ಕೇಂದ್ರ ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವರಾದ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಇಂದು ಹೊಸದಿಲ್ಲಿಯಲ್ಲಿ ಸಾರ್ವಜನಿಕ ವಲಯದ ಬ್ಯಾಂಕುಗಳ (ಪಿ ಎಸ್ ಪಿ) ಕಾರ್ಯಕ್ಷಮತೆಯನ್ನು ಪರಿಶೀಲಿಸಿದರು, ಅವುಗಳ ಹಣಕಾಸು ನಿಯತಾಂಕಗಳು, ಠೇವಣಿ ಕ್ರೋಢೀಕರಣ, ಡಿಜಿಟಲ್ ಪಾವತಿಗಳು ಮತ್ತು ಸೈಬರ್ ಭದ್ರತಾ ಚೌಕಟ್ಟು, ಜೊತೆಗೆ ಹಣಕಾಸು ಸೇರ್ಪಡೆಯಡಿ ಸಾಲದ ಲಭ್ಯತೆ ಮತ್ತು ಪಿ ಎಸ್ ಪಿ ಗಳಿಗೆ ಸಂಬಂಧಿಸಿದ ಇತರ ಉದಯೋನ್ಮುಖ ವಿಷಯಗಳ ಬಗ್ಗೆ ಪರಿಶೀಲಿಸಿದರು.

ಸಭೆಯಲ್ಲಿ ಕಾರ್ಯದರ್ಶಿ ಡಾ.ವಿವೇಕ್ ಜೋಶಿ, ಹಣಕಾಸು ಸೇವೆಗಳ ಇಲಾಖೆ ನಿಯೋಜಿತ ಕಾರ್ಯದರ್ಶಿ ಶ್ರೀ ಎಂ. ನಾಗರಾಜು, ಸಾರ್ವಜನಿಕ ವಲಯದ ಬ್ಯಾಂಕುಗಳ (ಪಿ ಎಸ್ ಪಿ) ಮುಖ್ಯಸ್ಥರು ಮತ್ತು ಹಣಕಾಸು ಸೇವೆಗಳ ಇಲಾಖೆಯ (ಡಿಎಫ್ಎಸ್) ಹಿರಿಯ ಅಧಿಕಾರಿಗಳು ಭಾಗವಹಿಸಿದ್ದರು.

ನಿವ್ವಳ ಎನ್ ಪಿ ಎ ಗಳು (ಎನ್ ಪಿ ಎ ಗಳು) 0.76% ಕ್ಕೆ ಇಳಿದಿದ್ದು, ಬ್ಯಾಂಕುಗಳಲ್ಲಿ ಸಾಕಷ್ಟು ಬಂಡವಾಳ  ಪ್ರಮಾಣ 15.55% ಆಗಿದ್ದು, ಬ್ಯಾಂಕುಗಳ ನಿವ್ವಳ ಬಡ್ಡಿ ಮಾರ್ಜಿನ್ (ಎನ್ಐಎಂ) 3.22% ಮತ್ತು ಷೇರುದಾರರಿಗೆ 27,830 ಕೋಟಿ ರೂ.ಗಳ ಲಾಭಾಂಶದೊಂದಿಗೆ 1.45 ಲಕ್ಷ ಕೋಟಿ ರೂ.ಗಳ ನಿವ್ವಳ ಒಟ್ಟು ಲಾಭದೊಂದಿಗೆ ಸುಧಾರಿತ ಆಸ್ತಿ ಗುಣಮಟ್ಟದೊಂದಿಗೆ  2024 ರ ಹಣಕಾಸು ವರ್ಷದಲ್ಲಿ ಪಿಎಸ್ಬಿಗಳು ಎಲ್ಲಾ ಹಣಕಾಸು ಮಾನದಂಡಗಳಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಿವೆ ಎಂಬುದನ್ನು ಸಭೆಯಲ್ಲಿ ಗಮನಿಸಲಾಯಿತು. ವಿವಿಧ ನಿಯತಾಂಕಗಳಲ್ಲಿನ ಸುಧಾರಣೆಗಳು ಮಾರುಕಟ್ಟೆಗಳಿಂದ ಬಂಡವಾಳವನ್ನು ಸಂಗ್ರಹಿಸುವ ಪಿ ಎಸ್ ಪಿ ಗಳ ಸಾಮರ್ಥ್ಯವನ್ನು ಹೆಚ್ಚಿಸಿವೆ.

ಠೇವಣಿ ಕ್ರೋಢೀಕರಣದ ಚರ್ಚೆಯ ಸಂದರ್ಭದಲ್ಲಿ, ಕೇಂದ್ರ ಹಣಕಾಸು ಸಚಿವರು ಸಾಲದ ಬೆಳವಣಿಗೆಯು ವೇಗ ಪಡೆದಿದ್ದರೂ, ಸಾಲದ ಬೆಳವಣಿಗೆಗೆ ಸುಸ್ಥಿರವಾಗಿ ಧನಸಹಾಯ ನೀಡಲು ಠೇವಣಿಗಳ ಕ್ರೋಢೀಕರಣವನ್ನು ಮತ್ತಷ್ಟು ಸುಧಾರಿಸಬಹುದು ಮತ್ತು ವಿಶೇಷ ಡ್ರೈವ್ ಗಳನ್ನು ನಡೆಸುವ ಮೂಲಕ ಠೇವಣಿಗಳನ್ನು ಸಂಗ್ರಹಿಸಲು ಸಂಘಟಿತ ಪ್ರಯತ್ನಗಳನ್ನು ಮಾಡುವಂತೆ ಬ್ಯಾಂಕುಗಳಿಗೆ ಸೂಚಿಸಿದರು. ಪರಿಣಾಮಕಾರಿ ಗ್ರಾಹಕ ಸೇವಾ ವಿತರಣೆಗಾಗಿ ಪಿ ಎಸ್ ಪಿ ಗಳು ತಮ್ಮ ಗ್ರಾಹಕರೊಂದಿಗೆ ಉತ್ತಮ ಸಂಬಂಧವನ್ನು ಹೊಂದಿರಬೇಕು ಎಂದು ಶ್ರೀಮತಿ ಸೀತಾರಾಮನ್ ಸಲಹೆ ನೀಡಿದರು. ಉದ್ಯೋಗಿಗಳು ತಮ್ಮ ಗ್ರಾಹಕರೊಂದಿಗೆ, ವಿಶೇಷವಾಗಿ ಗ್ರಾಮೀಣ ಮತ್ತು ಅರೆ-ನಗರ ಪ್ರದೇಶಗಳಲ್ಲಿ ಸಂಪರ್ಕ ಸಾಧಿಸುವುದನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ಕೇಂದ್ರ ಹಣಕಾಸು ಸಚಿವರು ಬ್ಯಾಂಕುಗಳನ್ನು ಒತ್ತಾಯಿಸಿದರು. ಉದಯೋನ್ಮುಖ ಕ್ಷೇತ್ರಗಳಲ್ಲಿ ಉತ್ತಮ ಅಭ್ಯಾಸಗಳನ್ನು ಹಂಚಿಕೊಳ್ಳುವ ಮೂಲಕ ಆಯಾ ಸಾಮರ್ಥ್ಯಗಳನ್ನು ಬಳಸಿಕೊಳ್ಳಲು ಸಹಯೋಗವನ್ನು ಅನ್ವೇಷಿಸುವಂತೆ ಮತ್ತು ಬ್ಯಾಂಕಿಂಗ್ ಕ್ಷೇತ್ರದ ಬದಲಾವಣೆಗಳಿಗೆ ಅನುಗುಣವಾಗಿ ತಮ್ಮನ್ನು ಸಜ್ಜುಗೊಳಿಸುವಂತೆ ಶ್ರೀಮತಿ ಸೀತಾರಾಮನ್ ಪಿಎಸ್ಬಿಗಳನ್ನು ಆಗ್ರಹಿಸಿದರು.

ಆಸ್ತಿಯ ಗುಣಮಟ್ಟವನ್ನು ಸುಧಾರಿಸಲು ಬ್ಯಾಂಕುಗಳು ಮಾಡಿದ ಪ್ರಯತ್ನಗಳನ್ನು ಶ್ಲಾಘಿಸಿದ ಶ್ರೀಮತಿ ಸೀತಾರಾಮನ್, ಎನ್ ಸಿ ಎಲ್ ಟಿ ಮತ್ತು ಎನ್ ಎ ಆರ್ ಸಿ ಎಲ್ ನೀಡುವ ಪರಿಹಾರ ಮತ್ತು ಚೇತರಿಕೆಯ ವ್ಯಾಪ್ತಿಯನ್ನು ಉತ್ತಮಗೊಳಿಸುವಂತೆ ಸಲಹೆ ನೀಡಿದರು.

ಡಿಜಿಟಲ್ ಪಾವತಿ ಮತ್ತು ಸೈಬರ್ ಭದ್ರತಾ ಚೌಕಟ್ಟಿಗೆ ಸಂಬಂಧಿಸಿದ ವಿಷಯಗಳ ಬಗ್ಗೆಯೂ ಸಭೆಯಲ್ಲಿ ಚರ್ಚಿಸಲಾಯಿತು. ಸೈಬರ್ ಭದ್ರತೆಯ ಸಮಸ್ಯೆಗಳನ್ನು ವ್ಯವಸ್ಥಿತ ದೃಷ್ಟಿಕೋನದಿಂದ ನೋಡಬೇಕು ಎಂದು ಕೇಂದ್ರ ಹಣಕಾಸು ಸಚಿವರು ಸಲಹೆ ನೀಡಿದರು ಮತ್ತು ಸೈಬರ್-ಅಪಾಯಗಳನ್ನು ಗಣನೀಯವಾಗಿ  ತಗ್ಗಿಸುವಿಕೆಯನ್ನು ಜಾರಿಗೆ ತರಲು ಬ್ಯಾಂಕುಗಳು, ಸರ್ಕಾರ, ನಿಯಂತ್ರಕರು ಮತ್ತು ಭದ್ರತಾ ಸಂಸ್ಥೆಗಳ ನಡುವಿನ ಸಹಯೋಗದ ವಿಧಾನದ ಅಗತ್ಯವಿದೆ ಎಂದು ಒತ್ತಿ ಹೇಳಿದರು. ಬ್ಯಾಂಕ್ ವ್ಯವಸ್ಥೆಗಳ ಭದ್ರತೆಯನ್ನು ನಿರ್ಲಕ್ಷ ಮಾಡಲಾಗದು ಅಥವಾ ಆ ನಿಟ್ಟಿನಲ್ಲಿ ರಾಜಿ ಮಾಡಿಕೊಳ್ಳುವುದಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಐಟಿ ವ್ಯವಸ್ಥೆಯ ಪ್ರತಿಯೊಂದು ಅಂಶವನ್ನು ಸೈಬರ್ ಭದ್ರತಾ ಕೋನದಿಂದ ನಿಯತಕಾಲಿಕವಾಗಿ ಮತ್ತು ಸಂಪೂರ್ಣವಾಗಿ ಪರಿಶೀಲಿಸಬೇಕು ಎಂದು ಕೇಂದ್ರ ಹಣಕಾಸು ಸಚಿವರು ಒತ್ತಾಯಿಸಿದರು.

ವಿವಿಧ ಯೋಜನೆಗಳ ಮೂಲಕ, ಪಿರಮಿಡ್ ನ ಕೆಳಭಾಗದಲ್ಲಿರುವ ನಾಗರಿಕರಿಗೆ ಅವರ ಜೀವನೋಪಾಯವನ್ನು ಬೆಂಬಲಿಸಲು ಮತ್ತು ಜೀವನವನ್ನು ಸುಧಾರಿಸಲು ಸಾಲದ ಪ್ರವೇಶವನ್ನು ಸುಗಮಗೊಳಿಸಲು ಸರ್ಕಾರ ಸದಾ  ಪ್ರಯತ್ನಿಸಿದೆ ಎಂಬುದರತ್ತ  ಶ್ರೀಮತಿ ಸೀತಾರಾಮನ್ ಬೆಟ್ಟು ಮಾಡಿದರು. ಡಿಜಿಟಲ್ ಹೆಜ್ಜೆಗುರುತುಗಳು ಮತ್ತು ನಗದು ಹರಿವಿನ ಆಧಾರದ ಮೇಲೆ ಎಂಎಸ್ಎಂಇಗಳಿಗೆ ಹೊಸ ಸಾಲ ಮೌಲ್ಯಮಾಪನ ಮಾದರಿ ಸೇರಿದಂತೆ ಇತ್ತೀಚಿನ ಬಜೆಟ್ ಪ್ರಕಟಣೆಗಳನ್ನು ತ್ವರಿತವಾಗಿ ಜಾರಿಗೆ ತರುವಂತೆ ಅವರು ಬ್ಯಾಂಕುಗಳನ್ನು ಆಗ್ರಹಿಸಿದರು. ಪಿಎಂ ಸೂರ್ಯ ಘರ್ ಮುಫ್ತ್ ಬಿಜ್ಲಿ ಯೋಜನೆ ಮತ್ತು ಪಿಎಂ ವಿಶ್ವಕರ್ಮ ಯೋಜನೆಯಂತಹ ಕೇಂದ್ರ ಸರ್ಕಾರದ ವಿವಿಧ ಉಪಕ್ರಮಗಳ ಅಡಿಯಲ್ಲಿ ಅರ್ಹ ಫಲಾನುಭವಿಗಳಿಗೆ ಸಾಲದ ಹರಿವನ್ನು ಮತ್ತಷ್ಟು ಹೆಚ್ಚಿಸುವತ್ತ ಗಮನ ಹರಿಸುವಂತೆ ಕೇಂದ್ರ ಹಣಕಾಸು ಸಚಿವರು ಬ್ಯಾಂಕುಗಳಿಗೆ ಸೂಚನೆ ನೀಡಿದರು.

ಭದ್ರತೆಯಾಗಿ ನೀಡಲಾಗಿದ್ದ  ದಾಖಲೆಗಳನ್ನು ಸಾಲಗಳನ್ನು ಮುಕ್ತಾಯಗೊಳಿಸಿದ ನಂತರ ಹಸ್ತಾಂತರಿಸುವ ಬಗ್ಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ ಮಾರ್ಗಸೂಚಿಗಳ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳಲು ಕೇಂದ್ರ ಹಣಕಾಸು ಸಚಿವರು ಬ್ಯಾಂಕುಗಳಿಗೆ ಸಲಹೆ ನೀಡಿದರು ಮತ್ತು ಗ್ರಾಹಕರಿಗೆ ದಾಖಲೆಗಳನ್ನು ಹಸ್ತಾಂತರಿಸುವಲ್ಲಿ ಯಾವುದೇ ವಿಳಂಬವಾಗಬಾರದು ಎಂದು ನಿರ್ದೇಶನ ನೀಡಿದರು.

*****