থাগৎখিবা:
21 OCT 2024 2:52PM by PIB Imphal
কেন্দ্রগী গৃহ মন্ত্রী অমসুং কোওপরেসন মন্ত্রী, শ্রী অমিত শাহনা ঙসি নই দিল্লীদা লৈবা নেস্নেল পুলিস মেমোরিয়েলদা পুলিসকী থৌদাং নীংশিংবগী নুমিৎ থৌরমদা অথৌবশিংদা ইকায় খুম্নবা উৎখ্রে। থৌরম অদুদা হোম এফিয়র্সকী রাজ্য মন্ত্রী শ্রী বন্দি সঞ্জয় কুমার, কেন্দ্রগী হোম সেক্রেতরী শ্রী গোবিন্দ মোহন, ইন্তেলিজেন্স ব্যুরো (আই.বি.)গী দাইরেক্তর শ্রী তপন কুমার দেকা, সেন্ত্রেল আর্মদ পুলিস ফোর্সেস (সি.এ.পি.এফ.)গী সেনিয়র ওফিসরশিং অমসুং অতোপ্পা মীহুৎ কয়াসু শরুক য়াখি।

মহাক্কী ৱারোলদা কেন্দ্রগী গৃহ মন্ত্রীনা হায়খি মদুদি পুলিস ফোর্সশিংগী জৱানশিংনা কাশ্মীরদগী কন্যাকুমারী অমসুং কচ্ছতগী কিবিথু ফাওবা ভারতকী ঙমখৈশিং ঙাক্লি। মহাক্না হায়খি মদুদি লান্মীশিংগী পর্সোনেলশিংনা ঐখোয় অমসুং ঙমখৈশিং অসি মতম পুম্নমক্তা ঙাক-শেল্লি। নুমিদাং নৎত্রগা নুংথিল, কুমহৈ নৎত্রগা খুদোংথীবা মতমদা, য়াম্না শাথীনা শাবা মতম, নোং, নৎত্রগা অইং-অশাদা ঙাক-শেল্লি।
শ্রী অমিৎ শাহনা হায়খি মদুদি নেস্নেল পুলিস মেমোরিয়েলদা লৈরিবা সেন্ত্রেল স্ত্রকচর অসিনা ঐখোয়গী জৱানশিংগী থৌদাংদা থম্লিবা অচেৎপা ফিরেপ, মখোয়গী অচেৎপা লৈবাক নীংবগী মতৌ অমসুং মখোয়গী খ্বাইদগী ৱাংবা থবক্কীদমক কত্থোকখিবা অদুগী খুদম্নি। মহাক্না হায়খি মদুদি ইং 1959গী ঙসিগী নুমিত্তা সেন্ত্রেল রিজর্ব পুলিস ফোর্স (সি.আর.পি.এফ.)গী মীওই 10না থৌনা লৈনা চাইনিজ লান্মীগী মায়োক্তা লান্থেংখি অমসুং মখোয়গী পুন্সি কত্থোকখি। শ্রী শাহনা হায়খি মদুদি প্রধান মন্ত্রী ওইরবা মতুংদা, শ্রী নরেন্দ্র মোদীনা দিল্লীগী ময়াইদা পুলিস মেমোরিয়েল অমা লান্মীশিং অসিগী কত্থোকপবু ইকায় খুম্নবা উৎনবা শেম্নবা ৱারেপ লৌখি। মহাক্না মখা তারদুনা হায়খি মদুদি পুলিস মেমোরিয়েল অসিনা ঐখোয়গী নহারোলশিংদা ইথিল পীদুনা মখা তানা চৎথগনি অমসুং ঙসি ঐখোয়না ফংলিবা সেক্যুরিতী অমসুং প্রোগ্রেস অসি লান্মী লিশিং কয়াগী অৱাংবা থাক্কী কত্থোকপগী মহৈনি হায়না নাগরিকশিংদা নিংশিংহল্লগনি। লৈবাক অসিগী ঙাকশেল অমসুং সেক্যুরিতীগীদমক পুলিস পর্সোনেল 36,468না মখোয়গী পুন্সি থাদোকখ্রে, মসিনা লৈবাক অসি চাউখৎপা ঙমহল্লে হায়না মহাক্না মখা তাখি। মহাক্না হায়খি মদুদি হৌখিবা চহি অমদা পুলিস পার্সোনেল 216না মথৌ তৌরিঙৈদা মখোয়গী পুন্সি কত্থোকখি অমসুং লৈবাক অসিনা থৌনা ফরবা লান্মীশিং অসিগী মফমদা মতম পুম্নমক্তা ইকায় খুম্নগনি।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি ঐখোয়গী পুলিস ফোর্সশিংনা লৈবাক্কী ঙাকশেলগীদমক খ্বাইদগী ৱাংবা থৱায় কৎপগী চৎনবী লৈরি। হিমালয়গী অইং-অশা অমসুং অকিবা পোক্লিবা চীংশিংদগী হৌরগা কচ্ছ অমসুং বারমরগী লৈকঙলা অমসুং পাক চাউরবা সমুদ্রশিং ফাওবদা লৈবাক অসিবু শিংনবা লৈতনা ঙাক-শেনখিবা, লৈবাক অসিগী ঙাক-শেনবগী থবক তৌখিবা ঐখোয়গী থৌনা ফরবা পুৱারী অমা লৈরি হায়না মহাক্না মখা তাখি।

শ্রী অমিৎ শাহনা হায়খি মদুদি জম্মু অমসুং কাশ্মীর, লেফ-ৱিং এক্সত্রিমিজমনা শোকহল্লবা মফমশিং অমসুং অৱাং-নোংপোক লমদমদা চহী তরাগী খুজিং কয়াগী মমাংদগী শান্তিগী ফীভম অসি অৱাবা ওইদুনা লাক্লি। অদুবু হৌখিবা চহী তরা অসিদা ঐখোয়না ঐখোয়গী সেক্যুরিতী ফোর্সশিংগী থৌনা অমসুং মতিক চানা হোৎনবনা মরম ওইদুনা শান্তি ওইহনবদা মায় পাকখি। অদুম ওইনমক, ঐখোয়গী লান অসি লোইদ্রি হায়না মহাক্না মখা তাখি। দ্রোন, দ্রগ ত্রেদ, সাইবর ক্রাইম, আর্তিফিসিএল ইন্তেলিজেন্স (এ.আই.)গী খুত্থাংদা অশোই-অঙাম থোকহন্নবা হোৎনবা, ধর্মগী ওইবা পুক্নিংবু পুক্নিং থৌগৎনবা থৌরাং তৌবা, ইনফিল্ত্রেসন, আইন্না য়াদবা খুৎলাইশিং লান্থোকপা অমসুং তেরোরিজমগুম্বা অনৌবা খুদোংচাদবশিং অসি ঙসি ঐখোয়না থেংনরিবা শিংনবশিংনি। শ্রী শাহনা হায়খি মদুদি খুদোংচাদবা অমসুং শিংনবশিং অদু কয়া য়াম্না চাউনা লৈরবসু, মখোয়না ঐখোয়গী লান্মীশিংগী থাজবা থম্বা ঙম্বগী মাইয়োক্তা লেপ্পদি কৈদৌনুংদা ঙমদে।

2047 ফাওবদা মপুং ফানা চাউখৎলবা ভারত অমা শেমগৎনবা প্রধান মন্ত্রী শ্রী নরেন্দ্র মোদীগী মঙলান অদু মপুং ফানা পাংথোক্নবা লৈবাক শীনবা থুংনা লৈরিবা পুলিস পর্সোনেলশিংনা ৱাশক্লি হায়না কেন্দ্রগী গৃহ মন্ত্রীনা ফোংদোকখি। মহাক্না হায়খি মদুদি লৈবাক অসিগী পার্লিয়ামেন্তনা পাস তৌখিবা অনৌবা ক্রিমিনেল লো অহুম অসি রাজ্য অমসুং য়ুনিয়ন তেরিতোরী পুম্নমক্তা হান্ননা চৎনবা হৌখ্রে। আইনশিং অসি মপুং ফানা চৎনরবা মতুংদা, ঐখোয়গী ক্রিমিনেল জস্তিস সিস্তেম অসি মালেমদা খ্বাইদগী মোদর্ন জস্তিস সিস্তেম ওইগনি হায়না মহাক্না হায়খি। মহাক্না মখা তারদুনা হায়খি মদুদি লৈবাক অসিগী মফম অমহেক্তদা রেজিস্তর তৌরবা ক্রাইম অমহেক্তদা চহী অহুমগী মনুংদা সুপ্রিম কোর্ত ফাওবা জস্তিস ফংহনগনি। মহাক্না অকনবা ৱাফম থমখি মদুদি জস্তিসকী অয়েৎপা অসি কোকহন্নবগী লম্বী অসিদি অনৌবা আইন অহুম অসি ইমপ্লিমেন্ত তৌবনয়া ওইগনি।

শ্রী অমিত শাহনা হায়খি মদুদি মোদী সরকারনা পুলিস পর্সোনেলশিংগী য়াইফনবা স্কিম কয়া অমা হৌদোকখ্রে। মহাক্না হায়খি মদুদি আয়ুশ্মান সি.এ.পি.এফ. স্কিমগী খুত্থাংদা কার্দ লাখ 41 হেন্না য়েন্থোকখ্রে অমসুং লুপা করোর 1422গী ক্লেম লাখ 13গী সেত্তলমেন্ত তৌখ্রে। মহাক্না হায়খি মদুদি ঐখোয়গী জৱানশিং অমসুং মখোয়গী ইমুং-মনুংগী হকশেল অসি কার্দ অসিগী খুত্থাংদা মফম অমহেক্তদা য়েংশিল্লি। মহাক্না হায়খি মদুদি হাউজিং স্কিমদসু, ঐখোয়না হাউজিং সেতিস্ফেক্সন রেসিও হেনগৎনবা পান্দম থম্লি। শ্রী শাহনা হায়খি মদুদি মোদী সরকারনা 2015দা লুপা করোর 3100 চংনা য়ুম 13,000 অমসুং বেরেক 113 শাবগী অয়াবা পীখি। মসিগী মনুংদা য়ুম 11,276 অমসুং বেরেক 111 অসি 2024গী মার্চ ফাওবদা লোইশিনখ্রে। সি.এ.পি.এফ. ই-আৱস ৱেব পোর্তেলগী খুত্থাংদা, অহাঙবা য়ুমশিং য়েন্থোকখ্রে হায়না মহাক্না হায়খি। প্রধান মন্ত্রীগী স্কোলরশিপ স্কিম অসি ঐখোয়গী পুলিস পর্সোনেলশিংগী অঙাংশিংগীদমক লাইবক ফবনি। মসিগা লোয়ননা, এম.বি.বি.এস.দা সি.এ.পি.এফ. পর্সোনেলশিংগী দিপেন্দেন্তশিংগীদমক সিৎ 26 অমসুং বি.দি.এস.দা সিৎ 3 রিজর্ব তৌখ্রে। সেন্ত্রেল এক্স-গ্রেসিয়াগী শেনফম অসি লম্প-সম কম্পেন্সেসনদা হেনগৎহনবনা ঐখোয়গী জৱানশিংগী ইমুং-মনুংশিংদা অচৌবা মতেং পীরি।

কেন্দ্রগী গৃহ মন্ত্রীনা হায়খি মদুদি ঐখোয়গী পুলিস পর্সোনেলশিং, মরু ওইনা সি.এ.পি.এফ.শিংগী পর্সোনেলশিংনা, লো এন্দ ওর্দর ঙাক্তুনা থম্নবা অমসুং লৈবাক অসিগী সেক্যুরিতী লৈহন্নবা নত্তনা অতোপ্পা থবক কয়া অমসু পাংথোক্লি। মহাক্না হায়খি মদুদি 2019দগী 2024 ফাওবদা সি.এ.পি.এফ. পর্সোনেলশিংনা চাউরাক্না করোর 5.80 লাখ 90,000গী চাংদা পাম্বী থারি অমসুং মখোয়বু মখোয়গী মচাগুম্না য়েংশিল্লি। শ্রী শাহনা হায়খি সিভিক এক্সন প্রোগ্রামগী খুত্থাংদা, ভারত সরকার অমসুং রাজ্য সরকারশিংগী স্কিম পুম্নমক ঙমখৈগী জিলা পুম্নমক্তা লৈরিবা নাগরিকশিংদা য়ৌহন্নবা হোৎনরি। লৈবাক অসিগীদমক মখোয়গী পুন্সি থাদখিবা জৱানশিংগী কত্থোকপশিং অসি অথুবদা লোইররোই হায়না গৃহ মন্ত্রীনা হায়খি। মহাক্না হায়খি মদুদি লান্মীশিং অসিনা কত্থোকখিবা অসিনা মরম ওইদুনা লৈবাক অসিগী ঙাক-শেনবা ফংলগনি অমসুং 2047 ফাওবদা ভারতনা চাউখৎলবা লৈবাক অমা ওইরক্লগনি। মহাক্না মখা তারদুনা হায়খি মদুদি লৈবাক অসিনা নীংতম্বা চহী 100 শুরকপদা থৌনা ফরবা জৱানশিং অসিগী কত্থোকপশিং অসি মতম পুম্নমক্তা নীংশিংদুনা লৈগনি।
***