মন্ত্রী-মন্দলদা ঐগী মরুপ ওইরিবা জ্যোতিতাদিত্য সিন্ধিয়াজী, চন্দ্রসেখরজী, ITUগী সেক্রেতরী-জেনরেল, লৈবাক কয়াগী মন্ত্রীশিং, ভারতকী তোঙান-তোঙানবা রাজ্যশিংগী মন্ত্রী পুম্নমক, ইন্দস্ত্রী লিদরশিং, তেলিকোম এক্সপর্তশিং, স্তার্তঅপশিংগী লমদগী লাক্লিবা ঐগী নহা ওইরিবা মরুপশিং, লৈবাক অসিগী অমদি মালেমগী অতৈ দিগনিতরীশিং, নুপী অমদি নুপাশিং,

ইন্দিয়া মোবাইল কংগ্রেসতা লৈবাক অসিগী অমদি মালেমগী লাকপীরিবা পুম্নমকপু তরাম্না ওকচরি! ঐহাক্না ইন্তর্নেস্নেল তেলিকোম য়ুনিয়ন – ITUগী মরুপশিংবু অখন্ননা তরাম্না ওকচরি। নখোয়না WTSAগীদমক অহানবা ওইনা ভারতপু খনবিরি। নখোয়বু তৌবিমল খঙবা অমসুং থাগৎপা ফোংদোকচরি।

মরুপশিং,

ঙসি ভারত অসি তেলিকোম অমসুং মরী লৈনবা তেক্নোলোজীদা মালেমগী খ্বাইদগী খুমাং চাউশিল্লিবা লৈবাকশিংগী মনুংদা অমা ওইরি। ভারত্তা মোবাইল ফোন য়ুজর করোর 120 নত্ত্রগা মিলিয়ন 1200 লৈ। ভারত্তা ইন্তর্নেৎ য়ুজর করোর 95 নত্ত্রগা মিলিয়ন 950 লৈ। ভারত্তা মালেমগী রিএল তাইম দিজিতেল ত্রাঞ্জেক্সনশিংগী চাদা 40 হেন্না পাংথোক্লি। ভারতনা লাস্ত মাইল দেলিভরীগীদমক খ্বাইদগী ফবা খুৎলাই অমা ওইনা দিজিতেল কন্নেক্তিবিতী উৎখি। গ্লোবেল তেলিকম্ম্যুনিকেসগী স্তেন্দর্দশিং অমসুং তুংলমচৎগী খন্ন-নৈনদধনা গ্লোবেল গুদকী মেদিয়মসু ওইরগনি। ঐহাক্না পুম্নমক্তা য়াইফ পাউজেল পীজরি।

মরুপশিং,

WTSA অমসুং ইন্দিয়া মোবাইল কংগ্রেস অসি পুন্না পাংথোকপা অসিসু য়াম্না মরু ওই। WTSAগী পান্দমদি গ্লোবেল স্তেন্দর্দশিংদা থবক তৌবনি। অমরোমদা ইন্দিয়া মোবাইল কংগ্রেসনা সর্ভিসেস্তা থবক তৌবদা অচৌবা থৌদাং লৌরি। মরম অসিনা ঙসিগী থৌরম অসিনা স্তেন্দর্দশিং অমসুং সর্ভিসশিংবু চপ মান্নবা প্লেৎফোর্ম অমদা পুরক্লি। ঙসি ভারতনা ক্বালিতী সর্ভিসশিংদা মীৎয়েং থম্মি। ঐখোয়গী স্তেন্দর্দশিংদা ঐখোয়নসু অখন্নবা মীৎয়েং থম্মি। অসিগুম্বা ফীভম অমদা WTSAগী এক্সপরিয়েন্সনা ভারত্তা অনৌবা শক্তি অমা পীরগনি।

মরুপশিং,

WTSAনা কনসেন্সসকী খুত্থাংদা মালেম পুম্ববু এম্পাৱর তৌনবা হায়রি। ইন্দিয়া মোবাইল কংগ্রেসনা কন্নেক্তিবিতীগী খুত্থাংদা মালেম পুম্ববু এম্পাৱর তৌনবা হায়রি। মসিনা হায়বদি কনসেন্সস অমসুং কন্নেক্তিবিতী অসি থৌরম অসিদা পুন্না লিঙ্ক তৌরি। ঙসিগী নুংঙাইনদবনা থল্লবা মালেম অসিদা অনিমক অসি কয়া য়াম্না মরু ওইবগে হায়বা নখোয়না খঙলি। ভারতনা চহি লিশিং কয়াদগী বসুধৈব কুতুম্বকমগী অমর ওইরবা পাউজেল অসি শন্দোক্তুনা  লাক্লি। ঐখোয়না G-20 লমজিংনবা খুদোংচাবা ফংখিবা মতমদা ঐখোয়না ৱান আর্থ, ৱান ফেমিলী, ৱান ফ্যুচরগী পাউজেল পী। ভারতনা নুংঙাইনদবা কোকহন্দুনা মালেমবু কন্নেক্ত তৌবগী থবক তৌরি। অরিবা সিল্ক রুততগী ঙসিগী তেক্নোলোজী রুত অসি ফাওবা ভারতকী মতম চুপ্পদা পান্দম অমা খক্তা লৈখি -  মালেমবু কন্নেক্ত তৌবা অমসুং চাউখৎপগী অনৌবা লম্বীশিং হাংদোকপা। অসিগুম্বা ফীভম অমদা WTSA অমসুং IMCগী পার্তনরশিপ অসি ইথিল পীনীংঙাই ওইরি অমসুং ফজরবা পাউজেল ওইরি। লোকেল অমসুং গ্লোবেল পুনশিল্লবা মতমদা লৈবাক অমা খক্তা নত্তনা মালেম পুম্বনা মদুদগী কান্নবা ফংই অমসুং মসি ঐখোয়গী পান্দমনি

মরুপশিং,

21শুবা চহিচাদা ভারতকী মোবাইল অমসুং তেলিকোমগী খোঙচৎ  অসি মালেম পুম্বগী নৈন্নবা হিরম অমা ওইরি। মালেম অসিদা মোবাইল অমসুং তেলিকোম অসি ফেসিলিতী অমা ওইনা উরি। অদুবু ভারতকী মোদেল অসিদি খরা মখৈ খেন্নরি। ভারত্তা ঐখোয়না তেলিকোম অসি শুপ্নগী কন্নেক্তিবিতীগী মেদিয়ম অমা ওইবতা নত্তনা ইক্বিতী অমসুং খুদোংচাবগী মেদিয়ম অমসু ওইখি। ঙসি মেদিয়ম অসিনা খুঙ্গংশিং অমসুং সহরশিং, ইনাক খুনবা অমসুং লায়রবশিংগী মরক্তা লৈরিবা খেন্নবা অসি কোকহনবদা  মতেং পাংলি। ঐহাক্না নীংশিংলি, চহি তরাগী মমাংদা ঐহাক্না লৈবাক  অসিদা দিজিতেল ইন্দিয়াগী ভিজন পুথোকখি। মদুদা ঐহাক্না মচেৎ-মচেৎকী মহুৎ হোলিস্তিক এপ্রোচ অমগা লোয়ননা চংশিনবা মথৌ তাই হায়খি। ঐখোয়না দিজিতেল ইন্দিয়াগী য়ুম্বী মরি মশক খঙদোকখি। অহানবা – দিভাইসকী মমল হন্থহনবা।  অনিশুবা – দিজিতেল কন্নেক্তিবিতীনা লৈবাক অসিগী কাচিন কোয়া শিনবা থুংনা য়ৌহনবা। অহুমশুবা – দেতা অসি মীপুম খুদিংমক্তা ফংহনবা। অমসুং মরিশুবদা ঐখোয়গী পান্দম অসি ‘দিজিতেল ফার্স্ত’ অসিনা ওইবা। ঐখোয়না অমুক্তংদা য়ুম্বী মরি অসিদা থবক তৌবা হৌখি অমসুং ঐখোয়না ফলশিংসু ফংলে।

মরুপশিং,

ঐখোয়গী ফোনশিং অসি ভারত্তা ঐখোয়না মেন্যুফেকচর তৌবা হৌদ্রিবা ফাওবা হোংনা ফংলোই। 2014দা ভারত্তা মেন্যুফেকচরিং য়ুনিৎ অনি খক্তা লৈরমখি ঙসিদি মসি 200 হেন্না লৈরে। মমাংদা ঐখোয়না মপালদগী ফোনশিং অয়াম্বনা ইম্পোর্ত তৌরমখি। ঙসি ঐখোয়না মমাংদগী ভারত্তা মোবাইল ফোন শরুক তরুক হেন্না মেন্যুফেকচর তৌরি, ঐখোয়বু মোবাইল এক্সপোর্তিং কন্ত্রী ওইনা খঙনরি। অমসুং ঐখোয়না মসিদা লেপ্পোই। হৌজিক ঐখোয়না মালেমদা চিপতগী হৌরগা ফিনিশ প্রদক্তশিং ফাওবা মপুং ফানা মেদ ইন ইন্দিয়া ফোন পীবগী থবক তৌরি। ঐখোয়না ভারত্তা সেমিকন্দক্তর ইকোসিস্তেমদা চাউনা ইনভেস্তমেন্তশিংসু তৌরি।

মরুপশিং,

কন্নেক্তিবিতীগী য়ুম্বীদা থবক পায়খৎপগা লোয়ননা ঐখোয়না ভারত্তা লৈরিবা য়ুমথোং খুদিংমক কন্নেক্ত তৌনবা হোৎনরি। ঐখোয়না লৈবাক অসিগী কাচিন কোয়া খুদিংমক্তা মোবাইল তাৱরশিংগী মপাঙ্গল কনবা নেৎৱার্ক অমা শেমগৎলি। ঐখোয়গী ত্রাইবেলগী মফমশিং, চীংগী মফমশিং, ঙমখৈগী মফমশিংদা অতেনবা মতমগী মনুংদা মোবাইল তাৱর লিশিং কয়া ইনস্তোল তৌখি। ঐখোয়না রেলৱে স্তেসনশিং অমসুং অতৈ মীয়াম তিনবা মফমশিংদা ৱাই-ফাই ফেসিলিতীশিং ফংহনখি। ঐখোয়না অন্দর-সী কেবলশিংগী খুত্থাংদা অন্দামান অমসুং নিকোবর অমসুং লক্ষদ্বীপগুম্বা ইথৎশিং শম্নহনখি। চহি তরাগী মনুংদা ভারতনা তিংখিবা ওপ্তিকেল ফাইবরগী অশাংবা অসি পৃথিবী অমসুং থাগী মরক্তা লৈরিবা অরাপ্পা অসিগী শরুক নিপান য়ৌখি! ঐহাক্না ভারতকী খোঙজেলগী খুদম অমগা পীজগে। চহি অনিগী মমাংদা ঐখোয়না মোবাইল কংগ্রেস অসিমক্তদা 5G লোঞ্চ তৌখি। ঙসি ভারতকী জিলা অয়াম্বা 5G সর্ভিসশিংনা শমহন্নবা ঙমলে। ঙসি ভারতনা মালেমদা অনিশুবা খ্বাইদগী চাউবা 5G মার্কেৎ ওইরে। অমসুং ঐখোয়না হৌজিক 6G তেক্নোলোজীদা থুনা থবক পায়খৎলি।

মরুপশিং,

তেলিকোম সেক্তরদা ভারতনা পুরকখিবা রিফোর্মশিং অমসুং ইন্নোভেসনশিং অসি অঙকপা অমসুং অমুক্তা ওইখিদ্রিবা ওইরি। মসিনা দেতাগী মমল চাউনা হন্থহনবা ঙমখি। ঙসি ভারত্তা ইন্তর্নেৎ দেতাগী মমল অসি GBদা সেন্ত 12  রোম ওইরি। মালেমগী অতৈ লৈবাক কয়াদা GBঅমদা মসিদগী শরুক 10দগী 20 হেন্না তাংলি। ঙসি ভারত মচা খুদিংমক্না থা অমদা দেতা 30GB শীজিন্নরি।

মরুপশিং,

ঐখোয়গী মরিশুবা য়ুম্বী হায়বদি দিজিতেল ফার্স্ত হায়বা ৱাখল্লোন অসিনা খোঙথাং পুম্নমক অসি অনৌবা থাক অমদা পুখৎখি। ভারতনা দিজিতেল তেক্নোলোজী দেমোক্রেতাইজ তৌখি। ভারতনা দিজিতেল প্লেৎফোর্মশিং শেমখি অমসুং প্লেৎফোর্মশিং অসিদা তৌবা ইন্নোভেসনশিংনা অনৌবা খুদোংচাবা কয়া শেমখি। জন ধন, আধার, অমসুং মোবাইলগী JAM ত্রিনিতীনা অনৌবা ইন্নোভেসনশিংগীদমক য়ুম্ফম থোনখি। য়ুনিফাইদ পেমেন্তস ইন্তরফেস – UPIনা অনৌবা কম্পনীশিংদা অনৌবা খুদোংচাবশিং পীখি। হৌজিক ONDCগী মতাংদা মান্ননা খন্ননৈনরি।  ONDC দগী দিজিতেল কম্মর্সতা অনৌবা রিভোল্যুসন অমা লাক্কদৌরি। ঐখোয়গী দিজিতেল প্লেৎফোর্মশিংনা করম্না কোরোনাগী মতমদা করম্না থবক খুদিংমক লায়থোকহনখিবগে হায়বা উবা ফংখ্রে। লায়রবদা শেল তাবা, কোরোনা লাকশিন্নবা থবক তৌরিবা কর্মচারীশিংদা রিএল তাইম গাইদলাইনশিং থাবা, ভেক্সিনেসন প্রোসেস স্ত্রীমলাইন তৌবা, ভেক্সিনগী দিজিতেল সর্তিফিকেৎ পীবা ওইরবসু ভারত্তা পুম্নমক য়াম্না লায়না পাংথোকপা ঙমহনখি। ঙসি ভারত্তা দিজিতেল বুকে অমা লৈ মসিনা মালেমদা য়াইফ থৌরাংগী স্কিমশিংগী অনৌবা পনখৈ অমা পীরি। মরম অসিনা G-20 প্রসিদেন্সী মনুংদা ভারতনা দিজিতেল পব্লিক ইনফ্রাস্ত্রকচরগী মতাংদা মীৎয়েং চীংশিনখি। অমসুং ঙসি অমুক হন্না ঐহাক্না ফোংদোকচরি মদুদি ভারতনা লৈবাক পুম্নমক্কা লোয়ননা DPIগা মরী লৈনবা মাগী এক্সপরিয়েন্স অমসুং লৌশিং শিয়র তৌবদা নুংঙাইবা পোকচগনি।

মরুপশিং,

WTSAদা নেৎৱার্ক ওফ ৱুমেন ইনিসিএতিবকী মতাংদা খন্ন-নৈনবা অমসু পাংথোক্কদৌরি। মসি য়াম্না মরু ওইবা হীরম অমনি। ভারতনা নুপীনা লমজিংবা চাউখৎ-থৌরাং অসিবু য়াম্না মরু ওইনা লৌদুনা থবক পায়খৎলি। G-20 প্রসিদেন্সী মনুংদসু ঐখোয়না মসিগী ফিরেপ অসি মাংদা পুখৎখি। তেক্নোলোজী সেক্তর ইনক্লুসিব ওইহন্দুনা তেক্নোলোজী প্লেৎফোর্মশিংগী খুত্থাংদা নুপীবু এম্পাৱর তৌরি, ভারতনা মসিগী পান্দম অসিদা থবক তৌরি। নখোয়না উবা ফংখ্রে করম্না ঐখোয়গী নুপী সাইন্তিস্তশিংনা ঐখোয়গী স্পেস মিসনশিংদা অচৌবা থৌদাং লৌবগে।ঐখোয়গী স্তার্তঅপশিংদা লৈরিবা নুপী কো-ফাউন্দরশিংগী মশিং অসি লেপ্পা লৈতনা হেনগৎলক্লি। ঙসি ঐখোয়গী ইচানুপীশিংগী চাদা 40 হেনবনা ভারতকী STEM এজুকেসনদা শরুক তম্মি। ঙসি ভারতনা তেক্নোলোজী লীদরশিপতা নুপীশিংগীদক খুদোংচাবশিং হেন্না হেন্না শেম্মি। নখোয়না সরকারগী নমো দ্রোন দিদি প্রোগ্রামগী মতাংদা তারমলগনি। মসি লৌউ-শিংউদা দ্রোন রিভোল্যুসন প্রমোৎ তৌনবা প্রোগ্রাম অমনি। কেম্পেন অসি ভারতকী খুঙ্গংশিংগী নুপীশিংনা লমজিংখি। ঐখোয়না য়ুম খুদিংমক্তা দিজিতেল বেঙ্কিং অমসুং দিজিতেল পেমেন্তশিং য়ৌহন্নবা বেঙ্ক সখি প্রোগ্রামসু চত্থখি। হায়বদি নুপীশিংনা দিজিতেল এৱেরনেস প্রোগ্রামসু লমজিংলি। আশা অমসুং অঙ্গনৱাদি ৱার্করশিংনা ঐখোয়গী প্রাইমারি হেল্থকিয়র, মেতর্নিতী অমসুং চাইল্দ কিয়রদা য়াম্না মরু ওইবা থৌদাং অমা লৌরি। ঙসি ৱার্করশিং অসিনা তেবশিং অমসুং এপ্রশিংগী খুত্থাংদা থবক পুম্নমক ত্রেক তৌরি। ঐখোয়না নুপীশিংগীদমক মহিলা ই-হাত প্রোগ্রামসু চত্থরি। মসি নুপী ওন্তপ্রিনোরশিংগী ওনলাইন মার্কেতিং প্রোগ্রাম অমনি। হায়বদি অসিগুম্বা তেক্নোলোজীদা ভারতকী  খুঙ্গং খুদিংমক্কী নুপীশিংনা তৌরিবা অসি অঙকপা ওইরি। লাক্কদৌরিবা মতমদা ঐখোয়না মসিগী স্কোপ অসি হেন্না হেনগৎহনগনি। ইচানুপী খুদিংমক্না  তেক লীদর ওইবা অদুগুম্বা ভারত অমগী মঙলান ঐহাক্না মঙলি।

মরুপশিং,

G-20গী প্রসিদেন্সীগী মতমদা ভারতনা মালেমগী মমাংদা য়াম্না মরু ওইবা ৱাফম অমা পুখৎখি। WTSAগুম্বা মালেমগী ওইবা প্লেৎফোর্ম অমগী মমাংদা ঐহাক্না ৱাফম অসি পুখৎপা পাম্মি। ইশু অসি দিজিতেল তেক্নোলোজীগী মালেমগী ফ্রেমৱার্ক, মালেমগী গাইদলাইনশিংনি। হৌজিক মালেমগী ইন্সতিত্যুসনশিংনা মালেমগী লৈঙাক্লোনগীদমক মসিগী মরুওইবা অসি খঙমিন্নবগী মতম ওইরে। তেক্নোলোজীগীদমক্তা মালেমগী থাক্তা তৌগদবা অমসুং তৌরোইদবশিং পাংথোক্কদবনি। ঙসি ফংলিবা দিজিতেলগী খুৎলাইশিং অমসুং এপ্লিকেসনশিং অসি লৈবাক অমহেক্তগী ঙমখৈদগী হেন্দোক্তুনা অথিংবা লৈতে। মরম অদুনা, লৈবাক অমত্তনা সাইবরগী খুদোংথীবশিংদগী মখোয়গী প্রজাশিংবু ঙাকথোকপা ঙম্লোই। মসিগীদমক ঐখোয়না পুন্না থবক তৌমিন্নবা তাই, মালেমগী ইন্সতিত্যুসনশিংনা মাংলোমদা চংশিনবা তাই অমসুং থৌদাং লৌবা তাই। ঐখোয়না ঐখোয়গী এক্সপরিয়েন্স অসি খঙই, ঐখোয়না এভিএসন সেক্তরগীদমক মালেমগী ওইবা কাংলোন অমসুং রিগুলেসনগী ফ্রেমৱার্ক অমা শেমখিবগুম্না, দিজিতেলগী মালেমদসু অসিগুম্বা ফ্রেমৱার্ক অমা মথৌ তাই। অমসুং মসিগীদমক্তা, WTSAনা হেন্না এক্তিব ওইনা থবক তৌগদবনি। ঐহাক্না WTSAগী মেম্বর খুদিংমকপু তেলিকম্ম্যুনিকেসনবু মীপুম খুদিংমক্কীদমক মতৌ করম্না সেফ ওইহনগদগে হায়বগী মতাংদা খন্ননবা হায়জনীংই। ইন্তর-কন্নেক্তেদ মালেম অসিদা, সেক্যুরিতী অসি অকোনবা ৱাখল্লোন অমা ওইবা য়ারোই। ভারতকী দেতা প্রোতেক্সন এক্ত অমসুং নেস্নেল সাইবর সেক্যুরিতী স্ত্রেতেজীনা সেফ দিজিতেল ইকোসিস্তেম অমা শেমগৎপদা ঐখোয়গী ফিরেপ অদু উৎলি। ঐহাক্না এসেমব্লী অসিগী মেম্বরশিংদা ইনক্লুসিব, সেক্যুর অমসুং তুংলমচৎকী শিংনবা খুদিংমক্তা এদাপ্তেবল ওইবা স্তেন্দর্দশিং শেম্নবা হায়জনীংই। তোঙান-তোঙানবা লৈবাকশিংগী মখল-মখা কয়াবুসু ইকায় খুম্নবা ইথিকেল এ.আই. অমসুং দেতা প্রাইভেসীগীদমক মালেমগী থাকশিং শেম্বা।

মরুপশিং,

ঙসিগী তেক্নোলোজীগী রিভোলুসন অসিদা তেক্নোলোজীদা হ্যুমেন সেন্ত্রিক দাইমেন্সনশিং পীনবা ঐখোয়না লেপ্পা লৈতনা হোৎনবা অসি য়াম্না মরু ওই। মসিগী রিভোলুসন অসি রেস্পোন্সিবল অমসুং তুং কোইনা চৎনহনবগী থৌদাং অসি ঐখোয়গীনি। ঙসি ঐখোয়না থম্লিবা থাকশিং অসিনা ঐখোয়গী তুংলমচৎকী মায়কৈ অদু লেপকনি। মরম অদুনা, সেক্যুরিতী, দিগ্নিতি অমসুং ইক্বিতিগী প্রিন্সিপলশিং অসি ঐখোয়গী খন্ন-নৈনবগী মরু ওইবা ওইনা লৈগদবনি। ঐখোয়গী পান্দমদি দিজিতেলগী মতম অসিদা লৈবাক অমত্তা, লমদম অমত্তা অমসুং কম্ম্যুনিতী অমত্তা নাথৈদুনা থমলোইদবনি। ঐখোয়গী তুংলমচৎ অসি তেক্নিকেল ওইনা মপাঙ্গল লৈবগা লোয়ননা ইথিক্সকী মতাংদসু অচুম্বা ওইহন্নবা ঐখোয়না হোৎনগদবনি। ঐখোয়গী তুংলমচৎ অসিদা ইন্নোভেসন অমসুং ইনক্লুজন লৈগদবনি।

মরুপশিং,

WTSA মায়পাক্নবগীদমক ঐহাক্না য়াইফ-মঙ্গোল পীজরি, ঐহাক্না নখোয়দা ঐগী সপ্পোর্ত পীজরি। নখোয় পুম্নমক্তা ঐহাক্না য়াইফ-মঙ্গোল পীজরি! হন্না-হন্না থাগৎচরি!

***