U Myntri Rangbah duh, Narendra Modi u la pyllait lai tylli ki kot halor ka jingim bad ka jingiaid lynti jong u Vice President barim jong ka ri, u M. Venkaiah Naidu shi sngi hashuwa ka sngikha ba 75 jong u lyngba ka video conferencing mynta ka sngi.

Ki kot ba la pyllait da u Myntri Rangbah duh kilong (i) ka Biography shaphang u Vice President barim ba la tip kum ka “Venkaiah Naidu – Life in Service” ba la thoh da u S Nagesh Kumar, Resident Editor barim jong ka The Hindu, Hyderabad edition; (ii) “Celebrating Bharat – The Mission and Messageof Shri M Venkaiah Naidu as 13th Vice–President of India”, ka Photo chronicle ba la pynbitpynbiang da u Dr I.V. SubbaRao, Secretary barim sha u Vice-President of India; bad kaba (iii) ka Pictorial biography ha ka Telegu ba la tip kum ka “Mahaneta – Life and Journey of Shri M. Venkaiah Naidu” ba la thoh da u Sanjay Kishore.

Ha ka jingai jingkren ha ka jingialang, u Myntri Rangbah duh u la ong ba u M. Venkaiah Naidu un sa dap 75 snem lashai ka sngi ka 1 tarik Naitung bad u la ong, “Kine ki 75 snem ki la long kiba kyrpang bad ka kynthup ia ki mawmer ba khraw” U Myntri Rangbah duh u la pynpaw ka jingkmen ban pyllait paidbah ia ka biography shaphang u M. Venkaiah Naidu bad artylli kiwei ki kot kiba long halor ka jingim jong u. U la pynpaw ka jingsngewskhem ba kine ki kot kin long ka tyllong ai mynsiem ia ki briew katba ka pynshai ruh ia ka lynti kaba dei sha ka ai jingshakri ia ka ri.

Haba kynmawia ka jingiadei kaba la slem jong u bad u Vice-President barim, u Myntri Rangbah duh u la ong ba u la ioh lad ban iatreilang bad u Venkaiah ji la kham slem. Kane ka jingiatreilang ka la sdang ha ka samoi treikam jong u Venkaiah ji kum u national president jong ka Bharatiya Janata Party (BJP), bud sa ka bynta ba kongsan ha kaba u la long u Myntri ha ka Kynhun Myntri, ka samoi treikam jong u kum u Vice-President jong ka ri, bad hadien kum u Shongknor jong ka iingdorbar thawain Rajya Sabha. “Ym lah ban pyrkhat ia ka jingkhraw ka jingshemphang kaba u briew uba na ka shnong kaba rit u la ioh da kaba bat ia ki kam kiba kongsan. Nga la ioh jinghikai shibun na u Venkaiahji,” u la bynrap.

U Modi u la pynpaw ba ka jingim jong u Venkaiah Naidu ji kalong ka dak kaba paka jong ka jingpyniasoh ia ki jingthmu, ka thong bad ka jinglong. U Myntri Rangbah duh u la pynpaw ka jingkmen shaphang ka jinglong ka BJP bad ka Jana Sangh mynta ha Andhra Pradesh bad Telangana haba ianujor bad ki phew snem ba la leit khlem kano kano ka nongrim kaba skhem. U la ong ba “Hapdeng kum kane ka jingeh, u Naidu u la trei borbah kum u ABVP Karyakarta da ka thong jong ka “Ri Nyngkong” bad u la rai ban leh ei ei na ka bynta ka ri.” U Myntri Rangbah duh u la iaroh ia u Naidu uba la iakhun tyngeh pyrshah ia ka Emergency, kaba la pyntreikam 50 snem mynshuwa ha ka ri, wat hapdeng ka jingshah set phatok kumba 17 bnai. U Modi u la ong ba u Naidu u la long uwei na ki riewshlur uba la shah tynjuh ha ka por jong ka Emergency bad dei na kata ka daw ba u shim ia u Naidu ji kum u paralok ba shisha.

Haba ong ba ka bor kam pyni ia ka jingsuk jong ka jingim hynrei kadei ka rynsan ban kot sha ki jingkut jingmut lyngba ka jingshakri, u Myntri Rangbah duh u la ong ba u Naidu u la pynshisha ialade haba u la ioh lad ban don bynta bad ka sorkar jong u Vajpayee ha kaba u la jied ban long u Myntri Sorkar Pdeng ba dei khmih ia ka Tnat Rural Development. U “Naidu ji u la kwah ban ai ka jingshakri ia ki shnong ki thaw, ki briew kiba duk bad ki nongrep,” la bynrap u Modi. U la ong shuh shuh ba u Naidu u la trei kum u Myntri Sorkar Pdeng ba dei khmih ia ka Tnat Rural Development ha ka sorkar Modi bad u la iaroh ia ka jingkut jingmut jong u bad ka thong na ka bynta ki nongbah jong ka ri kiba katkum ka juk mynta. U la kren shaphang ka Swachh Bharat Mission, Smart City Mission bad ka Amrit Yojna ba la sdang da u Venkaiah Naidu.

Haba iaroh ia ka jinglong jai jai jong u Vice President ba rim, u Myntri Rangbah duh u la kynmaw ba ym don ba lah ban kot bad ka kyrdan jingstad, ka jingstet pyrkhat, ki jubab ba kloi bad ki kyntien jong u Venkaiah Naidu. U Modi u la kynmaw ia ka slogan ba la wanrah da u Naidu ha ka jingthaw ia ka sorkar synrop lang jong u Atal Bihari Vajpayee, “Ek haath mein BJP ka jhanda, aur dusre haath mein NDA ka agenda”, kaba ka jingmut kalong ba ka lama jong ka party ha kawei ka kti bad ka agenda jong ka National Democratic Alliance ha kawei pat ka kti. Ha u 2014, u la wanrah ia ka jingong ‘Making of Developed India’ na ka bynta ka M.O.D.I. U Myntri Rangbah duh u la ong ba u dap da ka jinglyngngoh ia ki jingkren jong u Venkaiahji, kaba la pynlong ia u ban iaroh ia ka jinglong jong u ha Rajya Sabha shisien haba u la ong ba ka don ka jingmut, ka jingshisha, ka jingshemphang, ka jingsngewtynnad bad ka jingstad ha ki kyntien jong u Vice President ba rim.

U Myntri Rangbah duh u la iaroh ia ka jinglong kaba la wanrah da u Naidu ha ka samoi treikam jong u kum u Shongknor jong ka Rajya Sabha bad u la kren shaphang ki rai bapher bapher ba la shim da ka iingdorbar thawain. U la kynmaw ia ka jingwanrah ia ka bill ban weng ia ka Article 370 ha Rajya Sabha hashuwa ban wanrah sha ka iingdorbar thawain Lok Sabha, u Myntri Rangbah duh u la iaroh ia ka jingshemphang ha ka jinglong nongialam jong u Naidu ha ka jingmynjur ia kum kane ka bill kaba kham pher da kaba pynthikna ia ka burom jong ka iing dorbar thawain. U Myntri Rangbah duh u la kitbok kitrwiang ia ka jingim kaba jrong bad kaba koit ba khiah ia u Naidu.

U Modi u la kren shaphang ka jinglong lung mynsiem jong u Venkaiahji bad u la pyntip ba um ju ailad ba ki jingiapher kin ktah ia ka jingshim rai jong u. U la kren ruh shaphang ka jingim kaba shidur shisur jong u bad ki rukom ba kyrpang jong u ban iajan bad ki briew. U Myntri Rangbah duh, Modi u la kynmaw ruh ia ka jingpynlut por ha iingsah jong u Venkaiah Ji ha ki jinglehkmen. U Myntri Rangbah duh u la kren shaphang ki jingnohsynniang jong ki riewkhraw kum u Naidu sha ki kam sain pyrthei jong ka ri. Haba kren shaphang ki lai tylli ki kot ba la pyllait paidbah mynta ka sngi, u Myntri Rangbah duh u la ong ba ki la wanrah ia ka jingiaid lynti ka jingim jong u Venkaiah Ji, kaba long ka tyllong jong ka jingai mynsiem ia ki samla.        

U Myntri Rangbah duh u la pynkut ia ka jingkren jong u da kaba kynmaw& pule katto katne ki lain na ka poitri kaba u la aiti ia u Naidu ha Rajya Sabha shisien. U Modi sa shisien u la ai khublei & kitbok kitrwiang ia u Venkaiah Naidu ji ha ka jingdap 75 snem ka jingiaid lynti ka jingim jong u. U Modi u la pynpaw ka jingsngewskhem ba ka India kaba la kiew (Viksit Bharat) kan rakhe ia ka “century of freedom” jong ka ha u 2047 katba u Naidu ji un rakhe ia u mawmer dap shispah snem jong u.

*****