ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদী রোজগার মেলাদা ৱা ঙাংখ্রে অমসুং সরকারগী তোঙান তোঙানবা দিপার্তমেন্তশিং অমসুং লুপশিংদা নৌনা থবক খল্লবা নহারোলশিংদা এপোইন্তমেন্ত লেত্তর ৫১,০০০ হেন্না য়েন্থোকখ্রে। মহাক্না হায়খি মখোয়গী থবকশিংগী মনুংদা লৈবাক অসিগী শেন-থুমগী ঙাক্লৌ ফগৎহনবা, লৈবাক মনুংগী ঙাক-শেন ফগৎহনবা, অনৌবা ইনফ্রাস্ত্রচর শেমগৎপদা মতেং পাংবা অমসুং শীন্মীশিংগী পুন্সিদা অওনবা পুরকপা য়াওরি। পুকচেল শেংনা মখোয়গী থৌদাংশিং পাংথোকপনা চাউখৎলবা লৈবাক অমা ওইনবা মাইকৈদা ভারতনা চঙশিল্লিবা খোঙচত্ত অফবা ইথিল অমা পীগনি। নহারোলশিং অসিনা কৎথোকপগা লোয়ননা মখোয়গী থৌদাংশিং পাংথোক্কনি হায়বগী থাজবা থম্লি।

প্রধান মন্ত্রীনা হায়খি মদুদি লৈবাক অসিগী চাউখৎপা অমসুং মাইপাকপা অসি লৈবাক অদুগী নহারোলশিংগী মখা পোল্লি, নহারোলশিং থৱায় য়াওনা লৈবাক শেমগৎপা শরুক য়াবা মতমদা, লৈবাক অসি চাউখৎপা য়াংখৎলি অমসুং মালেমগী থাক্ত ইকায়খুম্নবা ফংই। মখোয়গী থবক শুবা কনবা অমসুং ইন্নোবেসনগী খুৎথাংদা ভারতকী নহারোলশিংনা মখোয়গী তৌবা ঙম্বা অদু মালেমদা মশক তাক্লি। লৈবাক অসিগী নহারোলশিং থবক ফংনবা অমসুং মশানা মশাবু থবক পীজনবগী খুদোংচাবশিং মখা তানা চাউখৎনবা সরকারনা থবক খুদিংমক পায়খৎলি। স্কিল ইন্দিয়া, স্তার্দঅপ ইন্দিয়া অমসুং দিজিতেল ইন্দিয়াগুম্বা থবকশিংনা নহারোলশিংদা অনৌবা খুদোংচাবা কয়া ফংহল্লে। হায়রিবা থবকশিং অসিগী খুৎথাংদা, মখোয়গী হৈথোই-শিংথোইবশিং উৎথোক্নবা সরকারনা ভারতকী নহারোলশিংদা মফম অমা পীরে। পায়খৎলিবা থবকশিং অসিদগী, চহি ১০ অসিদা, তেক্নোলোজি, দেতা অমসুং ইন্নোবেসনগী হিরমশিংদা ভারতকী নহারোলশিংনা লৈবাক অসি মাঙলোমদা পুখৎলে। য়ু.পি.আই, ও.এন.দি.সি অমসুং জি.ই.এমগুম্বা দিজিতেল প্লেতফোর্মশিং মাইপাকপা অসিনা কমদৌনা নহারোলশিংনা দিজিতেল ইকোনোমিদা অওনবশিং পুরকপগে হায়বা উৎলে। হৌজিক ভারতনা খুদক্ত দিজিতেল ত্রান্সসেক্সন পাংথোকপদা মালেমদা মাঙজিল থারে অমসুং মাইপাকপা অসিগী মনা নহারোলশিংদা পীরি।

প্রধান মন্ত্রীনা হায়খি মেক ইন ইন্দিয়া’ য়োকখৎনবা অমসুং মালেম থাক্কী পোৎথোকশিং পুথোক্নবা ভারতকী নহারোলশিংদা খুদোংচাবা পীনবা পান্দম অমগা লোয়ননা চহি অসিগী বজেত্ত সরকারনা মেনুফেকচরিং মিসন লাউথোক্লে। মেনুফেকচরিং মিসন্না লৈবাক শীনবা থুংবগী এম.এস.এম.ই অমসুং অপীকপা ওন্ত্রেপ্রেন্যুর মিল্লিয়ন কয়া শৌগৎপা খক নত্তনা, লৈবাক শীনবা থুংনা অনৌবা থবক ফংনবগী খুদোংচাবশিং পীগনি। মসি ভারতকী নহারোলশিংগীদমক মমাঙদা অমুক্ত ফংখিদ্রিবা খুদোংচাবশিংনি। ভারত মখা তানা মালেমদা খ্বাইদগী য়াংনা চাউখৎলক্লিবা ইকোনোমি ওইগনি হায়না হন্দক আই.এম.এফনা ফোঙদোকখ্রে। শেন-থুমগী ফিবম ফগৎলকপা অসিনা তুংদা হিরম কয়াদা থবক ফংনবগী খুদোংচাবশিং হেনগৎহল্লে। হন্দক ওতোমোবাইল অমসুং খোঙউপগী উদ্যোগশিং পোৎথোক পুথোকপা অমসুং মপান্দা থাদোকপদা অনৌবা রেকোর্দশিং থম্লে অমসুং নহারোলশিংদা থবক ফংনবা খুদোংচাবা কয়া পীরে। অহানবা ওইনা খাদি অমসুং ভিলেজ ইন্দস্ত্রিগী তর্নওভর লুপা করোর লাখ ১.৭০ হেল্লে, খুঙ্গংগী লমশিংদা অনৌবা থবক মিল্লিয়ন কয়া ফংহল্লে।

প্রধান মন্ত্রীনা হায়খি হন্দক কংফাল মনুংগী ঈশিং লম্বীদা পোৎ-চৈ পুথোক-পুশিনগী থবক য়াম্না চাউখৎলে, ২০১৪ গী মমাঙদা কার্গো মিল্লিয়ন তন ১৮ খক কংফাল মনুংগী ঈশিং লম্বীদা পোৎ-চৈ পুথোক-পুশিন তৌখি। অসিগী ওইনা কংফাল মনুংগী ঈশিং লম্বীদা পোৎ-চৈ পুথোক-পুশিন তৌবা তন মিল্লিয়ন ১৪৫ হেল্লে। হিরম অসিদা ভারতনা থৌশিল ফজনা শেম্বা অমসুং ৱারেপ লৌবদগী মাইপাকপা ঙম্বনি। লৈবাক অসিগী ঈশিং লম্বী ৫ দগী ১১০ দা হেনগৎলে অমসুং ঈশিং লম্বীশিংগী অশাংবা কিমি ২৭০০ দগী কিমি ৫০০০ দা হেনগৎলে। মাইপাকপশিং অসিনা লৈবাক অসিগী নহারোলশিংদা অনৌবা খুদোংচাবা কয়া ফংহল্লে। 

প্রধান মন্ত্রীনা হায়খি মুম্বাইনা ৱার্ল্দ ওদিও ভিজুএল এন্দ ইন্তরতেনমেন্ত সম্মিৎ (ৱেবস) ২০২৫ য়ুম্বু ওইরগনি অমসুং থৌরম অসিদা ভারতকী নহারোলশিং মরুওইনা লৌরি, অহানবা ওইনা নহা ওইরিবা ক্রিয়েতরশিংদা অসিগুম্বা মফম অমা পীরি। মেদিয়া, গেমিং অমসুং ইন্তরতেনমেন্তদা অনৌবা থবক পাংথোকপশিংগীদমক, ৱেবস অসি মখোয়গী হৈথোই-শিংথোইবা উৎনবা মমাঙদা অমুক্ত ফংখিদ্রিবা খুদোংচাবা অমনি। ইন্তরতেনমেন্তগী স্তার্দঅপশিংনা ইনভেস্তরশিং অমসুং উদ্যোগশিংগী লুচিংবশিংগা উন্নবা খুদোংচাবা ফংলগনি অমসুং মসি মখোয়গী অনৌবা ৱাখলশিং মালেমদা খঙহন্নবা খ্বাইদগী চাউবা মফম অমা ওইরগনি। থৌরম অসিদা শীল্লিবা তোঙান তোঙানবা ৱার্কশোপশিংগী খুৎথাংদা নহারোলশিং এ.আই. এক্স.আর অমসুং অঙকপা মেদিয়া কয়া খঙবা ঙম্লগনি। ৱেবসনা তুংদা ভারতকী দিজিতেল কন্তেন্ত থৌনা হাপ্লগনি।

প্রধান মন্ত্রীনা হায়খি লৈবাক অসিগী মাইপাকপশিংদা খুন্নাইগী কাংলুপ খুদিংমক্না মতেং পাংলি। ভারতকী নুপীমচাশিংনা মাঙজিল থারি, হন্দক লাউথোকখিবা য়ু.পি.এস.সিগী ফলদা, মকোক থোংবা পোজিসন অনি নুপীশিংনা ওইরে অমসুং মকোক মঙাগী মনুংদা অহুম নুপীশিংনি। লৈঙাক পায়বদগী হৌরগা স্পেস অমসুং সাইন্স ফাওবগী হিরমশিংদা ভারতকী নুপীশিংগী থৌনা অনৌবা থাকশিং য়ৌরে। সেল্ফ হেল্প গ্রুপশিং, বিবা শখিশিং, বেঙ্ক শখিশিং অমসুং কৃষি শখিশিংগুম্বা থবকশিংগী খুৎথাংদা অনৌবা খুদোংচাবশিং পীদুনা খুঙ্গংগী নুপীশিংগী ফিবম ফগৎনবা সরকারনা মীৎয়েং চঙলি।

হৌজিক নুপী লিশিং কয়া দ্রোন দিদিশিং ওইনা থবক তৌরি অমসুং মখোয়গী ইমুংশিং অমসুং খুঙ্গংশিংগী ফিবম ফগৎহল্লে, লৈবাক অসিদা সেল্ফ হেল্প গ্রুপ লাখ ৯০ হেন্না লৈরিবা অসিগী মনুংদা নুপী করোর ১০ হেন্না শরুক য়ারি। হায়রিবা গ্রুপশিং অসিগী ফিবম ফগৎনবা, সরকারনা মখোয়গী বজেত শরুক মঙাদা হেনগৎহল্লে অমসুং গরেন্তি য়াওদনা লুপা লাখ ২০ ফাওবা লোন পীনবা খুদোংচাবা সরকারনা পীরে। মুদ্রা য়োজনাগী মশিং খ্বাইদগী য়াম্বা বেনিফিসরিশিং নুপীশিংনা ওইরি অমসুং লৈবাক অসিদা স্তার্দঅপ ৫০,০০০ হেন্না নুপীশিংনা দিরেক্তরশিং ওইরি। হিরম অসিদা অওনবশিং পুরকপা অসিনা চাউখৎনবা অমসুং থবক ফংনবা অমসুং মশানা মশাবু থবক পীজনবা খুদোংচাবা হেন্না পীনবা ভারতকী ৱারেপ হেন্না মপাঙ্গল কনখৎহল্লে।

ঙসি মখোয়গী ইমপ্লোইমেন্ত লেত্তরশিং ফংলবা নহারোলশিংদা ৱা ঙাংবদা, প্রধান মন্ত্রীনা হায়খি মখোয়গী থবক কনবা অমসুং কৎথোকপগী ফল অমা ওইনা লনাই মীওইশিং অসিনা ফমশিং ফংবনি। মখোয়গী পুন্সিগী মথংগী তাঙ্ককশিং অসি মখোয়  মশা খক্তগী নত্তনা লৈবাক্কীদমক কৎথোক্নবা মতম অদু লাক্লে। মীয়ামগী থবক তৌনবগী থৌনা অসি লেংদনা লৈহনগদবনি। কনাগুম্বা অমনা মখোয়গী থবক অদু খ্বাইদগী ৱাংবা ইকায়খুম্নবগা লোয়ননা থবক তৌবা মতমদা, মখোয়গী থবকশিং অদুনা লৈবাক অসি অনৌবা মাইকৈদা লমজিংনবা থৌনা পীগনি। থৌদাংশিং পাংথোকপা, অনৌবা থবকশিং অমসুং ৱাশক ঙাক্না থবকত ঔবা অসিনা ভারতকী মীওই খুদিংমক্কী পুন্সিগী হিংবগী থাক হেনগৎহনবদা মতেং পাংগনি।

লনাই মীওইশিংনা দাইত্ব লৈবা ফমশিং পায়রকপা মতমদা, নাগরিকশিং ওইনা মখোয়গী থৌদাং অসিনা হেন্না মরুওই। হৌজিক এক পের মা কে নাম কেম্পেন পাংথোক্লি অমসুং মহৌশা লাইরেম্বীদা তৌবীমল খঙবা উৎপা ওইনা অমসুং থবক তৌবা ওইনা মীওই খুদিংমক্না মখোয়গী মমাগী মিংদা উ পাম্বী অমা থাগদবনি। মখোয়গী থবক মফমদা কেম্পেন অসিদা মীওই মশিং য়াম্না শরুক য়ানবা লনাই মীওইশিংনা হোৎনগদবনি। লাক্লিবা জুন থাদা মালেমগী য়োগ নুমিৎ পাংথোক্লগনি অমসুং মসি মাইপাক্লবা শীনফম অমগা লোয়ননা হকচাং ফবা পুন্সি অমা হৌনবগী অচৌবা খুদোংচাবা অমনি। হকচাং ফবা অসি লনাই মীওইশিংগী তঙাইফদবা খক নত্তনা মসি থবক ফজনা শুনবা অমসুং লৈবাক্কী কান্নবা পুরক্নবা মরুওইবনি।

প্রধান মন্ত্রীনা হায়খি লনাই মীওইশিংনা মিসন কর্ময়োগী থৌরাংগী মখাদা মখোয়গী থবক তৌবা ঙম্বা হেনগৎহনগদবনি। মখোয়গী থৌদাংশিং অসি ইচম চম্না ফমশিং পায়বা খক নত্তে, ভারতকী মীয়াম য়াইফনবা অমসুং লৈবাক অসি চাউখৎনবা থবক তৌবনি। সিবিল সর্বিস দেদা ফোঙদোকখিবা ‘নাগরিক দেবো ভাবা’ নিংশিংখি অমসুং মীয়ামগী থবক তৌবা অসি ঈশ্বরগী সেবা তৌবগা মান্নৈ হায়না ফোঙদোকখি। পুকচেল শেংবা অমসুং কৎথোকপগা লোয়ননা থবক তৌবনা ভারত চাউখৎলবা অমসুং নুংঙাই য়াইফবা লৈবাক অমা ওইগনি। মঙলানশিং মঙফাওনবা ঙম্নবা অমসুং ভারতমচা করোর ১৪০ গী অনিংবশিং থুংহন্নবা নহারোলশিংনা থবক তৌগদবনি।

নুঙগীৱারোল

প্রধান মন্ত্রীনা থবক ফংহন্নবা মরুওইবা পীবগী অচেৎপা ফিরেপ অদু উৎপগা লোয়ননা লৈবাক্কী তোঙান তোঙানবা মফম ৪৭ দা ১৫শুবা রোজগার মেলা পাংথোকখ্রে।  মসিনা নহাশিংদা লৈবাক শেমগৎপদা শরুক য়াবগী মগুন লৈবা খুদোংচাবশিং ফংহন্দুনা মখোয়গী শক্তি হেনগৎহনগনি।

লৈবাক শীনবা থুংবদগী নৌনা থবক খল্লবা মীওইশিংনা মসিদা রেভিন্যু দিপার্তমেন্ত, হায়র এজুকেসন দিপার্তমেন্ত, গৃহ মন্ত্রালয়, ঙাকশেল মন্ত্রালয়, রেলৱে, পোস্ত দিপার্তমেন্ত, লেবর অমসুং ইমপ্লোইমেন্ত দিপার্তমেন্ত, হকশেল অমসুং য়াইফ-য়ুম্বাল মন্ত্রালয় অমসুং অতোপ্পা তোঙান তোঙানবা মন্ত্রালয়শিং অমসুং দিপার্তমেন্তশিংদা থবক চংলগনি।

****