য়োর এক্সিলেন্সী, রাস্ত্রপতি লোরেসু,

লৈবাক অনিমক্কী দেলিগেৎশিং,

মীদিয়াগী মরুপ পুম্নমক,

খুরুমজরি!

বেন বিন্দু!

ঐহাক্না রাস্ত্রপতি লোরেনসু অমসুং মহাক্কী দেলিগেসনবু ভারত্তা তরাম্না ওকচরি। মসি পুৱারীগী তাঙ্কক অমনি। চহি 38গী মতুংদা, অঙ্গোলাগী রাস্ত্রপতি ভারত্তা লাক্লি। মহাক্কী খোঙচৎ অসিনা ভারত-অঙ্গোলাগী মরীদা অনৌবা মায়কৈ অমসুং ইথিল পীবতা নত্তনা ভারত-অফ্রিকাগী পার্তনরশিপসু মপাঙ্গল কনখৎহল্লি।

মরুপশিং,

চহি অসিদা, ভারত অমসুং অঙ্গোলানা মখোয়গী দিপ্লোমেতিক রিলেসনশিংগী চহি 40শুবা মপোক কুমওন পালন তৌরি। অদুবু ঐখোয়গী মরী অসি মদুদগী হেন্না লিরবনি অমসুং হেন্না চেৎশিল্লি। অঙ্গোলানা নীংতম্বা ফংনবগীদমক লান্থেংনরিঙৈদা, ভারতসু চাউনা থাজবা অমসুং মরুপ-মপাং ওইনা লেপখি।

মরুপশিং,

ঙসিদি, ঐখোয়না তোঙান তোঙানবা লমশিংদা তেংবাং পীনরি। ভারত অসি অঙ্গোলাগী ওইল অমসুং গ্যাসকী খ্বাইদগী চাউবা বায়রশিংগী মনুংদা অমনি। ঐখোয়না ঐখোয়গী ইনর্জী পার্তনরশিপ পাকথোক চাউথোকহন্নবা ৱারেপ লৌরে। অঙ্গোলাগী লান্মীশিং মোদর্নাইজ তৌনবগীদমক দোল্লর মিলিয়ন 200গী দিফেন্স ক্রেদিৎ লাইন অমা অয়াবা পীখ্রে হায়না ঐহাক্না খংহনবদা নুংঙাইবা ফাওই। দিফেন্স প্লেৎফোর্মশিং শেংদোকপা অমসুং শেমদোক-শাদোকপা অমসুং সপ্লাই তৌনবগী মতাংদসু খন্নখি। ঐখোয়না অঙ্গোলাগী লান্মীশিংবু ত্রেনিং পীবদা মতেং পাংবদা নুংঙাইবা ফাওই।

ঐখোয়গী দিবেলপমেন্ত পার্তনরশিপ অসি মাংলোমদা পুখৎতুনা, ঐখোয়না দিজিতেল পব্লিক ইনফ্রাস্ত্রকচর, স্পেস তেক্নোলোজী অমসুং কেপাসিতী বিল্দিংদা অঙ্গোলাগা ঐখোয়গী তৌবা ঙম্বশিং শিয়র তৌমিন্নগনি। ঙসি ঐখোয়না হেল্থকেয়র, দাইমন্দ প্রোসেসিং, ফর্তিলাইজর অমসুং ক্রিতিকেল মিনরেলস সেক্তরশিংদা ঐখোয়গী মরী অসি মখা তানা চেৎশিলহন্নবা ৱারেপ লৌখ্রে। অঙ্গোলাদা য়োগ অমসুং বোলীৱুদ মীয়াম্না পাম্নবা অসিনা ঐখোয়গী নাৎকী মরীগী মপাঙ্গল অদু উৎলি। ঐখোয়গী মীয়ামগী মরক্তা লৈনরিবা মরী অসি মপাঙ্গল কনখৎহন্নবা, ঐখোয়না ঐখোয়গী নহাশিংগী মরক্তা য়ুথ একচেঞ্জ প্রোগ্রাম অমা হৌদোক্নবা ৱারেপ লৌরে।

মরুপশিং,

ইন্তর্নেস্নেল সোলর এলাইন্সতা য়াওনবা অঙ্গোলানা ৱারেপ লৌখিববু ঐখোয়না তরাম্না ওক্লি। ঐখোয়না অঙ্গোলাবু কোলিসন ফোর দিজাস্তর রেসিলিয়েন্ত ইনফ্রাস্ত্রকচর, বিগ কেৎ এলাইন্স অমসুং গ্লোবেল বাইওফ্যুএলস এলাইন্স হায়না খঙনবা ভারতকী খোঙথাংশিংদা য়াওনবা বর্তন তৌখ্রে।

মরুপশিং,

মীওইবা খুন্নাইগীদমক তেরোরিজম অসি খ্বাইদগী চাউবা খুদোংথীনি হায়না ঐখোয়না য়ানরে। পহলগামদা থোকখিবা তেরোরিস্ত এতেক্তা শিখিবা মীওইশিংগীদমক রাস্ত্রপতি লোরেনসু অমসুং অঙ্গোলাগী মীয়াম্না অৱাবা ফোংদোকপীরকপা অদুগীদমক মখোয়গী মফমদা ঐহাক্না থাগৎপা ফোংদোকচরি। ঐখোয়না তেরোরিস্তশিং অমসুং মখোয়বু শৌগৎপশিংগী মায়োক্তা অকনবা অমসুং অহকপা থবকশিং লৌখৎনবা থৌরাং তৌরি। ঙমখৈ লান্না চত্থবা তেরোরিজমগা লান্থেংনবদা মতেং পাংবীবগীদমক ঐখোয়না অঙ্গোলাদা থাগৎপা ফোংদোক্লি।

মরুপশিং,

ভারত মচা করোর 140গী মায়কৈদগী, ঐহাক্না অফ্রিকন য়ুনিয়নগী প্রসিদেন্সী অসিগীদমক অঙ্গোলাবু থাগৎপা ফোংদোকচরি। ভারতনা G20গী প্রসিদেন্সী পায়রিঙৈদা অফ্রিকন য়ুনিয়ননা G20গী পর্মিনেন্ত মেম্বর ওইরকপা অসি ঐখোয়গীদমক চাউথোকচনীংঙাইনি। ভারত অমসুং অফ্রিকাগী লৈবাকশিংনা কোলোনিএল লৈঙাক্কী মায়োক্তা অমত্তা ওইনা ৱা ঙাংখি। মখোয়না অমনা অমবু ইথিল পীখি। ঙসি ঐখোয়না মালেমগী খা থংবা লমদমগী অপাম্বশিং, আশাশিং অমসুং এস্পিরেসনশিংগী ভোইসকীদমক পুন্না লেপমিন্নরে।

হৌখিবা চহি তরা অসিদা অফ্রিকাগী লৈবাকশিংগা লোয়ননা ঐখোয়গী তেংবাং পীনবা হেনগৎলক্লি। ঐখোয়গী ম্যুচেল ত্রেদ অসি বিলিয়ন 100 রোম য়ৌখ্রে। দিফেন্স কোওপরেসন অমসুং মেরিতাইম সেক্যুরিতীদা খুমাং চাউশিল্লক্লি। মমাং থাদা ভারত অমসুং অফ্রিকাগী মরক্তা অহানবা নেভেল মেরিতাইম এক্সরসাইজ 'অকিয়াম' পাংথোকখি। হৌখিবা চহি 10 অসিদা, ঐখোয়না অফ্রিকাদা অনৌবা এম্বেসদী 17 হাংদোক্লে। অফ্রিকাগীদমক দোল্লর বিল্লিয়ন 12 হেনবগী ক্রেদিৎ লাইনশিং পীখ্রে। মসিগা লোয়ননা, অফ্রিকন লৈবাকশিংদা দোল্লর মিলিয়ন 700গী গ্রান্ত এসিস্তেন্স পীখ্রে। আফ্রিকাগী লৈবাক 8দা ভোকেস্নেল ত্রেনিং সেন্তরশিং হাংদোক্লে। ঐখোয়না দিজিতেল পব্লিক ইনফ্রাস্ত্রকচরদা অফ্রিকাগী লৈবাক মঙাগা লোয়ননা তেংবাংলি। খুদোংথীবা খুদিংমক্তা, ঐখোয়না 'ফার্স্ত রেস্পোন্দর'গী থৌদাং লৌবগী খুদোংচাবা ফংখি। ঐখোয়না অফ্রিকাগী মীয়ামগীদমক লেপখি।

ভারত অমসুং অফ্রিকন য়ুনিয়ন, ঐখোয়না অসি চাউখৎপগী পার্তনরশিংনি। ঐখোয়না গ্লোবেল সাউথকী য়ুম্বীনি। অঙ্গোলাগী প্রসিদেন্সীগী মখাদা ভারত-অফ্রিকন য়ুনিয়নগী মরীনা অনৌবা অৱাংবা থাক্তা য়ৌরগনি হায়না ঐনা থাজবা থম্লি।

এক্সিলেন্সী,

ঐহাক্না অমুক্কা হন্না অদোম অমসুং অদোমগী দেলিগেসনবু ভারত্তা তরাম্না ওকচরি।

হন্না-হন্না থাগৎচরি।

ওব্রিগাদু।

***