বে ওফ বেঙ্গলদা লৈরিবা নোংলৈ-নুংশিৎকী শেম-শারিবশিং হন্না য়েংশিন্নবা কেবিনেত সেক্রেতরি, দোক্তর তি.ভি সোমনাথন্না লুচিংদুনা নেসনেল ক্রাইসিস মেনেজমেন্ত কম্মিতি(এন সি এম সি)গী মীফম অমা পাংথোকখ্রে।

বে ওফ বেঙ্গলগী ইস্ত সেন্ত্রেল মথক্তা লো-প্রেসর লৈরিবা অসিগী মতাংদা ইন্দিয়ান মেতিওরোলোজিকেল দিপার্তমেন্ত(আই.এম.দি)গী দিরেক্তর জেনেরেলনা কম্মিতিদা পাউদমখ্রে। নোংলৈ-নুংশিৎ অসি ৱেস্ত-নোর্থৱেস্তলোমদা চঙশিল্লকপা য়ারি অমসুং ওক্তোবর ২২গী অয়ুক্তা দিপ্রেসন অমা ওইরক্কনি অমসুং বে ওফ বেঙ্গলগী ইস্ত সেন্ত্রেল মথক্তা ওক্তোবর ২৩,২০২৪ দা নোংলৈ-নুংশিৎ অমা ওইরক্কনি। মতুং তারকপদা, মসি নোর্থৱেস্তরোমদা চৎখিগনি অমসুং ওক্তোবর ২৪গী অয়ুক্তা বে ওফ বেঙ্গলগী ওরিসা-নোংচুপ বেঙ্গল সমুদ্র মপান্দা য়ৌরক্কনি।

মখা তানা অৱাং-নোংচুপলোমদা চৎখিদুনা, মসিনা ওক্তোবর ২৪গী অহিংদা পুরি অমসুং সাগর আইলেন্দগী মরক্তা অৱাং থংবা ওরিসা অমসুং নোংচুপ বেঙ্গল লান্দুনা চৎখিবা য়ারি অমসুং ওক্তোবর ২৫,২০২৪গী অঙনবা অয়ুক্তা পুংদা কিমি ১০০-১১০ দগী ১২০ ফাওবগী চাংদা অকনবা নোংলৈ-নুংশিৎ অমা ওইনা শীৎকনি।

নোংলৈ-নুংশিৎনা লাকপা য়াবা পরিংদা লৈবা মীওইশিং ঙাক-শেন্নবা মাঙজৌননা থবকশিং পায়খৎনবা কম্মিতিনা ওরিসা অমসুং নোংচুপ বেঙ্গলগী চীফ সেক্রেতরিশিংদা খঙহনখ্রে। ঙামীশিং সমুদ্রদা কুমদনবা অমসুং সমুদ্রদা লৈরিবা ঙামীশিং শাফগদবা মফমশিংদা লৈহন্নবা খঙহনখ্রে। কন্ত্রোল রুমশিং থবক তৌরে অমসুং ফিবম অসি য়েংশিল্লে। লৈফম, পৱার সপ্লাই, হিদাক-লাংথক অমসুং অথু-অকায়গী থবকশিং থৌরাং তৌদুনা থম্লে। খুদোংথিনিঙাই ওইবা মফমদা লৈবা মীওইশিং হোন্দোক্নবা মশক খঙদোক্লে।

নেসনেল দিজাস্তর রেসপোন্স ফোর্স (এন দি আর এফ)না নোংচুপ বেঙ্গলদা তিম ১৪ অমসুং ওরিসাদা তিম ১১ থৌরাং তৌদুনা থম্লে। জহাজশিং অমসুং এয়রক্রাফশিংগা লোয়ননা লান্মী, নেভি অমসুং কোস্ত গার্দকী মী কনবা অমসুং মতেং পাংনবা তিমশিং থৌরাং তৌদুনা লৈরে। পারাদিপ অমসুং হালদিয়াগী হিথাংফমশিংদা চাংনাইনা চেকশিনবা অমসুং পাউতাকশিং পীরে। খুদক্তগী ওইনা শেমজিন-শাজিন্নবা অমসুং ফিবম য়েংশিন্নবা পৱার মিনিস্ত্রি অমসুং তেলিকম্মুনিকেসন দিপার্তমেন্তগী ইমর্জেন্সি তিমশিং থম্লে।

কেন্দ্রগী এজেন্সিশিং অমসুং ওরিসা সরকার অমসুং নোংচুপ বেঙ্গল সরকারনা শেম-শারিবশিং হন্না য়েংশিল্লদুনা, কেবিনেত সেক্রেতরিনা হায়খি মদুদি রাজ্য সরকারশিং অমসুং কেন্দ্রগী এজেন্সিশিংনা দরকার ওইবা চেকশিন-থৌরাংশিং পায়খৎকনি। মীওই অমতা শিদনবা অমসুং লন-থুমশিং অমাং-অতা থোক্তনবা পান্দম থমগদবনি। করিগুম্বা অমাং-অতা থোক্লকপা মতমদা, অথুবা মতমদা তঙাইফবদা থবকশিং অমুক হন্না শেমজিন-শাজিনগদবনি।

কেবিনেত সেক্রেতরিনা হায়খি মদুদি সমুদ্রদা লৈরিবা ঙামীশিং কৌখৎকদবনি অমসুং খুদোংথিনিঙাই ওইবা মফমশিংদা লৈরিবা মীওইশিং মতম চানা লৌথোক্কদবনি। ওরিসা অমসুং নোংচুপ বেঙ্গল সরকারশিং অমসুং কেন্দ্রগী এজেন্সিশিং মীকুপ-নাহুম শিংনা লৈরে অমসুং মতেং পাংনবা লৈগনি। অকনবা নোং চুবনা মরম ওইদুনা থোকহনবা য়াবা ফিবম অমা হেক্তা থেংন্নবা অন্ধ্র প্রদেস, ছতিসগর অমসুং ঝারখন্দ রাজ্যশিং থৌরাং তৌগদবনি। দামশিংদগী ঈশিং থাদোরকপদগী শোকহনবা য়াবা মফমশিং ইচাউ থোক্তনবা থৌরাং তৌগদবনি।

মীফম অদুদা ওরিসা অমসুং নোংচুপ বেঙ্গলগী চীফ সেক্রেতরিশিং, য়ুনিয়ন হোম সেক্রেতরি, পেত্রোলিয়ম অমসুং নেচরেল গ্যাস মিনিস্ত্রি, ফিসরিজ, পৱার, পোর্তস, সিপ্পিং অমসুং ৱাতরৱেজ দিপার্তমেন্তশিংগী সেক্রেতরিশিং, অন্ধ্র প্রদেসকী এদিসেনল চীফ সেক্রেতরি, তেলিকম্মুনিকেসন দিপার্তমেন্তগী মেম্বর(তেক্নিকেল), চীফ ওফ ইন্তিগ্রেতেদ দিফেন্স স্তাফ, চিয়ারমেন চীফস ওফ স্তাফ কম্মিতি, নেসনেল দিজাস্তর মেনেজমেন্ত ওথোরিতিগী মেম্বর সেক্রেতরি ইন্দিয়া মেতিওরোলোজিকেল দিপার্তমেন্তগী দিরেক্তর জেনেরেল, নেসনেল দিজাস্তর রেসপোন্স ফোর্সকী দিরেক্তর জেনেরেল, ইন্দিয়ান কোস্ত গার্দকী দিরেক্তর জেনেরেল অমসুং হোম এফেয়ার্স মিনিস্ত্রিগী সেনিয়ার ওফিসারশিং য়াওখি।

***