ঙসি প্রধান মন্ত্রী শ্রী নরেন্দ্র মোদীনা নিউ দিল্লিদা ইকোনোমিক্স তাইমস ৱার্ল্দ লিদরস ফোরমদা ৱা ঙাংখ্রে। 

থৌরম অদুদা ৱা ঙাংবদা প্রধান মন্ত্রীনা হায়খি লৈবাক অসিগী তুংগী য়াইফনবগীদমক ইকোনোমিক্স তাইমস ৱার্ল্দ লিদরস ফোরমদা অঙকপা ৱাফমশিং খন্নগনি হায়বগী থাজবা থম্লি অমসুং মালেম অসিনা ভারত্তা থাজবা থম্লকপা মতম অমদা খন্ন-নৈনবা পাংথোক্লি।

প্রধান মন্ত্রীনা হায়খি ঙসি ভারতনা মাইপাকপগী অনৌবা ৱারি অমা ইরে অমসুং শেন্মিৎলোনগী থবকশিং অসিগী খুৎথাংদা অওনবশিং পুরকখিবগী কান্নবা উবা ফংলে। থাজবশিংদগী হেন্দোক্না থবক পাংথোকপা মতম অমা ভারতকী লৈরে। মালেমগী ওইনা শেন-থুম চাউখৎপা চাদা ৩৫ ওইবা মতমদা হৌখিবা চহি ১০ অসিদা ভারতকী শে-থুম চাউখৎপা চাদা ৯০ ওইখি। মসিগী খোঙজেল অসি মখা তানা লৈখিগনি।

হৌখিবা চহি ১০দা মীয়াম হেন্না য়াইফনবা হিরম খুদিংমক্তা অহোংবা পুরক্লিবা অসিগী মতাংদা, প্রধান মন্ত্রীনা হায়খি পায়খৎলিবা থবকশিং অসিনা মীওই করোর কয়াগী পুন্সিদা কান্নবা ফংহল্লে। মীয়ামদা অফবা লৈঙাক ফংহনবা হায়বসি সরকারগী ৱাশক্নি। রিফোর্ম, পরফোর্ম অমসুং ত্রান্সফোর্ম অসি ঐখোয়গী লাইৱা ওইরে। হৌখিবা চহি ১০ দা ভারতকী মীয়াম্না থবক তৌবদা সরকারগী থৌনা অমসুং লৈবাক অসিগী মাইপাকপশিং উবা ফংলে। মরম অদুনা, ভারতকী মীয়ামদা অনৌবা থাজবশিংনা পীক থল্লে। মখোয় মশাদা, লৈবাক অসিগী চাউখৎপা, থৌশিলশিং, ৱারেপশিং অমসুং সরকারনা থাংলিবা খোঙথাংশিংদা থাজবা থম্লে। মালেমগী তোঙান-তোঙানবা মফমশিংদা মীখলশিং পাথোক্নরি। লৈবাক কয়াগী সরকারশিংনা খুদোংথিবা মায়োক্নবা মতমদা অহোংবা পুরক্নবগীদমক মীয়াম ভোৎ থাদরি। মসিগী ওন্ন-তৈনবদা, চহি ৬০ অসিদা অহানবা ওইনা সরকার অমা অহুমলকশুবা ওইনা ভারতকী ভোত্তরশিংনা শেমখ্রে। ভারতকী নহারোলশিং অমসুং নুপীশিংগী অনিংবা অমসুং অপাম্বনা মখা চৎথনবা, রাজনিতিগী তুংদু-লৈতাবা লৈহন্নবা অমসুং শেন-থুম চাউখৎনবা ভোৎ পীখিবনি অমসুং মসিগীদমক মখোয় থাগৎপা ফোঙদোকচরি।

প্রধান মন্ত্রীনা হায়খি ভারতকী চাউখৎপা অসি মালেমগী হেদলাইনশিংগী শরুক অমা ওইরে। স্তেতিসতিক্সকী মরুওইবা লৈরবসু, মসিনা কয়া য়াম্না মীওই কয়াগী পুন্সিদা অহোংবা পুরক্লবগে হায়বা তাক্লে। ভারতকী তুংলমচৎকী অরোনবা অসি অওনবশিংদা লৈরে। হৌখিবা চহি ১০ দা মীওই করোর ২৫ লায়রবা কোকহল্লে অমসুং নিও-মিদল ক্লাস অমা শেমগৎলে। থবক অসিগী খোঙজেল অমসুং পাক-চাউবা অসি পুৱারি ওইরগনি অমসুং মালেম অসিদা মমাঙদা গনতন্ত্র লৈবাক অমদা কৈদৌঙৈদা থবক ওইনা পাংথোকখিদ্রি। সরকারনা লায়রবশিংদা য়েংলিবা মীৎয়েংদা অহোংবা পুরকপদগী অহোংবা অসি পুরকপনি। অনিংবশিং অমসুং ময়োক্নবগী থৌনা লৈজরবসু, তঙাইফদবা খুদোংচাবশিং ফংদবগী অৱাবশিং লায়রবশিংনা ময়োক্নখি। মখোয়গী অৱাবশিং কোকহন্দুনা অমসুং মখোয়দা মতেং পাংদুনা লায়রবশিংগী ফিবম ফগৎনবা সরকারনা মফম অমা পীরে।

দিজিতেল ত্রান্সসেক্সনশিং অমসুং গরেন্তি য়াওদবা লোনশিংগী কান্নবশিং পীদুনা লায়রবশিংগী পুন্সিদা অওনবা পুরক্নবা লম্বী অসিদা লাকখিবনি। ঙসিদি লায়রবা মীওই কয়া ওন্ত্রেপ্রেনিউয়রশিং ওইরক্লে অমসুং পাউ ফাউদোক-ফাউজিন অমসুং খুৎলায়শিংগী মতেংদগী হৌজিক মখোয় ই-পাউ ফজনা খঙলবা মীওইশিং ওইরে। লায়রবা কোক্লবা মীওইশিং চাউখৎনবগী অকনবা থৌনা অমা লৈরি অমসুং মখোয়গী অনিংবশিং অদুনা লমজিংদুনা অনৌবা ইনফ্রাস্ত্রকচর শেমগৎলকপনি।

মহাক্না মখা তানা হায়খি মখোয়গী লৌশিংনা অনৌবা থবকশিংগী লম্বীশিং শেম্বগা লোয়ননা, মখোয়গী হৈথোই-শিংথোইবনা উদ্যোগকী মাইকৈ তাকখি, মখোয়গী দরকার ওইবশিংনা কৈথেলগী মাইকৈ তাকখি অমসুং মখোয়গী শেন্থোক হেনগৎলকপদগী কৈথেলদা পোৎ শীৎপা হেনগৎলকখি। ভারতকী নিও-মিদল ক্লাস অসি লৈবাক অসি চাউখৎনবা খ্বাইদগী চাউবা শাফুনি।

সরকারগী অহুমশুবা তার্মদা খোঙজেল শরুক অহুম য়াংনা থবক তৌগনি হায়না মীখলগী ফলশিং লাউথোকপা নুমিত্তা প্রধান মন্ত্রীনা ফোঙদোকখিবা ৱাফমশিং নিংশিংলদুনা, মহাক্না হায়খি ঙসিগী ঐখোয়গী পান্দমশিং হেন্না মপাঙ্গল কনখৎলক্লে। মীয়ামগুম, সরকারশু অনৌবা থাজবশিংনা পীক থল্লে। সরকারগী অহুমশুবা তার্ম নুমিৎ ১০০ শুদ্রি অদুবু ফিজিকেল ইনফ্রাস্ত্রকচর মতমগা চুনবা মওংদা শেমগৎনবা, সোসিএল ইনফ্রাস্ত্রকচর পাকথোক-চাউথোক্নবা অমসুং অওনবশিংগা লোয়ননা মাঙলোমদা চঙশিন্নবা থবক পায়খৎলে। হৌখিবা থা অহুমদা, লায়রবা, নহারোল, নুপীশিং অমসুং লৌমীশিংগীদমক সরকারনা অচৌবা ৱারেপশিং লৌরে। লায়রবশিং য়ুম করোর ৩ শানবা, য়ুনিফাইদ পেন্সন স্কিম, লৌউ-শিংউগী ইনফ্রাস্ত্রকচর পাকথোক-চাউথোক্নবা লুপ করোর লাখ ১গী ফন্দ, লৌমীশিংগী চাথোক লৈবা মখলগী মরু-মরাংশিং হৌদোকপা, নহারোল করোর ৪ কান্নবা পীনবা লুপা করোর লাখ ২গী পি.এম পেকেজ অমসুং খুঙ্গংশিংগী নুপীশিং অনৌবা লাখপতি দিদি লাখ ১১ শেমগৎপগী মাইপাকপশিং লৈরে। লাখপতি দিদি য়োজনা অসিনা নুপীশিংগী শেন-থুমগী ফিবম ফগৎহনবদা অচৌবা থৌদাং অমা লৌরে।

প্রধান মন্ত্রীনা হায়খি লুপা করোর ৭৫,০০০ হেনবগী বধবন হিথাংফম শেমগৎনবা উরেপ-উয়ুং তম্নবা মহাক ঙরাং মহারাস্ত্রাগী পালঘরদা চৎলুরে। লুপা করোর ৩০,০০০ চঙনা অনৌবা উদ্যোগকী সহর ১২ শেমগৎনবা, লুপা করোর ৫০,০০০ হেন্না হায়-স্পিৎ কোরিদোর ৯ শেমগৎনবা অমসুং লুপা করোর ৩০,০০০ চঙনা পুনে, থানে অমসুং বেঙ্গালোর মেত্রো পাকথোক-চাউথোক্নবা ৱারেপশিং লৌরে। লাদাখতা মালেমদা খ্বাইদগী ৱাংবা তন্নেল অমা শেমগৎপা হৌরে।

প্রধান মন্ত্রীনা হায়খি ঙসি অনৌবা বন্দে ভারত ত্রেন অহুম লমখাখ্রে। ঐখোয়গী ওইনা, ইনফ্রাস্ত্রকচর অসি শুপ্নগী শাংবা, পাকপা অমসুং ৱাংবা হেনগৎহনবা অদু খক নত্তে; মসি ভারতকী মীয়াম হিংবদা লাইবা হেনগৎহনবনি। ভারত রেলৱেজগী অওনবশিং পুরক্তুনা হৌজিক ত্রেন কোচশিং শারে। য়াম্না য়াংবা অমসুং নুংঙাইবা বন্দে ভারতগুম্বা অনৌবা ত্রেনশিং চেনবা হৌরে। য়াংনা চাউখৎলক্লিবা লৈবাক অমগী দরকার ওইবশিং ফংহন্নবা লৈবাক অসিগী ত্রান্সপোর্ত ইনফ্রাস্ত্রকচর অওনবা পুরক্নবা পান্দম অমগা লোয়ননা অনৌবা ত্রেনশিং অসি হৌদোকপনি। লৈবাক অসিগী লম্বী-থোং ফগৎহন্নবা সরকারনা পায়খৎলিবা থবকশিংগী মতাংদা প্রধান মন্ত্রীনা হায়খি মমাঙদা লৈবাক অসিদা লম্বীশিং শেমগৎখি, অদুবু ঐখোয়না লৈবাক শীনবা থুংনা অনৌবা এক্সপ্রেসৱেশিং শেমগৎলে। অপীকপা সহরশিংদা এয়র কন্নেক্তিবিতি হেনগৎহন্নবা থবকশিং পায়খৎলে অমসুং সরকারনা তয়ার-২ অমসুং তয়ার-৩ সহরশিং মথক্তা শম্নহল্লে অমসুং ভারতকী কাচিন-কোয়া শীনবা থুংনা অনৌবা ত্রান্সপোর্তকী কান্নবশিং ফংহল্লে।

প্রধান মন্ত্রীনা হায়খি সরকারগী দিপার্তমেন্তশিংগী মরক্তা পাউ ফাওনদবা লৈরিবা অসি কোকহন্নবা পান্দমগা লোয়ননা পি.এম গাতি শক্তি নেসনেল মাস্তর প্লান পায়খৎপনি অমসুং ইনফ্রাস্ত্রকচর শেমগৎনবা অপুনবা অমসুং খুৎশম্নদুনা চৎমিন্নবা থৌরাং অমা শেম্লে। হায়রিবা থবকশিং অসিনা থবক ফংবা হেনগৎহল্লে অমসুং ঐখোয়গী শেন্মিৎলোন অমসুং উদ্যোগতা অফবা কান্নবা অমা পীরে।

প্রধান মন্ত্রীনা হায়খি ২১শুবা চহিচাগী অহুমশুবা দিকেদ অসি ভারতকী মপান ফগৎলকপা দিকেদ অমনি। খোঙজেল অসিদা অপুনবা ওইনা থৌদাং লৌমিন্নদুনা, চাউখৎপগী কান্নবশিং লৈবাক অসিগী মীওই খুদিংমক ফংলে। ভারত চাউখৎলবা লৈবাক অমা ওইনবা মাঙলোমদা চঙশিল্লিবা অসিদা ভারতকী শেন্মিৎলোনগী মরী লৈনবশিং অমসুং প্রাইভেত সেক্তরনা য়ুম্বীশিং ওইদুনা লুচিংগনি। হায়রিবা য়ুম্বীশিং অসি ভারতকী নুংঙাই-য়াইফবগী য়ুম্ফম ওইবতা নত্তনা মালেমগী নুংঙাই-য়াইফনবা য়ুম্বীশিংশু ওইগনি। প্রধান মন্ত্রীনা হায়খি তোঙান-তোঙানবা হিরমশিংদা খুদোংচাবশিং হেনগৎলকপা ভারতনা মখা তানা উবা ফংলে। লৈবাক অসিগী অশানবা পান্দমশিংদা সরকারনা মতেং পাংলি। সরকার অসিনা অচৌবা খোঙথাং অমা থাং দরকার ওইরে অমসুং অশানবা পান্দম অমগা লোয়ননা সরকারনা থবক পায়খৎলি।

প্রধান মন্ত্রীনা মখা তানা হায়খি ভারত মালেমগী মেনুফেকচরিংগী মফম অমা ওইহনবা হায়বসি ভারতমচা খুদিংমক্কী অপাম্বনি। মালেম্না ভারত্তা থাজবা থম্লে অমসুং মাইকৈ অসিদা ঙসিদি লৈবাক অসিদা অওনবা অমা লাক্লে। হৌখিবা মতমগা চাংদম্নবদা ঙসিদা লৈবাক অসিদা এম.এস.এম.ইশিং মতেং য়াম্না ফংলে। প্লগ-এন্দ-প্লে ইন্দস্ত্রিএল পার্কশিং অমসুং ইকোনোমিক কোরিদোরশিং শেমগৎলে অমসুং ক্রিতিকেল মিনরেলশিং পুথোকপা পুক্নিং থৌগৎলে। ভারত্তা মমাঙদা অমুক্তা ওইখিদ্রিবা মওংদা পি.এল.আই স্কিম মাইপাক্লে।

মীনাই ওইদ্রিঙৈ মমাঙগী মতম নিংশিংলদুনা, প্রধান মন্ত্রীনা হায়খি ভারতনা নুংঙাই-য়াইফবগী মরুওইবা য়ু্ম্ফম অমদি ঐখোয়গী লৌশিংগী পুক্কৈ অসিনি, মসিনা ভারত চাউখৎনবগী মরুওইবা য়ুম্বী অমসু ওইরিবনি। ভারত স্কিল, লৌশিং, রিছার্স অমসুং  ইন্নোবেসনগী মফম অমা ওইনা শেমগৎনবা উদ্যোগ অমসুং মহৈলোয়শঙশিং পুন্না চৎমিন্ননবা সরকারনা থবক পায়খৎলে। চহি অসিগী বজেত্তা লুপা করোর লাখ ১ গী রিছার্স ফন্দ অমা থমদুনা হিরম অসিদা মরুওইবা মীৎয়েং চঙলে।

প্রধান মন্ত্রীনা হায়খি মিদল ক্লাস ইমুংশিংগী অঙাংশিং মপান লৈবাকশিংদা লাইরিক তম্বদা য়াম্লবা শেনফমশিং চাদিং তৌরি। মীয়াম কা হেন্না শেন চাদিং তৌবা হন্থহন্নবা ভারত্তা মপান লৈবাকশিংগী মকোক থোংবা য়ুনিভর্সিতিশিংগী কেম্পসশিং হাংদোক্নবা সরকারনা থবকশিং পায়খৎলে। নিংতম্বা ফংলবা মতুংদা অহানবা চহি ৭০দা এম.বি.বি.এস-এম.দি সিত লিশিং ৮০ লৈখিবা অদুগা চাংদম্নবদা হৌখিবা চহি ১০ অসিদা অনৌবা এম.বি.বি.এস-এম.দি সিত লাখ ১ হাপগৎলে। মথং চহি ৫দা অনৌবা মেদিকেল সিত লিশিং ৭৫ শেমগৎলগনি হায়না চহি অসিগী নিংতম্বা নুমিৎ থৌরমদা মহাক্না লাউথোকখ্রে। তুংদা ভারত মালেমদা হকশেল অমসুং নুংঙাইনা হিংনবগী মরুওইবা মফম অমা ওইনা শেমগৎকনি।

প্রধান মন্ত্রীনা হায়খি লৈবাক অসি মালেমগী চীঞ্জাক পুথোকফম ওইহন্নবা সরকারনা থবক পায়খৎলে। মালেম অসিগী দাইনিং তেবল খুদিংমক্তা য়ামদ্রবদা ভারত্তা শাবা চীঞ্জাক অমা লৈহনবা হায়বসি সরকারগী পান্দমনি। পান্দম অসি থবক ওইনা পাংথোক্নবা, ভারতকী দাইরি অমসুং সিফুদকী পোৎথোকশিং মগুন হেনগৎহনবগা লোয়ননা সরকারনা মতম চপ মান্ননা ওর্গনিক অমসুং নেচরেল লৌউ মখলশিং পুক্নিং থৌগৎলে। ভারতনা মাঙজিল থাদুনা হন্দক ভারতনা মাইপাক্না মিল্লতেশিংগী মালেমগী চহি মালেম শীনবা থুংনা থৌরমশিং পাংথোকখ্রে। মালেমদা মিল্লেতশিং খ্বাইদগী য়াম্না পুথোকপা লৈবাক কনানো ? ভারতনি। অফবা চীঞ্জাক অসিনা মহৌশা অমসুং চাউখৎপা অনিমক্তা কান্নবশিং পীরে। ভারত্তা মালেমগী অচৌবা ফুদ ব্রান্দশিং লৈরে, মসিনা লৈবাক অসিগী ফুদ ইন্দস্ত্রি চাউখৎলকপা অদু উৎলে।

প্রধান মন্ত্রীনা হায়খি বিকসিত ভারতকী অতোপ্পা মরুওইবা য়ুম্বী অমা গ্রিন ইনর্জি সেক্তরনা ওইরি। জি-২০ মীফমদা ভারতনা মাইপাক্না হৌদোকখিবা গ্রিন হায়দ্রোজেন ইনিসিয়েতিপ লৈবাক কয়ানা শৌগৎনরকখি অমসুং ২০৩০ ফাওবগী মনুংদা গ্রিন হায়দ্রোজেন তন মিল্লিয়ন ৫ পুথোকপা ঙম্নবা ভারতনা পান্দম অমা থম্লে অমসুং মসিগা লোয়ননা চহি অসিদা ভারতনা গিগাৱাত ৫০০গী রিন্যুএবল ইনর্জি পুথোক্নবা পান্দম থম্লি।

প্রধান মন্ত্রীনা হায়খি তেক্নোলোজিগা লোয়ননা তুরিজম অসি ভারত চাউখৎনবা অকনবা য়ুম্বী অমা ওইরি। মালেম শীনবা থুংনা হিরম খুদিংমক্তা ভারত মালেম শীনবা থুংনা পাম্নবা মফম অমা ওইরক্লে। ভারতকী পুৱারি অমসুং নাতকা মরী লৈনবা মফমশিং অমসুং  অপীকপা সমুদ্র খোঙবালশিং শেমগৎনবা থবকশিং পায়খৎলে। ‘দেখো অপ্না দেস, পিপলস চোইন্স কেম্পেন পাংথোক্তুনা ভারতকী মকোক থোংবা লমকোয়ফমশিং মশক খঙদোক্নবা মীয়ামদা ভোৎ থাদহল্লে অমসুং মসিগী মতুংদা মিসন মোদতা লমকোয়ফমশিং শেমগৎকনি। পায়খৎলিবা থবক অসিনা থবক ফংনবগী খুদোংচাবশিং শিংথাবা য়ানা হেনগৎহল্লগনি।

প্রধান মন্ত্রীনা মখা তানা হায়খি গ্লোভেল সাউথগীদমক অপুনবা ওইনা মালেম অসি চাউখৎমিন্নবা হায়বসি য়াম্না মরুওই । ভারতনা গ্লোভেল সাউথকী খোল্লাউ কনখৎলে অমসুং ঐখোয়গী অফ্রিকাগী মরুপশিং মতেং পাংলে। গ্লোভেল সাউথনা  য়াম্লবা খুদোংচাবশিং লৈবা তুংলমচৎ অমা মহাক্না মঙ মঙলি অমসুং মালেমগী মচিন-মনাও ওইবগী ৱাখল্লোন্দা হায়রিবা লৈবাকশিং অসিগীদমক ভারতনা লাউরি। মরুওইনা গ্লোভেল সাউথ য়াওনা মালেমগী লৈবাক খুদিংমক চাউখৎনবা মালেমগী ওইবা চৎন-কাংলোন অমা থম্নবা ঐখোয়না হোৎনরি। প্রধান মন্ত্রীনা হায়খি তুংগীদমক ঐখোয়না মীৎয়েং চঙলি। হয়েংগী শিংনবশিং অমসুং খুদোংচাবশিংগীদমক ঙসি ঐখোয়গী লৈবাক্না থৌরাং তৌরি। ঐখোয়না গ্রিন হায়দ্রোজেন মিসন, ক্বান্তম মিসন, সেমিকন্দক্তর মিসন অমসুং দিপ সি ওসিন মিসন পায়খৎলে। স্পেস তেক্নোজি চাউখৎনবা হন্দক সরকারনা লুপা করোর ১,০০০  কাইথোক্লে। ঙসিগী ভারত খুদোংচাবশিংগী লমদম অমনি অমসুং ভারতকী হয়েং হেন্না ফবা ওইগনি হায়না ঐখোয়না থাজৈ।

মহাক্কী লোইশিল্লকপগী ৱারোলদা, প্রধান মন্ত্রীনা হায়খি ২০৪৭ ফাওবা বিকসিত ভারত ওইনবা ভারতনা ৱারেপ লৌরে। খোঙচৎ অসিদা মীয়াম অমসুং মরী লৈনবশিং থৱায় য়াওনা শরুক য়াগদবনি অমসুং ভারতকী কম্পেনিশিং মালেমগী ব্রান্দশিং ওইরকপা মহাক্না উনিংই। মালেম শীনবা থুংনা হিরম খুদিংমক্তা ভারতনা মাঙজিল থাবা ঐখোয়না পাম্মী। খুদোংচাবা পীনবা, অওনবা পুরক্নবা অমসুং তংদু-লৈতাবা থৌশিল অমা পীনবা অমসুং চাউখৎনবা ঐখোয়না ৱাশক্লি। অনৌবা থবক পায়খৎনবা, থবক পাংথোক্নবা, অফবা ফিবম শেমগৎনবা অমসুং মগুন লৈহনবদা মীৎয়েং চঙনবা অদোম্না ৱাশক্কদবনি। মীওই খুদিংমক ৱাখল চাউনা খনগদবনি অমসুং ভারতকী মাইপাকপগী ৱারিশিং ইনবা পুন্না থবক তৌমিন্নগদবনি। ঙসিদি ভারতনা শেন তাল্লিবা মীওইশিং ইকায়খুম্নরে। নুংঙাই-য়াইফবা ভারত অমনা মালেমগী নুংঙাই-য়াইফনবা লম্বী অমা শেমগনি। লৈবাক মনুং অমসুং মপান্দা লৈরিবা ভারতমচাশিংনা ইন্নোবেসন, ইনক্লুজন অমসুং মালেমগী থাক্ত মতেং পাংনবগী লাইৱা নিংশিংগদবনি। ভারত নুংঙাই-য়াইফবনা মালেম নুংঙাই-য়াইফবা ওইগদবা মরম্না, লম্বী অসিদা ঐখোয় পুন্না চৎমিন্নরসি। মসিগী পান্দম অসি ফংবা ঙমগনি হায়বগী থাজবা লৈ।

***