దేశవ్యాప్తంగా బాలలు సాధించిన అసాధారణ విజయాలకు గుర్తింపుగా ఏటా భారత రాష్ట్రపతి చేతుల మీదుగా అందించే ప్రతిష్ఠాత్మక అవార్డు అయిన ‘ప్రధానమంత్రి రాష్ట్రీయ బాల పురస్కార్ (పీఎంఆర్బీపీ)-2025 కోసం భారత ప్రభుత్వం నామినేషన్లను ఆహ్వానించింది. నామినేషన్ల దాఖలుకు చివరి తేదీ జూలై 31. అన్ని నామినేషన్లను అధికారిక రాష్ట్రీయ పురస్కార్ పోర్టల్ https://awards.gov.in ద్వారా ఆన్‌లైన్‌లోనే సమర్పించాలి.

5 నుంచి 18 సంవత్సరాల మధ్య వయస్సున్న పిల్లలు (జూలై 31 నాటికి) నామినేషన్లకు అర్హులు. అసాధారణ విజయాలను సాధించిన పిల్లలను ఎవరైనా వ్యక్తి లేదా సంస్థ పీఎంఆర్బీపీ కోసం నామినేట్ చేయవచ్చు. పిల్లలు స్వీయ నామినేషన్ ద్వారా కూడా దరఖాస్తు చేసుకోవచ్చు.

దరఖాస్తు చేసుకోవడం కోసం- ముందుగా మొదటి పేరు, చివరి పేరు, పుట్టిన తేదీ, దరఖాస్తుదారు విభాగం (వ్యక్తి/సంస్థ), మొబైల్ నంబర్, ఇ-మెయిల్ ఐడీ, ఆధార్ నంబర్ మొదలైన వివరాలను అందించడం ద్వారా పోర్టల్‌లో నమోదు చేసుకుని లేదా లాగిన్ అయ్యి, క్యాప్చా ధ్రువీకరణ పూర్తిచేయాలి. రిజిస్టర్ చేసుకున్న తర్వాత ప్రస్తుత నామినేషన్ల విభాగం కింద ‘ప్రధానమంత్రి రాష్ట్రీయ బాల పురస్కార్- 2025’ని ఎంచుకుని, ‘నామినేట్/అప్లై నౌ’పై క్లిక్ చేయాలి. దరఖాస్తుదారులు సంబంధిత అవార్డు విభాగాన్ని ఎంచుకుని, నామినేషన్ తమ కోసమా లేక మరెవరి కోసమా అన్నది తెలియజేయాలి.

దరఖాస్తు ఫారం కోసం నామినీ వివరాలు, సాధించిన విజయమూ దాని ప్రభావాన్ని వివరించే సంక్షిప్త కథనమూ (గరిష్టంగా 500 పదాలు), సహాయక పత్రాల అప్‌లోడ్ (పీడీఎఫ్ ఫార్మాట్, గరిష్టంగా 10 అటాచ్‌మెంట్లు), ఇటీవలి ఫొటో (జేపీజీ/జేపీఈజీ/పీఎన్జీ ఫార్మాట్‌) అవసరం. తుది సమర్పణకు ముందు దరఖాస్తులను డ్రాఫ్టులుగా సేవ్ చేసుకుని అవసరమైతే ఎడిట్ చేసుకోవచ్చు. క్షుణ్నంగా సమీక్షించి సమర్పించిన అనంతరం డౌన్‌లోడ్ చేసుకోగల దరఖాస్తు ప్రతి రిఫరెన్సు కోసం అందుబాటులో ఉంటుంది.

కింది ఆరు విభాగాల్లో ప్రతిభ ప్రదర్శించిన 18 ఏళ్ల కన్నా తక్కువ వయస్సున్న (2025 జూలై 31 నాటికి) పిల్లలను ప్రధానమంత్రి రాష్ట్రీయ బాల పురస్కార్ ద్వారా సత్కరిస్తారు: ధైర్య సాహసాలు, సామాజిక సేవ, పర్యావరణం, క్రీడలు, కళలు – సంస్కృతి, సైన్స్ అండ్ టెక్నాలజీ.

విభిన్న రంగాలలో దేశ యువత సాధించిన విజయాలను ఘనంగా చాటడం, నిజ జీవితంలో ఆదర్శప్రాయులను పరిచయం చేయడం ద్వారా దేశవ్యాప్తంగా చిన్నారుల్లో స్ఫూర్తిని నింపడం, పిల్లల సమగ్రాభివృద్ధికి అనుకూలమైన వాతావరణాన్ని పెంపొందించడం ప్రధానమంత్రి రాష్ట్రీయ బాల పురస్కార్ అవార్డుల లక్ష్యాలు.

మరింత సమాచారం కోసం, నామినేట్ చేయడానికి సందర్శించండి- https://awards.gov.in.  

***