محترم صدر دسنائیک جی،

دونوں ممالک کے مندوبین

میڈیا کے دوستو،

نمسکار!

ایوبوان!

وانکم!

میرے لیے یہ بہت فخر کی بات ہے کہ آج صدر دسنائیک کی طرف سے ‘سری لنکا مترا وبھوشن’ سے مجھے نوازا گیا ۔ یہ ایوارڈ نہ صرف مجھے بلکہ 140 کروڑ ہندوستانیوں کو بھی اعزازبخشتا ہے ۔ یہ ہندوستان اور سری لنکا کے عوام کے درمیان تاریخی تعلقات اور گہری دوستی کو شاندارخراج تحسین ہے ۔

میں اس اعزاز کے لیے صدر  دسنائیک، سری لنکا کی حکومت اور سری لنکا کے عوام کا تہہ دل سے شکریہ ادا کرتا ہوں ۔

دوستو،

وزیر اعظم کے طور پر سری لنکا کا یہ میرا چوتھا دورہ ہے ۔ 2019 میں میرا آخری دورہ انتہائی حساس وقت پر ہوا تھا ۔ اس وقت یہ میرا پختہ یقین تھا کہ سری لنکا دوبارہ ابھرے گا  اور مضبوط ہو کر ابھرے گا ۔

میں سری لنکا کے عوام کی ہمت اور صبر کو سراہتا ہوں  اور آج ، میں سری لنکا کو ترقی کی راہ پر واپس دیکھ کر بے حد خوش ہوں ۔ ہندوستان کو فخر ہے کہ اس نے ایک سچے دوست پڑوسی کے طور پر اپنے فرائض پورے کیے ہیں ۔ چاہے وہ 2019 کا دہشت گردانہ حملہ ہو ، کووڈ وبا ہو ، یا حالیہ معاشی بحران ہو ، ہم ہر مشکل کے وقت سری لنکا کے عوام کے ساتھ مضبوطی سے کھڑے رہے ہیں ۔

مجھے عظیم تمل سنت تھروولوور کے الفاظ یاد آ رہے ہیں۔  انہوں نے کہا:

سیار قریہ یاول

ناٹ پن

آدو پل

وَنَیْکَرَیْا یاول کاپو

جس کا مطلب ہے، چیلنجوں اور دشمنوں کے سامنے، ایک سچے دوست اور اس کی دوستی کی ڈھال سے زیادہ کوئی مضبوط یقین دہانی نہیں ہو سکتی۔

دوستو،

صدر دسنائیک نے صدر بننے کے بعد اپنے پہلے غیر ملکی دورے کے لیے ہندوستان کا انتخاب کیا  اور مجھے ان کا پہلا غیر ملکی مہمان بننے کا اعزاز حاصل ہوا ہے ۔ یہ ہمارے خصوصی تعلقات کی گہرائی کی علامت ہے ۔

ہماری پڑوسی پہلے کی پالیسی اور وژن ‘مہاساگر’ دونوں میں سری لنکا کا ایک خاص مقام ہے ۔ پچھلے چار مہینوں میں ، صدر دسنائیک کے ہندوستان کے دورے کے بعد سے ، ہم نے اپنے تعاون میں نمایاں اضافہ کیا ہے ۔

سمپور سولر پاور پلانٹ سری لنکا کو توانائی کی حفاظت حاصل کرنے میں مدد کرے گا ۔ کثیر پروڈکٹ پائپ لائن کی تعمیر اور ٹرنکومالی کو توانائی کے مرکز کے طور پر ترقی دینے کے لیے طے پانے والے معاہدے سے تمام سری لنکا کے لوگوں کو فائدہ ہوگا ۔ دونوں ممالک کے درمیان گرڈ انٹر کنیکٹیوٹی معاہدہ سری لنکا کے لیے بجلی برآمد کرنے کے مواقع پیدا کرے گا ۔

مجھے خوشی ہے کہ آج سری لنکا میں مذہبی مقامات کے لیے 5000 سولر روف ٹاپ سسٹم کا افتتاح کیا جائے گا ۔ بھارت سری لنکا  کومنفرد ڈیجیٹل شناختی پروجیکٹ کے لیے بھی تعاون فراہم کرے گا ۔

دوستو،

ہندوستان نے ‘سب کا ساتھ سب کا وکاس’  کانظریہ اپنایا ہے ۔ ہم اپنے شراکت دار ممالک کی ترجیحات کو بھی اہمیت دیتے ہیں ۔

صرف پچھلے 6 مہینے میں ، ہم نے 100 ملین امریکی ڈالر سے زیادہ کے قرضوں کو گرانٹ میں تبدیل کیا ہے ۔ ہمارا دو طرفہ ‘قرض کی تنظیم نو کا معاہدہ’ سری لنکا کے عوام کو فوری مدد اور راحت فراہم کرے گا ۔ آج ہم نے شرح سود کو کم کرنے کا بھی فیصلہ کیا ہے ۔ یہ اس بات کی علامت ہے کہ آج بھی ہندوستان سری لنکا کے عوام کے ساتھ کھڑا ہے ۔

مشرقی صوبوں کی سماجی اور اقتصادی ترقی کے لیے تقریباً 2.4 بلین لنکن روپے کا امدادی پیکج فراہم کیا جائے گا۔ آج ہم نے کسانوں کی فلاح و بہبود کے لیے سری لنکا کے سب سے بڑے گودام کا بھی افتتاح کیا۔

کل ہم ‘مہو-اومانتھائی’ ریلوے لائن کا افتتاح کریں گے، اور ‘مہو-انورادھا پورہ’ سیکشن پر سگنلنگ نظام کا سنگ بنیاد رکھیں گے۔ کنکیسنتھورائی بندرگاہ کی جدید کاری کا کام بھی جلد شروع ہو جائے گا۔

سری لنکا میں بھارت نژاد تمل برادری کے لیے 10,000 مکانات کی تعمیر کا کام جلد مکمل کیا جائے گا۔ سری لنکا کے 700 اضافی اہلکاروں کو تربیت فراہم کی جائے گی۔ ان میں ارکان پارلیمنٹ، عدلیہ سے وابستہ افراد، کاروباری شخصیات، میڈیا کے افراد کے ساتھ ساتھ نوجوان رہنما بھی شامل ہوں گے۔

دوستو،

ہمیں یقین ہے کہ ہمارے مشترکہ سیکورٹی مفادات ہیں۔ دونوں ممالک کی سلامتی ایک دوسرے سےمنسلک اور باہمی طور پرمنحصر ہے۔

میں ہندوستان کے مفادات کے تئیں حساسیت کے لیے صدر دسنائیک کا شکر گزار ہوں۔ ہم دفاعی تعاون کے شعبے میں کیے گئے اہم معاہدوں کا خیرمقدم کرتے ہیں۔ ہم نے کولمبو سیکورٹی کانکلیو اور بحر ہند میں سیکورٹی تعاون پر مل کر کام کرنے پر بھی اتفاق کیا ہے۔

دوستو،

ہندوستان اور سری لنکا کے درمیان صدیوں پرانے روحانی روابط ہیں۔

مجھے یہ اعلان کرتے ہوئے بے حد خوشی ہو رہی ہے کہ میری آبائی ریاست گجرات کے اراولی علاقے میں 1960 میں ملے بھگوان بدھ کے مقدس آثار کوتوضیح کے لیے سری لنکا بھیجا جا رہا ہے۔

ہندوستان ترنکومالی میں تھرکونیشورم مندر کی آرائش اور تزئین کاری میں مدد کرے گا۔ ہندوستان انورادھا پورہ مہابودھی مندر کمپلیکس میں مقدس شہر اور نوارا ایلیا میں سیتا ایلیا مندر کی تعمیر میں بھی مدد فراہم کرے گا۔

دوستو،

ہم نے ماہی گیروں کے ذریعہ معاش سے متعلق مسائل پر بھی بات کی۔ ہم نے اتفاق کیا کہ ہمیں اس معاملے میں انسانی ہمدردی کے رویہ کے ساتھ آگے بڑھنا چاہیے۔ ہم نے ماہی گیروں اور ان کی کشتیوں کی فوری رہائی پر بھی زور دیا۔

ہم نے سری لنکا میں تعمیر نو اور مفاہمت پر بھی بات کی۔ صدر دسنائیک نے مجھے اپنے جامع انداز فکر سے واقف کرایا۔ ہم امید کرتے ہیں کہ سری لنکا کی حکومت تمل عوام کی امنگوں پر پورا اترے گی اور سری لنکا کے آئین کو مکمل طور پر نافذ کرنے اور صوبائی کونسل کے انتخابات کرانے کے اپنے عزم کو پورا کرے گی۔

دوستو،

ہندوستان اور سری لنکا کے تعلقات باہمی اعتماد اور خیر سگالی کے رشتوں پر مبنی ہیں۔ ہم اپنے عوام کی امیدوں اور امنگوں کو پورا کرنے کے لیے مل کر کام کرتے رہیں گے۔

ایک بار پھر، میں صدر دسنائیک کے پرتپاک استقبال کے لیے ان کا صمیم قلب سے شکریہ ادا کرتا ہوں۔ مجھے یقین ہے کہ آنے والے وقت میں ہم اپنی شراکت داری کو نئی بلندیوں تک لے جائیں گے۔

بہت بہت شکریہ!

***

ش ح۔م ع۔ش ت۔

U NO:9632