Ka India ka la kot sha u mawmer ba kongsan da kaba tam 100 GW ka jinglah pynmih bording solar, kaba la pynkhlain ia ka kyrdan jong ka kum ka nongialam kylleng ka pyrthei ha kaba iadei bad ka bording ba lah ban pynthymmai. Kane ka jingjop kadei ka dak jong ka jingkut jingmut ka India na ka bynta ka lawei kaba kham khuid bad kaba kham bha bad kalong ka sienjam ba kongsan ban pynurlong ia ka thong jong ka, ka bording ba iadei bad ki non-fossil fuel ba 500 GW shuwa u snem 2030 ba la buh thong da u Myntri Rangbah duh Narendra Modi.

U Myntri Sorkar Pdeng ba dei khmih ia ka Tnad New and Renewable Energy, Shri Pralhad Joshi u la ong, “Hapoh ka jingialam jong u Myntri Rangbah duh Narendra Modi, ka jingiaid lynti ka India ha kaba iadei bad ka bording ha kine ki shiphew snem ba la leit ka la long kaba kongsan bad kaba ai mynsiem. Ki sienjam kum ki solar panel, ki solar park bad ki projek rooftop solar ki la wanrah jingkylla ba thymmai. Kumta, mynta ka India ka la kot sha ka thong kaba 100 GW ka jinglah pynmih bording solar. Ha kaba iadei bad ka bording kaba khuid, ka India ym tangba ka la lah ban kyrshan dalade hynrei ka la pyni ruh ia ka pyrthei ka lynti ba thymmai.”

U Myntri Sorkar Pdeng Joshi u la ong ba kane ka jingjop kadei kaba iohbor na ka jingkut jingmut ia ka lawei kaba khlain bad kaba khuid. U Myntri u la bynrap ba ka PM SuryaGhar Muft Bijli Yojana ka la pynurlong ia ka rooftop solar bad ka la wanrah jingkylla ha ka bording kaba iaineh, kaba la pynkupbor ia man ki longiing da ka bording kaba khuid.

Ka jingkiew shaphrang ka kam Solar

Ka kam bording solar jong ka India ka la sakhi ka jingkiew kaba 3450% ka jinglah pynmih bording ha kine ki shiphew snem ba la leit, ka la kiew na ka 2.82 GW ha u 2014 sha ka 100 GW ha u 2025. Haduh 31 tarik Kyllalyngkot, 2025, ka jinglah pynmih bording solar ka India kalong 100.33 GW, bad 84.10 GW ka dang don hapoh ka jingpyntrei bad sa 47.49 GW hapoh ka jingkhot tender. Ki projek hybrid bad ki tyllong pynmih bording na ki tyllong ba lah ban pynthymmai kiba long round-the-clock (RTC) ki la kiew sted bha, ha kaba 64.67 GW ka dang don hapoh ka jingpyntrei bad ladep khot tender, kaba la kot baroh 296.59 GW ka jingdon ki projek solar bad hybrid.

Ka bording Solar ka la long ka nongnohsynniang ba kongsan sha ka jingkiew ka bording ba lah ban pynthymmai jong ka India, kaba la kot 47% ka jinglah pynmih bording ba lah ban pynthymmai. Ha u 2024, la wanrah sa 24.5 GW ka bording solar kaba pyni ka jingkiew palat arshah ha ka jingpyndait solar haba ianujor bad u snem 2023. Ha u snem ba ladep la sakhi ruh ka jinglah pynmih 18.5 GW ka bording solar, jan 2.8 shah ka jingkiew haba ianujor bad u snem 2023. Ka Rajasthan, Gujarat, Tamil Nadu, Maharashtra bad Madhya Pradesh kilong napdeng ki jylla ba leh bha, kaba la nohsynniang sha ka bor jong ka India ban pynmih bording solar.

Ka kam rooftop solar ha India ka la sakhi ka jingkiew ba kongsan ha u 2024, ha kaba la pynbiang thymmai 4.59 GW, kaba pyni ka jingkiew kaba 53% haba ianujor bad u snem 2023. Ka bynta ba kongsan jong kane ka jingkiew shaphrang kadei ka PM Surya Ghar: Muft Bijli Yojana, kaba la plie paidbah ha u 2024, kaba la jan kot mynta 9 lak ka jingpyndait bording solar ha ki tnum iing, ka la iarap ia ki longiing kylleng ka ri ban ioh ia ka bording kaba khuid.

Ka India ka la kiew shaphrang ha ka kam shna solar. Ha u 2014, ka ri ka duna bha ha ka jingpynmih ia ki solar module kaba tang 2 GW. Ha kine ki shiphew snem ba la leit, kane ka la kiew sha ka 60 GW ha u 2024, kaba la pynlong ia ka India kum ka nongialam kylleng ka pyrthei ha ka kam shna solar. Lyngba ka polisi ba biang, ka India ka don ha ka lynti ban kot sha ka jinglah pynmih solar module kaba 100 GW shuwa u 2030.

Hapoh ka jingialam jong u Myntri Sorkar Pdeng Pralhad Joshi, ka Tnad New and Renewable Energy (MNRE) ka la pyntreikam ia ki sienjam ba kongsan ban kyntiew ia ka bor pynmih bording na ki tyllong ba lah an pynthymmai ha India. Une u mawmer 100 GW ha ka bording solar ka kdew ia ka bynta jong ka India kum ka ri kaba donbor ha ka jingpynmih bording, kaba pynthikna ka jingpynioh bording ba khuid, ba lah ban iaineh, bad ba jemdor na ka bynta million ngut katba saindur ia ka lawei kaba lah ban kyrshan dalade ha ka jingpyndap bording.

*****