U Myntri Sorkar Pdeng ba dei khmih ia ki tnad Kam Pohiing bad Cooperation, Amit Shah u la ai jingkren ha ka jingrakhe ia ka Official Language Diamond Jubilee bad ka Akhil Bharatiya Rajbhasha Sammelan kaba saw ha New Delhi mynta ka sngi. U Myntri u la pyllait paidbah ruh ia ka Diamond Jubilee Special Issue jong ka 'Rajbhasha Bharati' magazine ba la pynkhreh kyrpang na ka bynta kane ka sngi. U Amit shah u la pyllait paidbah ruh ia ka stamp bad ka pisa nar kum ka dak jong ka Diamond Jubilee. U Shah u la sam ruh ia ki khusnam Rajbhasha Gaurav bad Rajbhasha Kirti Award. Ha kane ka sngi u Myntri Kam Pohiing u la plie paidbah ruh ia ka Bharatiya Bhasha Anubhaag (Indian Languages ​​Section).

Ha ka jingai jingkren, u Amit Shah u la ong ba ka jingiaid lynti ha kine ki 75 snem ka dei jong ka jingpdiang ia ka Hindi kum ka official language bad ruh ban pynneh bad kyntiew ia ki rukom, ka deiriti, ki ktien, ka thoh ka tar, ka jingsaindur da kaba pyniasoh ia baroh ki ktien tynrai jong ka ri lyngba kane. U la ong ba ka jingiaid lynti kaba 75 snem jong ka ktien Hindi mynta ka la poi sha ka bynta kaba khatduh ban pynurlong ia ka thong bad ba mynta ka dei ka sngi ban pynlong ia ktien Hindi na ka bynta ki jingiakren, ki briew, ka teknoloji bad ka ktien ba kren ha kiwei kiwei ki ri ruh.

U Mynrti Kam Pohiing u la ong ba la plie paidbah ia ka Indian Languages ​​Section mynta ka sngi. U la ong ba ngi la sakhi lang ia ka jingsdang ba thymmai kaba long kum ka jingthung ia u symbai ba rit u ban kylla sha u dieng jri ba heh. U la ong ba kane ka Indian Languages Section kan long ka jaka pdeng na ka bynta ka jingiada ia ki ktien jong ngi ha ki por ban wan. U la ong ba ka Indian Languages ​​Section kan long shi bynta ka tnad Official Language, namar ka jingkyntiew ia ka official language kam lah ban jia haduh ynda ngi la pynkhlain ia baroh ki ktien jong ka ri bad wanrah ia ka jingiadei hapdeng ka official language bad kiwei kiwei ki ktien jong ka India.

U Amit Shah u la ong ba ym lah ban don ka jingiakhun hapdeng ka ktien Hindi bad kiwei kiwei ki ktien tynrai namar ka Hindi ka dei ka paralok jong baroh ki ktien tynrai. U la ong ba ka Hindi bad ki ktien tynrai ki iarap iwei ia iwei bad ka dei namar kane ba yn pynkhlain ia ka jingiajan hapdeng ka Hindi bad kiwei kiwei ki ktien tynrai lyngba ka Indian Languages ​​Section. U la ong ba haba don kano kano ka jingthoh, ka jingai jingkren lane ka shithi ha ka ktien Hindi, ka Indian Languages ​​Section kan pynkylla ktien ia kine sha ki ktien tynrai jong ka ri. Kumjuh, ki jingthoh bad ki jingai jingkren ha baroh kiwei kiwei ki ktien jong ka ri ki dei ki ban pynkylla sha ka ktien Hindi, kaba long ka jingdonkam kaba khraw mynta.

U Myntri u la ong ba kito ki bym kwah ban pyntreikam ia ka Swaraj, Swadharma bad Swabhasha kin ym lah ban pyllait ia ki pateng ban wan na ka rukom pyrkhat ha ki bor ba shah teh mraw. U la ong ba ka Swabhasha ka don ha ka jingmut jong ka Swaraj . U la ong ba ka ri bad ki jaitbynriew ki bym lah ban iada ia ki ktien jong ki kim iasoh bad ka histori, ka thoh ka tar bad ka deiriti jong ki bad ba ki pateng ban wan jong ki ki bteng ban im ha ka jingpyrkhat kumba long ha ka por ba shah teh mraw. U Shah u la ong ba ka long kaba kongsan bha ba wat hadien 75 snem ba la ioh ka jinglaitluid, ngi trei da kaba ban jur halor ki jingngeit u Shivaji Maharaj ha ka Swaraj, Swabhasha bad Swadharma. U la ong ruh ba ha ka New Education Policy, u Myntri Rangbah Duh, Narendra Modi u la ban jur ha ka jingai jinghikai ha ki por ba dang sdang pule, ha ka ktien tynrai. U la ong ba ka lad ia khynnah ba suk tam ban sngewthuh ia ki jingkynnoh, ka rukom pyrkhat, ka jingsngewthuh, ka jingpyrkhat, ka jingpeit bniah bad ka jingshim rai ka dei lyngba ka ktien tynrai. U la ong ba ka dei namar kane ba u Myntri Rangbah Duh u la ban jur halor ka jingai jinghikai ha ka ktien tynrai. U Myntri Kam Poh Iing u la ong ba kane ka dei ka sngi ban pynkhlain ia baroh ki ktien jong ka India bad pynlong ia ka official language ka ktien kaba pyniasoh ha ka ri bad lyngba kane ngin lah ban pyndep ia ki kam jong ka ri ha ki ktien lajong.

U Amit Shah u la ong ba ka Hindi ka la don ka bynta kaba khraw ha ka jingiakhun ban ioh jinglaitluid. U la ong ba kawei na ki daw jong ka jingpulom ka jingiakhih ha u 1857 ka dei namar ba ym shym la don ka ktien kaba pyniasoh. U la ong ba ka ri kam dei ka ri geopolitical hynrei ka dei ka ri geo-cultural bad ba kaba pyniasoh ia ka ri ka dei ka deiriti. U la ong ba ia ka jingiatylli ha ka ri la tei ha ka deiriti, ka deiriti ka iadei bad ka dei kaba la tei ha ki ktien bad haba ngi duh ia ki ktien jong ngi, ka jingtylli jong ka ri ka don ha ka jingma kaba khraw.

U Myntri Kam Pohiing u la ong ba la u dei u Dr. Bhim Rao Ambedkar, C. Rajagopalachari, Mahatma Gandhi, Sardar Vallabhbhai Patel, KM Munshi, Lala Lajpat Rai, Netaji Subhash Chandra Bose ne u Acharya Kripalani, bun na ki nongialam jong ngi kiba kyntiew ia ka Hindi ki wan na ki jaka bym kren ia ka ktien Hindi. U la ong ba baroh na ki ki don ka ktien tynrai lajong hynrei ki sngewthuh ba ka ktien Hindi ka dei ka lad ban pyniasoh ia ka ri bad kumta, da kaba pynlong ia ka Hindi kum ka dak jong ka jingtylli jong ka ri, ki la ai ia ka ka dur jong ka official language.

U Amit Shah u la ong ba lada don mano mano ba lah ban pynneh ia ki ktien tynrai jong ngi, ki dei ki longkmie. U la kyntu ia baroh ki kmie ki kpa ba kin kren ia ki khun tang ha ka ktien tynrai. U la ong ba haba ngi leh ia kane, yn ym don kaei kaei kaba buh jingma ia ki ktien jong ngi. U Shah u la ong ba ki ktien jong ngi kin dang bteng ban ai jingshakri ia ka pyrthei ha  ki por ban wan. U la ong ba ki por ban wan ki dei ki por jong ka official language bad kiwei kiwei ki ktien tynrai jong ka India. U la ong ba mynta ym don mano mano ba lah ban the mraw ia ka ri ha kano kano ka rukom bad kane ka kynthup ha ka jingteh mraw ia ka ktien.

U Myntri u la ong ba ka tnad Official Language ka la trei borbah ban wanrah ia ka jingpdiang ia ka Hindi. U la ong ba ym lah ban pynjakhlia ia ka Hindi lyngba ka jingpdiang ia ki kyntien na kiwei kiwei ki ktien tynrai namar ka Hindi ka long kum ka Mei Ganges bad kan bteng beit ban long kyntang. Bun ki ktien kim dei ha ka Hindi hynrei ki dei ki ktien tynrai bad ngi pdiang ia kine. U la ong ba haba ka Hindi ka pdiang ia kine, bun ruh ki ktien Hindi ba la pdiang ha kiwei kiwei ki ktien tynrai. U Myntri u la ong ba ngi la pdiang ia ki kyntien na kiwei kiwei ki ktien jong ka India ha ka Shabd Sindhu dictionary. U la ong ba ka Hindi ka dei ban long kaba suk ban pdiang, kaba laitluid bad kaba suk ban kren. U la ong ba u ngeit skhem ba ka Shabd Sindhu dictionary kan long ka dictionary kaba heh tam ha ka pyrthei shuwa ka elekshon Lok mSabha ban wan.

U Amit Shah u la ong ba hapoh ka jingialam jong u Myntri Rangbah Duh, Narendra Modi, ka Sorkar Pdeng ka dang trei na ka bynta ka jingpyndonkam ia ka Hindi ha ka pule puthi, ki kam ai jinghikai teknikal, bad ki kam ka ain. U la ong ba dei ban rah shakhmat ia ka Hindi ym kum ka jingiakhun hynrei lyngba ka jingpdiang. U Shah u la ong ba shibun ki rai ka Supreme Court ki dei kiba la pynkylla sha ki ktien bapher bapher. U la ong ba ka Rajasthan, Uttar Pradesh, Madhya Pradesh bad Uttarakhand ki la pynthikna ba baroh ka jingai jinghikai ha ki kam ai jingsumar ki dei ha ka ktien Hindi. U la ong ba dang trei mynta ban pynkhreh ia ka jingai jinghikai engineering ha kumba 13 jait ki ktien jong ka India bad ba ha ki por ban wan, ka ktien na ka bynta ka jingwad bniah ruh kan long ka Hindi.

U Myntri ka tnad Kam Pohiing u la ong ba hapoh ka jingialam jong u Myntri Rangbah Duh, Narendra Modi, ka jingpynkhreh ia ka jingpdiang ia ka Hindi ka dang iaid shakhmat. U la ong ba u Myntri Rangbah Duh u la trei ban kyntiew ia ka jingpdiang ia ka Hindi da kaba ai ki jingkren ha ka ktien Hindi da ka jingsngew sarong ia la kajong ha ka rynsan kaba heh tam ha ka pyrthei. U la ong ba haba u Myntri Rangbah Duh ba rim u Atal Bihari Vajpayee u la ai jingkren ha ka United Nations General Assembly ha ka ktien Hindi, baroh kawei ka pyrthei ka la dap da ka jinglyngngoh. U Shah u la ong ba mynta ka Hindi ka la long ka ktien jong ka United Nations bad ka la kylla sha ka ktien kaba ar ha palat 10 tylli ki ri. U la ong ba mynta ka Hindi ka la iaid shakhmat ha ka jinglong ka ktien ba pyndonkam ha kiwei kiwei ki ri.

U Amit Shah u la ong ba ka Hindi ka lah ban pynkhlain ia ki ktien tynrai jong ka India bad ki ktien tynrai jong ka India ki lah ban pynkhlain ia ka Hindi. U la ong ba mynta, ki file bad ki jingai jingtip ha ka tnad Kam Pohiing bad ka tnad Cooperation ki dei kiba thoh ha ka ktien Hindi. U la ong ba ka ktien ka dei ka lad ban pynsngew, bad ka jingpynsngew ka kylla sha ka jingsawa haba leh ia kane ha ka ktien lajong.

******