U Myntri Rangbah duh Narendra Modi u la buh maw nongrim, plie bad aiti sha ka ri ïa ki kam pynroi bapher bapher ba shongdor palat T. 24,000 klur ha Dahod, Gujarat mynta ka sngi. Haba ai jingkren ha ka jingialang, u la ong ba ka 26 tarik u Jymmang ka don ka jingmut kaba kyrpang namar ba ka dei ka sngi ba u la shim smai nyngkong eh kum u Myntri Rangbahduh ha u snem 2014. U la pdiang ïa ka jingkyrshan bad jingkyrkhu jong ki paidbah ka Gujarat, kiba la shaniah ha u ïa ka jingkitkhlieh ban ïalam ïa ka ri. U Myntri Rangbah duh u la pynpaw ba kane ka jingshaniah bad jingai mynsiem ka la pynrhem ia ka jingaiti lut jong u ban shakri ia ka ri miet la bad sngi. Ha ki snem kiba la leit noh, ka India ka la shim ia ki rai kiba ym pat ju jia bad bym lah ban mutdur, ka la pyllait na ki jingpyrkhing kiba la don da ki phew snem bad ka la kiew shaphrang ha man la ki kam. “Mynta, ka ri ka mih na ka juk jong ka jingduh jingkyrmen bad jingdum sha ka juk thymmai jong ka jingshaniah bad jingkyrmen”, u la bynrap.

“Ki 140 klur ngut ki nong India ki iatylli ban tei ia ka Viksit Bharat”, la ong u Modi, da kaba ban jur ia ka jingdonkam ban shna ia ki mar ba donkam hapoh ka ri, da kaba ong ba ka jinglah kyrshan dalade ka dei ka jingdonkam jong kane ka por. U la ong ba ka India ka nang kiew stet ha ka liang ka jingshna tiar ha ka pyrthei, da kaba kdew ba ka jingpynmih tiar hapoh ka ri bad ka jingshalan shabar ri ki nang kiew man ka por. Mynta ka India ka shalan ia ki mar bapher bapher, kynthup ia ki smartphone, ki kali, ki jinglehkai, ki tiar iada ri, bad ki dawai. U la pynpaw shuh shuh ba ka India kam dei tang kaba shna ïa ki tiar rel bad Metro Technology hynrei ka shalan ruh kylleng ka pyrthei. Da kaba kdew ia ka Dahod kum ka nuksa ba kongsan jong kane ka jingkiew shaphrang, ha kaba la plie paidbah bad sdang ia ki projek kiba heh kiba shongdor da ki hajar klur, u Modi u la pynpaw ia ka Karkhana Rel Electric ha Dahod kum ka jingjop kaba kongsan. U la pynkynmaw ia ka jingbuh ia u maw nongrim na ka bynta kane lai snem mynshwa bad u la pynpaw ia ka jingsngew sarong ba mynta la lah ban shna ia ka rel elektrik kaba nyngkong eh. U la kaweh lama ia ka rel, kaba long ka khyllipmat jong ka jingsarong ia ka Gujarat bad ia ka ri baroh kawei. Nalor kata, u la pynbna ba ka Gujarat ka la lah ban pyndonkam da ka bording 100% ha ka lynti rel jong ka, da kaba khot ia ka kum u mawmer ba kongsan bad u la ai khublei ia ki briew jong ka Gujarat na ka bynta kane ka jingjop.

Haba pyrkhat ia ka jingiadei kaba la slem bha jong u bad ka Dahod bad ki jingkynmaw kiba bun kiba iadei bad katei ka thain, u Myntri Rangbahduh u la ong ba u la wan jngoh ia ka Dahod da ki phew snem, bad ha ki snem ba nyngkong jong u, u ju leit jngoh ia katei ka thain da ka bicycle. U la pynpaw ba kine ki jingshem ki la ailad ïa u ban sngewthuh ïa ki jingeh bad ka lad kaba don ha Dahod. Wat hadien ba u la shimti kum u Myntri Rangbah ka Jylla, u la bteng ban leit jngoh bunsien ïa kane ka thaiñ bad u la shim ïa ki sienjam kiba tyngeh ban weng ïa ki jingeh jong ka. U la ban jur ba man la ka sienjam na ka bynta ka kam pynroi ha Dahod ka wanrah ka jingsngewhun kaba khraw ia u, bad mynta ka dei sa kawei pat ka sngi kaba don jingmut na ka bynta jong u.

Haba pynpaw ïa ka jingkiew stet jong ka tnad rel jong ka ri India ha kine ki 10-11 snem ba la leit, u Modi u la ban jur ïa ka jingpynïar ïa ki jingshakri metro bad ka jingsdang ïa ki rel kiba stet bha, kaba pynkylla ïa ka jingïasoh ha kylleng ka ri. U la ong ba ki rel Vande Bharat mynta ki iaid ha jan 70 tylli ki lynti, kaba pynkhlain shuh shuh ia ka lad ka leit ka wan jong ka ri. U la pynbna ia ka jingsdang jong ka Vande Bharat Express kaba thymmai hapdeng ka Ahmedabad bad ka Veraval. U Modi u la ong shuh shuh ba ka jingkiew jong ki rel kiba katkum ka juk mynta ha India ka dei namar ka jingkiew jong ka ri ha ka liang ka teknoloji. U la ban jur ba ia ki coach bad ki rel mynta la shna hapoh ka ri, kaba la pynduna ia ka jingshaniah ha ki mar kiba wan nabar. “Ka India ka la paw kum ka ri kaba hakhmat eh ban shalan ia ki tiar rel”, la ong u Modi, da kaba kdew ba ka India ka shalan ia ki metro coach sha Australia bad ki rel sha England, Saudi Arabia, bad France. U la bynrap ruh ba ka Mexico, Spain, Germany, bad Italy ruh ki thied ïa ki tiar ba ïadei bad ka lynti rel na India. U Modi u la ong shuh shuh ba ïa ki rel ba kit ia ki nongleit nongwan jong ka India la pyndonkam ha Mozambique bad Sri Lanka, bad ïa ki rel ‘Made in India’ la shalan sha bun tylli ki ri. U la ong ba kane ka pyni ia ka jingiar kaba iai bteng jong ka sienjam ‘Make in India’, kaba pynskhem ia ka jingsngew sarong jong ka ri.

“Ka lynti rel kaba khlain ka kyntiew ia ka jingsuk bad kyntiew ia ki karkhana bad ka rep ka riang”, la ong u Myntri Rangbahduh, da kaba pynpaw ba katto katne ki thain ha India ki la ioh ia ka jingpyniasoh rel ha ka sien kaba nyngkong ha kine ki shiphew snem ba la dep. U la ong ba bun ki jaka ha Gujarat mynshuwa ki don tang ki rel kiba rit bad kiba iaid suki, hynrei mynta la pynheh ia ki katto katne ki lynti kiba rit. Haba pynbna ia ka jingplie ia ki lynti rel bapher bapher, kynthup ia ka rel kaba thymmai hapdeng ka Dahod bad ka Valsad, ka ban ai jingmyntoi shibun ia ka jaka sah ki riewlum, u Myntri Rangbahduh u la ong ba ki karkhana ki plie shibun ki lad ioh kam ioh jam na ka bynta ki samla. U la pynpaw ba ka karkhana rel jong ka Dahod kan shna ïa ki rel kiba don ka bor 9,000 horsepower, kaba pynkiew shibun ïa ka bor bad ka jinglah jong ki rel jong ka India, da kaba kdew ba man la ka rel ba shna ha Dahod kan don ïa ka kyrteng jong ka nongbah. U Myntri Rangbahduh u la ong ba yn shna da ki spah tylli ki rel ha ki snem ban wan, ka ban plie shibun ki lad ioh kam na ka bynta ki samla jong ka thain. U la ban jur ba kane ka karkhana kan kyrshan ruh ïa ki karkhana rit kiba pynmih ïa ki tiar rel, kaba ïalam sha ka jingkiew ka ïoh ka kot ha ki jaka ba marjan. U la ong ba ki lad ioh kam ioh jam kin long palat na ka karkhana, kaba ai jingmyntoi ia ki nongrep, ki nongri jingri, ki nongdie dukan, bad ki nongbylla, kaba pynthikna ia ka jingkiew ka ioh ka kot.

U Modi u la pynpaw ba ka Gujarat ka la kiew bha ha ki bynta bapher bapher, kynthup ïa ka pule puthi, ka IT, ki semiconductor, bad ka kam jngohkai pyrthei. U la ban jur ba ka jylla ka la pynskhem ïalade kum ka nongïalam ha ki kam bapher bapher. U la ong ba ïa ka karkhana semiconductor kaba heh la plie ha Gujarat ha ka jingbei tyngka kaba da ki hajar klur, kaba nang pynkhlaiñ shuh shuh ïa ka kyrdan jong ka India ha ka kam semiconductor ha ka pyrthei. U la ong ba kine ki sienjam ki plie lad ioh kam ba thymmai na ka bynta ki lak ngut ki samla ha Gujarat, kaba nohsynniang sha ka jingkiew ka ioh ka kot bad ka roi ka par jong ka jylla.

Haba ban jur ba ka Dahod, Vadodara, Godhra, Kalol, bad Halol ki la tei lang ïa ka surok bah kaba kyntiew ia ka kam shna ha Gujarat, u Myntri Rangbahduh u la ong ba ka Vadodara ka kiew stet bha ha ka jingshna liengsuiñ, ha kaba la plie ïa ka jaka shna liengsuiñ Airbus ha ki katto katne bnai ba la leit. U la ong ba ka Vadodara ka dei ruh ka jaka ba don ka Gati Shakti University ba nyngkong eh ha India. U la ban jur ba ka Savli ka la don lypa ïa ka karkhana shna kali rel kaba heh, katba ka Dahod mynta ka don ïa ka jaka pynmih ïa ki rel kiba khlaiñ bor tam jong ka India—ki enjin kiba don ka bor 9,000 horsepower, kaba long ka khyllipmat jong ka jingsarong ia ka ri. U Myntri Rangbahduh u la ong ba ka Godhra, Kalol, bad Halol ki don ia ki jaka shna tiar, ki karkhana rit, bad ki MSME, kiba nohsynniang sha ka jingkiew ki karkhana jong ka Gujarat. Da kaba pyrkhat ïa ka lawei ha kaba kane ka thaiñ jong ka Gujarat kan pawnam na ka bynta ban pynmih ïa kiei kiei baroh—naduh ki bicycle bad ki thuk thuk haduh ki enjin rel bad ki liengsuiñ, u Myntri Rangbahduh u la ong ba kum kane ka surok bah na ka bynta ka jingkyntiew ia ka kam shna mar ka long kaba kham kyrpang ha ka pyrthei, kaba pynskhem ïa ka kyrdan jong ka Gujarat kum ka jaka kaba donbor ha ka kam karkhana.

“Ka jingkyntiew ia ki thain riewlum ka long kaba donkam bha ban tei ia ka ri India kaba la kiew shaphrang”, la ban jur u Modi, da kaba kdew ba ki la don ki sienjam ba la shim ha kine ki 11 snem ba la leit ban kyntiew ia ki jaitbynriew riewlum. U la ong ba ka jingshemphang kaba la slem jong u ban trei ha ki jaka riewlum jong ka Gujarat ka la nohsynniang sha ki sienjam kiba ha ka kyrdan jong ka ri. U Modi u la pynkynmaw ïa ka por ba ki khynnah riewlum ha Gujarat ki ïakynduh ïa ki jingeh ha ka jingpule ia ka science. U la pynpaw ba mynta, ka jaka sah ki riewlum baroh kawei ka ïoh ïa ka jingpule kaba bha, da ki kolej kiba bha, ki ITI, ki medical college, bad ar tylli ki skulbah kiba ai jingshakri ïa kine ki jaidbynriew. Haba pynpaw ba ka rynsan jong ki skul Eklavya Model ka la nang khlain bha ha kine ki 11 snem ba la dep, kaba pynthikna ia ki lad jingpule kiba kham bha na ka bynta ki khynnah skul riewlum, u Modi u la kdew ba ka Dahod hi ka don katto katne ki skul Eklavya Model, kaba kyrshan shuh shuh ia ka pule puthi jong ki riewlum.

Haba pynpaw ia ki sienjam ba kongsan ba la shim na ka bynta ban kyntiew ia ki jaitbynriew riewlum ha kylleng ka ri, u Myntri Rangbahduh u la ong ba ha ka sien kaba nyngkong ha ka histori jong ka ri India kaba laitluid, la sdang ia ka skhim kaba heh ban kyntiew ia ki shnong riewlum. U la ong ba ka ‘Dhartii Aaba Janjati Gram Utkarsh Abhiyan’ ka dei ka sienjam ba kongsan, ha kaba ka Sorkar Pdeng ka la bei pisa kumba T. 80,000 klur ban pyntreikam ïa kane ka prokram. U la ong ba hapoh kane ka skhim, la sdang ia ki kam pynroi ha palat 60,000 tylli ki shnong ha kylleng ka ri, kynthup ia ka Gujarat. U Myntri Rangbah duh u la pynpaw ba ia kine ki shnong ki la don ka bording, ka um, ki surok, ki skul, bad ki hospital ban kyntiew ia ka jingim. U la ban jur ba la shna ïa ki ïing kiba paka na ka bynta ki longïing riewlum, kaba pynthikna ïa ka jingim kaba kham bha na ka bynta ka imlang sahlang.

U Modi u la ban jur ïa ka jingkut jingmut ban kyntiew ïa ki jaitbynriew riewlum kiba shah iehnoh beiñ, da kaba ong ba ka sorkar jong u ka buh hakhmat eh ïa kito kiba la shah iehnoh beiñ la slem bha. U la pynpaw ba ha ka sien kaba nyngkong, ka sorkar ka la wanrah ïa ka PM Janman Yojana ban kyrshan khamtam ïa ki kynhun riewlum ki bym ioh ia ki jingdonkam ba kongsan da ki phew phew snem. U Modi u la ong ba hapoh kane ka skhim, la kyntiew ïa ki jingdon jingem bad ki jingdonkam ha ki shnong riewlum, bad la plie ki lad ioh kam ioh jam, kaba pynthikna ïa ka jingïadon bynta kaba kham khraw ha ka liang ka ioh ka kot bad ka imlang sahlang na ka bynta kine ki jaidbynriew.

Ha kren shaphang ka jingsdang ia ka thong jong ka ri ban pynlait ia ki jaitbynriew riewlum na ka jingpang sickle cell anemia, u Myntri Rangbahduh u la ong ba da ki million ngut ki nongshong shnong kiba dei ki riewlum ki la dep ban leh ia ka screening hapoh kane ka sienjam. U la ban jur ba ka sorkar ka angnud ban pynsted ia ka roi ka par jong ki thain kiba la sahdien. U la kdew ba palat 100 tylli ki district la kheiñ mynshuwa kum ki jaka ba sahdien, ha kaba bun na ki, ki dei ki jaka ba bun ki riewlum. U la ong ba ka Dahod ka dei kawei na kum kine ki distrik, hynrei mynta, ka dang kiew shaphrang kum ka Aspirational District, kaba iaid lyngba ka jingkylla da ki jingdon jingem katkum ka juk mynta bad ki lad ki lynti kiba long katkum ka juk mynta. U Myntri Rangbahduh u la pynpaw ba ka South Dahod ka la mad ïa ka jingkyrduh um kaba jur, hynrei mynta, la buh da ki spah kilomitar ki pipe, kaba pynthikna ba ka um Narmada kan poi sha man la ki longïing. U la ong ba ha kine ki snem ba la dep, la pynïasoh ïa ka jaka kaba 11 lak akar naduh Umargam haduh Ambaji ban ioh bynta ha ka kam ai um ha ki jaka rep, kaba pynsuk ïa ka rep ka riang na ka bynta ki jaidbynriew riewlum.

Haba ithuh ia ka jingdon palat hajar ngut ki kynthei ha Vadodara, kiba la ia lum lang ban pyndon burom ia ka ri bad ki shipai jong ka, u Modi u la pynpaw ia ka jingburom bad jingsngewnguh kaba khraw ia ki kynthei ka ri India na ka bynta ka jingkyrshan ba radbah jong ki. U la pynpaw ba ka Dahod ka dei ka jaka jong ka jinglenlade bad ka jingaiti lut, da kaba pynkynmaw ba u Maharishi Dadhichi u la aiti ïa la ka jingim harud wah Dudhimati ban ïada ïa ka jingthaw. U Modi u la kdew ruh ba kane ka thaiñ ka la kyrshan ïa u nongïaleh laitluid u Tatya Tope ha ki por jong ka jingeh bad ba ka Mangarh Dham ka ieng kum ka dak jong ka jinglenlade jong u Govind Guru bad da ki spah ngut ki riewshlur kiba dei ki riewlum. Haba ban jur ba ki jinglong tynrai jong ka India ki dawa ban leh pyrshah ïa ka jingbymhok, da kaba buh jingkylli hato ka ri ka lah ban shu sngap jar hadien ka jingthombor ki lehnoh ha Pahalgam, Jammu & Kashmir, u Modi u la ong, “Ka Operation Sindoor kam shym la long tang ka sienjam jong ki shipai hynrei ka dei ka jingpynpaw ïa ki jingngeit bad ki jingsngew jong ka India”. U la ong ba ki lehnoh kim shym la mutdur ia ki jingma kaba lah ban mih na ki kam jong ki, da kaba kynmaw ia ka jingpyniap bein ia u kpa hakhmat ki khun jong u. U la ong ba kum kine ki dur ki dang pynmih ïa ka jingbitar ha kylleng ka ri, namar ba 140 klur ki nong India ki la shah tynjuh ha ki kam lehnoh. U Modi u la pynbna ba u la pyndep ïa ka jingkitkhlieh jong u kum u nongïalam jong ka ri, da kaba ai ïa ka jinglaitluid kaba pura ïa ki shipai India, kiba hadien kata ki la pyndep ïa ka jingtreikam kaba ym pat ju ïohi ha ki phew snem. U la pynpaw ba la ithuh bad pynjot ïa khyndai tylli ki ktem lehnoh ha shiliang pud hapoh 22 minit, bad u la ong ba ki shipai jong ka Pakistan ki la pyrshang ban pynphai kylla hynrei la shah rem ha ki shipai India. U Modi u la pynpaw ka burom kaba khraw ïa ka jingshlur jong ki shipai India, da kaba ai khublei ïa ka jingshlur bad ka jingaiti lut jong ki na ka jaka ba kyntang jong ka Dahod.

U Myntri Rangbahduh u la ong ba ka ri kaba la kha hadien ka jingphiah ka la pynleit jingmut ha ka jingshun ia ka ri India bad kaba wanrah ia ka jingma. “Ka India, ha kawei pat ka liang, ka thmu ban pynduhjait ïa ka jingduk, ban pynkhlain ïa ka ïoh ka kot jong ka, bad ban ïoh ïa ka roi ka par”, u la bynrap. U Myntri Rangbahduh u la pynpaw ba ia ka ri India kaba la kiew lah ban tei tang ynda ki kynhun shipai bad ka ioh ka kot jong ka ki khlain. U la pynpaw ba ka sorkar ka dang ïai bteng ban trei ha kane ka bynta, ban pynthikna ba ka jingshngaiñ jong ka ri bad ka jingkiew ka ïoh ka kot ki ïaid ryngkat ryngkat.

Haba ban jur ïa ka lad kaba khraw ba don ha Dahod, da kaba ong ba kane ka jingïalang ka dei tang ka jingïohi lypa ïa ki bor treikam jong ka, u Modi u la pynpaw ïa ka jingshaniah kaba pura ha ki briew kiba trei shitom jong ka Dahod, da kaba ban jur ba kin pyndonkam hok ïa ki lad ki lynti kiba dang thymmai bad pynkylla ïa ka Dahod sha kawei na ki distrik ba la kiew bha ha ka ri. U la pynkut da kaba ai khublei sa shisien ïa ki briew jong ka Dahod, da kaba pynskhem biang ïa ka jingngeit jong u ha ka jingaiti lut bad ka jingkiew shaphrang jong ki.

U Myntri Rangbah ka Jylla Gujarat, Bhupendrabhai Patel, u Myntri Sorkar Pdeng ba dei khmih ia ka Railways, Information and Broadcasting & Electronics and Information Technology, Ashwini Vaishnaw ki la don lang nalor kiwei pat ki riew pawkhmat ha kane ka sngi.

Ka Nongrim

Ha kaba iadei bad ka jingangnud jong u ban kyntiew ïa ka lad jingpynïasoh bad ban tei ïa ki jingdon jingem ha ka lad ka leit ka wan kiba iahap bad ki jinglong jingman ha kylleng ka pyrthei, u Myntri Rangbahduh u la plie ïa ka karkhana shna rel jong ka Indian Railways ha Dahod. Kane ka karkhana kan pynmih ia ki rel elektrik kiba 9000 HP na ka bynta ban pyndonkam hapoh ka ri bad ban shalan shabar ri. U la pyllait ruh ia ka rel elektrik kaba nyngkong kaba la shna na katei ka karkhana. Ki rel kin iarap ban kyntiew ia ka jingkit mar jong ka Indian Railways. Ia kine ki rel yn pynbit pynbiang da ki kor pynsangeh ba lah ban pynthymmai, bad la shna ia ki ban pynduna ia ka jingpyndonkam ia ka bording, kaba iarap ban pynneh pynsah ia ka mariang.

Hadien kane, u Myntri Rangbahduh u la buh maw nongrim bad plie ïa ki projek pynroi bapher bapher ba shongdor palat T.24,000 klur ha Dahod. Ki projek ki kynthup ia ki projek rel bad ki projek bapher bapher jong ka sorkar Gujarat. U la kaweh lama ruh ïa ka Vande Bharat Express hapdeng ka Veraval bad ka Ahmedabad & ka rel hapdeng ka steshon Valsad bad Dahod.

***