U Myntri Kam Pohiing bad Cooperation jong ka Sorkar Pdeng, Amit Shah un pyniaid ia ka bynta kaba 7 jong ka jingialang ba halor tam jong ka Narco-Coordination Center (NCORD) ha ka sngi Palei, 18 tarik Naitung, 2024 ha New Delhi. U Myntri Kam Pohiing un plie ia ka National Narcotics Helpline ka ‘MANAS’ (Madak padarth Nisedh Asuchna Kendra) bad plie ia ka Zonal Office jong ka Narcotics Control Bureau (NCB) ha Srinagar. U Amit Shah un pyllait ruh ia ka ‘Annual Report 2023’ jong ka NCB bad ka kot halor ka ‘Nasha Mukt Bharat’. Ka jingthmu jong ka jingialang kalong ban iatreilang bad pynkhlain ia ki sienjam jong ki agency jong ka sorkar pdeng bad sorkar jylla kiba don bynta ha ka jingiakhun pyrshah ia ki kam khaii drok beain ha India.

Hapoh ka jingialam jong u Myntri Rangbah duh, Narendra Modi ka sorkar India ka la pdiang ia ka ‘Zero Tolerance Policy’ pyrshah ia ka jingkhaii drok beain ban tehlakam ia ki jingeh ba iadei bad ki drok. Ka Tnat Kam Pohiing kan kot sha ka thong jong u Myntri Rangbah duh Modi na ka bynta ka India kaba lait na u drok shuwa u 2047 lyngba ki 3 tylli ki mat treikam- ka jingpynkhlain ia ka rukom treikam, ka jingiatreilang hapdeng baroh ki agency kiba iadei bad ki kam pyrshah ia ki drok bad ka campaign ai jingtip paidbah.

Kum shi bynta kane ka jingtreikam la shim katto katne ki sienjam ba kynthup:

• Ka jingpynlong man la ka por ia ki jingialang NCORD jong baroh kito kiba don bynta ha kane ka kam ha baroh ki kyrdan jong ki kam kiba saw kyrdan.
• Ka jingplie ia ka rynsan NCORD ban iasam ia ki kam bad ki rukom treikam ba biang.
• Ka jingthaw ia ka Joint Coordination Committee na ka bynta ka jingiatreilang halor ki mat treikam ba iadei bad ki case kiba heh, kiba don jingiadei bad kiwei kiwei ki kam beain bad ki jingktah ia kiwei kiwei ki ri.
• Ka jingseng ia ka Anti-Narcotics Task Force (ANTF) ha man ka jylla/UT.
• Ka jingphaikhmat kyrpang sha ka jingpynduh ia ki drok ba la ioh kurup.
• Ka jingplie ia ka rynsan NIDAAN na ka bynta kito kiba leh ia ki kam beain kiba iadei bad ki drok.
• Ka jingwanrah ia ki jingpyndonkam ia ki ksew ban lap ia u drok.
• Ka jingpynkhlain ia ki lad forensic.
• Ka jingplie ia ki iingbishar NDPS ba kyrpang bad ki iingbishar Fast Track.
• Ka Nasha Mukt Bharat Abhiyan (NMBA) na ka bynta ban pynsngewthuh shaphang ka jingma jong ka jingpyndonkam ia ki drok.

Ia ka NCORD la sdang ha u 2016 na ka bynta ka jingiatreilang kaba kham bha hapdeng ki Jylla bad ka Tnat Kam Pohiing jong ka Sorkar Pdeng. La pynkhlain shuh shuh lyngba ka rukom treikam kaba saw kyrdan ha u 2019. Ka don ia ka NCORD Committee kaba halor tam, kaba khlieh da u Union Home Secretary, ka Executive Level NCORD Committee kaba khlieh da u Special Secretary, Tnat Kam Pohiing, ki State Level NCORD Committee ba la khlieh da ki Chief Secretary bad ki District Level NCORD Committee – ba la khlieh da ki District Magistrate.

*****