2025 സാമ്പത്തിക വർഷത്തിൽ ഭൗതിക സമ്പർക്കസൗകര്യ മേഖലകളിലെ ശേഷിവർധന സമാനമായി തുടരുമെന്ന് സാമ്പത്തിക സർവേ ചൂണ്ടിക്കാട്ടി. വരുംദശകത്തിൽ ഇന്ത്യയുടെ വികസന മോഹങ്ങൾക്ക് അടിസ്ഥാനസൗകര്യങ്ങളിൽ ഗണ്യമായ നിക്ഷേപം ആവശ്യമാണെന്നു കേന്ദ്ര ധനകാര്യ-കോർപ്പറേറ്റ്‌കാര്യ മന്ത്രി ശ്രീമതി നിർമല സീതാരാമൻ ഇന്നു പാർലമെന്റിൽ അവതരിപ്പിച്ച 2024-25ലെ സാമ്പത്തിക സർവേ പറയുന്നു.

റെയിൽവേ

റെയിൽവേ ശൃംഖലയുടെ വിപുലീകരണത്തിലെ പുരോഗതി മുൻവർഷവുമായി താരതമ്യപ്പെടുത്താവുന്ന നിലയിൽ തുടർന്നു. അതേസമയം റോളിങ് സ്റ്റോക്കിന്റെ കൂട്ടിച്ചേർക്കൽ ഗണ്യമായി വർധിച്ചു. റെയിൽവേ സ്റ്റേഷൻ അടിസ്ഥാനസൗകര്യങ്ങളിലും ലോക്കോമോട്ടീവുകളുടെയും കോച്ചിങ് സ്റ്റോക്കിന്റെയും നവീകരണത്തിലും ശ്രദ്ധ കേന്ദ്രീകരിച്ചത്, റെയിൽവേ മേഖലയിൽ യാത്രക്കാരുടെ സൗകര്യങ്ങൾ മെച്ചപ്പെടുത്തി. ഇന്ത്യൻ റെയിൽവേ വിശാലമായ ശൃംഖലയിലുടനീളം പ്രവർത്തനകാര്യക്ഷമതയും സുരക്ഷയും വർധിപ്പിക്കുന്നതിനായി സിഗ്നലിങ്ങും സുരക്ഷാസംവിധാനങ്ങളും നവീകരിക്കുന്നു. മെക്കാനിക്കൽ സിഗ്നലിങ് ഒഴിവാക്കൽ, കവച് സ്വയംകൃത ട്രെയിൻ സുരക്ഷാസംവിധാനം, ഇലക്ട്രോണിക് ഇന്റർലോക്കിങ്, ഓട്ടോമാറ്റിക് ബ്ലോക്ക് സിഗ്നലിങ്, ഇലക്ട്രോണിക് ഇന്റർലോക്കിങ്ങിനുള്ള സിഗ്നൽ ഡിസൈൻ ഓട്ടോമേഷൻ സങ്കേതം എന്നിവ ഇതുമായി ബന്ധപ്പെട്ട ചില സംരംഭങ്ങളാണ്.

റെയിൽ സംവിധാനത്തിലെ സമീപകാല സംരംഭങ്ങൾ

·     ഗതിശക്തി ബഹുതല ചരക്കു ടെർമിനൽ (GCT): 2024 ഒക്ടോബർ 31നകം 91 GCT കമ്മീഷൻ ചെയ്യുകയും 234 സ്ഥലങ്ങൾക്ക് അംഗീകാരം നൽകുകയും ചെയ്തു.

·     നെറ്റ് സീറോ കാർബൺ പുറന്തള്ളൽ: 2029-30 ‌‌ഓടെ ഇന്ത്യൻ റെയിൽവേ 30 GW പുനരുപയോഗ ഊർജം ലക്ഷ്യമിടുന്നു. 2024 ഒക്ടോബർ വരെ 375 MW സൗരോർജവും 103 MW പവനോർജവും കമ്മീഷൻ ചെയ്തു.

·     പ്രധാന സാമ്പത്തിക ഇടനാഴികൾ: പിഎം ഗതിശക്തി പോർട്ടലിൽ രേഖപ്പെടുത്തിയ മൂന്നു റെയിൽവേ ഇടനാഴികൾക്കു കീഴിൽ ₹11.17 ലക്ഷം കോടി വിലമതിക്കുന്ന 434 പദ്ധതികൾ കണ്ടെത്തിയിട്ടുണ്ട്.

·     പൊതു സ്വകാര്യ പങ്കാളിത്തം (PPP): PPP മാതൃകയിൽ 17 പദ്ധതികൾ പൂർത്തിയായി (₹16,434 കോടി); 8 പദ്ധതികൾ പുരോഗമിക്കുന്നു (₹16,614 കോടി)

·     വന്ദേ ഭാരത് ട്രെയിനുകൾ: 2024 ഏപ്രിൽ മുതൽ ഒക്ടോബർ വരെ, 17 പുതിയ ജോഡി വന്ദേ ഭാരത് ട്രെയിനുകൾ ശൃംഖലയിൽ അവതരിപ്പിച്ചു; 228 കോച്ചുകൾ നിർമിച്ചു.

തുറമുഖങ്ങളും കപ്പൽഗതാഗതവും ഉൾനാടൻ ജലപാതകളും

2025 സാമ്പത്തിക വർഷത്തിൽ തുറമുഖശേഷി ഗണ്യമായി മെച്ചപ്പെട്ടു. ഇതു പ്രവർത്തനകാര്യക്ഷമത മെച്ചപ്പെടുത്തുന്നതിനും പ്രധാന തുറമുഖങ്ങളിലെ ശരാശരി കണ്ടെയ്നർ ചരക്കുനീക്ക സമയം 2024 സാമ്പത്തിക വർഷത്തിലെ 48.1 മണിക്കൂറിൽനിന്ന് 2025 സാമ്പത്തിക വർഷത്തിൽ (ഏപ്രിൽ-നവംബർ) 30.4 മണിക്കൂറായി കുറയ്ക്കുന്നതിനും കാരണമായി.

തുറമുഖ-കപ്പൽഗതാഗത-ഉൾനാടൻ ജലപാതാ മേഖലയിലെ സംരംഭങ്ങൾ

·              38,000 കോടി രൂപയുടെ PPP നിക്ഷേപമുള്ള വാധ്‌വൻ തുറമുഖപദ്ധതി ഒഴികെ, ഏകദേശം ₹69,800 കോടിയുടെ 23 ക്യാപ്റ്റീവ് പ്രോജക്ടുകൾ ഉൾപ്പെടെ 98 പിപിപി പദ്ധതികൾക്ക് കേന്ദ്ര ഗവണ്മെന്റ് അംഗീകാരം നൽകി.

·              നിലവിൽ, ₹41,480 കോടിയുടെ 56 പദ്ധതികൾ പ്രവർത്തനക്ഷമമാണ്. ഇതു തുറമുഖശേഷി പ്രതിവർഷം ഏകദേശം 550 ദശലക്ഷം ടൺ (MTPA) വർധിപ്പിക്കുന്നു.

·              2024 ഒക്ടോബറിൽ, ലോഥലിലെ ദേശീയ സമുദ്ര പൈതൃക സമുച്ചയത്തിന് അംഗീകാരം ലഭിച്ചു. അതിൽ 14 ഗാലറികളുള്ള മ്യൂസിയം, ഏറ്റവും ഉയരം കൂടിയ വിളക്കുമാടം മ്യൂസിയം, ഇന്ത്യയിലെ ഏറ്റവും വലിയ നാവിക ഗാലറി, പ്രമേയാധിഷ്ഠിത വിനോദകേന്ദ്രങ്ങൾ എന്നിവ ഉൾപ്പെടുന്നു.

·              ഗ്രേറ്റ് നിക്കോബാർ ദ്വീപിലെ ഗലാത്തിയ ബേയിലുള്ള അന്താരാഷ്ട്ര ചരക്കുപേടക കപ്പൽച്ചരക്കുകൈമാറ്റ തുറമുഖം, ഇന്ത്യൻ കിഴക്കൻ തീര തുറമുഖങ്ങളിൽനിന്നും അയൽരാജ്യങ്ങളിൽനിന്നുമുള്ള കപ്പൽച്ചരക്കുകൈമാറ്റം വർധിപ്പിക്കുന്നതിനായി ആസൂത്രണം ചെയ്തിട്ടുണ്ട്.

·              ₹1303 കോടി വിലമതിക്കുന്ന നഗര ജലപാതാപദ്ധതികൾ പുരോഗമിക്കുന്നു. 30 പദ്ധതികളിൽ 16 എണ്ണം ഇതിനകം പൂർത്തിയായി. 35 ലക്ഷത്തിലധികം യാത്രക്കാർക്കു പ്രയോജനം ലഭിക്കുകയും 5 ലക്ഷത്തിലധികം വാഹനങ്ങളുടെയും ഒരു ലക്ഷം ചരക്കുട്രക്കുകളുടെയും ഗതാഗതം സുഗമമാക്കുകയും ചെയ്തു.

·              ബംഗ്ലാദേശിൽ ജലപാതകൾ വികസിപ്പിച്ചും ₹305 കോടിയുടെ പദ്ധതിയുടെ 80 ശതമാനം ധനസഹായം നൽകിയും വടക്കുകിഴക്കൻ മേഖലയിലേക്കുള്ള ജലപാതാസഞ്ചാരക്ഷമത ഇന്ത്യ വർധിപ്പിക്കുന്നു.

·              ബ്രഹ്മപുത്ര, ബരാക് നദികളും ഇന്തോ-ബംഗ്ലാദേശ് ഔപചാരികപാതയും മെച്ചപ്പെടുത്തുന്നതിനായി ഇന്ത്യ ₹1010 കോടി നിക്ഷേപിക്കും.

റോഡ് ഗതാഗതം

1,46,195 കിലോമീറ്റർ വരുന്ന ദേശീയ പാത (NH) ശൃംഖല ഉൾപ്പെടെ ഇന്ത്യയിൽ ആകെ 63.4 ലക്ഷം കിലോമീറ്റർ റോഡ് ശൃംഖലയുണ്ട്. മൊത്തം റോഡ് ശൃംഖലയുടെ 2 ശതമാനം മാത്രമേ ദേശീയ പാത ഉൾക്കൊള്ളുന്നുള്ളൂവെങ്കിലും മൊത്തം റോഡ് ചരക്കുഗതാഗതത്തിന്റെ 40 ശതമാനത്തോളം ഇതു വഹിക്കുന്നു. അതിനാൽ, റോഡ് ഗതാഗത ശൃംഖലയുടെ നട്ടെല്ലാണു ദേശീയ പാത ശൃംഖല.

റോഡ് ഗതാഗതമേഖലയിലെ സംരംഭങ്ങൾ

·              പദ്ധതി അടിസ്ഥാനമാക്കിയുള്ള ദേശീയ പാത വികസനത്തിൽനിന്ന് ഇടനാഴി അടിസ്ഥാനമാക്കിയുള്ള സമീപനത്തിലേക്കുള്ള മാറ്റം, ദേശീയപാതയുടെ ദൈർഘ്യം 2014ലെ 91,287 കിലോമീറ്ററിൽനിന്ന് 2024ൽ 1.46 ലക്ഷം കിലോമീറ്ററായി വർധിപ്പിക്കാൻ സഹായിച്ചു.

·              ഭാരത്‌മാല പരിയോജന, ചാർ ധാം മഹാമാർഗ് പരിയോജന, ദേശീയ അതിവേഗ ഇടനാഴികൾ, നാലുവരിയും അതിനുമുകളിലുമുള്ള ദേശീയ പാതകൾ.

·             ദേശീയ പാതകളിലെ വിപുലമായ ഗതാഗത പരിപാലനം, ചരക്കുനീക്ക കേന്ദ്രങ്ങൾ സ്ഥാപിക്കൽ, വാഹനം പൊളിക്കലിനുള്ള സുസ്ഥിര നടപടികൾ, നടന്നുകൊണ്ടിരിക്കുന്ന റോപ്പ്‌വേ പദ്ധതികൾ എന്നിവ റോഡ് ഗതാഗതം മെച്ചപ്പെടുത്തുന്നതിനുള്ള പ്രധാന സംരംഭങ്ങളിൽ ഉൾപ്പെടുന്നു.

വ്യോമയാനം

ഭാരതീയ വിമാനത്താവള അതോറിറ്റി ഉൾപ്പെടെ, വിമാനത്താവളങ്ങൾ പ്രവർത്തിപ്പിക്കുന്നവരും വികസിപ്പിക്കുന്നവരും 2020 സാമ്പത്തിക വർഷം മുതൽ 2025 സാമ്പത്തിക വർഷം വരെ ₹91,000 കോടി കവിയുന്ന മൂലധനച്ചെലവു പദ്ധതി പിന്തുടരുന്നു. 2024 നവംബറോടെ ഇതിന്റെ ഏകദേശം 91 ശതമാനം കൈവരിക്കാനായി.

വ്യോമയാന സംരംഭങ്ങൾ

·              ഉഡാൻ പദ്ധതിപ്രകാരം, രണ്ടു ജല വിമാനത്താവളങ്ങളും 13 ഹെലിപോർട്ടുകളും ഉൾപ്പെടെ 88 വിമാനത്താവളങ്ങളെ ബന്ധിപ്പിക്കുന്ന 619 പാതകൾ ഇതുവരെ പ്രവർത്തനക്ഷമമാക്കി.

·              വിമാനത്താവളത്തിന്റെ ചരക്കു കൈകാര്യംചെയ്യൽ ശേഷി ക്രമേണ വർധിക്കുകയാണ്. 2024 സാമ്പത്തിക വർഷത്തിൽ ഇത് 8 ദശലക്ഷം മെട്രിക് ടണ്ണിലെത്തി.

​ഡിജിറ്റൽ വിനിമയക്ഷമത

ഡിജിറ്റൽ ഇന്ത്യയെക്കുറിച്ചുള്ള ഗവണ്മെന്റിന്റെ കാഴ്ചപ്പാടിന് അനുസൃതമായി, ഡിജിറ്റൽ ഉൾപ്പെടുത്തൽ, സാങ്കേതിക നവീകരണം, നിയന്ത്രണ പരിഷ്കാരങ്ങൾ എന്നിവയിൽ ഡിജിറ്റൽ വിനിമയക്ഷമത വലിയ പുരോഗതി കൈവരിച്ചു.

ഡിജിറ്റൽ വിനിമയക്ഷമതയിലെ സംരംഭങ്ങൾ

ടെലികമ്യൂണിക്കേഷൻസ്

·              2024 ഒക്ടോബർ 31ഓടെ, എല്ലാ സംസ്ഥാനങ്ങളിലും കേന്ദ്രഭരണപ്രദേശങ്ങളിലും 5ജി സേവനങ്ങൾ ആരംഭിച്ചു.

·              2024 ഓഗസ്റ്റിൽ, സാർവത്രിക സേവന ബാധ്യത നിധിയെ ഡിജിറ്റൽ ഭാരത് നിധി (DBN) എന്നു പുനർനാമകരണം ചെയ്തു. ഭാരത് നെറ്റ് പദ്ധതി, വടക്കുകിഴക്കൻ മേഖലയ്ക്കുള്ള സമഗ്ര ടെലികോം വികസന പദ്ധതി, ആൻഡമാൻ-നിക്കോബാർ ദ്വീപുകൾക്കും ലക്ഷദ്വീപ് ദ്വീപുകൾക്കുമുള്ള ടെലികോം വികസനം, സേവനങ്ങൾ ഇതുവരെ ലഭ്യമല്ലാതിരുന്ന പ്രദേശങ്ങളിലെ മൊബൈൽ സേവനങ്ങൾ, വികസനം കാംക്ഷിക്കുന്ന ജില്ല പദ്ധതി എന്നിവ DBN-ന് കീഴിലുള്ള ചില സംരംഭങ്ങളാണ്.

വിവരസാങ്കേതികവിദ്യ

·              2024 നവംബർ 30 വരെ, ദേശീയ വിവരസാങ്കേതികശാസ്ത്ര​ കേന്ദ്രം (NIC), ജിഐ ക്ലൗഡ് സംരംഭമായ മേഘ്‌രാജ് പ്രകാരം, അതിന്റെ ക്ലൗഡിൽ 1917 ആപ്ലിക്കേഷനുകളെ പിന്തുണയ്ക്കുന്നു.

·              ഉപയോക്തൃ വകുപ്പുകളുടെ ക്ലൗഡ് ആവശ്യങ്ങൾ പരിഹരിക്കുന്നതിനായി ഗവണ്മെന്റ് 23 പൊതു-സ്വകാര്യ ക്ലൗഡ് സേവനദാതാക്കളെ എംപാനൽ ചെയ്തിട്ടുണ്ട്.

ഉയർന്ന വളർച്ചനിരക്ക് നിലനിർത്താൻ അടുത്ത രണ്ടു ദശകങ്ങളിൽ ഇന്ത്യക്ക് അടിസ്ഥാനസൗകര്യ നിക്ഷേപത്തിൽ തുടർച്ചയായ വർധന അനിവാര്യമാണെന്നു സാമ്പത്തിക സർവേ 2024-25 പറയുന്നു. നിലവിലുള്ള ഭൗതിക ആസ്തികളുടെ നവീകരണത്തോടൊപ്പം സംയോജിത ബഹുതല ഗതാഗതം കെട്ടിപ്പടുക്കാനുള്ള നമ്മുടെ ശ്രമങ്ങൾ ത്വരിതപ്പെടുത്തുന്നത് കാര്യക്ഷമതയും ഏതറ്റംവരെയുമുള്ള സമ്പർക്കസൗകര്യങ്ങളും മെച്ചപ്പെടുത്തും.

****

SK