ഭാരത് മാതാ കീ ജയ്!
ഭാരത് മാതാ കീ ജയ്!
ഭാരത് മാതാ കീ ജയ്!

ആന്ധ്രാപ്രദേശ് ഗവർണർ സയ്യിദ് അബ്ദുൾ നസീർ ജി, ഈ സംസ്ഥാനത്തെ ജനപ്രിയ മുഖ്യമന്ത്രി, എന്റെ സുഹൃത്ത് ശ്രീ ചന്ദ്രബാബു നായിഡു ജി, നടനും രാഷ്ട്രീയക്കാരനും ഉപമുഖ്യമന്ത്രിയുമായ പവൻ കല്യാൺ ജി, കേന്ദ്ര മന്തിസഭയിലെ എന്റെ സഹപ്രവർത്തകർ, സംസ്ഥാന ​ഗവണ്മെൻ്റിലെ മന്ത്രിമാർ, എംപിമാർ, മറ്റ് എംഎൽഎമാർ, ബഹുമാന്യരായ പൗരന്മാരെ, സഹോദരീ സഹോദരന്മാരെ,

आंध्र प्रजला प्रेमा मरियु अभिमा-नानकि ना कृतज्ञतलु।

ना अभिमानान्नि चुपिनचे अवकासम इप्पुडु लभिन-चिन्धि। 

(ആന്ധ്രയിലെ ജനങ്ങളുടെ സ്നേഹത്തിനും ആരാധനയ്ക്കും നന്ദി. എന്റെ സ്നേഹം പ്രകടിപ്പിക്കാനുള്ള അവസരം ഇപ്പോൾ വന്നിരിക്കുന്നു)

ആദ്യമായി, സിംഹാചലം വരാഹ ലക്ഷ്മി നരസിംഹ സ്വാമിയെ ഞാൻ വണങ്ങുന്നു.

സുഹൃത്തുക്കളേ,

നിങ്ങളുടെ അനുഗ്രഹത്താൽ, 60 വർഷത്തിനിടെ ആദ്യമായി, രാജ്യം മൂന്നാം തവണയും ഒരു ​ഗവണ്മെൻ്റിനെ തെരഞ്ഞെടുത്തു, ​ഗവണ്മെൻ്റ് രൂപീകരിച്ചതിനുശേഷം, ഇത് എന്റെ ആദ്യത്തെ ഔദ്യോഗിക പരിപാടിയാണ്. നിങ്ങൾ എനിക്ക് നൽകിയ ഗംഭീരമായ സ്വീകരണവും ബഹുമാനവും, യാത്രയിലുടനീളം ജനങ്ങൾ എന്നെ അനുഗ്രഹിച്ച രീതിയും അതിശയകരമാണ്. ഇന്ന്, ചന്ദ്രബാബുവിന്റെ പ്രസംഗത്തിൽ, അദ്ദേഹം എല്ലാ പ്രധാന കാര്യങ്ങളും പങ്കുവെച്ചു. അദ്ദേഹത്തിന്റെ ഓരോ വാക്കിനും പിന്നിലെ ഉത്സാഹത്തെയും വികാരത്തെയും ഞാൻ ബഹുമാനിക്കുന്നു, ആന്ധ്രയിലെയും രാജ്യത്തെ മുഴുവൻ ജനങ്ങളും ഒരുമിച്ച് ഈ ലക്ഷ്യങ്ങൾ തീർച്ചയായും കൈവരിക്കുമെന്ന് ഞാൻ ഉറപ്പ് നൽകുന്നു.

സുഹൃത്തുക്കളേ,

നമ്മുടെ ആന്ധ്രാപ്രദേശ് സാധ്യതകളുടെയും അവസരങ്ങളുടെയും സംസ്ഥാനമാണ്, അന്തർലീന ശക്തിയുടെയും വളർച്ചയുടെയും സംസ്ഥാനമാണ്. ആന്ധ്രയുടെ ഈ സാധ്യതകൾ സാക്ഷാത്കരിക്കപ്പെടുമ്പോൾ, ആന്ധ്ര വികസിതമാകും, അപ്പോൾ മാത്രമേ ഇന്ത്യ ഒരു വികസിത രാഷ്ട്രമായി മാറുകയുള്ളൂ. അതിനാൽ, ആന്ധ്രയുടെ വികസനം ഞങ്ങളുടെ ദർശനമാണ്. ആന്ധ്രയിലെ ജനങ്ങളെ സേവിക്കുക എന്നതാണ് ഞങ്ങളുടെ പ്രതിബദ്ധത. 2047 ഓടെ സംസ്ഥാനത്തെ ഏകദേശം 2.5 ട്രില്യൺ ഡോളർ സമ്പദ്‌വ്യവസ്ഥയാക്കുക എന്നതാണ് ആന്ധ്രാപ്രദേശ് ലക്ഷ്യം വച്ചിരിക്കുന്നത്. ഈ ദർശനം സാക്ഷാത്കരിക്കുന്നതിനായി, ചന്ദ്രബാബു ഗാരുവിന്റെ ​ഗവണ്മെൻ്റ് "സ്വർണ്ണ ആന്ധ്ര@2047" സംരംഭത്തിന് തുടക്കമിട്ടു. സംസ്ഥാനത്തിന്റെ ഓരോ ലക്ഷ്യവും കൈവരിക്കുന്നതിന് കേന്ദ്രത്തിലെ എൻ‌ഡി‌എ ​ഗവണ്മെൻ്റും ആന്ധ്രാപ്രദേശിനൊപ്പം തോളോട് തോൾ ചേർന്ന് പ്രവർത്തിക്കുന്നു. അതുകൊണ്ടാണ് കേന്ദ്ര ഗവണ്മെൻ്റ് ലക്ഷക്കണക്കിന് കോടി രൂപയുടെ പദ്ധതികളിൽ ആന്ധ്രാപ്രദേശിന് പ്രത്യേക മുൻഗണന നൽകുന്നത്. ഇന്ന്, 2 ലക്ഷം കോടി രൂപയുടെ പദ്ധതികളുടെ ശിലാസ്ഥാപനം ഇവിടെ നടന്നു. ഈ പദ്ധതികൾ ആന്ധ്രാപ്രദേശിന്റെ വികസനത്തെ പുതിയ ഉയരങ്ങളിലേക്ക് കൊണ്ടുപോകും. ഈ വികസന പദ്ധതികൾക്ക് ആന്ധ്രാപ്രദേശിനെയും മുഴുവൻ രാജ്യത്തെയും ഞാൻ അഭിനന്ദിക്കുന്നു.

സുഹൃത്തുക്കളേ,

ആന്ധ്രപ്രദേശ് അതിന്റെ നൂതന സ്വഭാവം കാരണം ഐടി, സാങ്കേതികവിദ്യ എന്നിവയുടെ ഒരു പ്രധാന കേന്ദ്രമാണ്. ഇപ്പോൾ, ആന്ധ്ര പുതിയ ഭാവി സാങ്കേതികവിദ്യകളുടെ കേന്ദ്രമായി മാറേണ്ട സമയമായി. നിലവിൽ വികസിപ്പിച്ചുകൊണ്ടിരിക്കുന്ന സാങ്കേതികവിദ്യകളിൽ, തുടക്കം മുതൽ തന്നെ നമ്മൾ നേതൃത്വം നൽകണം. ഇന്ന്, ഹരിത ഹൈഡ്രജന്റെ ഉപയോഗം ഉയർന്നുവരുന്ന ഒരു മേഖലയാണ്. 2023 ൽ രാജ്യം ദേശീയ ഹരിത ഹൈഡ്രജൻ ​ദൗത്യം ആരംഭിച്ചു. 2030 ഓടെ 5 ദശലക്ഷം മെട്രിക് ടൺ ഹരിത ഹൈഡ്രജൻ ഉത്പാദിപ്പിക്കുക എന്നതാണ് ഞങ്ങളുടെ ലക്ഷ്യം!പ്രാരംഭ ഘട്ടത്തിൽ, രണ്ട് ഹരിത ഹൈഡ്രജൻ കേന്ദ്രങ്ങൾ സ്ഥാപിക്കും, അതിലൊന്ന് നമ്മുടെ വിശാഖപട്ടണത്തായിരിക്കും. ഭാവിയിൽ, ഇത്രയും വലിയ തോതിലുള്ള ഹരിത ഹൈഡ്രജൻ ഉൽപാദന സൗകര്യമുള്ള ലോകത്തിലെ ചുരുക്കം ചില നഗരങ്ങളിൽ ഒന്നായിരിക്കും വിശാഖപട്ടണം. ഈ ഹരിത ഹൈഡ്രജൻ കേന്ദ്രം നിരവധി തൊഴിലവസരങ്ങൾ സൃഷ്ടിക്കും. കൂടാതെ, ആന്ധ്രാപ്രദേശിലെ നിർമ്മാണ ആവാസവ്യവസ്ഥയും വികസിക്കും.

സുഹൃത്തുക്കളേ,

ഇന്ന്, നക്കാപ്പള്ളിയിൽ ബൃഹത്ത് ഔഷധ പാർക്ക് പദ്ധതിക്ക് തറക്കല്ലിടാനുള്ള അവസരവും എനിക്ക് ലഭിച്ചു. രാജ്യത്ത് ഇത്തരമൊരു പാർക്ക് സ്ഥാപിക്കപ്പെടുന്ന മൂന്ന് സംസ്ഥാനങ്ങളിൽ ഒന്നാണ് ആന്ധ്രാപ്രദേശ്. ഉല്പാദനത്തിനും ഗവേഷണത്തിനുമായി മികച്ച അടിസ്ഥാന സൗകര്യങ്ങൾ ഈ പാർക്കിൽ ഉണ്ടായിരിക്കും. ഇത് നിക്ഷേപകരുടെ ആവേശം വർദ്ധിപ്പിക്കുകയും ഇവിടുത്തെ ഔഷധ കമ്പനികൾക്ക് പ്രയോജനമാവുകയും ചെയ്യും.

സുഹൃത്തുക്കളേ,

നഗരവൽക്കരണത്തെ ഒരു അവസരമായി നമ്മുടെ ​ഗവണ്മെൻ്റ് കാണുന്നു. ആന്ധ്രയെ നവയുഗ നഗരവൽക്കരണത്തിന് ഒരു മാതൃകയാക്കാൻ ഞങ്ങൾ ആഗ്രഹിക്കുന്നു. ഈ ദർശനം സാക്ഷാത്കരിക്കുന്നതിന്, ഇന്ന്, ക്രിസ് സിറ്റി എന്നറിയപ്പെടുന്ന കൃഷ്ണപട്ടണം വ്യാവസായിക മേഖലയ്ക്ക് തറക്കല്ലിട്ടു. ഈ സ്മാർട്ട് സിറ്റി ചെന്നൈ-ബെംഗളൂരു വ്യാവസായിക ഇടനാഴിയുടെ ഭാഗമാകും. ഇത് ആന്ധ്രയിലേക്ക് ആയിരക്കണക്കിന് കോടി നിക്ഷേപം കൊണ്ടുവരുകയും ദശലക്ഷക്കണക്കിന് വ്യാവസായിക തൊഴിലവസരങ്ങൾ സൃഷ്ടിക്കുകയും ചെയ്യും.

സുഹൃത്തുക്കളേ,

ശ്രീ സിറ്റിയുമായി ചേർന്ന് ഒരു നിർമ്മാണ കേന്ദ്രമാകുന്നതിന്റെ നേട്ടങ്ങൾ ആന്ധ്രാപ്രദേശിന് ഇതിനകം തന്നെ ലഭിക്കുന്നുണ്ട്. വ്യാവസായിക, നിർമ്മാണ മേഖലകളിൽ ആന്ധ്രാപ്രദേശിനെ രാജ്യത്തെ മുൻനിര സംസ്ഥാനങ്ങളിലൊന്നാക്കി മാറ്റുക എന്നതാണ് ഞങ്ങളുടെ ശ്രമം. നിർമ്മാണം പ്രോത്സാഹിപ്പിക്കുന്നതിനായി, ഞങ്ങളുടെ ​ഗവണ്മെൻ്റ് ഉല്പാദന ബന്ധിത ആനുകൂല്യ പദ്ധതികൾ പോലുള്ളവ നടപ്പിലാക്കുന്നു. തൽഫലമായി, ഇന്ന്, നിരവധി ഉല്പന്നങ്ങളുടെ നിർമ്മാണത്തിൽ ഇന്ത്യ ലോകത്തിലെ മുൻനിര രാജ്യങ്ങളിൽ ഒന്നാണ്.

സുഹൃത്തുക്കളേ,

ഇന്ന്, പുതിയ വിശാഖപട്ടണം നഗരത്തിൽ ദക്ഷിണ കോസ്റ്റ് റെയിൽവേ സോൺ ആസ്ഥാനത്തിനുള്ള തറക്കല്ലിടൽ നടക്കുന്നു. ആന്ധ്രാപ്രദേശിന്റെ വികസനത്തിന് ഇത് വളരെ പ്രധാനമാണ്. വളരെക്കാലമായി, ഒരു പ്രത്യേക റെയിൽവേ മേഖലയ്ക്കുള്ള ആവശ്യം ഉണ്ടായിരുന്നു, ഇന്ന്, ഈ സ്വപ്നം സാക്ഷാത്കരിക്കപ്പെടുന്നു. സൗത്ത് കോസ്റ്റ് റെയിൽവേ സോണിന്റെ ആസ്ഥാനം സ്ഥാപിതമായിക്കഴിഞ്ഞാൽ, മേഖലയിലുടനീളം കാർഷിക, വ്യാപാര സംബന്ധിയായ പ്രവർത്തനങ്ങൾ വ്യാപിക്കും. കൂടാതെ, വിനോദ സഞ്ചാര മേഖലയ്ക്കും പ്രാദേശിക സമ്പദ്‌വ്യവസ്ഥയ്ക്കും വളർച്ചയ്ക്കുള്ള പുതിയ അവസരങ്ങൾ ലഭിക്കും. ഇന്ന്, ആയിരക്കണക്കിന് കോടി രൂപയുടെ കണക്റ്റിവിറ്റിയുമായി ബന്ധപ്പെട്ട പദ്ധതികളുടെ ഉദ്ഘാടനവും തറക്കല്ലിടലും ഇവിടെ നടന്നു. റെയിൽവേ മേഖലയിൽ, 100% വൈദ്യുതീകരണം പൂർത്തിയായ സംസ്ഥാനങ്ങളിൽ ഒന്നാണ് ആന്ധ്രാപ്രദേശ്. അമൃത് ഭാരത് സ്റ്റേഷൻ പദ്ധതി പ്രകാരം ആന്ധ്രാപ്രദേശിലെ എഴുപതിലധികം റെയിൽവേ സ്റ്റേഷനുകൾ വികസിപ്പിച്ചുകൊണ്ടിരിക്കുന്നു. ആന്ധ്രാപ്രദേശിലെ ജനങ്ങളുടെ യാത്രാ സൗകര്യത്തിനായി ഏഴ് വന്ദേ ഭാരത് ട്രെയിനുകളും അമൃത് ഭാരത് ട്രെയിനുകളും സർവീസ് നടത്തുന്നുണ്ട്.

സുഹൃത്തുക്കളേ,

മികച്ച കണക്റ്റിവിറ്റിയും മെച്ചപ്പെട്ട സൗകര്യങ്ങളും ഉള്ള ആന്ധ്രയിലെ ഈ അടിസ്ഥാന സൗകര്യ വിപ്ലവം സംസ്ഥാനത്തിന്റെ മുഴുവൻ ഭൂപ്രകൃതിയെയും മാറ്റിമറിക്കും. ഇത് ജീവിത സൗകര്യവും ബിസിനസ് സു​ഗമമാക്കുന്നതും വർദ്ധിപ്പിക്കും. 2.5 ട്രില്യൺ ഡോളർ സമ്പദ്‌വ്യവസ്ഥയായി മാറുക എന്ന ആന്ധ്രയുടെ ലക്ഷ്യത്തിന് ഇത് അടിത്തറ പാകും.

സുഹൃത്തുക്കളേ,

നൂറ്റാണ്ടുകളായി, വിശാഖപട്ടണവും ആന്ധ്രാപ്രദേശിന്റെ തീരവും ഇന്ത്യയുടെ വ്യാപാരത്തിലേക്കുള്ള കവാടമാണ്. ഇന്നും വിശാഖപട്ടണത്തിന് അതേ തലത്തിലുള്ള പ്രാധാന്യമുണ്ട്. സമുദ്രവുമായി ബന്ധപ്പെട്ട അവസരങ്ങൾ പൂർണ്ണമായും പ്രയോജനപ്പെടുത്തുന്നതിനായി ഞങ്ങൾ ദൗത്യ രീതിയിൽ നീല സമ്പദ് വ്യവസ്ഥ പ്രോത്സാഹിപ്പിക്കുന്നു. ഇതിനായി വിശാഖപട്ടണം മത്സ്യബന്ധന ഹാർബർ നവീകരിച്ചുകൊണ്ടിരിക്കുന്നു. ആന്ധ്രാപ്രദേശിലെ മത്സ്യബന്ധനത്തിൽ ഏർപ്പെട്ടിരിക്കുന്ന നമ്മുടെ സഹോദരീസഹോദരന്മാരുടെ വരുമാനവും വ്യവസായവും വളരുന്നുണ്ടെന്ന് ഉറപ്പാക്കാൻ ഞങ്ങൾ പൂർണ്ണ സംവേദനക്ഷമതയോടെ പ്രവർത്തിക്കുന്നു. മത്സ്യത്തൊഴിലാളികൾക്ക് കിസാൻ ക്രെഡിറ്റ് കാർഡ് പോലുള്ള സൗകര്യങ്ങൾ ഞങ്ങൾ നൽകിയിട്ടുണ്ട്. സമുദ്രത്തിലെ സുരക്ഷയ്ക്കായി ഞങ്ങൾ നിർണായക നടപടികൾ സ്വീകരിക്കുന്നു.

സുഹൃത്തുക്കളേ,

രാജ്യത്തിന്റെ എല്ലാ മേഖലകളിലും എല്ലാവരെയും ഉൾക്കൊള്ളുന്നതും സമഗ്രവുമായ വികസനം ഉണ്ടാകണമെന്നാണ് ഞങ്ങളുടെ ശ്രമം, അങ്ങനെ വികസനത്തിന്റെ നേട്ടങ്ങൾ സമൂഹത്തിലെ എല്ലാ വിഭാഗങ്ങളിലും എത്തിച്ചേരും. ഇത് നേടിയെടുക്കുന്നതിനായി, സമ്പന്നവും ആധുനികവുമായ ഒരു ആന്ധ്രാപ്രദേശിന്റെ സൃഷ്ടിക്ക് എൻ‌ഡി‌എ ​ഗവണ്മെൻ്റ് പ്രതിജ്ഞാബദ്ധമാണ്. ഇന്ന് ഉദ്ഘാടനം ചെയ്യപ്പെടുന്ന പദ്ധതികൾ ആന്ധ്രയിലെ ജനങ്ങളുടെ അഭിവൃദ്ധി ഉറപ്പാക്കും. ഈ പദ്ധതികൾക്ക് ഞാൻ നിങ്ങളെ എല്ലാവരെയും ഒരിക്കൽ കൂടി അഭിനന്ദിക്കുന്നു.

നിങ്ങൾക്കെല്ലാവർക്കും വളരെ നന്ദി!

ഡിസ്ക്ലയ്മർ : പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലാണ് നടത്തിയത്.

-SK-