داخلہ اور امداد باہمی کے  مرکزی  وزیر جناب امت شاہ نے آج نئی دہلی میں منعقدہ ’رن فار یونٹی‘ کو جھنڈی دکھا کر روانہ کیا۔ سردار ولبھ بھائی پٹیل کے یوم پیدائش کے موقع پر یعنی 31 اکتوبر کو منائے جانے والے قومی اتحاد کے دن کے ایک حصے کے طور پر ’رن فار یونٹی‘ کا اہتمام کیا گیا تھا۔ اس موقع پر مرکزی کابینہ کے وزراء جناب منوہر لال کھٹر، ڈاکٹر منسکھ مانڈویہ، مرکزی وزیر مملکت برائے داخلہ جناب نتیا نند رائے اور دہلی کے لیفٹیننٹ گورنر جناب ونے کمار سکسینہ سمیت کئی معززین موجود تھے۔

اپنے خطاب میں مرکزی وزیر داخلہ جناب امت شاہ نے کہا کہ وزیر اعظم جناب نریندر مودی نے 2015 میں عظیم رہنما سردار ولبھ بھائی پٹیل کی یاد میں ’رن فار یونٹی‘ منعقد کرنے کا فیصلہ کیا تھا تاکہ ملک کے لوگ ملک کی یکجہتی اور سالمیت کا عہد کرسکیں۔ انہوں نے کہا کہ اس کے بعد سے، پورا ملک ‘رن فار یونٹی’ کے ذریعے نہ صرف پورے ملک کی یکجہتی اور سالمیت کا عہد کرتا ہے بلکہ خود کو بھارت ماتا کی خدمت کے لیے وقف کر دیتا ہے۔ جناب شاہ نے مزید کہا کہ ’رن فار یونٹی‘ ملک کے اتحاد کا عہد نیز ترقی یافتہ ہندوستان کا عہد بن گیا ہے۔ انہوں نے کہا کہ وزیر اعظم مودی نے تمام ہم وطنوں کے سامنے 2047 تک ایک مکمل ترقی یافتہ ہندوستان کی تعمیر کا عہد کیا ہے جو دنیا کے ہر میدان میں سب سے اوپر ہوگا۔

جناب امت شاہ نے کہا کہ آج ہندوستان دنیا کے سامنے پھلنے پھولنے ، ایک ترقی کرنے والے اور ایک مضبوط ملک کے طور پر کھڑا ہے۔ انہوں نے کہا کہ اگر ہم تاریخ پر نظر ڈالیں تو آزادی کے بعد 550 سے زیادہ رجواڑوں کے زیر نگیں ریاستوں کو اکٹھا کرکے موجودہ ہندوستان کی تشکیل سردار صاحب کی مضبوط قوت ارادی اور فوری فیصلہ سازی کی وجہ سے ہی ممکن ہوئی۔ انہوں نے کہا کہ یہ سردار پٹیل تھے جن کی مضبوط قوت ارادی کی وجہ سے آج ہندوستان دنیا کے سامنے متحد اور مضبوطی کے ساتھ کھڑا ہے۔ انہوں نے مزید کہا کہ آج ہندوستان ہر میدان میں قائد بننے کی راہ پر دنیا کے سامنے مضبوطی کے ساتھ کھڑا ہے اور اس کی بنیاد سردار پٹیل نے رکھی تھی۔

داخلہ اور امداد باہمی کے مرکزی وزیر نے کہا کہ یہ بدقسمتی کی بات ہے کہ سردار پٹیل کو برسوں تک فراموش کر دیا گیا اور انہیں بھارت رتن کے اعزاز سے بھی محروم رکھا گیا۔ انہوں نے کہا کہ وزیر اعظم مودی نے گجرات کے کیوڑیا میں دنیا کا سب سے اونچا مجسمہ بنا کر سردار پٹیل کی یاد کو زندہ رکھا ہے۔ جناب شاہ نے کہا کہ ہر میدان میں سردار پٹیل کے وژن، نظریات اور پیغام کو وزیر اعظم مودی نے ٹھوس شکل دی ہے۔

جناب امت شاہ نے کہا کہ سردار پٹیل کے عظیم خیالات یقیناً ملک کی نوجوان نسل کے لیے مشعل راہ بنیں گے۔ مرکزی وزیر داخلہ نے ہم وطنوں پر زور دیا کہ وہ ’رن فار یونٹی‘ کے ذریعے ہندوستان کے اتحاد کو مضبوط کرنے اور 2047 تک ایک مکمل ترقی یافتہ ہندوستان کے خواب کو شرمندہ تعبیر کرنے کا عہد کریں۔

***

ش ح۔ ف ا ۔ع د

U-No. 1863)