ইকায়খুম্নরবা স্পীকর মঞ্জুর নাদির জী,

ইকায়খুম্নরবা প্রাইম মিনিস্তর মার্ক এন্থোনী ফিলিপ্স জী,

ইকায়খুম্নরবা ভাইস প্রেসিদেন্ত ভারত জগদেব জী,

ইকায়খুম্নরবা ওপোজিসনগী লুচিংবা,

ইকায়খুম্নরবা মন্ত্রীশিং,

পার্লিয়ামেন্তকী মেম্বরশিং,

ইকায়খুম্রনাব জিদিসিয়রীগী চাঞ্চেলর,

অতৈ ইকায়খুম্নবা মতিক চারবা মীওইশিং,

ইবেম্মর অমদি ইবুংঙো পুম্নমক,

গুয়ানাগী পুৱারী ওইরবা পার্লিয়ামেন্ত অসিদা ময়ামগী মরক্তা তিন্নবা ঐবু কৌবিরকপগীদমক ঐনা ময়ামগী লমন তোনশিঞ্জরে‍। গুয়ানানা ঐগী ইফমদা ঙরাং খ্বায়দগী অৱাংবা থাক্কী ইকায়খুম্নবা উৎপিখি, মদুগীদমক ঐনা ময়াম পুম্নমক্কী মফমদা অমদি গুয়ানাগী মীয়াম পুম্বগী মফমদা তৌবিমল খঙবা উৎচরি‍। ঐগীদমক্তদি, গুয়ানাগী মীপুম খুদিংমক ‘স্তার বোয়’ অমনি‍। মফমসিগী মীপুম খুদিংগী মফমদা থাগৎচরি‍! ইফমদা উৎপিরিবা ইকায়খুম্নবা অসিবু ঐহাক্না ভারতকী মীয়ামগী মফমদা কত্থোকচরি‍।

মরূপশিং,

ভারত অমদি গুয়ানাগী মরক্তা লৈরিবা মরী অসি অচেৎপা মরী অমনি‍। মসি মান্নবা লৈহাও, শিন্মী অমদি হোৎনবা কন্বনা শেম্মিন্নখিবা মরীনি‍। চাউরাক্না চহি ১৮০ রোমগী মমাঙদা, ভারত মচা অমনা অহান্বা ওইনা গুয়ানাগী লৈহাওদা খোঙদাখি‍। মদুদগী হৌনা নুংঙাইবা অমদি অৱাবা মতমদা, মরী অসি চেৎনা অমদি নাকল অনিমক নুংশিননা লোয়নরকখিবনি‍। ইন্দিয়া এরাইভেল মোনুমেন্ত অসিনা নাকল অনিগী ওইবা মরী অসিগী খুদম ওইনা লেপ্লি‍। অসিগুম্লবা মরুওইখ্রবা খুদম অসিগী মনাক্তা চৎচনবগী খুদোংচাবা ঐনা ফংলগনি‍।

মরূপশিং,

ঙসি ঐহাক্না ময়ামগী মফমদা ভারতকী প্রধান মন্ত্রী ওইনা ৱাফম খরা ফোঙদোকচরি, অদুবু চহি ২৪গী মমাঙদা, ঐনা ফজখ্রবা লৈবাক অসিদা করিগুম্বা খরা ফংনবা লাকখি‍। মীওই কয়া অমনা মফমসিগী নীংথিরবা অমদি পুক্নিং হুরবা লমথুংফমগী মায়কৈদা পুক্নিং চিংশিন্নখি, অদুগা ঐহাক্না গুয়ানাগী পারী পুরীগী লন অমদি পুৱারীবু থিজিনবা পামখি‍। হৌজিকসু, খোঙচৎ অদুদা ঐগা ৱারী ৱাতায় শানখিবা নীংশিংলিবা মীওই কয়া গুয়ানাদা লৈরি‍। ঐনা মফমসিদা লাক্লম্বদুগী নীংশিং ৱারী কয়া ঐনা পুদুনা লাক্লি, মখোয়শিংদুদি ক্রিকেতপু য়াম্না পামজবদগী হৌরগা পুক্নিং শুমহৎপা ঈশৈ নোংমাই ফাওবা য়াওরি‍। অদুগা ঐনা চত্নীবু কৈদৌঙৈদা কাউদে – ভারতকীবু ওইরবসু গুয়ানাগীবু ওইরবসু তশেংনা শিংথানিংঙাইগী মশক্নি‍।

মরূপশিং,

অতোপ্পা লৈবাক অমদা চৎপা মতমদা মশাগী ওইবা পুৱারীগী অনকপা মরী লৈনবা থেংনবা হায়বসি পাক্না হেক থোকপা নত্তে‍। হৌখিবা চহিচা অনি মখাসিদা ভারত অমসুং গুয়াগী মরক্তা, মীনায় নাইথাং, ঈহৌ হৌবা অমদি নীংতম্নবগীদমক লান্থেংনবগী মান্নবা এক্সপিরিএন্স লৈরি‍। লৈবাক অনিমক্তা, মশিং থিঙমদ্রবা মীওইশিংনা নীংতম্বা ফংনবগীদমক মপুন্সি কত্থোক্নখি‍। গান্ধীজীগা নক্না লোয়নরম্বা সি.এম. এন্দ্রু, অমসুং ইস্ত ইন্দিয়ন এসোসিএসনগী প্রেসিদেন্ত জং বহাদুর সিংহগুম্বা মীওইশিংনা ঐখোয়গী মীয়ামগী মীনায় নাইথাংগী পুন্সিদগী মনীং তমহন্নবা পুন্না লান্থেংমিন্নরম্মি‍। ঐখোয় পুন্না নীংতম্বা ফংমিন্নখিবনি‍। ঙসি, ভারত অমসুং গুয়ানা অনিমক্না মালেমগী থাক্তা দিমোক্রেসী মপাঙ্গল কনখৎহল্লি‍। মরম অদুনা, গুয়ানাগী পার্লিয়ামেন্ত অসিদা লেপ্লবসিদা, ঐনা ময়ামগী মফমদা ভারত মচা করোর ১৪০ গী মায়কৈদগী য়াইফ পাউজেল পীজরি‍। ঐনা গুয়ানা পার্লিয়ামেন্তকী মীহুৎ খুদিংমক্কী মফমদা নুংঙাইবা ফোঙদোকচরি‍। অদোম্না দিমোক্রেসীগীদমক খোঙফম হন্দনা লেপ্লিবা অসিনা গুয়ানাবু মপাঙ্গল কলহনবখক্তা নত্তনা মালেম পুম্বগী খোঙজেলদা থৌদাং য়ারি‍।

মরূপশিং,

ঐখোয়না দিমোক্রেসী মপাঙ্গল কনখৎহন্নবা হোৎনবগা লোয়ননা মালেমগী হোংলক্লিবা ফীভম অসিদা ঐখোয় মীৎকুপ নাহুম শিংনা লৈবা মথৌ তাই‍। ভারত অমসুং গুয়ানানা মনীং তম্লকখিবদা, মালেম অসিনা তোঙান তোঙানবা শিংনবশিং থেংনখি‍। ঙসি ২১শুবা চহিচাসিদা, ঐখোয়না পুম্নৌ নৌবা ৱাফম কয়া থেংনরি‍। মালেমগী অনিশুবা লাঞ্জাও মতুংদা শেমগৎলকখিবা সিস্তেম অমসুং ইন্সতিত্যুসনশিং শিথরকপগী মমি তারক্লি‍। লাইচৎ মতুংদা, অনৌবা মালেমগী ওর্দর অমগী মায়কৈদা খোঙ থাংজিল্লকপগী মহুত্তা, মালেম অসিনা অতৈ অরুবা পরৈ চেনবা ৱাফমশিংগী লাংদা থুরি‍। শিংনবনা থল্লবা মতমসিদা, খ্বায়দগী মরুওইবা লাইৱাদি, “দিমোক্রেসী ফর্স্ত – হ্যুমেনিতী ফর্স্ত” হায়বসিনি‍। “দিমোক্রেসী ফর্স্ত” হায়বসিগী ৱাখল্লোন্না ঐখোয়গী ইফমদা  মীপুম খুদিংমক লোয়নদুনা মাঙদা চঙশিন্নবা, ইনক্লুজিবিতী পুরক্নবা, অমদি কল্লেক্তিব দিভেলপমেন্ত য়োকখৎনবা পুক্নিং থৌগৎলি‍। অদুগা, “হ্যুমেনিতী ফর্স্ত” হায়রিবা ৱাখল্লোন অসিনা ঐখোয়গী ফিরেপ লৌবগী মায়কৈ তাক্লি‍। মীওইবা খুন্নাইনা ঐখোয়গী ফিরেপশিংগী য়ুম্ফম ওইরক্লবা মতমদা, মদুগী মহৈ অদু মশানা অদুমক মীপুম খুদিংমক্কী য়াইফনবা ওইরক্লগদবনি‍।

মরূপশিং,

ঐখোয়গী দিমোক্রেতিব ভেল্যুশিং অসি কয়ামুক য়াম্না চাওবগে হায়ববু ঐখোয়না চাওখৎপগী লম্বীদা চঙশিল্লকপা মতমদা শিংনবা কয়াদা ঐখোয়গী ঙাক্লৌ ওইরি‍। দিমোক্রেসীনা ইনক্লুজিব ওইবা খুন্নাই অমা শেমগৎনবগী মতিং লৈবা পাম্বৈ অমা ওইরি‍। সিতিজনগী লাইনিং নৎত্রগা হৌরকফম য়েংদনা, দিমোক্রেসীনা মখোয়গী হক ঙাক্লি অমদি তরং তরংবা তুংলমচৎ অমা পীরি‍। ঐখোয়গী লৈবাক অনিসিনা দিমোক্রেসী হায়বসি লিগেল ফ্রেমৱর্ক নৎত্রগা সিস্তেম অমখক নত্তে; মসি ঐখোয়গী DNA, মঙলান অমদি তৌথোরকপা থবক থৌরমশিংদা চুদুনা য়াওখ্রবনি হায়বা উৎলি‍।

মরূপশিং,

ঐখোয়গী মীওইবা খুন্নাইদা য়ুম্ফম ওইবা লম্বী অসিনা লৈবাক খুদিংমক অমদি লৈবাক্তুগী মীপুম খুদিংমক চপ মান্ননা মরুওই হায়বা তম্বিরি‍। ফিলোসোফী অসিনা ভারতকী মালেমগী ওইবা মঙলান শেম্লি‍। ভারতকী G-20 প্রেসিদেন্সী মতমদা, ভারতনা ৱন আর্থ, ৱন ফেমিলী, ৱন ফ্যুচরগী ৱাফম হৌদোকখি‍। লাইচৎ মতমদা, মীওইবা খুন্নাইনা হান্না থেংনখিদ্রিবা শিংনবা অমা মায়োক্নরকপা মতমদা, ভারতনা ৱন আর্থ, ৱন হেল্থকী মায়কৈদা মীৎয়েঙ থমখি‍। অইং অশাগী খল কায়থরকপা থেংনবদা অপুনবগী থবক থৌরম মথৌ তাই, অমদি ভারতনা ৱন ৱর্ল্দ, ৱন সন, ৱন গ্রিদকী মঙলান মালেমগী মফমদা হৌদোকখি‍। মহৌশানা থোকহন্বা অমাঙ অতাশিং হন্থহন্নবা, ভারতনা কোএলিসন ফোর দিজাস্তর রেজিলিএন্ত ইনফ্রাস্ত্রকচর (CDRI) লুচিংখি‍। মালেম অসিনা মালেমগীদমক খঞ্জবা মীওইশিংগী অচৌবা নেতৱর্ক অমা মথৌ তারকপা মতমদা, ভারতনা সস্তেনেবল লিভিং পুক্নিং থৌগৎনবা মালেমগী ঈহৌ অমগী পরিংদা মিসন LiFE হৌদোকখি‍।

মরূপশিং,

“দিমোক্রেসী ফর্স্ত – হ্যুমেনিতী ফর্র্স্ত” হায়রিবা ৱাখল্লোন অসি য়োকখৎলদুনা, ভারতনা মাগী বিস্ববন্ধু (মালেমগী মরূপ) অমা ওইবগী শক্লোন লেপ্তনা লৌদুনা লাক্লি‍। মালেমগী লাংফম খুদিংদা, ভারতনা ফর্স্ত রেস্পোন্দর ওইননবা হোৎনদুনা লাক্লি‍। লাইচৎ মনুংদা, লৈবাক কয়ানা মখোয়গী ঙাকশেলগী লমদা মীৎয়েঙ থম্নখিবা মতমদা, ভারতনা হিদাক লাংথক অমদি ভেক্সিন লৈবাক ১৫০ হেন্বদা ফংহনখি‍। অদুগুম্লবা খুদোংথিরবা মতমদুদা ভারতনা গুয়ানাগী মীয়ামগী মতেঙ পাংবা ঙমখিবদা ঐ অপেন্বা ফাওই‍। লান নৎত্রগা অমাঙ অতা থোক্লকপা খুদিংদা, ভারতনা ওইজবা থিদনা মতেঙ পাংলি – স্রি লঙ্কা, মাল্দিব্স, নেপাল, তুর্কী, নৎত্রগা সীরিয়াদবু ওইরবসু‍। য়ুহা হাবদগী হৌরগা হাৎন শুনবগী লাংফম ফাওবদা, ভারতনা মাঙজিল থানা চোংশিন্দুনা মতেঙ পাংবশিংগী মরক্তা অমা ওইরি‍। ঐখোয়না ইশাগী ওইজবা থিনবগীদমক কৈদৌনুংদা থবক তৌখিদে নৎত্রগা ইশাগী ইথিল পাকথোক চাউথোকহন্নবা ৱাখল্লোন্দা থবক তৌখিদে‍। ঐখোয়না রিসোর্সশিং মতম পুম্বদা ইকায় খুম্নখি অমদি লম লৌশিন্বা নৎত্রগা নমজা নমথেক্নবগী ৱাখল্লোনগী মায়োক্তা লেপ্তুনা লাকখি‍। তরং অমদি সমুদ্র হায়বসি মালেমগী ওইনা মুক্নবগী মফম ওইহল্লোইদবনি, মালেমগী ওইনা তেংবাংনবগী মফম ওইহনগদবনি হায়না ঐনা মতম পুম্বদা থাজবা থম্মি‍। মখোয় অসি মুক্নগদবা মফম নত্তে, ৱাখল্লোন তিন্নদবশিংগী হৌরকফম খঙদোক্তুনা মরু ফুক্তোক্কদবা মফম্নি‍। তেরোরিজম, দ্রগ ত্রাফিক্কিং, অমসুং সাইবরক্রাইম্নচিংবা শিংনবশিংনা ঐখোয়গী মান্নবা তুংলমচৎপু খুদোং থিহল্লি, অমদি মখোয়শিং অসি পুন্না থেংনমিন্নরবা খক্তদা ঐখোয়না তুংগী মীরোলগী হেন্না ফবা তুংলমচৎ অমা থম্লম্বা ঙমগদৌরিবনি‍। পান্দম অসি ঐখোয়না “দিমোক্রেসী ফর্স্ত – হ্যুমেনিতী ফর্র্স্ত” হায়রিবা ৱাখল্লোন অসি ঐখোয়না হোৎনরিবা পুম্বসিগী ময়ায়দা থম্লবা মতমদা ফংবা ঙমগদৌরিবনি‍।

মরূপশিং,

ভারতনা মতম পুম্বদা পরম, থাজবা, অমদি অরোন অথুপ লৈতবা ৱাখল্লোনগী য়ুম্ফম অমগা লোয়ননা ৱা ঙাঙদুনা লাক্লি‍।‍ করিগুম্বা লৈবাক নৎত্রগা লমদম অমখক্তবু ওইরবসু নাথৈদুনা থম্লম্লবদি, ঐখোয়গী পান্দম ফংদনা লৈহৌগনি‍। মরম অসিননি ভারতনা – লৈবাক খুদিংমক মরু ওই হায়না হেক হেক হায়রিবা‍। মরম অসিননি ভারতনা ঈথৎকী লৈবাকশিংবু অপীকপা ঈথৎকী লৈবাক হায়বগী মহুত্তা অচৌবা সমুদ্রগী লৈবাকশিংনি হায়রিবা‍। মীৎয়েঙ অসিগা লোয়ননা, ঐখোয়না ইন্দিয়ন ওসীন রিজন্দা লৈরিবা ঈথৎকী লৈবাকশিং শম্নহন্নবা SAGAR প্লেতফোর্ম হৌদোকখিবা‍। মসিগী মথক্তা, ঐখোয়না পেসিফিক ওসীনগী লৈবাকশিং মরী শম্নহন্নবা অখন্নবা ফোরম অমসু শেমখি‍। ৱাখল্লোন অসিগী পরিংদা থবক পায়খত্তুনা, ভারতনা অফ্রিকান য়ুনিয়নবু ভারতকী G-20 প্রেসিদেন্সী মতমদা য়াওহন্দুনা থৌদাং চপ চানা য়াখি‍।

মরূপশিং,

ঙসি, ভারতনা মালেমগী ওইনা চাওখৎপা অমদি ইং তপ্পা পুরকপদা ঙাক্লৌ পীননবা খোঙফম চেৎনা লেপ্লি‍। ৱাখল্লোন অসিদনি ভারতনা গ্লোবেল সাউথকী খোঞ্জেল ওইরক্লিবা‍। গ্লোবেল সাউথনা মমাঙদা অৱা অনা কয়া মায়োক্নখ্রে হায়না ভারতনা থাজৈ‍। পুৱারীগী ওইনাআ য়েংবদা, ঐখোয়না মহৌশাগা তোৎন-তিন্ননা চৎমিন্নরবা, ঐখোয়গী নাৎগী ৱাখল্লোনশিংনা লমজিংদুনা চৎলবা মতমদা খুমাঙ চাওশিল্লি‍। অদুম ওইনমক, লৈবাক কয়া অমনা অকোয়বগী ফীভম কায়থহন্দুনা চাওখৎপা পুরকখি‍। ঙসি গ্লোবেল সাউথকী লৈবাকশিংনা অইং-অশাগী খল কায়থরকপগী খ্বায়দগী চাউবা পোৎলুম পুরি, অমদি অসিগুম্ব খল মান্নদবা অসি চুমথোকপা মথৌ তাই‍।

মরূপশিং,

ভারত নৎত্রগা গুয়ানাবু ওইরবসু, ঐখোয়না চাওখৎপা পুরক্নিংবগী অপাম্বা অমদি ঐখোয়গী মীয়ামদা হেন্না ফবা পুন্সি অমা ফংহন্নবা মঙলান মঙমিন্নরি‍। মসি ফংনবগীদমক, গ্লোবেল সাউথকী অমত্তা ওইবা খোঞ্জেল অমা মথৌ তাই‍। হৌজিক অসি গ্লোবেল সাউথকী মীৎকপ থোকপগী মতমদুনি, ঐখোয় পুনশিন্নদুনা অনৌবা মালেমগী মচৎ অমা শেম্নবা তাঞ্জাক অদু লাক্লবনি‍। খোঙচৎ অসিদা ঐনা ময়াম পুম্বগী, গুয়ানাগী ইকায়খুম্নরবা মীয়ামগী মীহুৎশিংগী মশক থোকপা থৌদাং অমা ৱাখলদা শাগৎচরি‍।

মরূপশিং,

মফমসিদা নুপী মেম্বর কয়া য়াওবা ঐনা উবা ফংই‍। মালেমগী তুংলমচৎ শেম্বা অমদি মালেমসিনা খুমাঙ চাওশিন্নবা মরুওইবা ফেক্তর অমদি মালেমসিগী অপুনবা মীশিংগী তঙ্খায় অমা ওইরিবা নুপীশিং অসিনি‍। চহিচা কয়া নুপীশিংদা মালেমগী খোঙজেলদা থৌদাং মপুং ফানা য়াহন্নবা খুদোংচাবা পীবিদনা লাকখি‍। মসিগী মরম কয়া লৈখি, অমদি মসি লৈবাক অমখক্কী নৎত্রগা গ্লোবেল সাউথকীখক্তা নত্তে; মসি মালেম পুম্বগী ওইবা মচৎ অমা ওইরম্মি‍। অদুম ওইনমক, ২১শুবা চহিচাদা, নুপীশিংনা মালেমগী ওইনা নুংঙাই য়াইফবা পুরকপদা মরুওইবা থৌদাং লৌরি‍। মসি খঙলদুনা, ভারতকী মাগী G-20 প্রেসিদেন্সী মতমদা, নুপীশিংনা লমজিংদুনা চাওখৎপা পুরকপা হায়বা ৱাফমসি মরুওইবা এজেন্দা অমা ওইনা থমখি‍।

মরূপশিং,

ভারত্তা, ঐখোয়না থাক খুদিংদা সেক্তর খুদিংদা নুপীশিংবু লুচিংবগী শক্লোন লৌহন্দুনা মপাঙ্গল হাপ্নবা মশক থোকপা কেম্পেন অমা হৌদোকখি‍। ঙসি, ভারতকী নুপীশিংনা হীরম খুদিংদা মীকোক থোংলক্লি‍। মালেমগী ওইনা য়েংবদা, পাইলোত ৫% নুপীনি, অদুগা ভারত্তনা মশিং অসি ১৫% য়ৌরি‍। ভারতকী ফাইতর পাইলোত কয়া অমসু নুপীশিংনা ওইরি‍। মালেমগী চাওখৎলবা লৈবাকশিংদা, STEM— সাইন্স, তেক্নোলোজী, ইঞ্জিনরিয়রিং, অমদি মেথমেতিক্সকী গ্রেজুএতশিংগী মশিং চাদা ৩০ দগী ৩৫ ফাওবতনি‍। অদুম ওইনমক, ভারত্তদি মশিং ্রসি চাদা ৪০ হেল্লি‍। নুপী সাইন্তিস্তশিংনা হৌজিক্তি ভারতকী অচৌবা স্পেস মিসনশিংদা য়াওরি‍। ভারতনা হন্দক্তা মাগী পার্লিয়ামেন্ততা নুপীশিংগী রিজর্বেসন পীননবা লেজিসলেসন চৎনহনখ্রে খঙবদা অদোম অপেন্বা পোক্কনি‍। ঙসি, ভারত্তা দিমোক্রেতিক গভর্নেন্সকী থাক পুম্নমক্তা নুপীশিংনা মহুৎ শিল্লি‍। লোকেলগী থাক্তসু, ঐখোয়গী পঞ্চায়তী রাজ সিস্তেমগী খুত্থাঙদা, মীখল মায় পাক্লকপা মীহুৎ মিলিয়ন ১.৪ হায়বদি লাখ ১৪ রোমদি নুপীনি‍। মসি অচম্বা মীৎয়েঙদা থম্বা তারগদি, ঐখোয়গী লোকেল গভর্নমেন্ততা লৈরিবা নুপী মশিং অসি গুয়ানাগী অপুনবা মীশিংগী শরুক অনিরোম ওইগনি‍।

মরূপশিং,

গুয়ানানা লেতিন অমেরিকাগী পাক চাউরবা মহাদেশ অসিগী হোজঙ ওইরি‍। অদোম্না ভারত অমসুং পাক চাওখ্রবা লমদম অসিগী মরক্তা খুদোংচাবা অমদি ওইথোকপা য়াবশিংগী থোং অমা ওইবা য়াগনি‍। ঐখোয়না পুল্লগা ভারত অমসুং CARICOM গী মরক্তা লৈরিবা খোঙবু ওইবগী মরী অসি কনখৎহন্বা ঙমগনি‍। ঙরাংমক্তদসু, ইন্দিয়া-CARICOM সম্মিত মফমসিদা, গুয়ানাদা পাঙথোকখি, মদুদা ঐখোয়না খুৎশম্ননা চৎমিন্নরিবা অসি মায়কৈ খুদিংদা কনখৎহন্নবা ফিরেপ লৌখি‍।

মরূপশিং,

ভারতনা গুয়ানাগী চাওখৎ খোঙচত্তা হেক য়াবা লম্বী খুদিংদা ঙাক্লৌ পীননবা লেপ্লি‍। ইনফ্রাস্ত্রকচর নৎত্রগা কেপাসিতী বিল্দিংদা ইনভেস্তমেন্ত তৌববু ওইরবসু, ভারত অমসুং গুয়ানানা খুৎশম্ননা থবক তৌমিন্নরি‍। ভারতনা ফংহনখিবা হি অমদি এয়রক্রাফ্তশিংনা গুয়ানাদা চাউনা কান্নবা পীরি‍। ভারতনা রিনিউএবল ইনর্জীগী লমদা, মরুওইনা সোলার পৱার সেক্তরদা মশক থোক্না ঙাক্লৌ পীরি‍। অদোম্না T-20 ক্রিকেত ৱর্ল্দ কপ মায় পাক্না শিনখিবা অসি শিংথানিংঙাইগী মশক্নি, অমদি ভারতনা স্তেদিয়ম শাগৎপদা থৌদাং য়াখিবগীদমক চাউথোকচৈ‍।

মরূপশিং,

ঐখোয়গী খোঙবু ওইবগী মরী অসিনা পুরক্লিবা চাওখৎপসিগা লোয়ননা অনৌবা তাঙ্কক অমদা খোঙ থাংজিল্লক্লি‍। ভারতকী ইনর্জী দিমান্দ থুনা হেনগৎলকপগা লোয়ননা, ঐখোয়না ঐখোয়গী তোঙান তোঙানবা ইনর্জী সোর্সশিংদা থবক পায়খৎলি, অমদি মসিদা ঐখোয়না গুয়ানাবু মরুওইবা ইনর্জী সোর্স অমা ওইনা লৌরি‍। অমুকসু, ঐখোয়না ভারতকী বিজিনেসশিংগী মফমদা গুয়ানাদা শেল হেন্না থাদনবা পুক্নিং থৌগৎলি‍।

মরূপশিং,

ভারতকী মফমদা নহা মীশিং য়াম্না লৈ, অমদি লমদম অসিবু য়ুথ কেপিতেল ওইনা হেক হেক হায়নরিবসি অদোম খঙবিরমগনি‍। ভারতকী অচৌবা ক্বালিতীঈ এজুকেসন অমদি স্কিল দিভেলপমেন্ত ইকোসিস্তেম অমসু লৈজরি‍। ঐখোয়না গুয়ানাদগী মহৈরোয় মশিং য়ারিবমখৈ য়াম্না লাক্তুনা সিস্তেম অসিগী কান্নবা লৌরনবা তরাম্না ওকচরি‍। গুয়ানাগী পার্লিয়ামেন্তকী খুত্থাঙদা, ঐহাক্না গুয়ানাগী নহাশিংগী মফমদা ভারতকী ইনোভেতর অমদি সাইন্তিস্তশিংগা খুৎশম্ননা থবক পায়খৎমিন্ননবা পাউজেল কৎচরি‍। ঐখোয় পুনশিন্দুনা ঐখোয়গী নহাশিংবু মালেমগী ওইনা খুৎশম্নরগা মরমদম মরৈকায়গীদমক য়াইফনবা থবক পায়খৎমিন্ননবা পুক্নিং থৌগৎমিন্নসি‍। ক্রিএতিব ওইবা কোলাবোরেসন তৌদুনা, ঐখোয়না ঙসি মালেমসিনা মায়োক্নরিবা শিংনবশিংগী ইনোভেতিব ওইপা পাম্বৈশিং পুথোকপা ঙমগনি‍।

মরূপশিং,

গুয়ানাগী অথোইবা মপারী, শ্রী চেদ্দি জগন্না মতম অমদা ঐখোয়না হৌজিক্কী মতমদা লৈরিবা ফীভম ফগৎহন্নবা মাঙলমচত্তগী তমশিনগদবনি, অমদি তুংগীদমক অচেৎপা য়ুম্ফম থোনগদবনি হায়বিরম্ম‍ি‍। লৈবাক অনিসিগী মান্নবা পুৱারী অমদি পারাশিংনা, ঐখোয়না হোৎনরিবশিং অসিগা পুল্লগা, হেন্না তরং তরংবা তুংলমচৎ অমমগী মায়কৈদা শোয়দনা ঐখোয়বু লমজিংগনি‍। ৱাখল্লোন অসিগা লোয়ননা, ঐগী ৱারোল তেনশিঞ্জগে‍। ঐনা ময়াম পুম্নমকপু ভারত্তা লেঙবিরক্নবা পাউজেল কৎচরি, অমদি গুয়ানাদগী হেক য়ারিবমখৈ মশিং য়াম্লবা মীওইশিংবু তরাম্না ওকচবদা ঐহাক্না নুংঙাইবা ফাওগনি‍। অমুক্কা হন্না, ঐনা গুয়ানাগী পার্লিয়ামেন্ত অমদি ময়াম পুম্নমক্কী মফমদা থম্মোয় শেংনা তৌবিমল খঙবা উৎচরি‍। ময়ামবু থাগৎচরি‍।

দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেংবা ৱারোলদি হিন্দীদা পীখিবনি‍।

***