রাস্ত্রপতিগী লোইশঙ
ভারতকী ইকায় খুম্ননীংঙাই ওইরবা রাস্ত্রপতি শ্রীমতি দ্রৌপদি মুর্মুনা 78শুবা নীংতম নুমিৎকা মাংওইননা লৈবাক মীয়ামদা থমখিবা ৱারোল
Posted On:
14 AUG 2024 7:37PM by PIB Imphal
ঐহাক্কী নুংশিরবা ইরৈচাশিং,
ঐহাক্না ময়াম পুম্নমকপু নীংতম নুমিৎকী য়াইফ পাউজেল পীজরি।
লৈবাক অসিনা 78শুবা নীংতম্বা নুমিৎ পাংথোক্নবা শেম-শাদুনা লৈরিবসি উবদা ঐহাক নুংঙাইবা ফাওই। থৌরম অসিদা লাল কিল্লাদা, রাজ্যশিংগী কোনুংদা নৎত্রগা লৈকায় লৈকায়দা মচু অহুমগী ফিরাল পায়হন্নরিবা অসি উবা ফংবদা ঐখোয়গী থম্মোয়দা মতম পুম্নমক্তা নুংঙাইবা ফাওই। মসি ভারত মচা বিল্লিয়ন 1.4 হেনবগা লোয়ননা ঐখোয়গী চাউরবা লৈবাক অসিগী শরুক অমা ওইবগী নুংঙাইবা ফোঙদোকপনি। ঐখোয়না ঐখোয়গী ইমুং মনুংগা লোয়ননা তোঙান-তোঙানবা কুহ্মৈশিং পাংথোকপগুম্না, ঐখোয়না ঐখোয়গী নীংতম নুমিৎ অমসুং গনতন্ত্র নুমিৎ অসি ঐখোয়গী মরুপ-মপাং ওইরিবা ঐখোয়গী ইমুং মনুংগা লোয়ননা পাংথোক্লি।
ওগস্ত 15দা, লৈবাক অসিগী মফম খুদিংমক্তা অমসুং মপানগী মফমশিংদসু, ভারত মচাশিংনা ফিরাল চিংখৎপগী থৌরমশিংদা শরুক য়াগনি, লৈবাক নীংবগী ঈশৈ শক্লগনি, অমসুং অথুম অহাওশিং য়েন্থোক্কনি। অপীকপা অঙাংশীংনা কলচরেল ইভেন্তশীংদা শরুক য়াগনি। মখোয়না ঐখোয়গী অথোইবা লৈবাক অসিগী মরমদা অমসুং মসিগী নাগরিক ওইবগী খুদোংচাবশিংগী মতাংদা ৱা ঙাংবদা, ঐখোয়না মখোয়গী ৱাহৈদা ঐখোয়গী অথৌবা নীংতম লান্মীশিংনা হায়রম্বশিং অদু অমুক্কা হন্না তাবা ফংলি। নীংতম ইহৌদা শরুক য়াখিবশিংগী মঙলান অমসুং লৈবাক অসিনা লাক্কদৌরিবা মতমশিংদা অমুক্কা হন্না ঙান্থোইরকপগী মতৌ উবা ফংগদৌরিবশিংবু অমত্তা ওইনা পুন্দুনা থম্লিবা থৌরী অদুগী শরুক অমা ঐখোয়শু ওইরি হায়বা ঐখোয়না খঙলে।
পুৱারীগী ইচেল অসিদা ঐখোয়না শরুক য়ারি হায়বা খঙবসিনা ঐখোয়বু ৱাখল তাহল্লি। মসিনা ঐখোয়দা লৈবাক্না মীরম লৈঙাক্কী মীখা পোল্লম্বগী মতম অদুবু নীংশিংহল্লি। লৈবাক নীংবা অমসুং থৌনা ফরবা মীওইশিংনা অচৌবা শিংনবা কয়া মাইয়োক্নখি অমসুং খ্বাইদগী চাউবা কত্থোকপশিং থৌওং পাংথোকখি। ঐখোয়না মখোয়বু ইকায় খুম্নবা উৎচরি। মখোয়না লেপ্পা লৈতনা হোৎনখিবশিংনা ভারতপু চহি কয়া তুমদুনা লৈরম্বদগী মীকপ থোকহল্লি। নম্থদুনা মতম শাংনা লৈরুরবা তোঙান-তোঙানবা চৎনবী অমসুং ভেল্যুশিংনা ঐখোয়গী শক্নাইরবা লুচিংবা কয়াগী খুত্থাংদা অমুক্কা হন্না শাফোংলকখি। জাতিগী মপা অমসুং নাইতোম ঙাল্লিবা ঐখোয়গী থৱানমিচাক ওইরিবা মহাত্মা গান্ধীনা চৎনবী কয়া অমসুং খোল্লাও কয়াবু অমত্তা ওইনা পুনশিনবীখি।
সরদার পতেল, নেতাজী সুভাস চন্দ্র বোস অমসুং বাবাসাহেব অম্বেদকরগা লোয়ননা ভগৎ সিংহ, চন্দ্রশেখর আজাদ অমসুং অতৈ কয়াগুম্বগী অফবা লুচিংবশিংসু লৈরম্মি। মসিদি লৈবাক্কী খুন্নাই পুম্বনা শরুক য়াখিবা লৈবাক শিনবা থুংবগী ইহৌ অমা ওইখি। ত্রাইবেলশিংগী মরক্তা, তিলকা মানঝী, বীরসা মুন্দা, লক্ষ্মন নায়ক অমসুং ফুলো-ঝানোশু য়াওরি, অমসুং মখোয়গী কত্থোকপশিং অদু হৌজিক থাগৎপা ফোংদোক্লি। ঐখোয়না ভগবান বির্সা মুন্দাগী মপোক কুমওনবু জনজাতি গৌরব দিবস ওইনা পাংথোকপা হৌরে। মথং চহিদা মহাক্কী 150শুবা মপোক কুমওন পাংথোকপা অসিনা লৈবাকপু মীকপ থোকহনখিবদা মহাক্না য়াখিবা থৌদাংবু ইকায় খুম্নবগী অহেনবা খুদোংচাবা অমসু ওইরগনি।
ঐহাক্কী নুংশিরবা ইরৈচাশিং,
ঙসি, ওগস্ত 14দা, লৈবাক অনি থোক্না খায়দোকখিবগী অকী তুজুংলবা থৌদোকশিংবু নীংশিংবা নুমিৎ ওইনা লৈবাক অসিনা বিভাজন বিভিষিকা স্মৃতি দিবস পালন তৌরি। চাউরবা লৈবাক অসিবু শরুক অনি থোক্না খায়দোকখিবা মতমদা, মীওই মিলিয়ন কয়াবু নম্ফুদা ময়ুম হোংহনখি, মীওই লাক্ষ কয়ানা মখোয়গী পুন্সি মাংখি। নীংতম্বা নুমিৎ পাংথোক্ত্রিঙৈগী নোংমা মমাংসিদা, চাংদম্ননীংঙাই লৈত্রবা মওংদা মীওইবা খুন্নাইনা অৱা-অনা কয়া নংখিববু নীংশিংলি অমসুং মসিনা শোকহনখ্রবা মীওইশিংগী ইমুং মনুংগা অমত্তা ওইনা লেপ্লি।
ঐখোয়না সংবিধানগী 75শুবা চহি অসি পাংথোক্লি। অনৌবা নীংতম্বা লৈবাক অসিগী খোঙচৎ অসিদা অৱাবা কয়া মায়োক্নখি। অচুম্বা, চপ মান্নবা, নীংতম্বা অমসুং ইচিল ইনাও ওইবগী সংবিধানগী ৱাখল্লোনদা চেৎনা লেপ্লদুনা, ঐখোয়না ভারতপু মালেমগী থাক্তা মসিগী অচুম্বা মফম অদু অমুক হন্না ফংবা ঙমহন্নবা মিসন অমা পায়খৎলি।
চহি অসিদা ঐখোয়গী লৈবাক অসিদা জেনরেল ইলেক্সন পাংথোকপা মতমদা, ভোৎ থাদবা য়াবা মীশিংগীনা চাউরাক্না করোর 97 ওইখি। মসিদি পুৱারীগী ওইবা রেকোর্দ অমনি, মসিনা মীওইবা খুন্নাইনা উখিবা খ্বাইদগী চাউবা মীখল পাংথোকপগী থৌরম অমা ওইহনখি। অসিগুম্বা অচৌবা থৌরম অসি শোইদনা অমসুং অশোয়-অঙাম লৈতনা পাঙথোকপগীদমক ভারতকী ইলেক্সন কম্মিসনবু থাগৎপা ফোংদোকচরি। অইং-অশা কয়া থৌনা ফনা মাইয়োক্নদুনা ইলেক্তরশিংবু মতেং পাংখিবা ওফিসিএলশিং অমসুং সেক্যুরিতী পর্সোনেল পুম্নমক্তা ঐহাক্না থাগৎপা ফোংদোকচরি। অসিগুম্বা মীশিং য়াম্লবা মীওইশিংনা মখোয়গী ভোৎ থাদবগী হক অদু শীজিন্নরকপা মতমদা, মসিনা গনতন্ত্রগী ৱাখল্লোন্দা চাউনা থাজবা থম্লি হায়বা উৎখি। ভারতনা মায় পাক্না মীখল পাঙথোকপা অসিনা মালেমগী গনতন্ত্রগী শক্তিশিংবু মপাঙ্গল কনখৎহল্লি।
ঐহাক্কী নুংশিরবা ইরৈচাশিং,
ইং 2021দগী 2024 ফাওবদা, ভারত অসি চহি খুদিংগী চাদা 8কী চাংচত্তা চাউখৎলক্লিবা মরুওইবা শেন্মিৎলোনশিংগী মরক্তা অমা ওইখি। মসিনা মীয়ামগী খুৎতা শেল হেন্না ফংহনবতা নত্তনা পোভর্তী লাইনগী মখাদা লৈরিবা লাইরবশিংগী মশিংসু য়াম্না হন্থহল্লে। লাইরবগী অৱাবা মায়োক্নরিবা মীওইশিংবু মতেং পাংনবা হোৎনবতা নত্তনা মখোয়বু লাইরবগী খয়াত্তগী পুথোক্লক্নবা ঐখোয়না অঙম্বা থাক্তা হোৎনরি। খুদম ওইনা, কোবিদ-19গী অহানবা তাঙ্কক্তা হৌদোকখিবা পি.এম. গরীব কলয়ান অন্না য়োজনা অসিনা চাউরাক্না মীওই করোর 80দা লেম্না রাসন ফংহল্লি অমসুং লাইরবগী খয়াত্তগী পুথোকপা ঙমখ্রবা মীওইশিংবু লাইরবগী খয়াত্তা অমুক হন্না তাহন্দনবা থৌদাং য়ারি।
ভারতনা মালেমগী খ্বাইদগী মঙাশুবা চাউবা শেন্মিৎলোন ওইরকপা হায়বসি ঐখোয় পুম্নমক্কী চাউথোকচনীংঙাইনি, লোয়ননা, ঐখোয়না অথুবা মতমদা মালেমগী খ্বাইদগী অহুমশুবা চাউবা শেন্মিৎলোন ওইনবা শেম-শাদুনা লৈরি। মসিদি লৌমী অমসুং শিন্মীশিংনা লেপ্পা লৈতনা হোৎনবনা, প্লানর অমসুং শেন্মিৎলোন শেম্বা মীওইশিংনা অশানবা মিৎয়েং য়েংবা, অমসুং মিৎয়েং শানবা লুচিংবশিংনা ওইথোকহনখিবনি।
ঐখোয়গী অন্নদাতা ওইরিবা লৌমীশিংনা লৌউ-শিংউগী পোত্থোক অসি পাম্লিবা অসিদগী হেন্না ফগৎহন্নবা হোৎনরি। মসিগী খুত্থাংদা, মখোয়না ভারতপু লৌউ-শিংউদা মরোমদোম লেপচবা ঙমহন্দুনা অমসুং ঐখোয়গী মীয়ামগী চানবা পীবদা চাউনা মতেং পাংলি। ইনফ্রাস্ত্রকচর অসি হৌখিবা চহিশিংদা মশক থোক্না চাউখৎখ্রে। স্ত্রেতজিক ওইবা প্লান্নিং অমসুং ইফেক্তিব ইন্সতিত্যুসনশিংনা লম্বী অমসুং হাইৱেজ, রেলৱেজ অমসুং হিথাংফমশিংগী নেৎৱার্ক পাকথোক চাউথোকহনবদা মতেং পাংলি। ফ্যুচরস্তিক তেক্নোলোজীগী অচৌবা মতিক অসি য়েংলগা, সরকারনা সেমিকন্দক্তর অমসুং আর্তিফিসিএল ইন্তেলিজেন্সকুম্বা সেক্তর কয়া অমা মপুং ফানা তেংবাংবগা লোয়ননা লৈবাক্কী শাহৌদা তেংবাংবা ঙমগদবা স্তার্তঅপশিংগী অফবা ইকোসিস্তেম অমা শেমগৎলি। মসিনা ভারতপু ইনভেস্তমেন্তকীদমক্তা হেন্না পাম্নবা মফম অমা ওইহল্লে। নুং পান ফাওনা উবগী অহেনবা মতৌগা লোয়ননা, বেঙ্কিং অমসুং ফাইনান্সিএল সেক্তরগী থবক নীংথিজনা পাংথোকপা হেল্লে। হায়রিবা ৱাফমশিং অসিনা ভারতপু চাউখৎলবা লৈবাকশিংগী মরক্তা পুখৎপা ঙমগদবা নেক্স জেনেরেসন ইকোনোমিক রিফোর্ম অমসুং ইকোনোমিক গ্রোথকীদমক্তা ফম্বাক অমা শেমখ্রে।
মসিগুম্বা খোঙজেল য়াংবা অমসুং মান্নবা থাক্তা খুমাং চাওশিল্লকপনা ভারতপু মালেমগী থবক থৌরমশিংদা হেন্না ৱাংবা থাক্তা লৈহল্লে। জি-20গী প্রসিদেন্সী মায় পাক্না লোইশিনখ্রবা মতুংদা, ভারতনা গ্লোবেল সাউথকী ভোইস অমা ওইনা লৌরিবা থৌদাং অসিবুশু মপাঙ্গল কনখৎহনখ্রে। মালেমগী শান্তি অমসুং নুংঙাই য়াইফবগী মতৌ হেনগৎহন্নবা ভারতনা ইথিল অসি শিজিন্নবগী পান্দম থম্লি।
ঐহাক্কী নুংশিরবা ইরৈচাশিং,
ঐখোয়না ঐখোয়গী সংবিধানগী মশক-মওং শেম্লম্বা দাঃ বি.আর. অম্বেদকরবু নীংশিংফম থোক্লি। মহাক্না য়াম্না চুম্না হায়রম্মি অমসুং ঐহাক্না মহাক্কী ৱারোল অমুক থমজরি, "ঐখোয়না ঐখোয়গী পোলিতিকেল দেমোক্রেসী অসিবু সোসিএল দেমোক্রেসী অমসু ওইহনগদবনি। পোলিতিকেল দেমোক্রেসী অসি মসিগী য়ুম্ফমদা সোসিএল দেমোক্রেসী লৈত্রবদি তুং কোইবা ঙম্লোই”। (রাস্ত্রপতিগী ৱাফমদা অমুক লাকপা) পোলিতিকেল দেমোক্রেসীনা লেপ্পা লৈতনা খুমাং চাওশিল্লকপনা সোসিএল দেমোক্রেসীবু মশাগী থাক্তা লৈহনবগী মায়কৈদা খুমাং চাওশিল্লকপগী খুদম ওইরি। খুন্নাইগী পুন্সিগী হীরম খুদিংমক্তা পুম্নমকপু য়াওহনবগী ৱাখল্লোন অসিবু মপুং ফাহল্লি। ঐখোয়না ঐখোয়গী দাইবর্সিতী অমসুং প্লুরেলিতীগা লোয়ননা লৈবাক অমা ওইনা পুন্না চৎমিন্নরি। য়ানবা পুরক্তুনা হোৎনমিন্নবগী থৌওং অসিবু ইনক্লুজনগী খুৎলাই অমা ওইনা মপাঙ্গল কনখৎহনগদবনি। ঐখোয়গী লৈবাক্কুম্বা অচৌবা লৈবাক অসিদা, খুন্নাইগী থাক ৱাংখৎলকপগী মতুং ইন্না থাক মান্নদবগী থৌওং লৈবগী ৱাখল্লোন অসি ঐখোয়না ইল্লোইদবনি।
সোসিএল জস্তিস অসি সরকারগী খ্বাইদগী মরুওইবা মিৎয়েংনি অমসুং মসিনা সেদ্যুল কাস্ত, সেদ্যুল ত্রাইব অমসুং খুন্নাইগী অতোপ্পা লাপথোক্লবা কাংলুপশিংগী য়াইফ-থৌরাংগী মতাংদা মমাংদা অমুক্তা পাংথোকখিদ্রিবা থবক কয়া পায়খৎলে। খুদম ওইনা, প্রধান মন্ত্রী সমাজিক উত্থান ইভাম রোজগার আধারিত জনকলয়ান, হায়বদি পি.এম.-সুরাজ, অসিনা লায়রবা কাংলুপকী মীওইশিংদা হকথেংননা শেলগী তেংবাং পীনবা পান্দম থম্লি। প্রধান মন্ত্রী জনজাতি আদিবাসি ন্যাই মহা অভিয়ান নৎত্রগা পি.এম.-জনমাননা, মরুওইনা, খুদোংচাদবা ত্রাইবেল গ্রুপশিং, হায়বদি পি.ভি.তি.জি.শিংগী সোসিও-ইকোনোমিক কন্দিসনশিং ফগৎহন্নবা মরুওইবা ইন্তরভেন্সনগীদমক মাস কেম্পেনগী মওং অমা লৌখ্রে। নেস্নেল এক্সন ফোর মেকানাইজ সেনিতেসন ইকোসিস্তেম নৎত্রগা নমস্তে স্কিম্না সেনিতেসন ৱার্কর অমত্তনা সিৱর অমসুং সেপ্তিক তেঙ্কশিং শেংদোকপগী খুদোংথিনিংঙাই ওইবা থবক অসি খুৎনা তৌরোইদবনি হায়বা খঙহল্লি।
‘জস্তিস’ হায়বা ৱাহৈ অসি য়ারিবমখৈ পাক চাউনা লৌরবদি মসিদা তোঙান তোঙানবা সোসিএল ফেক্তর কয়া য়াওরি। ঐহাক্না মখোয়গী মরক্তগী হীরম অনি, মরুওইনা, জেন্দর জস্তিস অমসুং ক্লাইমেৎ জস্তিসতা মীয়ামগী পুক্নিং চিংশিনবা পাম্মি।
ঐখোয়গী খুন্নাইদা নুপীশিং অসি মান্নবা থাক খক্তা নত্তনা মান্নবা থাক্তদগীশু হেল্লি হায়না লৌনৈ। অদুবু, মখোয়না চৎনবীগী মতুং ইন্না হন্থনা য়েংবগী থৌওং কয়াগী অৱাবা মাইয়োক্নরি। অদুবু সরকার অসিনা নুপীশিংগী য়াইফ-থৌরাং অমসুং নুপীশিংবু শক্তি লৈহনবদা চপ মান্নবা মরু ওইবা পীরিবা অসিদা ঐহাক নুংঙাইবা ফাওই। মসিগীদমক পাংথোকপা বজেৎ এলোকেসন অসি হৌখিবা চহি তরা অসিদা শরুক অহুম হেনগৎখ্রে। লেবর ফোর্সতা মখোয়গী শরুক য়াবগী চাং হেনগৎলক্লি। মসিগী মায়কৈ অসিদা খ্বাইদগী পুক্নিং থৌগৎনীংঙাই ওইবা থৌওং অসিদি পোকপা মতমদা নুপা-নুপীগী মশীংগী চাং অসি য়াম্না ফগৎলকপা অসিনি। নুপীশিংবু মরুওইনা থমদুনা সরকারগী অখন্নবা তোঙান-তোঙানবা স্কিম কয়াসু শেমখ্রে। নারী শক্তি বন্দন অধিনিয়ম অসি নুপীশিংবু অশেংবা মপাঙ্গল কনখৎহন্নবা পান্দম থম্লি।
ক্লাইমেৎ চেঞ্জ অসি তশেং-তশেংবা থৌওং অমা ওইরে। চাউখৎলক্লিবা লৈবাকশিংনা মখোয়গী শেন্মিৎলোনগী পেরাদাইম হোংদোকপা অসি হেন্না অরুবা অমনি। অদুবু, ঐখোয়না হায়রিবা মায়কৈ অসিদা ঐখোয়না খল্লম্বদগী হেন্না চাওখৎলক্লি। মালেমগী অইং-অশা হেনগৎলকপগী খ্বাইদগী ফবা শাফুশিং অসিদগী পৃথীবি অসি ঙাকথোক্নবা মীওইবা জাতিগী লানফম অসিদা ভারতনা মাংজিল থানা লৈবগীদমক চাউথোকচবা ফাওই। ঐহাক্না অদোম পুম্নমকপু অদোমগী পুন্সি মহিংদা অপীকপা অদুবু ইফেক্তিব ওইবা অহোংবা পুরক্নবা অমসুং ক্লাইমেৎ চেঞ্জকী শিংনবশিং অসি থেংননবা হোৎনবদা মতেং পাংনবা হায়জরি।
অচুম্বা ৱায়েলগী মতাংদা পনবা মতমদা, ঐহাক্না মফমসিদা হায়জনীংবদি, চহি অসিগী জুলাইদগী ভারতীয় ন্যাই সনহিত চৎনহন্দুনা, ঐখোয়না মীখা পোল্লিঙৈ মতমগী অরিবা চৎনবী অমা লৌথোক্লে। অনৌবা কোদ অসি ক্রাইমগী ভিক্তিমশিংগীদমক্তা জস্তিস ফংহন্নবা মিৎয়েং থম্লি, চৈরাক পীবদা মিৎয়েং চঙদ্রে। ঐহাক্না মসিগী অহোংবা অসি নীংতম লান্মীশিংদা ইকায় খুম্নবা ওইনা উরি।
ঐহাক্কী নুংশিরবা ইরৈচাশিং,
অমৃত কাল, ঐখোয়গী নীংতম্বগী চহি চাম্মা মপুং ফাবগী ক্বার্তর সেঞ্চ্যুরীগী হৌজিক চৎলিবা মতম অসিদি ঙসিগী নহারোলশিংনা শেমগৎলগনি। মখোয়গী ইনর্জী অমসুং থৱাই চঙবগী মতৌনা লৈবাক অসিবু অনৌবা থাক্তা পুখৎপদা মতেং পাংগনি। নহা ওইরিবশিংগী মরক্তা চৎনবী অমসুং হৌজিক্কী মতমগী লৌশিংগী খ্বাইদগী হেনবা কান্নবা লৌবা ঙম্বা ৱাখল্লোন য়োকখৎপা অমসুং অনৌবা ৱাখল্লোন চেলহনবা অসিনা ঐখোয়গী খ্বাইদগী অহেনবা মিৎয়েং চঙবা থবক ওইগদবনি। অসুনা 2020দগী হৌখিবা নেস্নেল এজুকেসন পোলিসীনা হীরম অসিগী মতাংদা মহৈ য়ালহনবা হৌখ্রবনি।
সরকারনা মখোয়গী হৈশিংবশিং শীজিন্ননবা হায়দুনা মখোয়গীদমক স্কিলিং, থবক পীবা অমসুং অতোপ্পা খুদোংচাবশিং ফংহন্নবা থৌরাং কয়া পায়খৎলি। থবক পীবা অমসুং স্কিলিংগী স্কিম মঙাগী প্রধান মন্ত্রীগী পেকেজ অসিগী মখাদা চহি মঙাগী মনুংদা নহারোল করোর 4.1না কান্নবা ফংলগনি। সরকারগী অনৌবা খোংথাং অমগী মখাদা, চহি মঙাগী মনুংদা নহা করোর অমনা মকোক থোংবা কম্পেনীশিংদা ইন্তর্নশিপ তৌগনি। মসি পুম্নমক অসি বিক্সিত ভারত অমা শেমগৎনবা ফম্বাক্কী শরুক অমা ওইরগনি।
ভারত্তা, ঐখোয়না সাইন্স অমসুং তেক্নোলোজীবু লৌশিং তানবগী শরুক অমা অমসুং মীওইবা খুন্নাইগী খুমাং চাউশিলহন্নবগী খুৎলাই অমা ওইনা লৌই। খুদম ওইনা, দিজিতেল এপ্লিকেসনশিংগী লমদা ঐখোয়না ফংলিবা মায় পাকপশিং অসি অতোপ্পা লৈবাকশিংদা তেমপ্লেৎ ওইনা শিজিন্নরি। হৌখিবা চহিশিংদা, ভারতনা স্পেস এক্সপ্লোরেশনদা মমাংদা অমুক্তা ওইখিদ্রিবা মওংদা খুমাং চাওশিল্লক্লি। অদোম পুম্নমক্কা লোয়ননা, ঐহাক্না মথং চহিদা গগনয়ান মিসন হৌদোকপগী থৌরম ঙাইরি। মসিনা ভারতকী অহানবা হ্যুমেন স্পেস ফ্লাইত্তা ভারতকী এস্ত্রোনোতশিংগী তীম অমা স্পেসতা পুশিল্লগনি।
স্পোর্তসকী মালেম অসি লৈবাক অসিনা হৌখিবা চহী তরা অসিদা চাউনা খুমাং চাওশিল্লকখিবা অতোপ্পা লম অমনি। সরকারনা স্পোর্তস ইনফ্রাস্ত্রকচর চাউখৎহনবদা অখন্নবা মীৎয়েং থম্লি, অমসুং মসিনা মহৈসু পীরি। ইন্দিয়ন কন্তিঞ্জেন্তনা হন্দক্তা লোইশিনখিবা পেরিস ওলিম্পিক গেম্সতা খ্বাইদগী ফবা পরফোর্মেন্স উৎখি। শান্নরোইশিংগী থৌনা অমসুং কন্না হোৎনবগীদমক ঐহাক্না থাগৎপা ফোংদোকচরি। মখোয়না নহাশিংবু ইথিল পীরি। ভারতনা ক্রিকেত্তা তি-20 ৱার্ল্দ কপতা মায় পাকখি অমসুং মসিনা মশান্না অসিবু পামজবা য়াম্লবা মীওই কয়াদা হরাও নুংঙাইবা ফাওহল্লি। ছত্রংগী মশান্নাদা ঐখোয়গী লাইপোক ওইরবা শান্নরোইশিংনা লৈবাক্কী মিংচৎ পুরক্লি। মসিদি ছত্রংগী য়ুগতা ভারতকী মতম অমা হৌরকপগী তাঙ্কক অমা ওইনা লৌনরি। বেদমিন্তন, তেনিস অমসুং অতোপ্পা শান্ন-খোৎনবশিংদা ঐখোয়গী নহাশিংনা মালেমগী থাক্তা মিংচৎ পুরক্লি। মখোয়গী মায় পাকপশিং অসিনা মথংগী চারোন-শুরোনশিংদসু ইথিল পীরি।
ঐহাক্কী নুংশিরবা ইরৈচাশিং,
লৈবাক অসিনা নীংতম্বা নুমিৎ পাংথোক্নবা শেম-শাদুনা লৈরিঙৈদা, ঐহাক্না অমুক্কা হন্না অদোম পুম্নমকপু, মরুওইনা মশাগী পুন্সিগী খন্দনা ঐখোয়গী নীংতম্বা ঙাক্লিবা, ঐখোয়গী থৌনা ফরবা আর্মদ ফোর্সেসকী জৱানশিংগী মফমদা য়াইফ-পাউজেল পীজরি। লৈবাক শীনবা থুংনা চেকশিন থৌরাং লৌখৎলিবা পুলিস অমসুং সেক্যুরিতী পর্সোনেলদা ঐহাক্না য়াইফ-পাউজেল পীজরি। ঐহাক্না জুদিসিয়রী অমসুং সিবিল সর্বিসকী মীওইশিং, অমসুং মপান লৈবাক্তা লৈবা ঐখোয়গী মিসনশিংগী ওফিসিএলশিংদসু য়াইফ-পাউজেল পীজরি। ঐহাক্না ঐখোয়গী দাইস্পোরাশিংবুশু য়াইফ-পাউজেল পীজরি। অদোম্না ঐখোয়গী ইমুংগী শরুক অমা ওইরি, অদোমগী মায় পাকপশিং অসিদা ঐখোয়না চাউথোকচরি। অদোম অসি ভারতকী নাৎ অমসুং হেরিতেজকী শক্নাইরবা মীহুৎশিংনি।
ঐহাক্না মীয়াম পুম্নমক্কী মফমদা নীংতম্বা নুমিৎকী য়াইফ-পাউজেল অমুক হন্না পীজরি!
থাগৎচরি।
জয় হিন্দ!
জয় ভারত!
*****
(Release ID: 2045433)
Visitor Counter : 21
Read this release in:
Marathi
,
Tamil
,
Telugu
,
Malayalam
,
Bengali
,
Odia
,
English
,
Khasi
,
Urdu
,
Hindi
,
Hindi_MP
,
Nepali
,
Assamese
,
Punjabi
,
Gujarati
,
Kannada