ভারত মাতা কি জয়!

ভারত মাতা কি জয়!

ভারত মাতা কি জয়!

ছত্তিসগর মাহতরি কি জয়!

রতনপুর ৱালি মাতা মহামায়া কি জয়!

কর্মা মায়া কি জয়! বাবা গুরু ঘাসিদাস কি জয়!

(তিল্লিবা মীয়ামদা লমদম অসিগী লোলদা ৱা ঙাংবা)

ঐগী থম্মোয় নুংদগী হায়জরি জয় জোহার!

ছত্তিসগরগী রাজ্যপাল, শ্রী রামেন দেকাজী; রাজ্য অসিগী মীয়ামনা পাম্নবা অমসুং থৌনা ফরবা মুখ্য মন্ত্রী, শ্রী বিষ্ণুদেও সাইজী; কেন্দ্রগী মন্ত্রীমন্দলদা ঐহাক্কী ইকাই খুম্নরবা মরুপ, মনোহর লালজী; লমদম অসিগী পার্লিয়ামেন্তকী মেম্বর অমসুং কেন্দ্রগী মন্ত্রী তোখান সাহুজী; ছত্তিসগর বিধানসভাগী স্পিকর অমসুং ঐহাক্কী নুংশিরবা মরুপ, রমন সিংহজী; উপ মুখ্য মন্ত্রী, বিজয় শর্মাজী; অরুন সাহুজী; ছত্তিসগর সরকারগী মন্ত্রী, এম.পি. অমসুং এম.এল.এ. পুম্নমক; অমসুং মফম কয়াদগী লাকপা ঐহাক্কী ইচিল-ইনাওশিং!

ঙসিদি অনৌবা চহিগী অহৌবা নুমিৎনি। মসি নবরত্রিগী অহানবা নুমিৎসু ওইরি, অমসুং লমদম অসি মাতা মহামায়াগী লমদম ওইনা থৌজাল ফংলি। ছত্তিসগর অসি মাতা কৌশালিয়ানা পোকখিবা মফমনি। অসিগুম্বা অশেংবা থৌওং অসিদা, লাইগী নুপীগী ইনর্জীদা কত্থোকপা নুমিৎ নিপান অসি ছত্তিসগরগীদমক্তা অখন্নবা মরুওইবা অমা লৈ। নবরত্রিগী অহানবা নুমিত্তা মফম অসিদা লাকপা অসি ঐহাক্কী য়াম্না নুংঙাইবা অমনি। নুমিৎ খরনিগী মমাংদা, ভক্ত শিরোমনি মাতা কর্ম্মগী ইকায় খুম্নবা ওইনা পোস্তেজ স্তাম্প অমা ফোঙখ্রে। মসিগী থৌরম অসিদা ঐহাক্না অদোম পুম্নমকপু থম্মোয় শেংনা নুংঙাইবা ফোংদোকচরি।

মরুপশিং,

নবরত্রিগী কুহ্মৈ অসি রাম নৱমীগী চাউরবা থৌরমগা লোয়ননা লোইশিনগনি। অমসুং ছত্তিসগরনা ভগবান রামগী মফমদা ইকায় খুম্নবা অসি তশেংনা শিংথানীংঙাইনি। ঐখোয়গী রামনামী সমাজ (সেক্ত অমা) অসি ভগবান রামগী শেংলবা মিংখৈ অসিদা মপুং ফানা কত্থোক্লি। ঐহাক্না ভগবান রামগী মমাগী লৈবাক অসিগী মীয়াম অমসুং ঐহাক্কী মরুপশিং পুম্নমক্তা য়াইফ-পাউজেল পীজরি। জয় শ্রী রাম!

মরুপশিং,

ঙসিগী য়াইফরবা নুমিৎ অসিদা, মোহভত্তা স্বয়মভু শিবলিং মহাদেবকী য়াইফ-মঙ্গোলগা লোয়ননা, ছত্তিসগরগী চাউখৎ-থৌরাংবু হেন্না খুমাং চাউশিলহন্নবা ঐঙোন্দা খুদোংচাবা পীরে। মীকুপ খরগী মমাংদা ঐখোয়না লুপা কোতি 33,700 হেনবগী প্রোজেক্তশিং শঙ্গাখ্রে অমসুং উরেপ উয়ুং তমখ্রে। প্রোজেক্তশিং অসিদা শোত্থরবা মীওইশিংগীদমক য়ুম, স্কুলশিং, লম্বী-থোং, রেলৱেজ, ইলেক্ত্রিসিতী অমসুং গ্যাস পাইপলাইনশিং য়াওরি। হায়রিবা প্রোজেক্তশিং অসিনা ছত্তিসগরগী মীয়ামগী পুন্সি মহিংদা চাউনা অহেনবা খুদোংচাবা ফংহল্লগনি। মখোয়না নহারোলশিংগীদমক্তা অনৌবা থবক ফংহন্নবা খুদোংচাবা কয়া অমসু পীগনি। চাউখৎ-থৌরাংগী মরুওইবা প্রোজেক্তশিং অসিগীদমক ঐহাক্না অদোম পুম্নমকপু থম্মোয় শেংনা নুংঙাইবা ফোংদোকচরি।

মরুপশিং,

ঐখোয়গী চৎনবীগী মতুং ইন্না, কনাগুম্বা অমদা য়ুম-কৈ পীবা অসি অফবা কর্মনি হায়না লৌনৈ। অদুম ওইনমক, মশাগী য়ুম অমা লৈবগী মঙলান অদু মপুং ফারকপদগী হেন্না নুংঙাইবা করি লৈবগে? ঙসি, নবরত্রি অমসুং অনৌবা চহিগী য়াইফরবা থৌরম অসিদা, ছত্তিসগরগী লায়রবা ইমুং লাখ অহুম মখোয়গী অনৌবা য়ুমদা হোংলক্লি। মীকুপ খরগী মমাংদা, ঐহাক্না বেনেফিসরী অহুমগা উনবগী খুদোংচাবা ফংখি। অমসুং ঐহাক্না মখোয়গী মাইথোংশিংদা নুংঙাইবা উবা ফংখি। নুপীশিংগী মরক্তগী অমা অদুক্কী মতীক হরাওমনখিবনা ৱা ঙাঙবা ঙমখিদে। মখোয়গী পুন্সিগী অনৌবা তাঙ্কক অসিদা ঐহাক্না হায়রিবা ইমুং পুম্নমক্তা - ইমুং লাখ অহুম অসিদা - নুংঙাইবা ফোংদোকচরি। খুদোংচাদবা ইমুংশিং অসিগী মকোক মথক্তা য়ুম লৈবগী ওইথোকপা অসি অদোম পুম্নমক্কী মতেংদগীনি। অদোম্না মোদীগী গেরেন্তীদা থাজবা থমখিবদগী ঐহাক্না মসি হায়জরি। মমাংগী সরকারগী মখাদা, ছত্তিসগরগী ইমুং লাখ কয়াগীদমক পক্কা য়ুম অমগী মঙলান অসি ফাইলশিংদা অদুমক ফুমজিন্দুনা লৈখি। ঐখোয়গী সরকারনা মসিগী মঙলান অসি মঙফাওনহনগনি হায়না ঐখোয়না অদোমদা থাজবা পীখি। মরম অদুনা, বিষ্ণুদিওগী সরকার শেম্বা মতমদা, মন্ত্রীমন্দলনা অহানবা ওইনা য়ুম লাখ 18 শাবগী ৱারেপ লৌখি। ঙসিদি, য়ুম লাখ অহুম অদু শঙ্গাখ্রে। অসিগুম্বা য়ুমশিং অসি ত্রাইবেলগী লমশিংদা য়ুম কয়া অমা শাবদা ঐহাক্না অখন্ননা নুংঙাইবা ফাওই। বস্তর অমসুং সুরগুজাগী ইমুং কয়াদা হৌজিক পক্কাগী য়ুম লৈরে। মীরোল কয়া খাংপোকশঙদা অৱাবা খাংলকপা মীওই অমনা ইমুংশিং অসিগীদমক মসিগী মরু ওইবা অসি তশেংনা থাগৎকনি। অহোংবা অসিগী পাক চাউবা অদু মপুং ফানা খঙবা ঙমদবা মীওইশিংগীদমক, ঐহাক্না মসি মওং চুম্না খংহনজগে। অদোম্না ত্রেন নৎত্রগা বস অমদা শাংখ্রবা খোঙচৎ অমদা অদোম্না সীত ফংদবনা মরম ওইদুনা লেপতুনা চৎলি। অদোম্না সীত অমা ফংবা মতমদা অদোম্না ৱাবা ফৈ অমসুং নুংঙাইতবা ফাওই, চুমদ্রা? হৌজিক, মখোয়গী পুন্সি চুপ্পা স্লাম নৎত্রগা খাংপোকশঙশিংদা লৈখিবা ইমুংশিং খল্লু। ঙসিদি, মখোয়না পক্কাগী য়ুমদা হোংলকপা মতমদা, মখোয়গী নুংঙাইবা অসি ঙমখৈ লৈতে। অহোংবা অসি উবদা ঐহাকপু অনৌবা থৌনা অমসুং ঐহাক্কী লৈবাক মীয়ামগীদমক লেপ্পা লৈতনা থবক তৌবগী ঐহাক্কী ৱারেপ অদু মপাঙ্গল কনখৎহল্লি।

মরুপশিং,

সরকারনা য়ুমশিং অসি শাবদা মতেং পাংলি, অদুবু য়ুম অমমম করম্না শাবগে হায়বগী ৱারেপ অসি সরকারনা নত্তে, বেনিফিসরীশিং মশামক্না লৌবনি। মসি অদোমগী অপাম্বা য়ুমশিংনি, অমসুং ঐখোয়গী সরকারনা য়ুমশিং শাবদা নত্তনা মসিদা লৈরিবা মীওইশিংগী পুন্সি মহিং ফগৎহন্নবান হোৎনরি। য়ুমশিং অসিদা তোইলেত, ইলেক্ত্রিসিতী, উজ্জ্বলা গ্যাস কন্নেক্সন অমসুং তোতি ঈশিং য়াওনা তঙাই ফদবা খুদোংচাবশিং ফংহন্নবা হোৎনরি। ঙসি মফম অসিদা ইমাশিং অমসুং ইচে-ইচলশিং মশিং য়াম্না লাকপা উবা ফংজৈ। হায়রিবা পক্কাগী য়ুমশিং অসি অয়াম্বনা ঐখোয়গী নুপীশিংগী মিংদা রেজিস্তর তৌখ্রে। অহানবা ওইনা, নুপীমচা লিশিং কয়াদা মখোয়গী মিংদা লিগেল্লি ওইনা মশাগী লম অমা রেজিস্তর তৌখি। ঐহাক্কী নুংশিরবা ইমাশিং অমসুং ইচে-ইচলশিং, অদোমগী মায়থোংদা উরিবা নুংঙাইবা অমসুং অদোমগী থম্মোয়দগী ফংবা য়াইফ-মঙ্গোলশিং অসি ঐহাক্কী খ্বাইদগী চাউবা লননি।

মরুপশিং,

অসিগুম্বা য়ুম মশিং য়াম্না শাবা মতমদা - য়ুম লাখ কয়া শাবা মতমদা - মসি অতোপ্পা মশক থোকপা চাউখৎপা অমা ওইহল্লি। মসি খল্লু: য়ুমশিং অসি কনানা শাখিবগে? মখোয়শিং অসি শাবদা শীজিন্নরিবা পোৎলমশিং অসি কদাইদগী ফংবগে? পোৎলমশিং অসি দিল্লী নৎত্রগা মুম্বাইদগী পুশিল্লকপা নত্তে, মখোয় অসি মফম অদুগী কৈথেলশিংদগী লাকপনি। য়ুমশিং অসি পাক-শন্না শাবা অসিনা ঐখোয়গী চেক শুবশিং, বোর মিস্ত্রীগুম্বা হৈ-শিংলবা শিন্মীশিং অমসুং খুঙ্গংগী শিন্মীশিংদা থবক পীরি। মসিনা কনস্ত্রক্সনগী পোৎলমশিং সপ্লাই তৌরিবা মফম অদুগী অপীকপা দুকানশিংসু কান্নবা ফংহল্লি। মসিগী মথক্তা, ত্রক অমসুং অতোপ্পা ভেহিকলশিংদা পোৎচৈশিং অসি ত্রান্সপোর্ত তৌবা মীওইশিংনা থবক্কী খুদোংচাবা কয়া ফংলি। অসুম্না, য়ুম লাখ কয়া শাবা অসিনা য়ুম লৈহনবতা নত্তনা ছত্তিসগরগী মফম কয়াদা থবক ফংহনখি।

মরুপশিং,

BJP সরকারনা ছত্তিসগরগী মীয়ামদা পীখিবা ৱাশক খুদিংমক নিংথিনা মপুং ফাহল্লি। মুখ্য মন্ত্রীনা হন্দক্তা লোকেল সেল্ফ গভর্নমেন্ত ইন্সতিত্যুসনশিংগীদমক মীখল পাঙথোকখ্রে হায়না পনখি। ঙসি ঐহাক অদোমগী মমাংদা লৈরিঙৈদা, অদোমগী থাজবা অমসুং য়াইফ-মঙ্গোলগীদমক্তা ঐহাক্কী থম্মোয়দগী থাগৎপা ফোংদোক্নবা খুদোংচাবা অসি ঐহাক্না লৌজরি।

মরুপশিং,

সরকারগী তোঙান তোঙানবা স্কিমশিংগী কান্নবা ফংলবা মীওই কয়া অমা ঙসি মফম অসিদা পুনখ্রে। ঐখোয়গী সরকারনা কত্থোকপশিং অদু করম্না থুনা ঙাক্না চৎলি হায়বদু অদোম্না মশামক্না উবা ফংলে। ঐখোয়না ছত্তিসগরগী নুপীশিংদা পীখিবা ঐখোয়গী ৱাশক অদু মপুং ফাহনখ্রে। ধানগী লৌমীশিংনা চহি অনিগী ওইনা পীগদবা বোনাস ফংখ্রে, অমসুং ধান অসি হেনগৎলবা মিনিমম সপোর্ত প্রাইসদা ফংহনখ্রে। মসিগী মহৈ ওইনা, লৌমী ইমুং লাখ কয়ানা পুন্না লুপা করোর লিশিং কয়া ফংখ্রে। মমাংগী কংগ্রেস সরকারগী মখাদা, রিক্রুতমেন্ত একজামিনেসনশিং অসি পাক শন্না শেঞ্জা-থুমজা তৌনবগী ওইখি। BJP সরকারনা হায়রিবা একজামিনেসন স্কেমশিং অসিগী মতাংদা মপুং ফানা থিজিন হুমজিনবগী ওর্দর পীখ্রে। মসিগী মথক্তা, হৌজিক ঐখোয়না রিক্রুতমেন্ত ইগজামশিং অসি মপুং ফানা ত্রান্সপরেন্সী লৈনা পাংথোক্নবা হোৎনরি। হায়রিবা অচুম্বা থবকশিং অসিনা BJPদা মীয়াম্না থাজবা হেনগৎহল্লে। এসেমব্লী অমসুং লোক সভাগী মীখলগী মতুংদা, হৌজিক BJPনা সিভিক ইলেক্সনশিংদসু মায় পাকখ্রে, ছত্তিসগরগী মফম পুম্বদা মখোয়গী ফ্লেগ ৱাংনা পাইরি। রাজ্য অসিগী মীয়াম্না BJP সরকারগী মীৎয়েং অমসুং খোঙথাংশিং অসিদা থম্মোয় শেংনা মতেং পাংলি।

মরুপশিং,

ছত্তিসগরনা রাজ্য অমা ওইনা চহি 25 মপুং ফারকখ্রে। মরকসিদা, চহি অসিদসু অতল জীগী চহি 100শুবা মপোক কুমওন পাংথোক্লি। মহাক্কী লেগেসীগী ইকায় খুম্নবা ওইনা, ছত্তিসগর সরকারনা 2025 অসি অতল নির্মান বর্শ ওইনা পাংথোক্লি। ঐখোয়গী অচেৎপা ফিরেপ অসি ময়েক শেংই - ঐখোয়না মসিবু শেমগৎলে, অমসুং ঐখোয়না মসিবু হেন্না ফগৎহল্লগনি। ঙসি শঙ্গাখিবা নৎত্রগা হৌদোকখিবা ইনফ্রাস্ত্রকচর প্রোজেক্ত খুদিংমক অসি ৱারেপ অসিগী খুদম অমনি।

মরুপশিং,

চাউখৎ-থৌরাংগী কান্নবা অসি মীয়ামদা ফংহন্নবা ছত্তিসগরবু তোঙানবা রাজ্য অমা ওইনা শেমখি। অদুম ওইনমক, কংগ্রেসকী লৈঙাক্কী মখাদা চাউখৎ-থৌরাং অসি লেংদনা লৈখি, অমসুং থবক অমা পায়খৎলকপা মফম খুদিংদা, ফত্তবা চৎনবী অমা লাকখি। কংগ্রেস পার্তীনা অদোমগী য়াইফ-থৌরাংগীদমক তশেংনা করিসু খল্লমদে। অদুবু ঐখোয়গীদি খল্লি। ঐখোয়না অদোমগী পুন্সি, অদোমগী নুংঙাইবা অমসুং অদোমগী অঙাংশিংগী তুংলমচৎপু মরুওইনা লৌরি। ঐখোয়গী সরকারনা ছত্তিসগরগী খুঙ্গং খুদিংদা চাউখৎ থৌরাংগী থবক পায়খৎলি। মফম অসিদা নহা ওইরিবা নুপীমচা অমনা মতম কয়াগী মমাংদগী পেন্তিং অমা থাংদুনা লৈরকপা ঐনা উখি। ঐনা সেক্যুরিতী পর্সনেলদা মহাক্কী মমীং অমসুং লৈফম লৌহৌনবা হায়জরি। ইচানুপী, ঐনা অদোমদা চিথী অমা শোইদনা থারক্কনি। কনাগুম্বা অমনা মসিবু খোমজিনবিয়ু অমসুং মসি ঐঙোন্দা য়ৌহনবিয়ু। থাগৎচরি, নুংশিরবা ইচানুপী। য়াম্না থাগৎচরি। ঙসিদি, অদোম্না অহোংবা লাক্লিবা অসি উবা ফংলে। অফবা লম্বীশিংনা খ্বাইদগী অথাপ্পা ত্রাইবেলগী মফমশিংদসু য়ৌরে। অহানবা ওইনা, ত্রেনশিংনা অনৌবা লমদমশিং শম্নহল্লি, অমসুং ঐহাক্না মফম অসিদা অনৌবা সর্ভিস অমা হৌদোক্লে। ইলেক্ত্রিসিতী অসি অহানবা ওইনা মফমশিং অসিদা য়ৌরক্লি, পাইপকী ঈশিং সপ্লাই অসি তশেং তশেংবা ওইরক্লি, অমসুং মমাংদা কন্নেক্তিবিতী লৈখিদ্রিবা মফমশিংদা মোবাইল তাৱরশিং ইনস্তোল তৌরি। অনৌবা স্কুলশিং, কোলেজশিং অমসুং হোস্পিতালশিং শাগৎলি। ছত্তিসগরগী লমদম অসি হোংলক্লি, অমসুং মসিগা লোয়ননা, মাগী তুংলমচৎ অসি অমুক হন্না ইরি।

মরুপশিং,

ছত্তিসগরনা হৌজিক্তি রেলৱেজ নেৎৱার্ক্কী 100% ইলেক্ত্রিসিতীনা চলাইবা রাজ্যশিংগী মরক্তা য়াওরে। মসি য়াম্না চাউবা মাইপাকপা অমনি। হৌজিক ছত্তিসগরদা চাউরাক্না লুপা করোর 40,000গী রেলৱে প্রোজেক্তশিং পায়খৎলি। মসিগী মথক্তা, চহি অসিগী বজেৎতা রাজ্য অসিগী রেলৱে ইনফ্রাস্ত্রকচরগীদমক্তা অখন্ননা লুপা করোর 7000গী এলোকেসন তৌখ্রে। চাউখৎ-থৌরাং অসিনা ছত্তিসগরগী তোঙান তোঙানবা মফমশিংদা রেলগী কন্নেক্তিবিতী য়াম্না হেনগৎহল্লগনি অমসুং য়ুম্লোন্নরিবা রাজ্যশিংগা লৈনরিবা মরীসু ফগৎহল্লগনি।

মরুপশিং,

শেল-থুমগী রিসোর্সশিংগা লোয়ননা, চাউখৎ-থৌরাংগীদমক্তা অফবা ৱাখল্লোনশিং অসি য়াম্না মরু ওই। করিগুম্বা ৱাখল্লোন অমসুং থবক অনিমক্তা ঐখোয়না কংগ্রেসকী লৈঙাক্কী মখাদা উখিবা অদুগুম্না লান্না লৌশিনবা লৈরবদি খ্বাইদগী চাউবা ত্রেজরী অসিসু শোয়দনা মাংহল্লগনি। ঐখোয়না মসি কংগ্রেসকী মতমদসু থেংনখি, করপসন অমসুং ফত্তবা মেনেজমেন্তনা ত্রাইবেল এরিয়াশিংদা চাউখৎপা পুরকপদা অথিংবা থমখি। খুদম ওইনা কোইলা অসি লৌরসি - ছত্তিসগরদা কোইলাগী রিজর্ব য়াম্না লৈ, অদুম ওইনমক রাজ্য অসিনা মশাগী মথৌ তাবশিং ফংনবা মতীক চাবা মৈ ফংনবা হোৎনখি। কংগ্রেসকী লৈঙাক্কী মখাদা, পাৱর সেক্তর অসি য়েংশিনখিদে, অমসুং পাৱর প্লান্তশিং শেমগৎনবা হোৎনখিদে। মসিগী ওন্ন-তৈনবদা, ঐখোয়গী সরকারনা হৌজিক্তি থাজবা য়াবা ইনর্জী সপ্লাই অমা লৈহন্নবগীদমক অনৌবা পাৱর প্লান্তশিং পায়খৎলি।

মরুপশিং,

ঐখোয়না সোলর ইনর্জীদগী ইলেক্ত্রিসিতী পুথোক্নবা কন্না হোৎনরি। মোদীনা হৌদোকখিবা অখন্নবা স্কিম অমা ঐহাক্না অদোমদা শন্দোক্না তাকচগে। স্কিম অসিনা অদোমগী ইলেক্ত্রিসিতী বিল কোকহনগনি অমসুং য়ুমদা ইলেক্ত্রিসিতী পুথোক্তুনা শেল তানবগী খুদোংচাবা ফংহনগনি। মসিগী খোঙথাং অসি পি.এম. সুর্য় গার মুফত বিজলী য়োজনা কৌই। স্কিম অসিগী মখাদা, ঐখোয়গী সরকারনা সোলর পেনেলশিং ইনস্তোল তৌনবগীদমক য়ুমথোং খুদিংগী লুপা 70,000/80,000গী শেলগী তেংবাং পীরি। মফমসিদা ছত্তিসগরদা ইমুং লাখ অনি হেন্না স্কিম অসিগীদমক রেজিস্তর তৌখ্রে। ঐহাক্না অদোম পুম্নমকপু মসিগী কান্নবশিং অসি লৌনবা শরুক য়াননবা পুক্নিং থৌগৎলি।

মরুপশিং,

অফবা গভর্নান্স অমসুং ভিজনগী অতোপ্পা খুদম অমদি গ্যাস পাইপলাইনশিং শেমগৎপনি। ছত্তিসগর অসি কংফালনা কোইশিনবা রাজ্য অমা ওইবনা, সমুদ্রদগী য়াম্না লাপ্না লৈবনা গ্যাস সপ্লাই অসি য়াম্না খুদোংচাদবা অমা ওইহল্লি। মমাংগী সরকারনা গ্যাস ইনফ্রাস্ত্রকচরদা মতিক চাবা শেন থাদবা ঙমখিদে, মসিনা মরম ওইদুনা রাজ্য অসি শেল য়াম্না চঙবা ত্রান্সপোর্তেসনগী পাম্বৈশিংদা মখা পোল্লি। ঐখোয়না হৌজিক মসিগী ৱাফম অসি কুপ্না নৈনরি। ঐখোয়গী সরকারনা ছত্তিসগরদা গ্যাস পাইপলাইনশিং থম্নবা থবক পায়খৎলি। মসিনা ত্রকশিংনা পেত্রোলিয়ম পোত্থোকশিং পুথোক পুশিন তৌবগী মখা পোনবগী চাং হন্থহল্লগনি। মসিনা ফ্যুল অমসুং ইনর্জীগা মরী লৈনবা পোৎথোকশিংগী মমল হন্থহনগনি। মসিগী মথক্তা, গ্যাস পাইপলাইনশিং হৌদোকপা অসিনা CNGদা চৎপা য়াহল্লগনি, মসিনা ক্লিনর অমসুং মমল য়াম্বা অতোপ্পা পাম্বৈ অমা ফংহল্লগনি। মসিগী মথক্তা, থৌরাং অসিনা পাইপকী খুত্থাংদা চেনবা গ্যাস অসি য়ুমথোংশিংদা হকথেংননা য়ৌহল্লগনি। পাইপকী খুত্থাংদা চাকশঙদা ঈশিং তাবগুম, গ্যাস অসিসু চপ মান্নবা মওংদা লাক্লগনি। হৌজিক ঐখোয়না য়ুম লাখ অনিগী মথক্তা পাইপকী খুত্থাংদা গ্যাসকী হকথেংননা সপ্লাই তৌনবা হোৎনরি। য়ুমথোংশিংদা কান্নবা ফংহনবতা নত্তনা, গ্যাস ফংহনবা অসিনা ছত্তিসগরদা অনৌবা ইন্দস্ত্রীশিংগী লম্বী য়াৎলগনি। মসিনা, অনৌবা থবক লিশিং কয়া ফংহল্লগনি।

মরুপশিং,

হৌখিবা দিকেদশিংদা, কংগ্রেসকী পোলিসীশিংনা ছত্তিসগর য়াওনা রাজ্য কয়াদা নক্সেলিজম শন্দোরকপদা মতেং পাংখি। অৱাৎপা লৈবা অমসুং চাউখৎপা ঙমদবা মফম খুদিংদা, নক্সেলিজমনা হৌরকখি অমসুং চাউখৎখি। অদুবু চহি 60 লৈঙাক্লম্বা পার্তী অদুনা করি তৌখি? শিংনবশিং অসি কোকহনবগী মহুত্তা, মসিনা অসিগুম্বা দিস্ত্রিক্তশিং অসিবু শোত্থরবা হায়না লাউথোকখি অমসুং মসিগী থৌদাংশিংদগী থৈদোকখি। মসিনা মরম ওইদুনা, ঐখোয়গী নহারোলশিংগী মীরোল কয়া মাংখি। মমা কয়া অমনা মখোয়গী মচাশিং লৈখিদবদা অৱাবা কয়া মায়োক্নখি, অমসুং মশিং থিঙমদ্রবা ইচে-ইচলশিংনা মখোয়গী ইচিল-ইনাওশিং লৈখিদবদা অৱাবা কয়া মায়োক্নখি।

মরুপশিং,

মমাংগী সরকারশিং অসিনা উৎখিবা মীনুংশি লৈতবনা অৱাবা অসি হেন্না হেনগৎহনখি। ছত্তিসগরগী তোঙান-তোঙানবা জিলাশিংদা খ্বাইদগী শোত্থরবা ত্রাইবেল ইমুং খরনা করম্না অৱাবা কয়া মায়োক্নরকপগে হায়বদু অদোম্না হকথেংননা উবা ফংলে। কংগ্রেস সরকারনা মখোয়গীদমক করিসু তৌখিদে। ঐখোয়না তৌখি। ঐখোয়না স্বচ্ছ ভারত অভিয়ান হৌদোক্তুনা লায়রবা ত্রাইবেল ইমুংশিংদা মতিক চাবা সেনিতেসন ফংহনখি। আয়ুশ্মান ভারত য়োজনা হৌদোক্তুনা মখোয়গী হকশেলগী মথৌ তাবশিংদা ঐখোয়না অহানবগী থাক পীখি। মসিদা লুপা লাখ 5 ফাওবগী লেম্না লায়েংবগী খুদোংচাবা ফংহনখি। পি.এম. জন ঔশধী কেন্দ্রশিংগী খুত্থাংদা ঐখোয়না তঙাই ফদবা হিদাক-লাংথকশিং অসি শেল চংদনা ফংহল্লে। মফম অসিদা হিদাক-লাংথকশিং অসি চাদা 80গী চাংদা ফংহল্লি।

মরুপশিং,

সোসিএল জস্তিসকী চেম্পিয়ননি হায়না হায়জরিবা মীওইশিং অসি ত্রাইবেল কম্ম্যুনিতীবু দিকেদ কয়াগী মমাংদগী থৌশাবীদনা লাকখিবা মীওইশিংনি। মরম অসিনা ঐহাক্না হায়জরি মদুদি মোদীনা অতোপ্পা কনাগুম্বা অমত্তনা খল্লমদবা মীওইশিংগীদমক লেপ্লি। ঐখোয়না অখন্নবা খোঙথাং কয়াগী খুত্থাংদা ত্রাইবেল খুন্নাইবু চাউখৎহন্নবা থবক পায়খৎলি। অসিগুম্বা প্রোগ্রামশিংগী মরক্তগী অমা হায়রগদি, ধর্তি আবা জনজাতি উদকার্শ অভিয়াননি, মসিগী মখাদা ত্রাইবেল দিবেলপমেন্তদা লুপা করোর 80,000গী শেনফম থাদরি। মসিগী খোঙথাং অসিনা ছত্তিসগর খক্তদা ত্রাইবেলগী খুঙ্গং 7000রোমদা কান্নবা ফংহল্লে। মসিগী মথক্তা, ত্রাইবেল কম্ম্যুনিতীগী মনুংদা, অখন্নবা মীৎয়েং চংবগী মথৌ তাবা অৱাংবা থাক্কী তুং কোইনা চৎপা কাংলুপশিং লৈ হায়বা ঐখোয়না খঙই।  ইহান হানবা ওইনা, ঐখোয়গী সরকারনা পি.এম. জনমান য়োজনা হৌদোক্লে, মসি অখন্ননা হায়রিবা কম্ম্যুনিতীশিং অসিগীদমক্তা দিজাইন তৌবনি। স্কিম অসিগী মখাদা, ছত্তিসগরগী জিলা 18দা লৈবা সেত্তলমেন্ত 2,000 হেনবদা চাউখৎ থৌরাংগী থবক পায়খৎলি। লৈবাক শীনবা থুংনা ত্রাইবেল সেতলমেন্তশিংদা কিলোমীতর 5,000গী লম্বী শেমগৎনবা অয়াবা পীখ্রে। মসিগী শরুক অমা, চাউরাক্না কিলোমীতর 2500, পি.এম. জনমান য়োজনাগী মখাদা ছত্তিসগরদা শেমগৎকনি। মসিগী মথক্তা, ঙসি মফম অসিদা লৈরিবা ইমুং কয়া অমনা স্কিম অসিগী খুত্থাংদা পক্কা হাউস ফংখ্রে। মসিদি ঐখোয়না পুরক্লিবা অহোংবা অসিনি - য়ুমথোং খুদিংমক্তা য়ৌগদবা চাউখৎপা।

মরুপশিং,

ঙসি, দবল ইঞ্জিন সরকার অসিগী মখাদা, ছত্তিসগরনা খোঙজেল য়াংনা অহোংবা পুরক্লি। সুকমা দিস্ত্রিক্তকী হেল্থ সেন্তর অমনা নেস্নেল ক্বালিতী সর্তিফিকেৎ অমা ফংলকপা মতমদা, মসিনা থাজবগী ইথিল অমা পোকহল্লি। দান্তেৱাদাদা লৈবা হেল্থ সেন্তর অমনা চহি কয়া থবক তৌদনা লৈরুরবা মতুংদা অমুক হন্না মথৌ তৌবা হৌরকপা মতমদা, মসিনা অনৌবা আশা অমা পুরকই। মসিগী হোৎনবা অসিনা নক্সালনা শোকহল্লবা মফমশিংদা তুং কোইনা শান্তি লৈহন্নবা অনৌবা য়ুগ অমগী লম্বী য়াৎলি। দিসেম্বরগী মন কী বাত্তা ঐনা বাস্তর ওলিম্পিক্সকী মতাংদা ঙাংখি। নহারোল লিশিং কয়া অমনা থৌরম অসিদা মতৌ করম্না থৌনা লৈনা শরুক য়াখিবগে হায়বদু নহাক্না খঙবা য়াই। মখোয়গী শরুক য়াবা অসিনা ছত্তিসগরদা ওইরক্লিবা অফবা অহোংবা অসিগী ময়েক শেংবা খুদম অমনি।

মরুপশিং,

ছত্তিসগরগী নহারোলশিংগীদমক ঐহাক্না অফবা তুংলমচৎ অমা উবা ফংলি। অনৌবা এজুকেসন পোলিসী অসি রাজ্য অসিনা পায়খৎপা অসি থাগৎনিংঙাইনি। লৈবাক শীনবা থুংনা, পি.এম. শ্রী স্কুল 12,000 হেন্না লিংখৎখ্রে। মসিগী মনুংদা চাউরাক্না 350দি ছত্তিসগরদা লৈরি। হায়রিবা ইন্সতিত্যুসনশিং অসিনা রাজ্য অসিগী এজুকেসন সিস্তেম পুম্নমকপু হেন্না ৱাংখৎহন্দুনা মোদেল স্কুলশিং ওইনা মথৌ তৌগনি। মসিগী মথক্তা, একলব্য মোদেল স্কুলশিংনা ছত্তিসগরদা চাউনা খুমাং চাউশিল্লি। নক্সালনা শোকহল্লবা মফমশিংদা লৈরিবা স্কুল কয়া অমসু অমুক হন্না হাংদোকখ্রে। মসিনা অঙাংশিংদা মহৈ তম্বগী অনৌবা খুদোংচাবা ফংহল্লে। ঙসি, ছত্তিসগরদা বিদ্যা সমীক্ষা কেন্দ্রসু হৌদোকখ্রে। মসিনা রাজ্য অসিগী এজুকেসন সেক্তরদা অতোপ্পা মরুওইবা মাইলস্তোন অমা ওইরে। থৌরাং অসিনা মহৈ তম্বগী মগুন হেনগৎহল্লগনি। মসিনা মহৈরোইশিং অমসুং ওজাশিং অনিমকপু রিএল-তাইমগী এসিস্তেন্স ফংহনবা ঙমহল্লগনি।

মরুপশিং,

ঐখোয়না অমুক্কা হন্না অদোমদা থাজবা পীনবা খুদোংচাবা ফংজরি। অনৌবা নেস্নেল এজুকেসন পোলিসীগী মখাদা, মেদিকেল অমসুং ইঞ্জিনীয়রিংগী মহৈ তম্বা অসি হিন্দীদা হৌরে। মসিনা খুঙ্গংশিং, খুন্নাইগী লায়রবা অমসুং ত্রাইবেল কম্ম্যুনিতীশিংগী নহারোলশিংনা মখোয়গী মঙলানশিং ফংনবা হোৎনবদা লোলগী ওইবা অপনবা লৈহল্লরোই।

মরুপশিং,

চহি কয়াগী মমাংদা ঐগী মরুপ রমন সিংহজীনা থোনখিবা মপাঙ্গল কনবা য়ুম্ফম অসি হৌজিক লৈরিবা সরকার অসিনা হেন্না মপাঙ্গল কনখৎহল্লে। লাক্কদৌরিবা চহি 25 অসিদা, ঐখোয়না চাউখৎপগী চাউথোকচনীংঙাই ওইরবা য়ুম্ফম অমা হায়রিবা অচেৎপা য়ুম্ফম অসিগী মথক্তা শেমগৎকদবনি। ছত্তিসগর অসি রিসোর্স মরাং কায়না লৈ, এস্পিরেসন মরাং কায়না লৈ, অমসুং অপুনবা পোতেন্সিএল মরাং কায়না লৈ। তুংলমচৎতা ঐখোয়না ছত্তিসগরগী চহি ৫০শুবা মপোক কুমওন থৌরম পাংথোকপা মতমদা, ঐখোয়না ছত্তিসগরবু লৈবাক অসিগী মকোক থোংবা রাজ্যশিংগী মনুংদা অমা ওইহন্নবা ঐখোয়গী পান্দম অদু ফংলগনি। চাউখৎপগী মহৈশিং অসি ছত্তিসগরগী ইমুং খুদিংদা য়ৌহন্নবা ঐখোয়না হোৎনগনি হায়না ঐহাক্না অমুক হন্না থাজবা পীজরি। অনৌবা চহি অসিগী হৌরকপদা চাউখৎ-থৌরাং কয়া অমা পায়খৎলকপদা অমসুং চাউখৎ-থৌরাংগা লোয়ননা অনৌবা খোঙচৎ অমা হৌরকপদা অদোম পুম্নমকপু ঐহাক্না অমুক্কা হন্না থাগৎপা ফোংদোকচরি। হন্না-হন্না থাগৎচরি!

***