക്തികൾ അതിനെ മതേതരത്വത്തിന് ഭീഷണിയായി കാണുന്നു, അല്ലെങ്കിൽ മതവിശ്വാസങ്ങൾക്ക് വിരുദ്ധമായി കണക്കാക്കുന്നു. എന്നാൽ ദേവി അഹല്യഭായി ജിയെ നോക്കാം - നൂറ്റാണ്ടുകൾക്ക് മുമ്പ്, സ്ത്രീകളുടെ അന്തസ്സിനോടും കഴിവിനോടുമുള്ള ബഹുമാനം നിമിത്തം, ഒരു പെൺകുട്ടിയുടെ വിവാഹത്തിന് ഉചിതമായ പ്രായം ഏതാണെന്ന് അവർ ഇതിനകം തന്നെ ചിന്തിച്ചിരുന്നു. അവർ തന്നെ ചെറുപ്പത്തിൽ വിവാഹിതയായെങ്കിലും, പെൺമക്കളുടെ വികസനവും ശാക്തീകരണവും ഉറപ്പാക്കുന്ന പാതയെക്കുറിച്ച് അവർക്ക് വ്യക്തമായ ധാരണയുണ്ടായിരുന്നു. ദേവി അഹല്യഭായ് ജിയുടെ ദർശനം അതായിരുന്നു. സ്ത്രീകൾക്ക് സ്വത്തിൽ അവകാശം ഉണ്ടായിരിക്കണമെന്നും, ഭർത്താവിനെ അകാലത്തിൽ നഷ്ടപ്പെട്ട വിധവകൾക്ക് പുനർവിവാഹം അനുവദിക്കണമെന്നും അവർ വാദിച്ചു. അവരുടെ കാലത്ത്, അത്തരം കാര്യങ്ങൾ ചർച്ച ചെയ്യുന്നത് പോലും വളരെ ബുദ്ധിമുട്ടായിരുന്നു, എന്നിട്ടും ദേവി അഹല്യഭായ് ഈ പുരോഗമന പരിഷ്കാരങ്ങളെ ശക്തമായി പിന്തുണച്ചു. മാൾവ സൈന്യത്തിനുള്ളിൽ ഒരു പ്രത്യേക വനിതാ സംഘത്തെയും അവർ സംഘടിപ്പിച്ചു. പാശ്ചാത്യ ലോകത്തെ ആളുകൾക്ക് ഇതിനെക്കുറിച്ച് ഇപ്പോഴും അറിയില്ല. 2.5 - 3 നൂറ്റാണ്ടുകൾക്ക് മുമ്പ് ഭാരതത്തിന്റെ സൈന്യത്തിൽ സ്ത്രീകൾ സേവനമനുഷ്ഠിച്ചിരുന്നുവെന്ന് അറിയാതെ, സ്ത്രീകളുടെ അവകാശങ്ങളുടെ പേരിൽ അവർ പലപ്പോഴും നമ്മെ വിമർശിക്കുകയും ഇകഴ്ത്താൻ ശ്രമിക്കുകയും ചെയ്യുന്നു.

സുഹൃത്തുക്കളേ,

സ്ത്രീകളുടെ സംരക്ഷണത്തിനായി, ഗ്രാമങ്ങളിൽ 'നാരി സുരക്ഷാ ടോളിസ്' - സ്ത്രീ സുരക്ഷാ ഗ്രൂപ്പുകൾ - സ്ഥാപിച്ചു. സാരാംശത്തിൽ, മാതാ അഹല്യഭായ് രാഷ്ട്രനിർമ്മാണ ദൗത്യത്തിൽ സ്ത്രീകളുടെ വിലമതിക്കാനാവാത്ത പങ്കിനെ പ്രതീകപ്പെടുത്തുന്നു. ഇന്ന്, സമൂഹത്തിൽ ഇത്രയും ആഴത്തിലുള്ള മാറ്റം കൊണ്ടുവന്ന ദേവി അഹല്യഭായ് ജിയെ ഞാൻ ആഴമായ ആദരവോടെ വണങ്ങുന്നു. ഞാൻ അവരുടെ കാൽക്കൽ വണങ്ങുന്നു, അവർ എവിടെയായിരുന്നാലും, അവർ നമുക്കെല്ലാവർക്കും അനുഗ്രഹങ്ങൾ ചൊരിയുന്നത് തുടരട്ടെ എന്ന് പ്രാർത്ഥിക്കുന്നു.

സുഹൃത്തുക്കളേ,

ദേവി അഹല്യഭായി നടത്തിയ ഒരു ശക്തമായ പ്രസ്താവനയുണ്ട്, അത് നമുക്ക് എപ്പോഴും പ്രചോദനം നൽകും, അത് നാം ഒരിക്കലും മറക്കരുത്. അവരുടെ വാക്കുകളുടെ സാരാംശം ഇതായിരുന്നു: 'നമുക്ക് ലഭിക്കുന്നതെന്തും പൊതുജനങ്ങൾ നൽകുന്ന കടമാണ്, അത് തിരിച്ചടയ്ക്കേണ്ടത് നമ്മുടെ കടമയാണ്.' ഇന്ന്, നമ്മുടെ ഗവൺമെന്റ് ലോക്മാതാ അഹല്യഭായി ഉയർത്തിപ്പിടിക്കുന്ന ഈ മൂല്യങ്ങളാൽ നയിക്കപ്പെടുന്നു. "നാഗ്രിക് ദേവോ ഭവ" - പൗരൻ ദൈവമാണ് - നമ്മുടെ ഭരണത്തിന്റെ മന്ത്രമായി മാറിയിരിക്കുന്നു. നമ്മുടെ ഗവൺമെന്റ് അതിന്റെ വികസന തന്ത്രത്തിന്റെ കാതലായി സ്ത്രീകൾ നയിക്കുന്ന വികസനത്തെ പ്രതിഷ്ഠിക്കുന്നു. ഗവൺമെന്റിന്റെ എല്ലാ പ്രധാന പദ്ധതികളിലും അമ്മമാരും സഹോദരിമാരും പെൺമക്കളും കേന്ദ്രബിന്ദുവാണ്. ദരിദ്രർക്കായി 4 കോടി വീടുകൾ നിർമ്മിച്ചിട്ടുണ്ടെന്നും ഇവയിൽ മിക്കതും സ്ത്രീകളുടെ - നമ്മുടെ അമ്മമാരുടെയും സഹോദരിമാരുടെയും - പേരുകളിൽ രജിസ്റ്റർ ചെയ്തിട്ടുണ്ടെന്നും നിങ്ങൾക്കറിയാം, അവ അവർക്ക് നിയമപരമായ ഉടമസ്ഥാവകാശം നൽകുന്നു. ഈ സ്ത്രീകളിൽ പലർക്കും, അവരുടെ ജീവിതത്തിൽ ആദ്യമായാണ് ഒരു സ്വത്ത് അവരുടെ പേരിൽ രജിസ്റ്റർ ചെയ്യുന്നത്. ഇതിനർത്ഥം നമ്മുടെ രാജ്യത്തെ കോടിക്കണക്കിന് സ്ത്രീകൾ ആദ്യമായി വീട്ടുടമസ്ഥരായി എന്നാണ്.

സുഹൃത്തുക്കളേ,

ഇന്ന്, എല്ലാ വീട്ടിലും പൈപ്പ് വെള്ളം ലഭിക്കുന്നുണ്ടെന്ന് ഉറപ്പാക്കാൻ ​ഗവൺമെന്റ് പ്രവർത്തിക്കുന്നു, അങ്ങനെ നമ്മുടെ അമ്മമാർക്കും സഹോദരിമാർക്കും വെള്ളം കൊണ്ടുവരാനുള്ള ബുദ്ധിമുട്ട് ഒഴിവാക്കാനും നമ്മുടെ പെൺമക്കൾക്ക് പഠനത്തിൽ ശ്രദ്ധ കേന്ദ്രീകരിക്കാനും കഴിയും. മുൻകാലങ്ങളിൽ, കോടിക്കണക്കിന് സ്ത്രീകൾക്ക് വൈദ്യുതി, എൽപിജി ഗ്യാസ്, ടോയ്‌ലറ്റുകൾ തുടങ്ങിയ അടിസ്ഥാന സൗകര്യങ്ങൾ ലഭ്യമല്ലായിരുന്നു. ഈ സൗകര്യങ്ങൾ ഉറപ്പാക്കാൻ നമ്മുടെ ​ഗവൺമെന്റ് ശ്രമിച്ചിട്ടുണ്ട്. ഇവ വെറും സൗകര്യങ്ങൾ മാത്രമല്ല; നമ്മുടെ അമ്മമാരോടും സഹോദരിമാരോടും ഉള്ള ബഹുമാനത്തിന്റെ ആത്മാർത്ഥമായ പ്രകടനമാണിത്. ദരിദ്ര കുടുംബങ്ങളിൽ നിന്നും ഗ്രാമപ്രദേശങ്ങളിൽ നിന്നുമുള്ള സ്ത്രീകൾ നേരിടുന്ന ദൈനംദിന പോരാട്ടങ്ങളിൽ പലതും ഈ നടപടികൾ ലഘൂകരിച്ചിട്ടുണ്ട്.

സുഹൃത്തുക്കളേ,

മുൻകാലങ്ങളിൽ, പല സ്ത്രീകളും അവരുടെ രോഗങ്ങൾ മറച്ചുവെക്കാൻ നിർബന്ധിതരായിരുന്നു. ഗർഭകാലത്ത് പോലും, ചികിത്സാ ചെലവുകൾ കുടുംബത്തിന് ഒരു ഭാരമാകുമെന്ന് ഭയന്ന് അവർ ആശുപത്രിയിൽ പോകുന്നത് ഒഴിവാക്കി. തൽഫലമായി, അവർ നിശബ്ദമായി വേദന സഹിച്ചു. ആയുഷ്മാൻ ഭാരത് യോജന അവരെ ഈ ആശങ്കയിൽ നിന്ന് മോചിപ്പിച്ചു. ഇപ്പോൾ, അവർക്കും 5 ലക്ഷം രൂപ വരെ വിലയുള്ള സൗജന്യ ആശുപത്രി ചികിത്സ ലഭ്യമാണ്.

സുഹൃത്തുക്കളേ,

വിദ്യാഭ്യാസത്തിനും ആരോഗ്യ സംരക്ഷണത്തിനും ഒപ്പം, സ്ത്രീ ശാക്തീകരണത്തിനുള്ള ഏറ്റവും നിർണായകമായ വശങ്ങളിലൊന്ന് വരുമാനമുണ്ടാക്കലാണ്. ഒരു സ്ത്രീ സ്വന്തമായി പണം സമ്പാദിക്കുമ്പോൾ, വീട്ടിലെ അവളുടെ ആത്മാഭിമാനം വർദ്ധിക്കുകയും കുടുംബ തീരുമാനങ്ങളിൽ അവളുടെ പങ്കാളിത്തം കൂടുതൽ പ്രാധാന്യമർഹിക്കുകയും ചെയ്യുന്നു. കഴിഞ്ഞ പതിനൊന്ന് വർഷമായി, ഭാരതത്തിലെ സ്ത്രീകളെ സാമ്പത്തികമായി ശാക്തീകരിക്കുന്നതിനായി നമ്മുടെ ​ഗവൺമെന്റ് നിരന്തരം പ്രവർത്തിച്ചിട്ടുണ്ട്. ഒന്ന് സങ്കൽപ്പിക്കുക - 2014 ന് മുമ്പ്, നിങ്ങൾ എന്നെ സേവനത്തിന്റെ ഉത്തരവാദിത്തം ഏൽപ്പിക്കുന്നതിന് മുമ്പ്, രാജ്യത്തെ 30 കോടിയിലധികം സ്ത്രീകൾക്ക് ഒരു ബാങ്ക് അക്കൗണ്ട് പോലും ഉണ്ടായിരുന്നില്ല. നമ്മുടെ സർക്കാർ ജൻ ധൻ യോജന ആരംഭിക്കുകയും അവർക്കെല്ലാവർക്കും ബാങ്ക് അക്കൗണ്ടുകൾ തുറക്കുകയും ചെയ്തു. ഈ അക്കൗണ്ടുകൾ വഴി, വിവിധ പദ്ധതികളിൽ നിന്നുള്ള ഫണ്ട് ഇപ്പോൾ ​ഗവൺമെന്റ് നേരിട്ട് അവരുടെ കൈകളിലേക്ക് മാറ്റുന്നു. ഇന്ന്, ഗ്രാമങ്ങളിലോ നഗരങ്ങളിലോ താമസിക്കുന്നവരായാലും, സ്ത്രീകൾ സ്വയം തൊഴിൽ ഏറ്റെടുക്കുകയും ഉപജീവനമാർഗം കണ്ടെത്തുകയും സാമ്പത്തികമായി സ്വതന്ത്രരാകുകയും ചെയ്യുന്നു. 'മുദ്ര യോജന'യിലൂടെ, അവർക്ക് ഈട് രഹിത വായ്പകൾ ലഭിക്കുന്നു. മുദ്ര പദ്ധതിയുടെ ഗുണഭോക്താക്കളിൽ 75% ത്തിലധികവും നമ്മുടെ സ്ത്രീകളാണ്.

സുഹൃത്തുക്കളേ,

ഇന്ന്, രാജ്യത്തുടനീളമുള്ള 10 കോടി സ്ത്രീകൾ സ്വയം സഹായ ഗ്രൂപ്പുകളുമായി ബന്ധപ്പെട്ടിരിക്കുന്നു, വിവിധ സാമ്പത്തിക പ്രവർത്തനങ്ങളിൽ ഏർപ്പെടുന്നു. പുതിയ വരുമാന സ്രോതസ്സുകൾ സൃഷ്ടിക്കുന്നതിൽ ​ഗവൺമെന്റ് ഈ സ്ത്രീകളെ സഹായിക്കുന്നു, നിരവധി ലക്ഷം രൂപയുടെ പിന്തുണ വാഗ്ദാനം ചെയ്യുന്നു. മൂന്ന് കോടി സ്ത്രീകളെ അത്തരം ലഖ്പതി ദീദികളാക്കാൻ ഞങ്ങൾ ദൃഢനിശ്ചയം ചെയ്തിട്ടുണ്ട്. 1.5 കോടിയിലധികം സഹോദരിമാർ ഇതിനകം ഈ നാഴികക്കല്ല് കൈവരിച്ചിട്ടുണ്ടെന്ന് പങ്കിടുന്നതിൽ എനിക്ക് സന്തോഷമുണ്ട്. ഓരോ ഗ്രാമത്തിലും, ബാങ്ക് സഖിമാർ ഇപ്പോൾ ആളുകളെ ബാങ്കിംഗ് സേവനങ്ങളുമായി ബന്ധിപ്പിക്കുന്നു. 'ബീമ സഖിമാരെ' പരിശീലിപ്പിക്കുന്നതിനുള്ള ഒരു കാമ്പെയ്‌നും ​ഗവൺമെന്റ് ആരംഭിച്ചിട്ടുണ്ട്. രാജ്യത്തുടനീളം ഇൻഷുറൻസ് പരിരക്ഷ നൽകുന്നതിൽ നമ്മുടെ സഹോദരിമാരും പെൺമക്കളും ഒരു പ്രധാന പങ്ക് വഹിക്കുന്നു.

സുഹൃത്തുക്കളേ,

പുതിയ സാങ്കേതികവിദ്യയിലേക്ക് സ്ത്രീകൾ പ്രവേശിക്കുന്നതിൽ നിന്ന് ഒഴിവാക്കപ്പെട്ടിരുന്ന ഒരു കാലമുണ്ടായിരുന്നു. ഇന്ന്, നമ്മുടെ രാഷ്ട്രം ആ കാലഘട്ടത്തെ വളരെ പിന്നിലാക്കുന്നു. ആധുനിക സാങ്കേതികവിദ്യയിൽ നമ്മുടെ സഹോദരിമാരും പെൺമക്കളും നേതൃത്വം വഹിക്കുന്നുണ്ടെന്ന് ഉറപ്പാക്കാൻ ​ഗവൺമെന്റ് പ്രവർത്തിക്കുന്നു. ഉദാഹരണത്തിന്, കൃഷിയിൽ, നമ്മൾ ഒരു ഡ്രോൺ വിപ്ലവത്തിന് സാക്ഷ്യം വഹിക്കുന്നു, നമ്മുടെ ഗ്രാമീണ സ്ത്രീകൾ മുൻപന്തിയിലാണ്. 'നമോ ഡ്രോൺ ദീദി' സംരംഭം ഗ്രാമീണ സ്ത്രീകളെ ശാക്തീകരിക്കുകയും അവരുടെ വരുമാനം വർദ്ധിപ്പിക്കുകയും അവരുടെ സമൂഹങ്ങളിൽ അവർക്ക് അംഗീകാരം നേടുകയും ചെയ്യുന്നു.

സുഹൃത്തുക്കളേ,

നമ്മുടെ പെൺമക്കളുടെ എണ്ണം വർദ്ധിച്ചുവരികയാണ്, ശാസ്ത്രത്തിലും ഗണിതത്തിലും പഠനം നടത്തുന്ന യുവതികളുടെ എണ്ണം സ്ഥിരമായി വർദ്ധിച്ചുകൊണ്ടിരിക്കുകയാണ്. നമ്മുടെ എല്ലാ പ്രധാന ബഹിരാകാശ ദൗത്യങ്ങളിലും, നിരവധി അമ്മമാരും സഹോദരിമാരും പെൺമക്കളും ശാസ്ത്രജ്ഞരായി സംഭാവന ചെയ്യുന്നു. നൂറിലധികം വനിതാ ശാസ്ത്രജ്ഞരും എഞ്ചിനീയർമാരും പങ്കാളികളായ ചന്ദ്രയാൻ -3 ദൗത്യത്തിൽ രാജ്യം മുഴുവൻ അഭിമാനിക്കുന്നു. അതുപോലെ, സ്റ്റാർട്ടപ്പുകളുടെ യുഗത്തിൽ, നമ്മുടെ പെൺമക്കൾ അസാധാരണമായ കഴിവുകൾ പ്രകടിപ്പിക്കുന്നുണ്ട്. രാജ്യത്തെ ഏകദേശം 45% സ്റ്റാർട്ടപ്പുകളിലും, കുറഞ്ഞത് ഒരു ഡയറക്ടറെങ്കിലും ഒരു സ്ത്രീയാണ് - നമ്മുടെ സഹോദരിമാരിൽ ഒരാളോ പെൺമക്കളോ. ഈ എണ്ണം ക്രമാനുഗതമായി വർദ്ധിച്ചുകൊണ്ടിരിക്കുന്നു.

സുഹൃത്തുക്കളേ, 

നയരൂപീകരണത്തിൽ പെൺകുട്ടികളുടെയും സ്ത്രീകളുടെയും പങ്കാളിത്തം വർദ്ധിപ്പിക്കുന്നതിന് ഞങ്ങൾ പ്രതിജ്ഞാബദ്ധരാണ്. കഴിഞ്ഞ ദശകത്തിൽ, ഈ ദിശയിൽ നിരവധി സുപ്രധാന നടപടികൾ സ്വീകരിച്ചിട്ടുണ്ട്. ഞങ്ങളുടെ ഗവൺമെന്റിന് കീഴിൽ ആദ്യമായി ഒരു മുഴുവൻ സമയ വനിതാ പ്രതിരോധ മന്ത്രിയെ നിയമിച്ചു. ആദ്യമായി, രാജ്യത്തിന് ഒരു വനിതാ ധനമന്ത്രിയുണ്ട്. പഞ്ചായത്ത് മുതൽ പാർലമെന്റ് വരെ, വനിതാ പ്രതിനിധികളുടെ എണ്ണം ക്രമാനുഗതമായി വർദ്ധിച്ചുകൊണ്ടിരിക്കുകയാണ്. നിലവിലെ പാർലമെന്റിൽ, 75 വനിതാ പാർലമെന്റ് അംഗങ്ങളുണ്ട്. എന്നിരുന്നാലും, ഈ പങ്കാളിത്തം കൂടുതൽ മുന്നോട്ട് കൊണ്ടുപോകാൻ ഞങ്ങൾ ലക്ഷ്യമിടുന്നു. ഈ കാഴ്ചപ്പാടോടെയാണ് 'നാരി ശക്തി വന്ദൻ അധിനിയം' നടപ്പിലാക്കിയത്. വർഷങ്ങളായി മുടങ്ങിക്കിടന്ന  നിയമനിർമ്മാണമാണ് ഇപ്പോൾ ഞങ്ങളുടെ ഗവൺമെന്റ് പാസാക്കിയത്. തൽഫലമായി, പാർലമെന്റിലും സംസ്ഥാന നിയമസഭകളിലും വനിതാ സംവരണം യാഥാർത്ഥ്യമായി. സാരാംശത്തിൽ, എല്ലാ തലങ്ങളിലും, എല്ലാ മേഖലകളിലും നമ്മുടെ സഹോദരിമാരെയും പെൺമക്കളെയും ശാക്തീകരിക്കാൻ ബിജെപി ​ഗവൺമെന്റ് പ്രവർത്തിക്കുന്നു.

സുഹൃത്തുക്കളേ,

ഭാരതം സംസ്കാരത്തിന്റെയും പാരമ്പര്യത്തിന്റെയും നാടാണ്. നമ്മുടെ പാരമ്പര്യങ്ങളിൽ, സിന്ദൂരം (കുഞ്ചൻ) സ്ത്രീത്വത്തിന്റെയും സ്ത്രീശക്തിയുടെയും ആദരണീയമായ പ്രതീകമാണ്. ശ്രീരാമനോട് അങ്ങേയറ്റം ഭക്തനായ ഹനുമാൻ സിന്ദൂരം ധരിച്ചാണ് ചിത്രീകരിച്ചിരിക്കുന്നത്. ദേവിയെ ആരാധിക്കുമ്പോൾ നമ്മൾ സിന്ദൂരം അർപ്പിക്കുന്നു. ഇന്ന്, ഈ സിന്ദൂരം ഭാരതത്തിന്റെ ധീരതയുടെയും പ്രതീകമായി മാറിയിരിക്കുന്നു.

സുഹൃത്തുക്കളേ,

പഹൽഗാമിൽ, തീവ്രവാദികൾ ഇന്ത്യക്കാരുടെ രക്തം ചിന്തുക മാത്രമല്ല, നമ്മുടെ സംസ്കാരത്തിനെതിരെയും ആക്രമണം അഴിച്ചുവിട്ടു. അവർ നമ്മുടെ സമൂഹത്തിൽ ഭിന്നത വിതയ്ക്കാൻ ശ്രമിച്ചു. ഏറ്റവും പ്രധാനമായി, ഈ തീവ്രവാദികൾ ഭാരതത്തിലെ സ്ത്രീകളെ നേരിട്ട് വെല്ലുവിളിച്ചു. ആ വെല്ലുവിളി തന്നെ ഭീകരർക്കും അവരെ പിന്തുണയ്ക്കുന്നവർക്കും മരണമണി മുഴക്കി. ഭാരതത്തിന്റെ ചരിത്രത്തിലെ ഏറ്റവും വലുതും വിജയകരവുമായ ഭീകരവിരുദ്ധ ഓപ്പറേഷനായി 'ഓപ്പറേഷൻ സിന്ദൂർ' നിലകൊള്ളുന്നു. നമ്മുടെ സായുധ സേന ആഴത്തിൽ ആക്രമണം നടത്തി - ശത്രു പ്രദേശത്തേക്ക് നൂറുകണക്കിന് കിലോമീറ്റർ തുളച്ചുകയറി പാകിസ്ഥാൻ സൈന്യം പോലും പ്രതീക്ഷിക്കാത്ത പ്രദേശങ്ങളിലെ തീവ്രവാദ ഒളിത്താവളങ്ങൾ ഇല്ലാതാക്കി. ഈ ഓപ്പറേഷൻ വ്യക്തമായ ഒരു സന്ദേശം നൽകി: തീവ്രവാദത്തിലൂടെയുള്ള നിഴൽ യുദ്ധങ്ങളുടെ യുഗം അവസാനിച്ചു. ഇനി മുതൽ, നമ്മൾ പ്രതിരോധിക്കുക മാത്രമല്ല - തിരിച്ചടിക്കുകയും ചെയ്യും. ഭീകരതയ്ക്ക് അഭയം നൽകുകയും പിന്തുണയ്ക്കുകയും ചെയ്യുന്നവരുടെ ഹൃദയങ്ങളിൽ നമ്മൾ ആക്രമണം നടത്തും, അവർക്ക് വലിയ വില നൽകേണ്ടിവരും. ഇന്ന്, 140 കോടി ഇന്ത്യക്കാരുടെ ഏകീകൃത ശബ്ദമായ ഓരോ ഇന്ത്യൻ പൗരനും പ്രഖ്യാപിക്കുന്നു: "നിങ്ങൾ ഒരു വെടിയുതിർത്താൽ, തിരിച്ച് വെടിയുണ്ടകളുടെ വർഷത്തിന് കാത്തിരിക്കൂ."

സുഹൃത്തുക്കളേ, 

ഓപ്പറേഷൻ സിന്ദൂർ നമ്മുടെ സ്ത്രീകളുടെ ശക്തിയുടെ ശക്തമായ പ്രതീകമായി മാറിയിരിക്കുന്നു. ഈ പ്രവർത്തനത്തിൽ അതിർത്തി സുരക്ഷാ സേന (ബിഎസ്എഫ്) വഹിച്ച ഗണ്യമായ പങ്കിനെക്കുറിച്ച് നമുക്കെല്ലാവർക്കും അറിയാം. ജമ്മു മുതൽ പഞ്ചാബ്, രാജസ്ഥാൻ, ഗുജറാത്ത് എന്നിവയുടെ അതിർത്തികൾ വരെ, നമ്മുടെ ബിഎസ്എഫ് പെൺമക്കൾ മുൻനിരയിൽ നിന്നു, നമ്മുടെ രാഷ്ട്രത്തെ ധൈര്യത്തോടെ പ്രതിരോധിച്ചു. അതിർത്തി കടന്നുള്ള വെടിവയ്പ്പിനോട് അവർ നിർണ്ണായകമായി പ്രതികരിച്ചു. കമാൻഡ് ആൻഡ് കൺട്രോൾ സെന്ററുകൾ മുതൽ ശത്രു പോസ്റ്റുകളുടെ നാശം വരെ, ബിഎസ്എഫിന്റെ ധീരരായ പെൺമക്കൾ ശ്രദ്ധേയമായ വീര്യം പ്രകടിപ്പിച്ചു.

സുഹൃത്തുക്കളേ,

ഇന്ന്, ദേശീയ പ്രതിരോധ മേഖലയിൽ ഭാരതത്തിന്റെ പെൺമക്കളുടെ അസാധാരണ കഴിവുകൾ ലോകം കാണുന്നു. ഈ മേഖലയിൽ അവരെ ശാക്തീകരിക്കുന്നതിന് കഴിഞ്ഞ ദശകത്തിൽ ​ഗവൺമെന്റ്ൗ നിരവധി നടപടികൾ സ്വീകരിച്ചിട്ടുണ്ട്. സ്കൂളുകൾ മുതൽ യുദ്ധക്കളം വരെ, രാജ്യം ഇപ്പോൾ അതിന്റെ പെൺമക്കളുടെ ധൈര്യത്തിലും ശക്തിയിലും അഭൂതപൂർവമായ വിശ്വാസം അർപ്പിക്കുന്നു. ആദ്യമായി, നമ്മുടെ സായുധ സേന പെൺകുട്ടികൾക്കായി സൈനിക് സ്കൂളുകളുടെ വാതിലുകൾ തുറന്നിട്ടിരിക്കുന്നു. 2014 ന് മുമ്പ്, നാഷണൽ കേഡറ്റ് കോർപ്സിലെ (എൻ‌സി‌സി) കേഡറ്റുകളിൽ 25% മാത്രമേ പെൺകുട്ടികളായിരുന്നുള്ളൂ. ഇന്ന്, ആ കണക്ക് 50% ത്തിലേക്ക് അടുക്കുന്നു. ഇന്നലെ, മറ്റൊരു ചരിത്ര നാഴികക്കല്ല് പിന്നിട്ടു. വനിതാ കേഡറ്റുകളുടെ ആദ്യ ബാച്ച് നാഷണൽ ഡിഫൻസ് അക്കാദമിയിൽ (എൻ‌ഡി‌എ) നിന്ന് ബിരുദം നേടിയതായി നിങ്ങൾ പത്രങ്ങളിൽ കണ്ടിരിക്കണം. ഇന്ന്, കരസേന, നാവികസേന, വ്യോമസേന എന്നിവയിൽ മുൻനിരയിൽ സ്ത്രീകളെ വിന്യസിക്കുന്നു. യുദ്ധവിമാനങ്ങൾ മുതൽ 'ഐ‌എൻ‌എസ് വിക്രാന്ത്' എന്ന യുദ്ധക്കപ്പൽ വരെ, വനിതാ ഉദ്യോഗസ്ഥർ നിർഭയമായി അവരുടെ ധൈര്യവും കഴിവും പ്രകടിപ്പിക്കുന്നു.

സുഹൃത്തുക്കളേ,

നമ്മുടെ നാവികസേനയുടെ ധീരരായ പെൺമക്കളുടെ ധീരതയുടെ സമീപകാലവും പ്രചോദനാത്മകവുമായ ഒരു ഉദാഹരണം നമുക്കുണ്ട്. 'നാവിക സാഗർ പരിക്രമ' എടുത്തുകാണിക്കാൻ ഞാൻ ആഗ്രഹിക്കുന്നു. ഇന്ത്യൻ നാവികസേനയിലെ രണ്ട് ധീരരായ വനിതാ ഉദ്യോഗസ്ഥർ ഏകദേശം 250 ദിവസം നീണ്ടുനിൽക്കുന്ന ഒരു കടൽ യാത്ര നടത്തി, ലോകം ചുറ്റി. ഈ അത്ഭുതകരമായ യാത്ര പൂർത്തിയാക്കിയത് എഞ്ചിൻ അല്ല, കാറ്റിന്റെ ശക്തിയാൽ പ്രവർത്തിക്കുന്ന ഒരു ബോട്ടിലായിരുന്നു. ഒന്ന് സങ്കൽപ്പിച്ചു നോക്കൂ - 250 ദിവസം കടലിൽ, ആഴ്ചകളോളം കര കാണാതെ, കഠിനമായ കൊടുങ്കാറ്റുകളും പ്രക്ഷുബ്ധമായ കാലാവസ്ഥയും നേരിട്ടുകൊണ്ട്. എന്നിരുന്നാലും, അവർ എല്ലാ വെല്ലുവിളികളെയും അതിജീവിച്ചു. എത്ര ശക്തമായ തടസ്സമാണെങ്കിലും, ഭാരതത്തിന്റെ പുത്രിമാർക്ക് അതിനെ കീഴടക്കാനുള്ള ശക്തിയുണ്ടെന്നതിന്റെ തെളിവാണിത്.

സുഹൃത്തുക്കളേ,

നക്സലൈറ്റ് കലാപത്തെ ചെറുക്കുകയോ അതിർത്തി കടന്നുള്ള ഭീകരതയെ നേരിടുകയോ ആകട്ടെ, ഇന്ന്, നമ്മുടെ പെൺമക്കൾ രാജ്യത്തെ സംരക്ഷിക്കുന്നതിൽ ഒരു ശക്തമായ കവചമായി മാറുകയാണ്. ദേവി അഹല്യയുടെ ഈ പുണ്യഭൂമിയിൽ നിന്ന്, ഭാരതത്തിലെ സ്ത്രീകൾക്ക് ഞാൻ വീണ്ടും എന്റെ ആദരപൂർവ്വമായ അഭിവാദ്യം അർപ്പിക്കുന്നു.

സുഹൃത്തുക്കളേ, 

ദേവി അഹല്യ വികസന പ്രവർത്തനങ്ങൾ ഏറ്റെടുക്കുക മാത്രമല്ല, നമ്മുടെ സമ്പന്നമായ സാംസ്കാരിക പൈതൃകം സംരക്ഷിക്കുകയും ചെയ്തു. ഇന്നത്തെ ഭാരതവും വികസനത്തിന്റെയും പൈതൃകത്തിന്റെയും ഇരട്ട പാതകളിലൂടെ മുന്നേറുകയാണ്. രാജ്യത്തുടനീളം ആധുനിക അടിസ്ഥാന സൗകര്യങ്ങൾ നിർമ്മിക്കുന്നതിന്റെ വേഗതയുടെ തെളിവാണ് ഇന്നത്തെ പരിപാടി. ഇന്ന്, മധ്യപ്രദേശിന് ആദ്യത്തെ മെട്രോ സർവീസ് ലഭിച്ചു. ശുചിത്വത്തിന് ഇതിനകം ആഗോളതലത്തിൽ പ്രശംസിക്കപ്പെട്ട ഇൻഡോർ, ഇപ്പോൾ മെട്രോ കണക്റ്റിവിറ്റിക്കും പേരുകേട്ടതായിരിക്കും. ഭോപ്പാലിലും മെട്രോ ജോലികൾ വേഗത്തിൽ പുരോഗമിക്കുന്നു. മധ്യപ്രദേശിലുടനീളം, റെയിൽവേ മേഖലയിൽ വിപുലമായ പ്രവർത്തനങ്ങൾ നടക്കുന്നു. കുറച്ച് ദിവസങ്ങൾക്ക് മുമ്പ്, രത്ലം-നാഗ്ദ റൂട്ട് നാല് ലൈനുകളാക്കി മാറ്റാൻ കേന്ദ്ര ​ഗവൺമെന്റ് അംഗീകാരം നൽകി. ഇത് കൂടുതൽ ട്രെയിനുകൾ ഓടിക്കാൻ അനുവദിക്കുകയും മേഖലയിലെ തിരക്ക് കുറയ്ക്കുകയും ചെയ്യും. ഇൻഡോർ–മൻമാഡ് റെയിൽവേ പദ്ധതിക്കും കേന്ദ്ര​ഗവൺമെന്റ് അംഗീകാരം നൽകിയിട്ടുണ്ട്.

സുഹൃത്തുക്കളേ,

മധ്യപ്രദേശിലെ ദാതിയയും സത്‌നയും ഇപ്പോൾ വ്യോമയാന ശൃംഖലയിൽ സംയോജിപ്പിച്ചിരിക്കുന്നു. ഈ രണ്ട് വിമാനത്താവളങ്ങളും ബുന്ദേൽഖണ്ഡ്, വിന്ധ്യ മേഖലകളിലുടനീളമുള്ള വ്യോമഗതാഗതം ഗണ്യമായി വർദ്ധിപ്പിക്കും. ഇത് മാ പീതാംബര, മാ ശാരദാ ദേവി, ആദരണീയ ചിത്രകൂട് ധാം എന്നീ പുണ്യസ്ഥലങ്ങൾ സന്ദർശിക്കുന്നത് കൂടുതൽ സൗകര്യപ്രദമാക്കും.

സുഹൃത്തുക്കളേ,

ഭാരതം അതിന്റെ ചരിത്രത്തിലെ ഒരു നിർണായക ഘട്ടത്തിലാണ് - നമ്മുടെ സുരക്ഷ ശക്തിപ്പെടുത്തുകയും, നമ്മുടെ കഴിവുകൾ വർദ്ധിപ്പിക്കുകയും, എല്ലാ തലങ്ങളിലും നമ്മുടെ സാംസ്കാരിക സ്വത്വം സംരക്ഷിക്കുകയും ചെയ്യേണ്ട ഒരു സമയമാണിത്. ഇത് നേടുന്നതിന്, നമ്മുടെ സ്ത്രീകൾ - നമ്മുടെ അമ്മമാർ, സഹോദരിമാർ, പെൺമക്കൾ - എന്നിവരുടെ സംഭാവന പരമപ്രധാനമാണ്. ലോക്മാതാ ദേവി അഹല്യബായിയിൽ നിന്ന് ഞങ്ങൾ പ്രചോദനം ഉൾക്കൊള്ളുന്നു. റാണി ലക്ഷ്മിഭായി, റാണി ദുർഗ്ഗാവതി, റാണി കമലപതി, അവന്തിഭായി ലോധി, കിത്തൂരിലെ റാണി ചെന്നമ്മ, റാണി ഗൈഡിൻലിയു, വേലു നാച്ചിയാർ, സാവിത്രിഭായി ഫൂലെ എന്നിവരുടെ പേരുകൾ - നമ്മുടെ ഹൃദയങ്ങളെ വളരെയധികം അഭിമാനത്താൽ നിറയ്ക്കുന്നു. ലോക്മാതാ അഹല്യബായിയുടെ 300-ാം ജന്മവാർഷികം വരും തലമുറകൾക്കായി കൂടുതൽ ശക്തവും കരുത്തുറ്റതുമായ ഒരു ഭാരതം കെട്ടിപ്പടുക്കാൻ നമ്മെ പ്രചോദിപ്പിക്കുന്നത് തുടരട്ടെ. ഈ ദൃഢനിശ്ചയത്തോടെ, ഞാൻ ഒരിക്കൽ കൂടി നിങ്ങൾക്കെല്ലാവർക്കും എന്റെ ഹൃദയംഗമമായ ആശംസകൾ അറിയിക്കുന്നു.

ഇപ്പോൾ, നിങ്ങളുടെ ത്രിവർണ്ണ പതാക ഉയർത്തി എന്നോടൊപ്പം ഇങ്ങനെ പറയൂ:

ഭാരത് മാതാ കീ ജയ്!

ഭാരത് മാതാ കീ ജയ്!

ഭാരത് മാതാ കീ ജയ്!

വന്ദേ മാതരം!

വന്ദേ മാതരം!

വന്ദേ മാതരം!

വന്ദേ മാതരം!

വന്ദേ മാതരം!

വന്ദേ മാതരം!

വന്ദേ മാതരം!

വന്ദേ മാതരം!

വന്ദേ മാതരം!

-SK-