മന്ത്രിസഭയിലെ എന്റെ സഹപ്രവർത്തകരായ ജ്യോതിരാദിത്യ സിന്ധ്യ ജി, ഐടിയുവിൻ്റെ സെക്രട്ടറി ജനറൽ ചന്ദ്രശേഖർ ജി, വിവിധ രാജ്യങ്ങളിൽ നിന്നുള്ള മന്ത്രിമാർ, ഭാരതത്തിൻ്റെ വിവിധ സംസ്ഥാനങ്ങളിൽ നിന്നുള്ള മന്ത്രിമാർ, വ്യവസായ പ്രമുഖർ, ടെലികോം വിദഗ്ധർ, സ്റ്റാർട്ടപ്പ് ലോകത്തെ യുവസംരംഭകർ, ഇന്ത്യയിലും വിദേശത്തുമുള്ള വിശിഷ്ടാതിഥികൾ, മഹതികളെ മാന്യന്മാരെ,

ഇന്ത്യ മൊബൈൽ കോൺഗ്രസിലേക്ക് നിങ്ങൾക്കെല്ലാവർക്കും ഊഷ്മളമായ സ്വാഗതം! ഇൻ്റർനാഷണൽ ടെലികോം യൂണിയനിൽ (ITU) നിന്നുള്ള സഹപ്രവർത്തകർക്ക് ഒരു പ്രത്യേക സ്വാഗതം അറിയിക്കാനും ഞാൻ ആഗ്രഹിക്കുന്നു. നിങ്ങൾ ആദ്യമായി ഡബ്ല്യുടിഎസ്എയ്ക്ക് ഭാരതം തിരഞ്ഞെടുത്തു. എനിക്ക് നിങ്ങളോട് കൃതജ്ഞതയുണ്ട്, നിങ്ങളുടെ തീരുമാനത്തെ ഞാൻ അഭിനന്ദിക്കുന്നു.

സുഹൃത്തുക്കളേ,

ഇന്ന്, ടെലികോം മേഖലയിലും അനുബന്ധ സാങ്കേതിക വിദ്യകളിലും ലോകത്ത് ഏറ്റവും കൂടുതൽ സംഭവങ്ങൾ നടക്കുന്ന രാജ്യങ്ങളിലൊന്നാണ് ഭാരതം. 120 കോടി അല്ലെങ്കിൽ 1200 ദശലക്ഷം മൊബൈൽ ഫോൺ ഉപയോക്താക്കളുള്ള ഭാരതം. 95 കോടി അല്ലെങ്കിൽ 950 ദശലക്ഷം ഇൻ്റർനെറ്റ് ഉപയോക്താക്കളുള്ള ഭാരതം. ലോകത്തെ 40 ശതമാനത്തിലധികം തത്സമയ ഡിജിറ്റൽ ഇടപാടുകൾ നടക്കുന്ന ഭാരതം. ഡിജിറ്റൽ കണക്റ്റിവിറ്റിയെ ലാസ്റ്റ് മൈൽ ഡെലിവറിക്ക് ഫലപ്രദമായ ഉപകരണമാക്കി മാറ്റിയ ഭാരതം. ആഗോള ടെലികമ്മ്യൂണിക്കേഷൻ മാനദണ്ഡങ്ങളും ഭാവിയും ഇവിടെ ചർച്ച ചെയ്യുന്നത് ആഗോള നന്മയ്ക്കുള്ള ഒരു മാധ്യമമായിരിക്കും. നിങ്ങൾക്കെല്ലാവർക്കും ഞാൻ എൻ്റെ ആശംസകൾ നേരുന്നു.

സുഹൃത്തുക്കളേ,

ഡബ്ല്യുടിഎസ്എയും ഇന്ത്യ മൊബൈൽ കോൺഗ്രസും ഒരുമിച്ചാണ് നടക്കുന്നത് എന്നതും ശ്രദ്ധേയമാണ്. ആഗോള നിലവാരത്തിൽ പ്രവർത്തിക്കുക എന്നതാണ് ഡബ്ല്യുടിഎസ്എയുടെ ലക്ഷ്യം. അതേസമയം, ഇന്ത്യ മൊബൈൽ കോൺഗ്രസ് സേവനങ്ങളിൽ പ്രധാന പങ്ക് വഹിക്കുന്നു. അതിനാൽ, ഇന്നത്തെ പരിപാടി, മാനദണ്ഡങ്ങളും സേവനങ്ങളും ഒരുമിച്ച് ഒരു പ്ലാറ്റ്‌ഫോമിൽ കൊണ്ടുവന്നിരിക്കുന്നു. ഭാരതം ഇപ്പോൾ ഗുണനിലവാരമുള്ള സേവനങ്ങളിൽ വളരെയധികം ശ്രദ്ധ കേന്ദ്രീകരിക്കുന്നു. നാം നമ്മുടെ മാനദണ്ഡങ്ങൾക്ക് ഊന്നൽ നൽകുകയും ചെയ്യുന്നു. ഈ സാഹചര്യത്തിൽ, ഡബ്ല്യുടിഎസ്എയുടെ അനുഭവം ഭാരതത്തിന് പുതിയ ഊർജ്ജം പകരും.

സുഹൃത്തുക്കളേ,

സമവായത്തിലൂടെ ലോകത്തെ ശാക്തീകരിക്കുന്നതിനെക്കുറിച്ച് ഡബ്ല്യുടിഎസ്എ സംസാരിക്കുന്നു. കണക്റ്റിവിറ്റിയിലൂടെ ലോകത്തെ ശാക്തീകരിക്കുന്നതിനെക്കുറിച്ച് ഇന്ത്യ മൊബൈൽ കോൺഗ്രസ് സംസാരിക്കുന്നു. ഈ സാഹചര്യത്തിൽ, സമവായവും കണക്റ്റിവിറ്റിയും ഒരുമിച്ച് വരുന്നു. ഇന്ന് സംഘർഷങ്ങൾ നിറഞ്ഞ ഒരു ലോകത്തിന് ഇവ രണ്ടും എത്ര പ്രധാനമാണെന്ന് നിങ്ങൾ മനസ്സിലാക്കുന്നു. "വസുധൈവ കുടുംബകം" (ലോകം ഒരു കുടുംബം) എന്ന അനശ്വര സന്ദേശം അനുസരിച്ചാണ് ആയിരക്കണക്കിന് വർഷങ്ങളായി ഭാരതം ജീവിക്കുന്നത്. ജി-20യെ നയിക്കാൻ അവസരം ലഭിച്ചപ്പോൾ, "ഒരു ഭൂമി, ഒരു കുടുംബം, ഒരു ഭാവി" എന്ന സന്ദേശവും ഞങ്ങൾ മുന്നോട്ടുവച്ചു. ലോകത്തെ ബന്ധിപ്പിക്കുന്നതിനും സംഘർഷങ്ങൾ പരിഹരിക്കുന്നതിനും ഭാരതം പ്രതിജ്ഞാബദ്ധമാണ്. പുരാതന സിൽക്ക് റോഡ് മുതൽ ഇന്നത്തെ സാങ്കേതിക മാർ​​ഗങ്ങൾ വരെ, ഭാരതത്തിൻ്റെ ദൗത്യം എല്ലായ്‌പ്പോഴും ഒന്നുതന്നെയാണ്: ലോകത്തെ ബന്ധിപ്പിക്കുകയും പുരോഗതിയുടെ പുതിയ പാതകൾ തുറക്കുകയും ചെയ്യുക. ഈ സാഹചര്യത്തിൽ, ഡബ്ല്യുടിഎസ്എയും ഐഎംസിയും തമ്മിലുള്ള പങ്കാളിത്തം പ്രചോദനാത്മകവും മികച്ചതുമായ ഒരു സന്ദേശം നൽകുന്നു. പ്രാദേശികവും ആഗോളവും ഒരുമിച്ച് ചേരുമ്പോൾ, അത് ഒരു രാജ്യത്തിന് മാത്രമല്ല, മുഴുവൻ ലോകത്തിനും പ്രയോജനകരമാണ്. ഇതാണ് ഞങ്ങളുടെ ലക്ഷ്യം.

സുഹൃത്തുക്കളേ,

ഇരുപത്തിയൊന്നാം നൂറ്റാണ്ടിൽ ഭാരതത്തിൻ്റെ മൊബൈൽ, ടെലികോം മുന്നേറ്റങ്ങൾ ലോകമെമ്പാടും പഠന വിഷയമാണ്. ആഗോളതലത്തിൽ മൊബൈലിനെയും ടെലികോമിനെയും ഒരു സൗകര്യമായാണ് കണക്കാക്കിയിരിക്കുന്നത്. എന്നാൽ ഭാരതത്തിൻ്റെ മാതൃക വ്യത്യസ്തമായിരുന്നു. ഭാരതത്തിൽ, ടെലികോമിനെ കണക്റ്റിവിറ്റിയുടെ ഒരു ഉപാധിയായി മാത്രമല്ല, തുല്യതയുടെയും അവസരങ്ങളുടെയും മാധ്യമമായാണ് നാം കണ്ടത്. ഗ്രാമങ്ങളും നഗരങ്ങളും സമ്പന്നരും ദരിദ്രരും തമ്മിലുള്ള വിടവ് നികത്താൻ ഈ മാധ്യമം സഹായിക്കുന്നു. 10 വർഷം മുമ്പ് ഡിജിറ്റൽ ഇന്ത്യ എന്ന കാഴ്ചപ്പാട് രാജ്യത്തിന് മുന്നിൽ അവതരിപ്പിച്ചപ്പോൾ ഞാൻ പറഞ്ഞത് നമ്മൾ പല പല ഭാ​ഗങ്ങളായല്ല, സമഗ്രമായ സമീപനത്തോടെയാണ് പ്രവർത്തിക്കേണ്ടതെന്ന്. ഡിജിറ്റൽ ഇന്ത്യയുടെ നാല് തൂണുകൾ ഞങ്ങൾ തിരിച്ചറിഞ്ഞു. ഒന്നാമതായി, ഉപകരണങ്ങളുടെ വില കുറവായിരിക്കണം. രണ്ടാമതായി, ഡിജിറ്റൽ കണക്റ്റിവിറ്റി രാജ്യത്തിൻ്റെ എല്ലാ കോണുകളിലും എത്തണം. മൂന്നാമതായി, ഡാറ്റ എല്ലാവർക്കും ലഭ്യമാകുന്നതായിരിക്കണം. നാലാമതായി, നമ്മുടെ ലക്ഷ്യം ‘ഡിജിറ്റൽ ഫസ്റ്റ്’ ആയിരിക്കണം. നമ്മൾ നാല് തൂണുകളിലും ഒരേസമയം പ്രവർത്തിക്കാൻ തുടങ്ങി, അതിൻ്റെ ഫലം നമ്മൾ കണ്ടു.

സുഹൃത്തുക്കളേ,

നമ്മൾ ഭാരതത്തിൽ ഫോണുകൾ ഉത്പ്പാദിപ്പിക്കാൻ തുടങ്ങുന്നതുവരെ  ഇത് നമുക്ക് താങ്ങാനാകുമായിരുന്നില്ല. 2014ൽ ഭാരതത്തിൽ രണ്ട് മൊബൈൽ നിർമാണ യൂണിറ്റുകൾ മാത്രമാണുണ്ടായിരുന്നതെങ്കിൽ ഇന്ന് 200ൽ അധികം നിർമാണ യൂണിറ്റുകളാണുള്ളത്. മുമ്പ്, നമ്മൾ മിക്ക ഫോണുകളും ഇറക്കുമതി ചെയ്യാറുണ്ടായിരുന്നു, എന്നാൽ ഇപ്പോൾ നമ്മൾ ഭാരതത്തിൽ ആറിരട്ടി ഫോണുകൾ നിർമ്മിക്കുന്നു, നമ്മൾ ഒരു മൊബൈൽ കയറ്റുമതിക്കാരായി അംഗീകരിക്കപ്പെട്ടിരിക്കുന്നു. എന്നാൽ നാം അവിടെ നിർത്തിയില്ല. ഇപ്പോൾ, ചിപ്പുകൾ മുതൽ പൂർത്തിയായ ഉൽപ്പന്നങ്ങൾ വരെ, ലോകത്തിന് പൂർണ്ണമായും മെയ്ഡ്-ഇൻ-ഇന്ത്യ ഫോൺ നൽകുന്നതിനായി നാം പ്രവർത്തിക്കുന്നു. ഭാരതത്തിലെ അർദ്ധചാലക ആവാസവ്യവസ്ഥയിലും നമ്മൾ ഗണ്യമായ നിക്ഷേപം നടത്തുന്നു.

സുഹൃത്തുക്കളേ,

കണക്ടിവിറ്റിയുടെ തൂണുകളിൽ പ്രവർത്തിക്കുമ്പോൾ, ഭാരതത്തിലെ എല്ലാ വീടുകളും കണക്ടു ചെയ്‌തിരിക്കുന്നുവെന്ന് ഞങ്ങൾ ഉറപ്പാക്കിയിട്ടുണ്ട്. രാജ്യത്തുടനീളം മൊബൈൽ ടവറുകളുടെ ശക്തമായ ശൃംഖല ഞങ്ങൾ നിർമ്മിച്ചിട്ടുണ്ട്. ആദിവാസി മേഖലകളിലും മലയോര മേഖലകളിലും അതിർത്തി പ്രദേശങ്ങളിലും ചുരുങ്ങിയ സമയത്തിനുള്ളിൽ ആയിരക്കണക്കിന് മൊബൈൽ ടവറുകൾ സ്ഥാപിച്ചു. റെയിൽവേ സ്റ്റേഷനുകളിലും മറ്റ് പൊതു സ്ഥലങ്ങളിലും ഞങ്ങൾ വൈഫൈ സൗകര്യം ഒരുക്കിയിട്ടുണ്ട്. ആൻഡമാൻ-നിക്കോബാർ, ലക്ഷദ്വീപ് തുടങ്ങിയ ദ്വീപുകളെ ഞങ്ങൾ കടലിനടിയിലെ കേബിളുകൾ വഴി ബന്ധിപ്പിച്ചിരിക്കുന്നു. വെറും 10 വർഷത്തിനുള്ളിൽ ഭാരതം ഭൂമിയും ചന്ദ്രനും തമ്മിലുള്ള ദൂരത്തിൻ്റെ എട്ട് മടങ്ങ് ദൂരം ഒപ്റ്റിക്കൽ ഫൈബർ സ്ഥാപിച്ചു! ഭാരതത്തിൻ്റെ വേഗതയുടെ ഒരു ഉദാഹരണം പറയാം. രണ്ട് വർഷം മുമ്പ് മൊബൈൽ കോൺഗ്രസിൽ ഞങ്ങൾ 5G അവതരിപ്പിച്ചു. ഇന്ന്, ഭാരതത്തിലെ മിക്കവാറും എല്ലാ ജില്ലകളും 5G സേവനങ്ങളുമായി ബന്ധിപ്പിച്ചിരിക്കുന്നു. ഇന്ന്, ഭാരതം ലോകത്തിലെ രണ്ടാമത്തെ വലിയ 5G വിപണിയായി മാറിയിരിക്കുന്നു, ഞങ്ങൾ ഇപ്പോൾ 6G സാങ്കേതികവിദ്യയിൽ അതിവേഗം പ്രവർത്തിക്കുകയാണ്.

സുഹൃത്തുക്കളേ,

ഭാരതത്തിലെ ടെലികോം മേഖലയിലെ പരിഷ്‌കാരങ്ങളും നവീകരണങ്ങളും സങ്കൽപ്പിക്കാനാവാത്തതും അഭൂതപൂർവവുമാണ്. തൽഫലമായി, ഡാറ്റാ ചെലവ് ഗണ്യമായി കുറഞ്ഞു. ഇന്ന്, ഭാരതത്തിൽ ഇൻ്റർനെറ്റ് ഡാറ്റയുടെ വില ഒരു ജിബിക്ക് ഏകദേശം 12 സെൻ്റാണ്, എന്നാൽ പല രാജ്യങ്ങളിലും ഒരു ജിബി ഡാറ്റയുടെ വില 10 മുതൽ 20 മടങ്ങ് വരെ കൂടുതലാണ്. ഓരോ ഇന്ത്യക്കാരനും പ്രതിമാസം ശരാശരി 30 ജിബി ഡാറ്റ ഉപയോഗിക്കുന്നു.

സുഹൃത്തുക്കളേ,

ഈ ശ്രമങ്ങളെയെല്ലാം നമ്മുടെ നാലാമത്തെ സ്തംഭമായ ‘ഡിജിറ്റൽ ഫസ്റ്റ്’ എന്ന ഊർജ്ജം ഒരു പുതിയ ഉയരങ്ങളിലേക്ക് കൊണ്ടുപോയി.  ഭാരതം ഡിജിറ്റൽ സാങ്കേതികവിദ്യയെ ജനാധിപത്യവൽക്കരിച്ചു. ഞങ്ങൾ ഡിജിറ്റൽ പ്ലാറ്റ്‌ഫോമുകൾ സൃഷ്ടിച്ചു, ഈ പ്ലാറ്റ്‌ഫോമുകളിലെ നൂതനത്വം ദശലക്ഷക്കണക്കിന് പുതിയ അവസരങ്ങൾ സൃഷ്ടിച്ചു. JAM ട്രിനിറ്റി (ജൻ ധൻ, ആധാർ, മൊബൈൽ) നിരവധി നവീകരണങ്ങളുടെ അടിത്തറയായി മാറിയിരിക്കുന്നു. യൂണിഫൈഡ് പേയ്‌മെൻ്റ് ഇൻ്റർഫേസ് (യുപിഐ) നിരവധി പുതിയ കമ്പനികൾക്ക് അവസരങ്ങൾ സൃഷ്ടിച്ചു. ഈ ദിവസങ്ങളിൽ, ONDC (ഓപ്പൺ നെറ്റ്‌വർക്ക് ഫോർ ഡിജിറ്റൽ കൊമേഴ്‌സ്) സമാനമായ രീതിയിൽ ചർച്ച ചെയ്യപ്പെടുന്നു, ഇത് ഡിജിറ്റൽ വാണിജ്യത്തിൽ ഒരു പുതിയ വിപ്ലവം കൊണ്ടുവരും. കൊറോണ മഹാമാരി സമയത്ത്, ഞങ്ങളുടെ ഡിജിറ്റൽ പ്ലാറ്റ്‌ഫോമുകൾ കാര്യങ്ങൾ എങ്ങനെ എളുപ്പമാക്കിയെന്ന് ഞങ്ങൾ കണ്ടു- ആവശ്യമുള്ളവർക്ക് പണം കൈമാറുക, COVID-19 കൈകാര്യം ചെയ്യുന്ന ജീവനക്കാർക്ക് തത്സമയ മാർഗ്ഗനിർദ്ദേശങ്ങൾ അയയ്ക്കുക, വാക്‌സിനേഷൻ പ്രക്രിയ കാര്യക്ഷമമാക്കുക, അല്ലെങ്കിൽ ഡിജിറ്റൽ വാക്‌സിനേഷൻ സർട്ടിഫിക്കറ്റുകൾ നൽകുക എന്നിങ്ങനെ എല്ലാം ഭാരതത്തിൽ സുഗമമായി സംഭവിച്ചു. ക്ഷേമപദ്ധതികളെ ആഗോളതലത്തിൽ പുതിയ ഉയരങ്ങളിലേക്ക് ഉയർത്താൻ കഴിയുന്ന ഒരു ഡിജിറ്റൽ പൂച്ചെണ്ട് ഭാരതത്തിനുണ്ട്. അതുകൊണ്ടാണ് ജി-20 അധ്യക്ഷതയുടെ കാലത്ത് ഭാരതം ഡിജിറ്റൽ പബ്ലിക് ഇൻഫ്രാസ്ട്രക്ചറിന് ഊന്നൽ നൽകിയത്. യുപിഐയുമായി ബന്ധപ്പെട്ട അനുഭവവും അറിവും എല്ലാ രാജ്യങ്ങളുമായും പങ്കിടുന്നതിൽ ഭാരതം സന്തുഷ്ടമാണെന്ന് ഇന്ന് ഞാൻ ആവർത്തിക്കുന്നു.

സുഹൃത്തുക്കളേ,

ഡബ്ല്യുടിഎസ്എയിൽ നെറ്റ്‌വർക്ക് ഓഫ് വിമൻ സംരംഭത്തെക്കുറിച്ച് ചർച്ച നടക്കും. ഇത് വളരെ പ്രധാനപ്പെട്ട ഒരു വിഷയമാണ്. സ്ത്രീകളുടെ നേതൃത്വത്തിലുള്ള വികസനത്തിനായി ഭാരതം ഗൗരവമായി പ്രവർത്തിക്കുന്നു. ജി-20 പ്രസിഡൻ്റിൻ്റെ കാലത്ത്, ഈ വിഷയത്തിലുള്ള നമ്മുടെ പ്രതിബദ്ധത നാം വർധിപ്പിച്ചു. ടെക്‌നോളജി മേഖലയെ ഉൾക്കൊള്ളാനും സാങ്കേതിക പ്ലാറ്റ്‌ഫോമുകളിലൂടെ സ്ത്രീകളെ ശാക്തീകരിക്കാനുമാണ് ഭാരതം ലക്ഷ്യമിടുന്നത്. നമ്മുടെ ബഹിരാകാശ ദൗത്യങ്ങളിൽ നമ്മുടെ വനിതാ ശാസ്ത്രജ്ഞർ എങ്ങനെയാണ് പ്രധാന പങ്ക് വഹിച്ചതെന്ന് നിങ്ങൾ കണ്ടിട്ടുണ്ട്. ഞങ്ങളുടെ സ്റ്റാർട്ടപ്പുകളിൽ വനിതാ സഹസ്ഥാപകരുടെ എണ്ണം തുടർച്ചയായി വർദ്ധിച്ചുകൊണ്ടിരിക്കുകയാണ്. ഇന്ന്, ഭാരതത്തിലെ STEM വിദ്യാഭ്യാസ പങ്കാളികളിൽ 40 ശതമാനത്തിലധികം നമ്മുടെ പെൺമക്കളാണ്. ടെക്‌നോളജിയുടെ നേതൃത്വത്തിൽ സ്ത്രീകൾക്ക് കൂടുതൽ കൂടുതൽ അവസരങ്ങൾ ഭാരതം സൃഷ്ടിക്കുകയാണ്. സർക്കാരിൻ്റെ നമോ ഡ്രോൺ ദീദി എന്ന പരിപാടിയെക്കുറിച്ച് നിങ്ങൾ കേട്ടിട്ടുണ്ടാകും. ഈ പരിപാടി കാർഷിക മേഖലയിൽ ഡ്രോണുകളുടെ ഉപയോഗം പ്രോത്സാഹിപ്പിക്കുന്നു, ഭാരതത്തിലെ ഗ്രാമങ്ങളിലെ സ്ത്രീകളാണ് ഇതിന് നേതൃത്വം നൽകുന്നത്. വീടുകളിലുടനീളം ഡിജിറ്റൽ ബാങ്കിംഗും ഡിജിറ്റൽ പേയ്‌മെൻ്റുകളും പ്രോത്സാഹിപ്പിക്കുന്നതിന്, ഞങ്ങൾ ബാങ്ക് സഖി പ്രോഗ്രാമും ആരംഭിച്ചിട്ടുണ്ട്. ഇതിനർത്ഥം സ്ത്രീകൾ ഡിജിറ്റൽ ബോധവൽക്കരണ സംരംഭത്തിന് നേതൃത്വം നൽകി എന്നാണ്. നമ്മുടെ പ്രാഥമിക ആരോഗ്യ പരിപാലനം, പ്രസവം, ശിശു സംരക്ഷണം എന്നിവയിൽ ആശാ, അങ്കണവാടി പ്രവർത്തകർക്ക് കാര്യമായ പങ്കുണ്ട്. ഇന്ന്, ഈ തൊഴിലാളികൾ ടാബ്‌ലെറ്റുകളും ആപ്പുകളും വഴി ഈ ജോലികളെല്ലാം ട്രാക്ക് ചെയ്യുന്നു. വനിതാ സംരംഭകർക്കായി ഓൺലൈൻ മാർക്കറ്റിംഗ് പ്ലാറ്റ്‌ഫോമായ മഹിളാ ഇ-ഹാത് പ്രോഗ്രാമും ഞങ്ങൾ നടത്തുന്നുണ്ട്. ഇതിനർത്ഥം, ഒരുകാലത്ത് സങ്കൽപ്പിക്കാൻ പോലും കഴിയാത്ത ഗ്രാമങ്ങളിൽ പോലും ഭാരതത്തിലെ സ്ത്രീകൾ ഇന്ന് സാങ്കേതികവിദ്യകൾ ഉപയോഗിച്ച് പ്രവർത്തിക്കുന്നു എന്നാണ്. ഭാവിയിൽ ഞങ്ങൾ ഈ സംരംഭം കൂടുതൽ വിപുലീകരിക്കാൻ പോകുന്നു. ഓരോ മകളും ടെക് ലീഡർ ആകുന്ന ഒരു ഭാരതമാണ് ഞാൻ വിഭാവനം ചെയ്യുന്നത്.

സുഹൃത്തുക്കളേ,

ഭാരതം ജി-20 പ്രസിഡൻറായിരിക്കെ, ഞങ്ങൾ ലോകത്തിന് മുന്നിൽ ഗൗരവമായ ഒരു വിഷയം അവതരിപ്പിച്ചു. ഡബ്ല്യുടിഎസ്എ പോലുള്ള ഒരു ആഗോള പ്ലാറ്റ്‌ഫോമിൽ ഈ വിഷയം അവതരിപ്പിക്കാൻ ഞാൻ ആഗ്രഹിക്കുന്നു. ഡിജിറ്റൽ സാങ്കേതികവിദ്യയുടെ ആഗോള ചട്ടക്കൂടും ആഗോള മാർഗ്ഗനിർദ്ദേശങ്ങളും ആണ് വിഷയം. ആഗോള ഭരണത്തിന് ഇതിൻ്റെ പ്രാധാന്യം ആഗോള സ്ഥാപനങ്ങൾ തിരിച്ചറിയേണ്ട സമയം അതിക്രമിച്ചിരിക്കുന്നു. സാങ്കേതികവിദ്യയ്ക്കായി ആഗോളതലത്തിൽ ചെയ്യേണ്ടതും ചെയ്യരുതാത്തതുമായ ഒരു കൂട്ടം ഉണ്ടാകേണ്ടതുണ്ട്. ഇന്ന്, എല്ലാ ഡിജിറ്റൽ ഉപകരണങ്ങളും ആപ്ലിക്കേഷനുകളും ഏത് രാജ്യത്തിൻ്റെയും അതിരുകൾക്കും പരിമിതികൾക്കും അപ്പുറത്താണ് പ്രവർത്തിക്കുന്നത്. സൈബർ ഭീഷണികളിൽ നിന്ന് സ്വന്തം പൗരന്മാരെ സംരക്ഷിക്കാൻ ഒറ്റയ്ക്ക് ഒരു രാജ്യത്തിനും കഴിയില്ല. ഇതിനായി നാം ഒരുമിച്ച് പ്രവർത്തിക്കണം, ആഗോള സ്ഥാപനങ്ങൾ ഉത്തരവാദിത്തം ഏറ്റെടുക്കണം. നമ്മുടെ അനുഭവത്തിൽ നിന്ന് ഞങ്ങൾക്കറിയാം, വ്യോമയാന മേഖലയിൽ നിയമങ്ങൾക്കും നിയന്ത്രണങ്ങൾക്കും ഒരു ആഗോള ചട്ടക്കൂട് സ്ഥാപിച്ചതുപോലെ, ഡിജിറ്റൽ ലോകത്തിനും സമാനമായ ഒരു ചട്ടക്കൂട് ആവശ്യമാണ്. ഡബ്ല്യുടിഎസ്എ ഇക്കാര്യത്തിൽ കൂടുതൽ സജീവമായി പ്രവർത്തിക്കേണ്ടതുണ്ട്. ടെലികമ്മ്യൂണിക്കേഷൻ എങ്ങനെ എല്ലാവർക്കും സുരക്ഷിതമാക്കാം എന്നതിനെക്കുറിച്ച് ചിന്തിക്കാൻ ഓരോ ഡബ്ല്യുടിഎസ്എ അംഗത്തോടും ഞാൻ അഭ്യർത്ഥിക്കുന്നു. പരസ്പരബന്ധിതമായ ഈ ലോകത്ത്, സുരക്ഷ ഒരു അനന്തര ചിന്തയാകാൻ കഴിയില്ല. ഭാരതത്തിൻ്റെ ഡാറ്റാ പ്രൊട്ടക്ഷൻ ആക്ടും നാഷണൽ സൈബർ സെക്യൂരിറ്റി സ്ട്രാറ്റജിയും സുരക്ഷിതമായ ഒരു ഡിജിറ്റൽ ആവാസവ്യവസ്ഥ കെട്ടിപ്പടുക്കുന്നതിനുള്ള നമ്മുടെ പ്രതിബദ്ധത പ്രകടമാക്കുന്നു. ഈ അസംബ്ലിയിലെ അംഗങ്ങളെ ഉൾക്കൊള്ളുന്നതും സുരക്ഷിതവും ഭാവിയിലെ എല്ലാ വെല്ലുവിളികൾക്കും അനുയോജ്യവുമായ മാനദണ്ഡങ്ങൾ സൃഷ്ടിക്കാൻ ഞാൻ അഭ്യർത്ഥിക്കുന്നു. വ്യത്യസ്‌ത രാജ്യങ്ങളുടെ വൈവിധ്യത്തെ മാനിക്കുന്ന നൈതിക AI, ഡാറ്റാ സ്വകാര്യത എന്നിവയ്‌ക്കായുള്ള ആഗോള നിലവാരം നിങ്ങൾ വികസിപ്പിക്കണം.

സുഹൃത്തുക്കളേ,

ഈ സാങ്കേതിക വിപ്ലവത്തിൽ, സാങ്കേതികവിദ്യയ്ക്ക് മനുഷ്യകേന്ദ്രീകൃതമായ ഒരു മാനം നൽകാൻ നാം തുടർച്ചയായി പരിശ്രമിക്കുന്നത് വളരെ പ്രധാനമാണ്. ഈ വിപ്ലവം ഉത്തരവാദിത്തപൂർണവും സുസ്ഥിരവുമാണെന്ന് ഉറപ്പാക്കേണ്ടത് നമ്മുടെ ഉത്തരവാദിത്തമാണ്. ഇന്ന് നാം നിശ്ചയിക്കുന്ന മാനദണ്ഡങ്ങൾ നമ്മുടെ ഭാവിയുടെ ദിശയെ രൂപപ്പെടുത്തും. അതിനാൽ, സുരക്ഷ, അന്തസ്, തുല്യത എന്നിവയുടെ തത്വങ്ങൾ നമ്മുടെ ചർച്ചകളുടെ കേന്ദ്രമായിരിക്കണം. ഈ ഡിജിറ്റൽ യുഗത്തിൽ ഒരു രാജ്യവും ഒരു പ്രദേശവും ഒരു സമൂഹവും പിന്തള്ളപ്പെടുന്നില്ലെന്ന് ഉറപ്പാക്കുക എന്നതായിരിക്കണം നമ്മുടെ ലക്ഷ്യം. നവീകരണവും ഉൾപ്പെടുത്തലും അതിൻ്റെ കാതലായി കണ്ട്, നമ്മുടെ ഭാവി സാങ്കേതികമായി ശക്തവും ധാർമ്മികമായി സുസ്ഥിരവുമാണെന്ന് ഉറപ്പാക്കണം, 

സുഹൃത്തുക്കളേ,

ഡബ്ല്യുടിഎസ്എയുടെ വിജയത്തിന് ഞാൻ ശുഭാശംസകളും പിന്തുണയും അറിയിക്കുന്നു. ഞാൻ നിങ്ങൾക്ക് എല്ലാ വിധ ഭാവുകങ്ങളും നേരുന്നു! വളരെ നന്ദി!

***

SK