U Myntri kam pohiing jong ka sorkar pdeng uba dei ruh u Myntri ka tnad treilang, u Amit Shah u la ong ba kan ym don ka jingisynei ia ki kynhun khaii drok. Haba ai khublei ïa ka Narcotics Control Bureau (NCB) na ka bynta ka jingkurup ïa ka jingkit kaba heh jong ki dawai pynbuaid kiba shongdor ₹88 klur bad ban kem ïa 4 ngut ki dkhot jong ka kynhun khaii drok ha ka pyrthei, u Myntri kam pohïing ka sorkar pdeng u la ong ha ka post ha ka X ba ka jingkhaïi drok ka long ka jingpynshisha ïa ka jingtreikam ba pura.

Ha ka post jong u, u Myntri kam pohiing jong ka sorkar pdeng bad u Myntri ka tnad treilang u Amit Shah u la ong, “Ym don jingisynei ia ki kynhun khaii drok. Da kaba pynsted ia ka kam jong ka sorkar Modi ban tei ia ka Bharat kaba lait na u drok, la kurup ia ka jingpynkit kaba heh jong ki dawai methamphetamine ba shongdor ₹88 klur, bad 4 ngut ki dkhot jong ka kynhun nongkhaii drok jong ka pyrthei la ioh kem ha Imphal bad Guwahati Zone. Ka jingkit drok ka long ka jingpynshisha ia ka jingtreikam kaba pura. Ka jingwad jong ngi ia u drok ka dang iai bteng. Ka jingai khublei kaba khraw ia ka kynhun NCB.”

Ki jingtip ba bniah shaphang ki jingtreikam

Ha ka jingkhynra kaba nyngkong, ha ka 13.03.2025, katkum ka jingioh jingtip, ki Ophisar ka NCB Imphal Zone ki la bat ia kawei ka trok hajan ka thain Lilong bad hadien ba ki la wad bniah ia katei ka kali, ki la ioh kurup ia u dawai Methamphetamine uba don 102.39 kilo na ka jaka buh tiar shna kali jong ka. La kem ruh ia 02 ngut kiba shong ha katei ka trok. Khlem da pynslem, ka kynhun ka la pynlong mardor ia ka jingbuddien bad kem ia u briew uba la suba ba udei ban ioh ia katei ka mar ba la khang na ka thain Lilong. Na u la ioh kurup ruh ia kawei ka kali saw shaka, kaba ju pyndonkam ban khaii drok. Ia baroh lai ngut la kem hadien. La suba ba kine ki drok ki dei kiba wan na Moreh. Ka jingtohkit ka dang iaid shakhmat ban kem ia kiwei pat kiba donkti ha katei ka kam.

Ha kawei pat ka jingkhynra, ha katei ka juh ka sngi, katkum ka jingioh jingtip, ki Ophisar ka NCB Guwahati Zone ki la bat ia kawei ka kali SUV ha khappud Assam –Mizoram hajan Silchar bad ha ka jingjurip bniah, ki la ioh kurup 7.48 Kilo ki dawai kuli Methamphetamine ba la buhrieh hapoh ka shaka jong katei ka kali bad la bat ruh ia ka kali hadien la kem ia u nongniah. Kine ki drok ki dei kiba wan na Moreh, Manipur bad la suba ba mut pynkit ia ki sha Karimganj. Ka jingtohkit ban kem ia kiwei pat kiba donkti ha katei ka kam ka dang iaid shakhmat.

Shuh shuh, ka NCB ka dang shimti ruh ia ka jingtohkit ia kawei ka mukotduma na ka tnad Excise jong ka jylla Mizoram ha kaba la ioh kurup kumba 46 kilo u crystal meth ha Brigade Bawngkawn Aizawl ha ka 6 tarik u Lber. Ha kane ka kam la kem 04 ngut ki briew kiba donkti ha ka jingkhaii drok. Ia ka jingtohkit ia kane ka kam la shimti da ka NCB ban wad bniah ia ka jingiadei hapdeng ki kynhun khaii drok na kylleng ka pyrthei bad ki kynhun khaii drok ha ka jylla.

Ka thain shatei lammihngi ka la paw kum kawei na ki jaka ba kham shah ktah ha ka ri India na ka liang ka jingkhaii drok namar ka jinglong jingman jong ka jaka. Da kaba ithuh ia kane ka jingduna, ka tnad kam pohiing ka la pynkhlain ia ka bor jong ka NCB ha u snem 2023 ban pynkhlain shuh shuh ia ka thma pyrshah ia u drok ha kane ka thain. Ka NCB, lyngba ki san tylli ki Zonal Unit bad kawei ka Regional Headquarter ha ka thain shatei lammihngi, ka la bteng ban trei pyrshah ia ki nongkhaii drok kiba treikam ha ka thain, khamtam eh pyrshah ia kito kiba donkti ha ka jingkhaii ia ki dawai pynbuaid kum ki dawai Methamphetamine, kiba la tip paidbah kum YABA kaba la buh jingma ym tang ia ki samla, hynrei ia ki paidbah nongshong shnong jong ka thain.

*****