Ka sorkar India ka la khot ia ka jingtyrwa kyrteng na ka bynta ka Pradhan Mantri Rashtriya Bal Puraskar (PMRBP) 2025, ka khusnam ba pawnam jong ka ri kaba ju ai man la u snem da ka President ka Ri India kum ka jingithuh ia ki jingjop ba kyrpang jong ki khynnah ha kylleng ka ri. Ka tarik ba khatduh ban pynpoi ïa ki kyrteng kan long ha ka 31 tarik u Naitung 2025. Baroh ki kyrteng ki dei ban thep online lyngba ka rynsan Rashtriya Puraskar ba la pynbiang ha https://awards.gov.in.

Ka jingai kyrteng ka plie ia ki khynnah kiba hapdeng ka rta 5 bad 18 snem (haduh ka 31 tarik u Naitung 2025). Uno uno u briew ne ka jaka pule ki lah ban jied ia ki khynnah kiba don ki jingjop ba kyrpang na ka bynta ka PMRBP. Ki khynnah ruh ki lah ban thep kyrteng hi ialade.

Ban aplai, ki nongaplai ki dei ban pynrung kyrteng shwa lane log in ha ka rynsan da kaba ai ia ki jingtip ba bniah kum ka Kyrteng, ka Jait, Tarik ba Kha, Jait Nongaplai (Shimet/Kynhun), Mobile Number, Email ID, Aadhaar Number, bad kiwei kiwei bad ka jingpynshisha da ka CAPTCHA. Shisien ba la pynrung kyrteng, ki dei ban jied ïa ka “Pradhan Mantri Rashtriya Bal Puraskar 2025” hapoh ka bynta Ongoing Nominations bad nion ha “Nominate/Apply Now.” Nangta ki nongaplai ki dei ban jied ia ka kyrdan khusnam kaba iadei bad pyni la ka jingkyntiew kyrteng ka dei na ka bynta jong ki ne na ka bynta kiwei pat.

Ka phom aplikeshon ka donkam ia ki jingtip ba bniah jong kiba kyntiew kyrteng, ka jingbatai kaba lyngkot (kaba haduh 500 kyntien) kaba batai ia ka jingjop bad ka jingktah jong kane ka kam, bad ka jingbuh ia ki kot ki sla kiba kyrshan (ha ka PDF, haduh 10 tylli ki jingsuh lang) bad ka dur ba dang shen (ha ka jpg/jpeg/png). Lah ban buh shuwa ia ki aplikeshon kum ki draft bad pynbeit shwa ban aiti khatduh. Shisien ba la dep peit bniah bad aiti, yn sa ioh ia ka kopi jong ka aplikeshon kaba lah ban shim na ka bynta ban ioh jingtip.

Ka Pradhan Mantri Rashtriya Bal Puraskar ka pynkup burom ïa ki samla kiba hapoh 18 snem ka rta (haduh ka 31 tarik u Naitung 2025) kiba la paw ha kine ki hynriew tylli ki bynta harum: Ka jingshlur, ka jingshakri ïa ka imlang sahlang, ka mariang, ka jingïalehkai, ka jingsaindur & ka kolshor, bad ka science & technology.

Ki jingthmu jong ki khusnam Pradhan Mantri Rashtriya Bal Puraskar ki long ban rakhe bad pyni ïa ki jingjop jong ki samla ka ri India ha ki bynta bapher bapher, ban ai mynsiem ïa kiwei pat ha ka ri baroh kawei da kaba pyni ïa ki nuksa ba shisha bad ban kyntiew ïa ka jinglong jingman na ka bynta ka jingkiew shaphrang kaba pura jong ki khynnah.

Ban ioh jingtip shuh shuh bad ban kyntiew kyrteng, sngewbha leit sha ka https://awards.gov.in.

****