কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহৰ অধ্যক্ষতাত এখন উচ্চ-পৰ্যায়ৰ সমিতিয়ে ছিকিমৰ বাবে দুৰ্যোগ পুনৰুদ্ধাৰ আৰু পুনৰ্নিৰ্মাণ কাৰ্যকলাপৰ বাবে আৰু পাঁচখন ৰাজ্যত অগ্নি নিৰ্বাপক সেৱা শক্তিশালী কৰাৰ বাবে প্ৰকল্পসমূহত অনুমোদন জনাইছে। বিত্ত মন্ত্ৰী, কৃষি মন্ত্ৰী আৰু নীতি আয়োগৰ উপাধ্যক্ষৰে গঠিত সমিতিখনে ৰাষ্ট্ৰীয় দুৰ্যোগ সঁহাৰি পুঁজিৰ (এনডিআৰএফ) অধীনত পুনৰুদ্ধাৰ পুঁজি উইণ্ডো আৰু প্ৰস্তুতি তথা ক্ষমতা নিৰ্মাণ পুঁজি উইণ্ডোৰ পৰা ৰাজ্যসমূহক বিত্তীয় সাহায্যৰ বাবে এই প্ৰস্তাৱবোৰ বিবেচনা কৰে।

প্ৰধানমন্ত্ৰী শ্ৰী নৰেন্দ্ৰ মোদীৰ দুৰ্যোগ স্থিতিস্থাপক ভাৰতৰ দৃষ্টিভংগী পূৰণ কৰাৰ উদ্দেশ্যেৰে গৃহ মন্ত্ৰী শ্ৰী অমিত শ্বাহৰ নিৰ্দেশনাত গৃহ মন্ত্ৰালয়ে দেশত দুৰ্যোগৰ কাৰ্যকৰী ব্যৱস্থাপনা নিশ্চিত কৰাৰ বাবে কেইবাটাও পদক্ষেপ গ্ৰহণ কৰিছে। ভাৰতত দুৰ্যোগৰ বিপদাশংকা হ্ৰাস প্ৰণালী শক্তিশালী কৰি দুৰ্যোগৰ সময়ত জীৱন আৰু সম্পত্তিৰ যিকোনো ব্যাপক ক্ষতি প্ৰতিহত কৰিবলৈ কেইবাটাও পদক্ষেপ লোৱা হৈছে।

উচ্চ-পৰ্যায়ৰ সমিতিয়ে "ৰাজ্যসমূহত অগ্নি নিৰ্বাপক সেৱাৰ সম্প্ৰসাৰণ আৰু আধুনিকীকৰণ" আঁচনিৰ অধীনত পাঁচখন ৰাজ্য যেনে বিহাৰ, গুজৰাট, ঝাৰখণ্ড, মহাৰাষ্ট্ৰ আৰু কেৰালাৰ বাবে ১,৬০৪.৩৯ কোটি টকাৰ প্ৰকল্পত অনুমোদন জনাইছে। সমিতিখনে বিহাৰৰ বাবে ৩৪০.৯০ কোটি টকা, গুজৰাটৰ বাবে ৩৩৯.১৮ কোটি টকা, ঝাৰখণ্ডৰ বাবে ১৪৭.৯৭ কোটি টকা, কেৰালাৰ বাবে ১৬২.২৫ কোটি টকা আৰু ৰাষ্ট্ৰীয় দুৰ্যোগ সঁহাৰি পুঁজিৰ (এনডিআৰএফ) অধীনত প্ৰস্তুতি আৰু ক্ষমতা নিৰ্মাণ পুঁজিৰ নিৰ্ধাৰিত আৱণ্টনৰ পৰা মহাৰাষ্ট্ৰৰ বাবে ৬১৪.০৯ কোটি টকা অনুমোদন জনাইছে। কেন্দ্ৰীয় চৰকাৰে এনডিআৰএফৰ অধীনত "ৰাজ্যসমূহত অগ্নি নিৰ্বাপক সেৱাৰ সম্প্ৰসাৰণ আৰু আধুনিকীকৰণ"ৰ বাবে মুঠ ৫,০০০ কোটি টকা আৱণ্টন দিছে, আৰু ইতিমধ্যে মুঠ ৩,৩৭৩.১২ কোটি টকাৰ বাবে ২০ খন ৰাজ্যৰ প্ৰস্তাৱত অনুমোদন জনাইছে।

তদুপৰি, ২০২৩ চনৰ অক্টোবৰত তিস্তা নদী অৱবাহিকাৰ সমীপত সংঘটিত বিধ্বংসী হিমবাহ হ্ৰদ বিস্ফোৰণ বানৰ (জিএলওএফ) ফলত ক্ষতিগ্ৰস্ত বিভিন্ন খণ্ডৰ দুৰ্যোগ পুনৰুদ্ধাৰ আৰু পুনৰ্নিৰ্মাণৰ প্ৰয়োজনীয়তাৰ বাবে ৰাষ্ট্ৰীয় দুৰ্যোগ সঁহাৰি পুঁজিৰ (এনডিআৰএফ) অধীনত পুনৰুদ্ধাৰ আৰু পুনৰ্নিৰ্মাণ পুঁজি উইণ্ডোৰ পৰা ছিকিম ৰাজ্যলৈ ৫৫৫.৭০ কোটি টকাৰ বিত্তীয় সাহায্যত অনুমোদন জনাইছে।

চলিত বিত্তীয় বৰ্ষত কেন্দ্ৰীয় চৰকাৰে ৰাজ্যিক দুৰ্যোগ সঁহাৰি পুঁজিৰ (এছডিআৰএফ) অধীনত ২৮ খন ৰাজ্যলৈ ১৯,০৭৪.৮০কোটি টকা আৰু ৰাজ্যিক দুৰ্যোগ প্ৰশমন পুঁজিৰ (এছডিএমএফ) অধীনত ১৬ খন ৰাজ্যলৈ ৩,২২৯.৩৫কোটি টকা মুকলি কৰিছে। ইয়াৰ উপৰি, ৰাষ্ট্ৰীয় দুৰ্যোগ সঁহাৰি পুঁজিৰ (এনডিআৰএফ) অধীনত ১৯ খন ৰাজ্যলৈ ৫,১৬০.৭৬ কোটি টকা আৰু ৰাষ্ট্ৰীয় দুৰ্যোগ প্ৰশমন পুঁজিৰ (এনডিএমএফ) অধীনত ০৮ খন ৰাজ্যলৈ ৭১৯.৭১কোটি টকা মুকলি কৰা হৈছে।

*****

RK/VV/ASH/PS/MK