Ka Myntri Kam pla tyngka jong ka sorkar pdeng ka Nirmala Sitharaman, mynta ka sngi, ka la khot ia ka jingialang bad ki Managing Director bad ki CEO jong ki Public bad Private Sector Bank bad ki Kompeni Insurance hapdeng ki jingeh ha ka liang ka jingshngain kaba mih na ka jingkulmar ha ki jaka khappud.

Ki heh ophisar na ka Department of Financial Services (DFS), ka Tnad kam pla tyngka jong ka sorkar pdeng, ka CERT-In, ka RBI, IRDAI bad ka NPCI ki la wan ban ïashim bynta ha kane ka jingïalang kaba la pynleit jingmut ha ka ban bishar bniah ïa ka rukom treikam ki bank bad ka jingpynkhreh na ka bynta ka cybersecurity, kynthup ïa ki digital application kum ka internet banking bad ka UPI.

Ki Managing Director bad ki CEO jong baroh ki Bank bad ki Kompeni Insurance ki la pyntip ia ka Myntri Kam pla pisa jong ka sorkar pdeng halor ki sienjam ba ki dang shim, haba peit ia ka jingkulmar kaba dang iai bteng ha khappud.

Ki MD & CEO jong ki Bank ki la pyntip ba la pynkhlain ia ki lad jingiada ha kaba iadei bad ka cyber security ha baroh kawei ka rukom treikam jong ki bank. La pyntreikam ia ki rukom treikam Anti-DDoS (Distributed Denial-of-Service) da ki bank ban iada na ki kam cyber beain. Ban pynthikna ia ka jinglong ba la pynkhreh jong ki jaka treikam, la pynlong ia ki mock drill kiba kynthup ia ka cybersecurity bad ki lad ban iada na ki jingjia ba heh kiba khlain bha. Ki la pyntip ba la buddien bha ïa ki jingpyrshang ban thok, bad ki nongtrei ki la ïoh katto katne ki jingpynbna hapoh ban ai jingtip shuh shuh.

Ki heh ophisar jong ka Bank ki la pynpaw ba ka Security Operations Centre (SOC) bad ki Network Operations Centre jong ki, ki treikam pura bad ki don ha ka jingpynkhreh kaba jur bha. Kine ki jaka ki iatreilang bad ka CERT-In bad ka National Critical Information Infrastructure Protection Centre (NCIIPC), kaba pynsuk ia ka jingsam jingtip ha ka por bad ka jingpeit bniah ia ki jingma.

Ha kane ka jingialang, ka Sitharaman ka la ban jur halor ka bynta kaba kongsan jong ki bank ha kaba pynthikna ïa ka jingiaid beit ka ioh ka kot ha ka por ba jur bha ki jingeh ha ka saiñ hima sima bad ki por ba jynjar.

Ka Myntri Kam pla tyngka ka sorkar pdeng ka la bthah ia baroh ki bank ba kin long kiba husiar bad pynkhreh ban ialeh pyrshah ia kano kano ka jingjia ne jingeh, ban pynthikna ia ka jinglah ban ioh ia ki jingshakri bank & pisa khlem jingthut na ka bynta ki nongshong shnong ha kylleng ka ri, khamtam ha ki jaka khappud. Ka Sitharaman ka la ong ba ki jingshakri jong ki bank, kiba ai ha ki jaka trei bad ruh lyngba ki lad digital, ki dei ban treikam khlem jingthut, bad dei ban pynbiang ia ki rukom treikam ha ki por ba kyrkieh bad pyrshang ia kine khnang ban lah ban pynbeit ia kino kino ki jingeh kiba mih.

Ka Myntri Kam pla tyngka ka sorkar pdeng ka la pynpaw ka jingsngewkhia kaba jur ia ka jingshngain jong ki nongtrei bank bad kiba haiing jong ki kiba trei ha ki tnad treikam kylleng ki jaka khappud bad ka la bthah ia ki bank ban pynthikna ia ka jingshngain kaba biang jong ki da kaba iatreilang bad ki kynhun kiba peit ia ka jingshngain.

Ka Myntri kam pla tyngka ka sorkar pdeng ka la bthah ia ki bank ban pynthikna ba ki nongshong shnong bad ki kam khaii kin ym shah ktah ha kano kano ka jinglong jingman, bad dei ban buh hakhmat eh ia ka jingdon pisa khlem jingeh ha ki ATM, ka jingshakri UPI bad internet banking kaba khlem jingthut, bad ka jingbteng ban ioh ia ki jingshakri ba kongsan ha ki kam bank.

Ka Nirmala Sitharaman ka la bthah ïa ki bank ba kin pynlong ïa ki jingpeit bniah man ka por ïa ki rynsan cybersecurity bad ki data center jong ki bad ban pynthikna ba baroh ki jingdon jingem digital bad core banking kin long kiba pura bad peitngor baroh shisngi khnang ban ïada na ki jingpynkheiñ aiñ lane kino kino ki kam cyber beain.

Ka Myntri Kam pla tyngka ka sorkar pdeng ka la bthah ia ki bank ban thung arngut ki heh ophisar kiba la ithuh ha ka headquarters, uwei na ka bynta ban ai jingtip ia baroh ki kam kiba iadei bad ka cyber bad uwei pat ban pynthikna ia ki rukom treikam, kynthup ia ka jingtreikam jong ki tnad bank bad ka jingdon pisa ha ki ATM. Baroh arngut ki ophisar ki dei ban pyntip ia kano kano ka jingjia sha ka CERT-In / ki tnad ba dei peit bad ka DFS ha ka por.

Ha kaba ïadei bad kane, la bthah ruh ïa ki bank ban ïatreilang ha ka por bad ka Reserve Bank of India, ka CERT-In bad ki tnad Sorkar ba dei peit khnang ban pynthikna ïa ka jingïasam jingtip bad ka jingtreikam kaba khlaiñ bad kaba stet.

Ka Sitharaman ka la bthah ruh ia ki kompeni Insurance ban pynthikna ia ka jingpynbeit ia ki jingdawa ha ka por kaba biang bad ka jingshakri ia ki paidbah khlem jingthut.

Ka Myntri Kam pla tyngka ka sorkar pdeng ka la ong ba ki Sponsor Bank ki dei ban pynthikna ba ki RRB kin ioh ia ka jingkyrshan kaba bha ha kine ki por bad ban ai jingiarap ia ki na ka bynta kino kino ki jingeh kiba ki iakynduh.

Ka Sitharaman ka la pynpaw biang ba ka Sorkar India ka ieng skhem ha ka jingïada ïa ka ri bad ka jingshngain ha ka ïoh ka kot, bad ka la ong ba ka rukom treikam jong ki bank bad ka rukom pynïaid pisa jong ka ri ka dang khlaiñ bad ïaid beit ïaid ryntih.

****