داخلی امور اور امداد باہمی کے مرکزی وزیرجناب امت شاہ نے آج لوک سبھا میں تریبھون کوآپریٹیو یونیورسٹی بل 2025 پر بحث کا جواب دیا۔ ایوان نے بحث کے بعد بل کی منظوری دے دی۔

بحث کا جواب دیتے ہوئے مرکزی وزیر داخلہ اور تعاون نے کہا کہ تعاون ایک ایسا موضوع ہے جو ملک کے ہر خاندان سے متعلق ہے۔ ہر گاؤں میں کوئی نہ کوئی اکائی ہے جو تعاون کے ذریعے زرعی ترقی، دیہی ترقی اور خود روزگار میں مصروف ہے اور ملک کی ترقی میں معاون ہے۔ جناب  شاہ نے کہا کہ آزادی کے 75 سال بعد آج ملک کو اپنی پہلی کوآپریٹو یونیورسٹی مل رہی ہے۔ انہوں نے کہا کہ اس بل کی منظوری کے بعد دیہی معیشت مضبوط ہو گی، خود روزگار اور کاروبارکی ترقی ہو گی، سماجی شمولیت میں اضافہ ہو گا اور جدت اور تحقیق میں بہت سے نئے معیار قائم کرنے کے مواقع میسر آئیں گے۔ جناب  شاہ نے کہا کہ اس طرح پورے ملک کو تعاون کے جذبے سے آراستہ اور جدید تعلیم سے لیس ایک نئی کوآپریٹو قیادت ملے گی۔

جناب امت شاہ نے کہا کہ اس کوآپریٹو یونیورسٹی کا نام تریبھون کوآپریٹیو یونیورسٹی رکھنے کا فیصلہ کیا گیا ہے۔ تربھون داس پٹیل ان لوگوں میں سے ایک تھے جنہوں نے سردار پٹیل جیسے عظیم رہنما کی قیادت میں ہندوستان میں تعاون کی بنیاد رکھی۔ انہوں نے کہا کہ گجرات اسٹیٹ کوآپریٹو دودھ مارکیٹنگ فیڈریشن (جی سی ایم ایم ایف) جسے آج ہم سب امول کے نام سے جانتے ہیں، تربھون جی کے خیال کا نتیجہ ہے۔ جناب  شاہ نے کہا کہ امول کا سفر جو 1946 میں گجرات کے ایک قصبے میں 250 لیٹر دودھ سے شروع ہوا تھا، آج ہندوستان کا سب سے بڑا ڈیری برانڈ بن گیا ۔ انہوں نے کہا کہ امول کا 2003 میں کاروبار 2882 کروڑ روپے تھا جو آج 60 ہزار کروڑ روپے سے تجاوز کر گیا ہے۔ انہوں نے کہا کہ اپوزیشن اس لیے احتجاج کر رہی ہے کہ ایک مخصوص خاندان کے نام پر کوئی یونیورسٹی نہیں ہے۔ وہ نہیں جانتے کہ تربھون داس پٹیل بھی ان کے لیڈر تھے۔

مرکزی وزیر تعاون نے کہا کہ 2014 میں جناب  نریندر مودی کی قیادت میں حکومت بننے کے بعد 10 سال کا عرصہ ملک کے غریبوں کے لیے سنہری حروف سے لکھا جائے گا۔ ان 10 سالوں میں صرف ملک کے غریبوں کو گھر، بیت الخلا، پینے کا پانی، 5 کلو مفت اناج، گیس کنکشن، 5 لاکھ روپے تک کا مفت علاج اور بجلی فراہم کرنے کا کام کیا گیا ہے۔ انہوں نے کہا کہ ان 10 سالوں میں ملک کے 25 کروڑ لوگ خط افلاس سے باہر آئے ہیں۔ جناب  شاہ نے کہا کہ پہلے ملک کے لاکھوں غریبوں کو ان ضروری اشیاء کو جمع کرنے میں اپنی زندگی گزارنی پڑتی تھی لیکن پچھلے 10 سالوں میں وزیر اعظم مودی نے وہ تمام چیزیں فراہم کر دی ہیں۔ انہوں نے کہا کہ ایسے کروڑوں لوگ ہیں جو آگے بڑھنا چاہتے ہیں، باہر نکلنا چاہتے ہیں اور ملک کی ترقی میں شراکت در بننا چاہتے ہیں لیکن ان کے پاس سرمایہ نہیں ہے۔ جناب  شاہ نے کہا کہ کوآپریٹیو ہی واحد راستہ ہے جس میں سرمایہ کے بغیر کسی شخص کو انٹرپرینیورشپ سے جوڑا جاسکتا ہے۔ کوآپریٹیو کے ذریعے چھوٹے سرمایہ والے کروڑوں لوگ کاروبار کرنے، عزت کے ساتھ زندگی گزارنے اور خود روزگار حاصل کرنے کے لیے اکٹھے ہو رہے ہیں۔

جناب امت شاہ نے کہا کہ 130 کروڑ کی آبادی والے ہندوستان جیسے ملک میں جی ڈی پی کے ساتھ ساتھ روزگار بھی ملک کی معیشت کی بہتری  کا ایک بڑا اشارہ ہے۔ انہوں نے کہا کہ کوآپریٹو سیکٹر واحد شعبہ ہے جو 130 کروڑ لوگوں کو خود روزگار کے ذریعے ملک کی ترقی سے جوڑتا ہے اور ان کے وقار کا بھی تحفظ کرتا ہے۔ جناب  شاہ نے کہا کہ وزیر اعظم مودی نے ساڑھے تین سال قبل تعاون کی وزارت تشکیل دی تھی، جس نے کسانوں، دیہی باشندوں  اور کوآپریٹو لیڈروں کی دہائیوں پرانی مانگ کو پورا کیا تھا۔ انہوں نے کہا کہ وزارت تعاون کے قیام کے بعد تعاون کی ترقی کے نئے باب کا آغاز ہوا ہے۔

مرکزی وزیر داخلہ اور تعاون نے کہا کہ آج ہندوستان میں 8 لاکھ کوآپریٹو سوسائٹیاں ہیں اور 30 ​​کروڑ لوگ ان کے ممبر ہیں۔ ایک طرح سے ملک کا ہر پانچواں شخص کوآپریٹو سے وابستہ ہے، لیکن 75 سال سے اس کی ترقی کے لیے کوئی کوشش نہیں کی گئی۔ جناب  شاہ نے کہا کہ کوآپریٹیو پورے ملک میں غیر مساوی طور پر چل رہے ہیں اور کوآپریٹو تحریک میں بے ضابطگیاں ابھرنا شروع ہو گئی ہیں۔ انہوں نے کہا کہ اسی لئے مودی جی نے کوآپریٹو وزارت قائم کی۔ اپنے قیام کے بعد سے اب تک وزارت تعاون نے گزشتہ ساڑھے تین سالوں میں بہت کام کیا ہے۔ انہوں نے کہا کہ کوآپریٹیو کو ترقی دینے کے لیے تمام ریاستوں کو ساتھ لے کر ایک کوآپریٹیو ڈیٹا بیس تیار کیا گیا ہے اور آج اس ڈیٹا بیس میں ہر ریاست، ضلع اور گاؤں کے کوآپریٹیو کے بارے میں معلومات دستیاب ہیں۔

جناب امت شاہ نے کہا کہ ملک میں 2 لاکھ نئی پرائمری ایگریکلچرل کریڈٹ سوسائٹیز (پی اے سی ایس) بنائی جائیں گی اور ملک میں ایک بھی پنچایت ایسی نہیں ہوگی جہاں پی اے سی ایس نہ ہو۔ انہوں نے کہا کہ مودی حکومت نے پی اے سی ایس کے ضمنی قوانین کو تبدیل کرنے کا فیصلہ کیا اور کشمیر سے کنیا کماری اور شمال مشرق سے دوارکا تک پورے ملک نے ماڈل بائی لاز کو قبول کیا۔ اس کے ذریعے 25 سے زائد اقتصادی سرگرمیوں کو پی اے سی ایس کے ساتھ منسلک کیا گیا، انتخابی عمل کو مربوط کیا گیا اور ایک مشترکہ اکاؤنٹنگ سافٹ ویئر بنایا گیا جو ملک کی تمام زبانوں میں دستیاب ہے۔ انہوں نے کہا کہ ملک میں 43 ہزار کامن سروس سینٹر (سی ایس سی) قائم کیے گئے ہیں جہاں مرکزی اور ریاستی حکومت کی 300 سے زیادہ اسکیموں کے فوائد اور سہولیات دستیاب ہیں۔ جناب  شاہ نے کہا کہ آج 36 ہزار پی اے سی ایس ملک میں پی ایم سمردھی کیندر کے طور پر کام کر رہے ہیں، 4 ہزار پی اے سی ایس جن اوشدھی کیندر بنائے گئے ہیں اور 400 پی اے سی ایس پٹرول پمپ بھی چلا رہے ہیں۔

وزیر موصوف نے کہا کہ مودی حکومت نے دنیا کی سب سے بڑی اسٹوریج اسکیم شروع کی اور اب تک 576 پی اے سی نے گوداموں کی تعمیر کا کام شروع کیا ہے۔ ان میں سے 11 پر کام مکمل ہو چکا ہے اور اب پی اے سی ایس کے ذریعے خریدا گیا دھان اور گندم وہاں محفوظ ہے۔ انہوں نے کہا کہ ملک میں 67 ہزار سے زائد پی اے سی ایس کمپیوٹر، سافٹ ویئر اور ڈیٹا اسٹوریج سے منسلک ہو چکے ہیں۔ آج ان 67,930 پی اے سی ایس میں سے 43,658 پی اے سی ایس کمپیوٹر کے ذریعے کام کر رہے ہیں۔ اب شام کو ان کے اکاؤنٹس کو ملا لیاجاتاہے، آن لائن آڈٹ کے ساتھ ساتھ سارا کاروبار بھی آن لائن ہوتا ہے۔ انہوں نے کہا کہ کمپیوٹرائزیشن نے کوآپریٹو سیکٹر میں انقلاب برپا کردیا ہے۔

مرکزی وزیر داخلہ اور تعاون نے کہا کہ ہر پنچایت میں 2 لاکھ پی اے سی ایس کی آمد سے ہمارے ملک کی کوآپریٹو تحریک ایک بار پھر متوازن انداز میں کھڑی ہوگی۔ انہوں نے کہا کہ گورنمنٹ ای مارکیٹنگ (جی ای ایم) پر خریداری کے لیے 550 سے زیادہ کوآپریٹو سوسائٹیوں کو شامل کیا گیا ہے۔ جناب  شاہ نے کہا کہ پچھلی حکومت کے دوران انکم ٹیکس میں پرائمری ایگریکلچرل کریڈٹ سوسائٹیز (پی اے سی ایس) کے ساتھ بہت زیادہ ناانصافی ہوئی تھی۔ مودی حکومت نے کوآپریٹیو کے لیے انکم ٹیکس پر سرچارج کو 12 سے کم کر کے 7 فیصد کر دیا ہے،ایم اے ٹی (کم سے کم متبادل ٹیکس) کو 18.5 سے کم کر کے 15 فیصد کر دیا ہے، 2 لاکھ روپے سے کم کے کاروباری لین دین پر انکم ٹیکس جرمانہ سے مستثنیٰ ہے اور مینوفیکچرنگ میں مصروف کوآپریٹیو کے لیے شرح کو 30 سے ​​کم کر کے 15 فیصد کر دیا ہے۔ انہوں نے کہا کہ پی اے سی ایس اور دیگر کے لیے نقد رقم جمع کرنے کی حد 20 ہزار روپے سے بڑھا کر 2 لاکھ روپے کر دی گئی ہے۔ اس کے علاوہ، ٹی ڈی ایس سے چھوٹ کی حد کو 1 کروڑ روپے سے بڑھا کر 3 کروڑ روپے کر دیا گیا ہے۔

جناب امت شاہ نے کہا کہ مودی حکومت نے قومی سطح کی تین نئی کوآپریٹو سوسائٹیاں بنائی ہیں جو پسماندہ اور آگے کے روابط پر کام کریں گی۔ انہوں نے کہا کہ تقریباً 8 ہزار پی اے سی ایس کو نیشنل کوآپریٹو ایکسپورٹ لمیٹڈ (این سی ای ایل) سے منسلک کیا گیا ہے اور ان کے ذریعے ہمارے کسانوں کی پیداوار بیرون ملک برآمد کی جا رہی ہے۔ اب تک، این سی ای ایل کے ذریعے دنیا بھر کے بازاروں میں 12 لاکھ ٹن مواد بیچ کر، اس کا منافع براہ راست کسانوں کے کھاتوں میں جمع کیا جا رہا ہے۔ جناب شاہ نے کہا کہ اس کے ساتھ ساتھ ہمارے روایتی اور میٹھے بیجوں کو انڈین سیڈز کوآپریٹیو سوسائٹی لمیٹڈ(بی بی ایس ایس ایل) کے ذریعے محفوظ کرکے تحفظ کیا جا رہا ہے۔ نیشنل کوآپریٹو آرگینک لمیٹڈ (این سی او ایل) کے ذریعے نامیاتی مصنوعات کو برانڈ بھارت کے طور پر سرٹیفائیڈ کیا جا رہا ہے۔ انہوں نے کہا کہ‘بھارت برانڈ’ کے نام سے ملک بھر میں 100فیصد آرگینک مصنوعات دستیاب کرائی جا رہی ہیں۔

مرکزی وزیر داخلہ اور تعاون نے کہا کہ اگر کوئی چھوٹا کسان اور دیہی شخص قرض لیتا ہے تو وہ اسے سود کے ساتھ واپس بھی کرتا ہے۔ انہوں نے کہا کہ یہی وجہ ہے کہ نیشنل کوآپریٹیو ڈیولپمنٹ کارپوریشن (این سی ڈی سی) نے صفر این پی اے کے ساتھ 90 ہزار کروڑ روپے کا کاروبار کیا ہے۔ جناب  شاہ نے کہا کہ این سی ڈی سی نے گجرات اور مہاراشٹر کے ماہی گیروں کو 44 سمندری ٹرالر دیے ہیں۔ 48 کوآپریٹو شوگر ملوں کو 10 ہزار کروڑ روپے دیے گئے ہیں۔ تقریباً 3 ہزار فارمر پروڈیوسر آرگنائزیشنز (ایف پی او) اور 1 ہزار 70 فشرمین فارمر پروڈیوسر آرگنائزیشنز (ایف ایف پی او) بنائے گئے ہیں۔ انہوں نے کہا کہ این سی ڈی سی نے اس بار 800 کروڑ روپے کا منافع کمایا ہے۔ این سی ڈی سی نے قرض کو بڑھانے اور صفر این پی اے کو برقرار رکھنے میں کامیابی حاصل کی ہے اور منافع کو بھی 100 کروڑ سے روپے 800 کروڑ  روپے کیاہے۔

مرکزی کوآپریٹیو وزیر نے کہا کہ کوآپریٹو سیکٹر میں تمام فنڈز کوآپریٹیو بینکوں تک پہنچانے کو یقینی بنانے کے لیے، گجرات کے پنچ محل اور بناسکانٹھا اضلاع میں ‘کوآپریٹیو کے درمیان تعاون’ کی پہل کی گئی۔ اس کے تحت اس بات کو یقینی بنایا گیا کہ ہر کوآپریٹو ادارے اور کوآپریٹو سوسائٹی کے اراکین کے کوآپریٹو بینک میں بینک اکاؤنٹس ہوں۔ جناب شاہ نے کہا کہ انہوں نے کوآپریٹو بینک میں اپنا کھاتہ بھی کھولا ہے۔ انہوں نے کہا کہ ‘آپریشن ان کوآپریشن’ کی پہل کی وجہ سے گجرات کے بینکوں میں جمع رقم میں تقریباً 8 ہزار کروڑ روپے کا اضافہ ہوا ہے۔ ان تمام اقدامات کی وجہ سے کوآپریٹو بینکوں پر لوگوں کا اعتماد بڑھا ہے۔

جناب امت شاہ نے کہا کہ پہلے اربن کوآپریٹو بینکوں (یو سی بی) کو 2003 سے نئی شاخیں کھولنے کی اجازت نہیں تھی، لیکن اب انہیں ریزرو بینک آف انڈیا کے ذریعے اپنے طور پر 10 فیصد تک نئی شاخیں کھولنے کی اجازت مل گئی ہے۔ پہلے انہیں ‘ڈورسٹیپ بینکنگ’ یعنی لوگوں کو ان کے گھروں پر بینکنگ کی سہولت فراہم کرنے کی اجازت نہیں تھی، لیکن اب شہری کوآپریٹو بینک ‘ڈورسٹیپ بینکنگ’ کی سہولت فراہم کر سکتے ہیں۔ جناب  شاہ نے کہا کہ پہلے شہری کوآپریٹیو بینکوں کو ‘ون ٹائم سیٹلمنٹ’ کرنے کی اجازت نہیں تھی لیکن اب وہ بھی نیشنلائزڈ اور شیڈول بینکوں کی طرح ‘ایک وقتی تصفیہ’ کر سکتے ہیں۔ پہلے آر بی آئی میں کوآپریٹیو بینکوں کی کوئی سماعت نہیں ہوتی تھی، لیکن اب وہاں ایک نوڈل افسر مقرر کیا گیا ہے جو کوآپریٹیو بینکوں کے مسائل سنیں گے۔ انہوں نے کہا کہ شہری کوآپریٹو بینکوں کی طرف سے دیے گئے ہوم لون کی حد کو دوگنا کر دیا گیا ہے۔ تجارتی رئیل اسٹیٹ کو قرض دینے کی بھی اجازت دی گئی ہے۔ جناب  شاہ نے کہا کہ غیر شیڈول بینکوں کو مضبوط کرنے کے لیے بھی کافی کام کیا گیا ہے۔

مرکزی وزیر تعاون نے کہا کہ نیشنل فیڈریشن آف اربن کوآپریٹو بینکس اینڈ کریڈٹ سوسائٹیز لمیٹڈ (این اے ایف سی یو بی) کی ایک امبریلا تنظیم تشکیل دی گئی ہے۔ انہوں نے کہا کہ جب بھی کوئی کوآپریٹو بینک کمزور ہوتا ہے تو امبریلا تنظیم اس کی مالی اعانت کرے گی اور اسے بند ہونے سے بچائے گی۔ مودی جی نے جمع کرنے والوں کا بیمہ بھی 1 لاکھ روپے سے بڑھا کر 5 لاکھ روپے کر دیا ہے، اس سے کوآپریٹو بینکوں پر اعتماد بڑھ گیا ہے۔

جناب امت شاہ نے کہا کہ پچھلے کئی سالوں سے کئی بڑے کوآپریٹیو لیڈر زراعت کے وزیر رہے ہیں، لیکن کوآپریٹو شوگر ملوں کے انکم ٹیکس کا مسئلہ ختم نہیں ہوا ہے۔ وزیر اعظم جناب نریندر مودی جی نے تعاون کی وزارت کی تشکیل کے بعد 2022 میں انکم ٹیکس کی تشخیص کے مسئلے کو ہمیشہ کے لیے ختم کر دیا۔ شوگر ملوں کی 4600 کروڑ روپے کی مانگ پوری ہوئی اور ہر سال 8000 کروڑ روپے کی نئی مانگ پیدا نہیں ہوئی۔ آزادی کے بعد کوآپریٹو شوگر ملوں نے شاید ہی اتنا بڑا منافع کمایا ہو۔ انہوں نے کہا کہ 84 ملوں کو 10 ہزار کروڑ روپے کا قرض منظور کیا گیا ہے۔ ایتھنول کی آمیزش سے متعلق پروگرام میں کوآپریٹو شوگر ملوں کو ترجیح دی گئی۔ راب پر مبنی ایتھنول پلانٹ اور ملٹی فیلڈ پلانٹ کے لیے بھی فنانس اسکیم شروع کی گئی۔ مودی حکومت نے مولاسس پر جی ایس ٹی کی شرح 28 فیصد سے گھٹا کر 5 فیصد کر دی۔ جناب شاہ نے کہا کہ مرکزی رجسٹرار کوآپریٹیو سوسائٹیز (سی آر سی ایس) کے دفتر، ریاستوں میں رجسٹرار دفاتر اور دیہی ترقیاتی بینکوں کی شاخوں کو کمپیوٹرائزڈ کیا جا رہا ہے جس کے لیے حکومت ہند مالی مدد فراہم کر رہی ہے۔

مرکزی وزیر تعاون نے کہا کہ سفید انقلاب 2.0 کے تحت 2029-2028 میں دودھ کی خریداری کو موجودہ 660 لاکھ لیٹر یومیہ سے بڑھا کر 1000 لاکھ لیٹر کرنے کا ہدف مقرر کیا گیا ہے۔ انہوں نے کہا کہ گزشتہ تین سالوں میں ہندوستان دنیا کا سب سے بڑا دودھ پیدا کرنے والا ملک بن گیا ہے۔ دنیا کی کل دودھ کی پیداوار کا ایک چوتھائی حصہ ہندوستان میں ہوتا ہے۔ سال 2024-2023 میں یہ بڑھ کر تقریباً 24 کروڑ ٹن ہو گیا ہے۔ انہوں نے کہا کہ سال 2015-2014 میں یہ تعداد 14.6 کروڑ ٹن تھی۔ پچھلے 10 سالوں میں دودھ کی پیداوار 14.6 کروڑ ٹن سے بڑھ کر 24 کروڑ ٹن ہو گئی ہے۔ آج 23 قومی سطح اور 240 ضلعی سطح کی یونینیں ہیں، 28 مارکیٹنگ ڈیریوں کے ساتھ ساتھ 2.30 لاکھ دیہاتوں میں پرائمری دودھ پروڈکشن کمیٹیاں بھی بنائی گئی ہیں۔

جناب امت شاہ نے کہا کہ کوآپریٹو ڈیری اب ان کسانوں کو جانوروں کا چارہ فراہم کریں گی جو پرائیویٹ طور پر دودھ بیچتے ہیں۔ کوآپریٹو ڈیری بھی جانوروں کو ٹیکے لگائیں گی۔ کوآپریٹو ڈیری اپنے گوبر کو جمع کرکے گیس تیار کریں گی۔ جب جانور مر جائے گا تو اس کی کھال اور ہڈیاں بھی کوآپریٹو ڈیریوں کے ذریعے منڈی میں بھیجی جائیں گی اور بدلے میں کسان کو زیادہ قیمت ملے گی۔ انہوں نے کہا کہ ان تمام پروجیکٹوں پر 10 ہزار کروڑ روپے کی لاگت سے کام شروع ہو چکا ہے۔ جناب  شاہ نے کہا کہ ڈیری سیکٹر سے وابستہ 70 فیصد سے زیادہ خواتین ہیں اور ڈیری کے شعبے میں معاشی فوائد بھی خواتین کو بااختیار بنانے کا باعث بنیں گے۔

مرکزی وزیر تعاون نے کہا کہ برسوں سے کم از کم امدادی قیمت (ایم ایس پی) پر دالیں خریدنے کا مطالبہ کیا جا رہا تھا لیکن پچھلی حکومتوں نے کچھ نہیں کیا۔ انہوں نے کہا کہ یہ سہولت ان لوگوں کو دستیاب ہوگی جو نیشنل ایگریکلچرل کوآپریٹو مارکیٹنگ فیڈریشن  اور نیشنل کوآپریٹو کنزیومر فیڈریشن  کی ویب سائٹ پر رجسٹر ہوں گے۔ اسی طرح مکئی کے کاشتکاروں کو بھی این اے ایف ای ڈی اور این سی سی ایف کی ویب سائٹس پر اندراج کرنا ہوگا تاکہ حکومت ہند اسے ایم ایس پی پر 100 فیصد خرید سکے۔

جناب امت شاہ نے کہا کہ پہلی بار کوآپریٹو سیکٹر میں کوآپریٹو رینکنگ فریم ورک بنایا گیا ہے ،جس کے سات بڑے پیرامیٹرز ہیں۔ اس میں پی اے سی ایس، ڈیری، فشریز، اربن کوآپریٹیو، ہاؤسنگ کریڈٹ اور کھادی اور گاؤں کی صنعت کی کمیٹیاں شامل ہوں گی۔ انہوں نے کہا کہ اب ضلع، ریاستی اور قومی سطح پر ایوارڈز فار ایکسیلنس دیئے جائیں گے اور وہ اپنی درجہ بندی کے مطابق کوآپریٹو بینکوں سے قرض حاصل کرسکیں گے۔

مرکزی وزیر داخلہ اور تعاون نے کہا کہ وزیر اعظم مودی کا ‘تعاون کے ذریعے خوشحالی’ صرف ایک نعرہ نہیں ہے۔ تعاون کی وزارت نے اسے زمین پر لانے کے لیے گزشتہ ساڑھے تین سالوں میں دن رات کام کیا ہے۔ انہوں نے کہا کہ چند ماہ میں ایک بہت بڑی کوآپریٹو ٹیکسی سروس شروع کی جائے گی جس میں ٹو وہیلر، ٹیکسی، رکشہ اور فور وہیلر رجسٹرڈ ہوں گے اور منافع براہ راست ڈرائیور کو دیا جائے گا۔ انہوں نے کہا کہ جلد ہی ایک کوآپریٹو انشورنس کمپنی بھی بنائی جائے گی جو ملک کے کوآپریٹو سسٹم میں انشورنس کا کام کرے گی۔ جناب شاہ نے کہا کہ کچھ ہی عرصے میں یہ نجی شعبے کی سب سے بڑی انشورنس کمپنی بن جائے گی۔

جناب امت شاہ نے کہا کہ کوآپریٹو سیکٹر کی ترقی اور توسیع کے پیش نظر تربیت یافتہ انسانی وسائل کی ضرورت ہے اور تریبھون کوآپریٹیو یونیورسٹی اس ضرورت کو پورا کرنے کے لیے کام کرے گی۔ کوآپریٹو یونیورسٹی بننے کے بعد اس کے ڈپلومہ اور ڈگری ہولڈرز کو نوکریاں ملیں گی۔ اس یونیورسٹی کے ذریعے ملکی اور عالمی ویلیو چین میں ہماری اہم شراکت داری ہوگی۔ نیو ایج کوآپریٹو کلچر بھی اس یونیورسٹی سے شروع ہوگا۔ انہوں نے کہا کہ کوآپریٹو ٹیچنگ ٹریننگ کے ہزاروں ادارے ملک بھر میں پھیلے ہوئے ہیں، لیکن ان کے کورسز معیاری نہیں ہیں۔  یونیورسٹی کے قیام سے پہلے ہی ہم نے کوآپریٹو سیکٹر کی ضروریات کو مدنظر رکھتے ہوئے کورس ڈیزائن کا کام شروع کیا تھا۔ انہوں نے کہا کہ یونیورسٹی میں ڈگری اور ڈپلومہ کورسز ہوں گے اور پی ایچ ڈی کی ڈگری بھی دی جائے گی۔ کوآپریٹو سیکٹر میں کام کرنے والے تمام موجودہ ملازمین کے لیے ایک مختصر مدت کا سرٹیفکیٹ کورس بھی ہوگا۔

مرکزی وزیر کوآپریٹیو نے کہا کہ اس بل کے ذریعے کوآپریٹو اصولوں اور کوآپریٹو سرگرمیوں میں توسیع ہوگی، کوآپریٹو سیکٹر کو نئی ٹیکنالوجی سے فائدہ ہوگا اور دیہی معیشت بھی مضبوط ہوگی۔ اس کے علاوہ تحقیق اور اختراع میں بھی اضافہ ہوگا اور کوآپریٹو سیکٹر نچلی سطح پر مضبوط ہوگا۔ مسٹر شاہ نے کہا کہ تریبھون داس جیسے عظیم شخص کے نام کے ساتھ جڑے ہونے سے یہ کوآپریٹو یونیورسٹی ایک اعلیٰ درجے کی یونیورسٹی ثابت ہوگی۔ یہ ملک میں بہت اچھے کوآپریٹو ورکرز فراہم کرنے کا کام کرے گا۔

جناب امت شاہ نے کہا کہ کوآپریٹو سیکٹر کے لیے وقف ملک کی پہلی یونیورسٹی آزادی کے 75 سال بعد تعمیر کی جائے گی اور مکمل طور پر فعال ہونے کے بعد جب ہر سال تقریباً 8 لاکھ لوگ ڈپلومہ، ڈگری یا سرٹیفکیٹ کے ساتھ فارغ التحصیل ہوں گے تو کوآپریٹو شعبے میں ایک نیا انقلاب آئے  گا۔ جناب  شاہ نے کہا کہ وہ 18 سال کی عمر سے کوآپریٹو سے وابستہ ہیں اورانہیں اس کی خوبیوں اور کمزوریوں کا تجربہ ہے۔ انہوں نے کہا کہ مودی جی ایک خوشحال ہندوستان کی بنیاد رکھ رہے ہیں اور یہ بل اس میں ایک مضبوط ڈھانچہ فراہم کرے گا۔ جناب شاہ نے کہا کہ تریبھون داس پٹیل جی کا وژن تھا کہ کوآپریٹو سیکٹر سے حاصل ہونے والا منافع ہر غریب خاتون تک پہنچنا چاہیے، اس لیے اس یونیورسٹی کا نام ان کے نام پر رکھنے کی تجویز دی گئی ہے۔

***

ش ح۔ ک ا۔ ع ر

U NO 9029