U Myntri Sorkar Pdeng ba dei khmih ia ki tnad Kam PohIing bad Cooperation Amit Shah u la plié paidbah ia ka 'Tiranga Yatra' ba la pynlong da ka Ahmedabad Municipal Corporation AMC) ha Ahmedabad. Shibun ki kynrem ki lyndan ba kynthup ia u Myntri Rangbah ka Gujarat, Bhupendra Patel ki la iadonlang ha kane ka sngi.

Ha kane ka sngi, u Shah u la ong ba ka Har Ghar Tiranga campaign ba la sdang da u Myntri Rangbah Duh, Narendra Modi ka la kylla sha ka dak jong ka jingieid ri bad ka dak jong ka jingkut jingmut ban tei ia ka India kaba khraw bad kaba la kiew shaphrang shuwa u 2047. U la ong ba kane ka campaign ka la wanrah ia ka bor kaba thymmai ha Gujarat bad ha baroh kawei ka ri.

U Myntri u la ong ba ha ka 15 tarik u Nailar, ngin poi sha u snem ba 78 jong ka jingioh jinglaitluid bad ha kane ka por, ym dei ban don kano kano ka iing ne ka ophis ha Gujarat ha kaba ym don ka lama jong ka ri. U la ong ba la sdang ia kane ka Tiranga Yatra khnang ba baroh kawei ka Gujarat ka dap da ka lama jong ka ri bad lyngba kane, ka jingieid ri ka wan ha ka jingmut jingpyrkhat jong baroh ki briew ka Gujarat bad jong ka ri.

U Amit Shah u la ong ba haba u Myntri Rangbah Duh u la rai ban rakhe ia ka Azadi Ka Amrit Mahotsav, ki la don lai tylli ki thong hadien kane. Ka thong kaba nyngkong ka dei ban pynkynmaw ia baroh ki khynnah, samla bad briew jong ka ri shaphang ka histori jong ka jingiakhun na ka bynta ka jinglaitluid. Ka thong kaba ar ka dei ban ai jingtip ia baroh ki briew jong ka ri, khamtam kito kiba dang kham khynnah, shaphang ki jingjop jong ka ri ha ki 75 snem jong ka jingioh jinglaitluid. Ka thong kaba lai ka dei ban pynbam smai ia 140 klur ngut ki briew jong ka ri ba kin pynkylla ia ka India sha ka lahduh ha baroh ki kam da kaba trei ban wanrah ia ka roi ka par ha ka ri ha kine ki 25 snem ban wan jong ka ‘Amrit Kaal’ haduh da dap shispah snem ka jingioh jinglaitluid ka India.

U Myntri u la ong ba hadien ka campaign jong ka ‘Azadi Ka Amrit Mahotsav’, la pynlong ia ka ‘Har Ghar Tiranga Yatra’ man u snem ban pynkynmaw ia ka jingkut jingmut ban pynlong ia ka India kum ka lahduh ha ka ‘AmritKaal’. U la ong ba mynta, ha kane ka por, ngi ai burom ia kito kiba la lenlade na ka bynta ka jinglaitluid jong ka ri.

U Amit Shah u la ong ba hapoh ka jingialam jong u Myntri Rangbah Duh, Narendra Modi ha kine ki 10 snem ba la dep, ka India ka la ioh shibun ki jingjop kiba la pynlyngoh ia ka pyrthei. U la ong ba hapoh ka jingialam jong u Myntri Rangbah Duh, ka lama jong ka ri ka la poi sha ka South Pole jong u bnai. U Shah u la ong ba ka India ka hap mad ia ki kam pyntriem bad ki kam Naxal da ki phew snem, hynrei u Modi u la ai ka jubab kaba biang ia ki nongshun jong ka ri da kaba wanrah ia ki surgical strike bad ki air strike. Ha ryngkat kane, u Modi u la iada ia 130 klur ngut ki briew jong ka ri na ka khlam Covid-19 da kaba ai baroh ar dose ki dawai tika khlem da hap ai jingsiew da kaba pyndonkam ia ka teknoloji.

U Shah u la ong ba katkum ka jingthmu jong u Myntri Rangbah Duh, Narendra Modi, ki samla jong ka ri ki hap ban wan shakhmat ban pynurlong ia ka jingkut jingmut ban pynlong ia ka India kum ka rikaba la kiew shaphrang shuwa u 2047. U la ong ba mynta, haba iohi ia ka lama jong ka ri ha ki kti jong baroh, imat baroh kawei ka Gujarat ka iasohlang bad kane ka jingkut jingmut bad ki dap da ka jingieid ri.

U Amit Shah u la ong ba u Myntri Rangbah Duh u la sdang ia ka ‘Har Ghar Tiranga’ naduh ka 9 haduh 15 tarik u Nailar. U la ong ba ngi dei ban iasoh bad kane ka campaign da kaba pynher ia ka lama jong ka ri ha ki iing, ki ophis, ki karkhana jong ngi ha ryngkat kiwei kiwei ki jaka bad shon selfie ia kane. U Shah u la ong ba lyngba kane ka campaign, ngi dei ban iasoh bad ka jingkut jingmut ban pynim ia ka jingieid ri ha ki briew jong ka ri bad pynlong ia ka India kum ka rikaba la kiew shaphrang. U la ong ba u Myntri Rangbah Duh u la kyntu ruh ban kyntiew ia ka jingpyndonkam ia ka Khadi ha ka ri bad kyntiew ia ka khaii pateng lyngba kane. U la ong ba ngi dei ban pynurlong ia ki jingong ‘Khadi na ka bynta ka Ri, Khadi na ka bynta ka Riam ka Beit’ bad ‘Har Ghar Tiranga, Har Ghar Khadi’ (Ka lama jong ka ri, ka Khadi ha man ka iing).

*****