Kum ka jingbuddien ia ka jingthmu jong u Myntri Rangbah duh, Narendra Modi ban kyntiew ia ka roi ka par jong ka Ladakh kaba riewspah, ka Tnat Kam Pohiing ka la rai ban plie 5 tylli ki distrik ba thymmai ha kane ka Union Territory.

Haba ai jingtip shaphang kane ka rai kaba kyrpang ha ka post ha ka rynsan ‘X’, u Myntri Kam Pohiing bad Cooperation jong ka sorkar Pdeng, Amit Shah u la ong lyngba kane ka rai, ki distrik ba thymmai - Zanskar, Drass, Sham, Nubra bad Changthang – kin pynpoi ia ki jingmyntoi ba dei na ka bynta ki briew sha ki tyngkong iing jong ki da kaba pynkhlain ia ka rukom synshar ha man ki jaka. Hadien ka jingplie ia kine ki san tylli ki distrik, mynta baroh kin don hynniew tylli ki distrik ha Ladakh, kynthup ka Leh bad Kargil.

Ka Ladakh kalong ka union territory kaba heh bha ha ka liang ka jingheh ka jaka. Mynta, ka Ladakh ka don artylli ki distrik – ka Leh bad Kargil. Kalong kawei na ki jaka ba dang duna ka jingbun briew ha India. Namar kalong ka jaka kaba kham jynjar ban poi, mynta ki bor pyniaid distrik ki mad shibun ki jingeh ban poi sha ki jaka nongkyndong. Hadien ka jingplie ia kine ki distrik, mynta baroh ki skhim jong ka sorkar pdeng ba iadei bad ka bha ka miat bad jong ki bor pyniaid jong ka Ladakh kin lah ban poi sha ki briew bad kham bun shuh shuh ki briew kin ioh ia kine ki jingmyntoi. Kane ka rai ba kongsan jong ka Tnat Kam Pohiing kan long kai jingmyntoi ha baroh ki liang jong ka roi ka par jong ka Ladakh.

Nalor ka jingai jingmynjur ban plie sa san tylli ki distrik ba thymmai, ka Tnat kam Pohiing ka la bthah ia ki bor pyniaid jong ka Ladakh ban thaw ia ka committee ban lum jingtip ia ki bynta bapher bapher ba iadei bad ka jingplie ia ki distrik ba thymmai, kum ki headquarter, u pud u sam, ka jinglong ki kam pyniaid bad ka jingwanrah ia ki kam, bad kiwei kiwei ki bynta ba iadei bad ka jingplie ia ka distrik bad kiwei kiwei bad ban phah ia ka kaiphod jong ka hapoh lai bnai. Hadien ba la ioh ia ka kaiphod na ka committee, ka Union Territory of Ladakh kan phah ia ka jingtyrwa ba khatduh ba iadei bad ka jingplie ia ki distrik ba thymmai katkum ka nongrim jong kane ka kaiphod sha ka Tnat Kam Pohiing na ka bynta kiwei kiwei ki sienjam.

Ka sorkar Modi ka kut jingmut ban wanrah shibun ki lad ki lynti na ka bynta ki briew jong ka Ladakh.

*****