Ka Myntri Sorkar Pdeng ba dei khmih ia ki tnad Kam Pla Tyngka bad Corporate Affairs, Nirmala Sitharaman ka la pyniaid ia ka jingialang ha New Delhi mynta ka sngi ban peit ia ki jingtreikam ki Public Sector Bank (PSB) ha kaba iadei bad ki kam pisa, ka jingkhring ia ki jingkynshew pisa, ki jingsiew digital bad ki kam kiba iadei bad ka jingshngain ha ki kam cyber, ha ryngkat ka jingpeit ia ka jingioh lad ban shim ram hapoh ka jingplie lad ia baroh ban iadon bynta bad ruh kiwei kiwei ki kam kiba iadei bad ki PSB.

Ha kane ka jingialang la wan iashim bynta lang ruh da u Dr. Vivek Joshi, Secretary; M. Nagaraju, Secretary-Designate, ka Tnad Financial Services; ki khliehduh jong ki Public Sector Bank (PSB) ha ryngkat ki ophisar jong ka Tnad Financial Services.

Ha kane ka jingialang la iohi ba ha u snem mang tyngka 24, ki PSB ki la treikam bha ha baroh ki kam kiba iadei bad ka pisa bad kane ka paw lyngba ka jingkiew ki jingdon jingem ha kaba ki Net NPA (NNPA) ki la hiar sha ka 0.76%, ka jingdon pisa ha ki bank haduh 15.55%, ka Net Interest Margin (NIM) jong ki bank kaba 3.22%, bad ka jingbun tam ka jingiohnong net aggregate kaba T. 1.45 lak klur ha kaba ka dividend ka long 27,830 klur na ka bynta ki shareholder. Ki jingkiew ha ki kam ki jam ki la kyntiew ruh ia ka bor jong ki PSB ba kin pynmih pisa na ki iew.

Ha ka jingiakren shaphang ka jingkhring ia ki jingkynshew pisa, ka Myntri ka la ong ba katba ka jingshim ram ka la kiew, dang lah ban pynbun shuh shuh ki jingkynshew pisa ban kyrshan ia ka jingkiew ka jingshim ram bad kumta ka la bthah ia ki bank ba kin sdang ia kin pynlong ia ki prokram ba kyrpang ban khring ia ka jingkynshew pisa; Ka Sitharaman ka la ai jingmut ruh ia ki PSB ba kin kyntiew ia ka jingiadei bad ki briew na ka bynta ka jingai jingshakri ba kham bha. Ka Myntri ka la kyntu ruh ia ki Bank ba kin pynthikna ba ki nongtrei ki iakren bad ki briew, khamtam ha ki jaka nongkyndong bad ki jaka khap sor. Ka Sitharaman ka la kyntu ruh ia ki PSB ba kin peit ia ka jingiatreilang ban pyndonkam lang ia ki bor treikam da kaba iasam ia ki rukom treikam ba biang tam bad ba kin pynthymmai ia ki jingtreikam katkum ki jingkylla ba dang wan ha ki kam kiba iadei bad ki bank.

Ka la iaroh ia ki sienjam jong ki bank ban kyntiew ia ki jingdon jingem bad ka la ai jingmut ia ki ba kin pyndonkam ia ki lad jong ki jingpynbeit bad ki jingioh biang ia ka pisa kiba don ha ka NCLT bad NARCL.

La iakren ruh shaphang ki jingsiew digital bad ka jingshngain ha ki kam security ha kane ka jingialang. Ka Myntri ka la ong ba dei ban peit bha ia ka jingshngain ha ki kam cyber bad ka la ban jur halor ka jingiatreilang ki bank, ka Sorkar ki nongpyniaid kam bad ki kynhun ai jingshngain khnang ban pynbiang ia ki jingshngain na ki jingma kiba don ha ki kam cyber. Ka Myntri ka la kyntu ruh ba dei ban peit biang na ka por sha ka por ia baroh ki bynta kiba iadei bad ka kam IT na ka bynta ka jingshngain ha ki kam cyber khnang ban pynthikna ba ki bank kim shah ktah ha ki kam beain.

Ka Sitharaman ka la ong ba ka Sorkar, lyngba ki skhim bapher bapher, ka la pyrshang ban plié lad shim ram ia ki briew kiba shem jingeh tam khnang ban kyrshan ia ka kamai kajih jong ki bad kyntiew ia ka jingim jong ki. Ka la ong ruh ia ki bank ba ki dei ban pynsted ban pyntreikam ia ki jingpynbna ha ka mang tyngka ba dang shu dep, ba kynthup ia ka rukom peit ba thymmai kumno ban ai ram ia ki MSME ba don nongrim ha ki kam digital bad ka jingtyllun ka pisa. La bthah ruh ia ki bank ba kin peit bniah ia ka jingkyntiew shuh shuh ki lad ioh shim ram ia kito kiba dei ban ioh ia kane hapoh ki sienjam kum ka PM Surya Ghar Muft Bijli Yojana bad PM Vishwakarma Yojana.

Ka Myntri ka la ai jingmut ruh ia ki bank ba kin pynthikna ba ki bud ia ki kyndon jong ka Reserve Bank of India ha kaba iadei bad ka jingpynphai ia ki kot ki sla haba la pyndep ia ki jingsiew ia ki ram bad ka la ong ba ym dei ban pynslem ban pynphai ia kine ki kot ki sla sha ki briew.

****