ইকায়খুম্নরবা মেম্বরশিং,

১. ঐহাক্না ১৮শুবা লোক সভাগী নৌনা মীখল মায় পাক্তুনা কারক্লবা মেম্বর পুম্নমক্কী মফমদা নুংঙাইবা ফোঙদোকচরি অমসুং য়াইফ পাউজেল পীজরি‍।

ময়াম পুম্নমক লৈবাকসিগী ভোতরশিংগী থাজবা ফংলবা মতুংদা মফমসিদা য়ৌবিরক্লিবনি‍।

লৈবাক অমসুং মীয়ামগী থৌগল তৌননবগী খুদোংচাবা অসি মীওই খরখক্তনা ফংই‍।

অদোম্না লৈবাক্না মাঙদা থম্বা হায়বা ৱাখল্লোন্দা অদোমগী থৌদাংশিং য়াবিরক্কনি অমসুং ভারত মচা করোর ১৪০গী মঙলান মঙফাওনহন্নবা পাম্বৈ অমা ওইরক্কনি হায়না চেৎনা থাজবা থমজৈ‍।

ঐহাক্না শ্রী ওম বিরলা জীবু লোক সভাগী স্পীকরগী ইকায়খুম্নরবা থৌদাং পাঙথোকপদা য়াইফ পাউজেল পীজরি‍।

মহাক মীয়ামগী ওইবা পুন্সিগী লমদা ফনা নীংথিনা ৱাখল লৌশিং লৈরবা মীশক্নি‍।

মহাক্না দিমোক্রেসীগী চৎনবীশিং মহাক্কী হৈশিংবগা লোয়ননা অনৌবা পন্দোল তম্না পুখৎপদা মায় পাক্কনি হায়না ঐনা চেৎনা থাজৈ‍।

ইকায়খুম্নরবা মেম্বরশিং,

২. ঐহাক্না ইলেক্সন কম্মিসন ওফ ইন্দিয়াগী মফমদসু ঙসি ভারত মচা করোর কয়াগী মহুৎ শিল্লগা তৌবিমল খঙবা ফোঙদোকচরি‍।

মসি মালেমগী খ্বায়দগী চাউবা মীখল ওইখি‍।

ভোতর কোর ৬৪ রোম্না মখোয়গী থৌদাং পুক্নিংদা মথুম মরাং হৌবা অমসুং হরাও তয়াম্বগা লোয়ননা য়ানখি‍।

নুপীশিংনা হন্দকসূ মশিং য়াম্না ভোত থাদনখি‍। মীখল অসিগী য়াম্না পুক্নিং মকা লাম্নিংঙাই ওইবা মশক অমা জম্মু অমসুং কাস্মিরদগী থোরকখি‍।

কাস্মির তম্পাক্না চহি দেকেদ কয়াগী ভোতর তর্নআউতকী রেকোর্দশিং থুগাইখি‍।

হৌখিবা দেকেদ মরিসিদা, ঐখোয়না লম্বী থিংবা অমসুং খোঙজঙ কয়াগী মরক্তা কাস্মিরদা ভোত থাদনবা মশিং য়ামদবা থেংনদুনা লাকখি‍।

ভারতকী য়েক্নবশিংনা মালেমগী ফম্পাক কয়াদা অরান্বা ৱাফমশিং শন্দোক্তুনা, মসিবু জম্মু অমসুং কাস্মিরগী মীয়ামগী ৱাখল্লোন ওইনা উত্তুনা লাকখি‍।

হন্দক্তি কাস্মির তম্পাক্না লৈবাকসিদা অমসুং লৈবাকসিগী মপান্দা লৈরিবা অসিগুম্বা মীওই খুদিংমক্কী মফমদা চপ চাবা পাউখুম পীরে‍।

অহান্বা ওইনা, লোক সভাগী মীখলদা য়ুমদা ভোত থাদবগী খুদোংচাবা ফংহনখি‍।

ঐহাক্না লোক সভা মীখলগী মরী লৈননা মথৌ পাঙথোকখিবা মীওই খুদিংমক্কী মফমদা মখোয়না তৌখিবা থবক্কীদমক থাগৎপা ফোঙদোকচরি অমসুং মখোয়গী মফমদা নুংঙাইবা ফোঙদোকচরি‍।

ইকায়খুম্নরবা মেম্বরশিং,

৩. মালেম পুম্বনা লোক সভা মীখল ২০২৪গী মরমদা ঙাংনরি‍।

মালেম অসিনা ভারতকী মীয়াম্না তশেং তশেংবা মেজোরিতীগা লোয়ননা থংন-থংননা অহুম্লক শুবা তর্মগী ওইনা মরা চেৎপা লৈঙাক অমা মীখলদা থাগৎলকপা উনরি‍।

মসি দেকেদ তরুক্কী মতুংদা ওইরক্লিবনি‍।

ভারতকী মীয়ামগী অপাম্বশিং খ্বায়দগী ৱাংবা থাক্তা লৈরিবা মতমসিদা, মীয়াম্না ঐগী লৈঙাক্কী মফমদা থংন-থংননা অহুম্লকশুবা তর্মগী ওইনা থাজবা উৎলি‍।

ভারতকী মীয়াম্না ঐগী লৈঙাকখক্তনা মখোয়গী অপাম্বশিং ফংহনবা ঙমগনি হায়বগী চপ চাপা থাজবা থম্লি‍।

মরমসিনা, ২০২৪গী মীখল অসি খুজিল থৌরাং, অনিংবা, কত্থোকপা অমসুং ফিরেপ্তা থাজবা থম্বগী মীখল অমা ওইরি‍।

• মপাঙ্গল কনবা অমসুং ফিরেপ লৈবা লৈঙাক্তা থাজবা
• অফবা লৈঙাক, মরা চেৎপা অমসুং মখা শমথবদা থজবা
• পুকচেল চেংবা অমসুং হোৎনবা কন্বদা থাজবা
• ঙাকশেল অমসুং নুংঙাই য়াইফবদা থাজবা
• লৈঙাক্কী ৱাশক অমসুং মদু ফংহন্বদা থাজবা
• চাওখৎপা ভারতকী ভারতকী ফিরেপ্তা থাজবনি‍।

মসি ঐগী লৈঙাক্কী থৌগলগী পান্দম থম্বা থবক অমসুং হৌখিবা চহি ১০সিদা পায়খৎখিবা অফবা লৈঙাক্লোন্দা অয়াবা পীবগী স্তাম্প অমনি‍।

মসি ভারতপু চাওখৎপা লৈবাক অমা ওইহন্নবগী থবক অপন্বা লৈতনা মখা চত্থনবা অমসুং ভারতনা মাগী পান্দমশিং ফংহন্নবগী অয়াবা অমা পীবনি‍।

ইকায়খুম্নরবা মেম্বরশিং,

৪. ১৮শুবা লোক সভা মীখল অসি হীরম কয়াদা পুৱারীগী মশক ওইখি‍।

লোক সভা অসি অমৃত কালগী অঙন্বা চহিশিংগী মনুংদা শেম্লিবনি‍।

লোক সভা অসিনা ভারতকী সংবিধান চৎনখিবগী ৭৫শুবা চহিগী শাখিশু ওইগনিরিবনি‍।

লোক সভা অসিনা মীয়ামগী য়াইফনবগী ফিরেপকী অনৌবা পন্দুপ অমা হাংদোক্লগনি হায়না ঐনা থাজৈ‍।

লাক্কদৌরিবা সেসন্দা ঐগী লৈঙাক্না অহান্বা বজেৎ পুথোক্কনি‍।

বজেৎ অসি লৈঙাক্কী মীৎয়েঙ শান্বা খুজিল থৌরাংশিং অমসুং তুংলমচৎকী মঙলানগী মতিং লৈবা দোকুমেন্ত অমা ওইগনি‍।

অচৌবা শেন্মিৎলোন অমসুং খুন্নাইগী ফিরেপশিংগা লোয়ননা, বজেৎ অসিদা পুৱারীগী মশক ওইবা খোঙথাঙ কয়া উবা ফংগনি‍।

খোঙলৈ থুনা চাওখৎপা পুরক্নবগী ভারতকী মীয়ামগী মঙলানশিংগা চুননা অহোংবা পুরকপগী খোঙজেল মখা তানা য়াঙখৎহনগনি‍।

ঐগী লৈঙাক্না মালেম পুম্বদগী ইনভেস্তরশিংগী পুক্নিং চিংশিন্নবা স্তেতশিংগী মরক্তা অফবা মওংগী অথোই অহেন তান্নবা লৈগনি হায়না ঐনা থাজৈ‍।

মসি হিদান্নবা তেংবাংনবা ফেদরেলিজমগী অশেংবা ৱাখল্লোন অদুনি‍।

লৈবাকসিনা চাওখৎপা হায়বসি স্তেতশিংনা চাওখৎপদা লৈ হায়বা ৱাখল্লোনগা লোয়ননা ঐখোয়না মখা তানা মাঙদা চঙশিনগনি‍।

ইকায়খুম্নরবা মেম্বরশিং,

৫. রিফোর্ম, পর্ফোর্ম অমসুং ত্রান্সফোর্মগী ফিরেপ্না ভারতপু ঙসি মালেমগী খ্বায়দগী খোঙজেল য়াঙনা চেনখৎলিবা শেন্মিৎলোন ওইহল্লে‍।

চহি ১০ সিদা, ভারতনা শেন্মিৎলোনূগী ১১শুবা মফমদগী ৫শুবা খ্বায়দগী চাউবা শেন্মিৎলোনগী মফমদা কাখৎলক্লে‍।

২০২১দগী ২০২৪ ফাওবদা, ভারতনা চহিদা চাদা ৮গী চাঙদা কাখৎলক্লি‍।

কাখৎলক্লিবা অসি অচম্বা ফীভমদা ওইরকবা নত্তে‍।

হৌখিবা চহি খরসিদা, ঐখোয়না চহি ১০০সিদা খ্বায়দগী চাউবা মালেমগী লাইচৎ থেংনখ্রে‍।

মালেমগী লাইচৎ অসিগী মরক্তা অমসুং মালেমগী তোঙান তোঙান্বা মফমশিংদা মুক্নবা ফীভম লৈনা লৈনা ভারতনা ফীভম অসিদা কাখৎলকখিবনি‍।

মসি হৌখিবা চহি ১০সিদা লৈবাক্কী য়াইফনবগীদমক পায়খৎখিবা রিফোর্মশিং অমসুং অচৌবা ফিরেপশিংনা ওইবা ঙমহনখিবনি‍।

ঙসি, ভারত মথন্তনা মালেমগী গ্রোথকী চাদা ১৫ পুরি‍।

হৌজিক, ঐগী লৈঙাক্না ভারতপু মালেমগী ৩শুবা খ্বায়দগী চাউবা শেন্মিৎলোন ওইহন্নবা হোৎনরি‍।

ইকায়খুম্নরবা মেম্বরশিং,

৬. ঐগী লৈঙাক্না শেন্মিৎলোনগী য়ুম্বী অহুম্মক – মেনুফেকচরিং, সর্ভিসেস অমসুং লৌউ শিংউদা চপ মান্ননা মরুওইবা মীৎয়েঙ থম্লি‍।

PLI স্কীমশিং অমসুং ইজ ওফ দুইং বিজিনেসনা ইনভেস্তমেন্ত অমসুং থবক পীবগী খুদোংচাবশিং অচৌবা থাক্তা হেনগৎহন্বদা থৌদাং লৌখি‍।

ত্রেদিস্নেল সেক্তরশিংগা লোয়ননা, সনরাইজ সেক্তরশিংসু মিসন মোদতা য়োকখৎলি‍।

সেমিকন্দক্তর নৎত্রগা সোলার ওইরবসু,

ইলেক্ত্রিক ভেহিকল নৎত্রগা ইলেক্ত্রোনিক্কী পোৎলমশিং ওইররবসু

গ্রীন হায়দ্রোজেন নৎত্রগা বেত্তরীশিং ওইরবসু,

এয়রক্রাফ্ত কেরিয়র নৎত্রগা ফাইতর জেৎশিং ওইরবসু,

ভারতনা সেক্তর পুম্বসিদা পাকথোক চাউথোক্লি‍।

ঐগী লৈঙাক্না লোজিস্তিক্কী শেঞ্জং হন্থহন্নবা লেপ্পা লৈতনা হোৎনরি‍।

লৈঙাক অসিনা সর্ভিস সেক্তরবুসু মপাঙ্গল কনখৎহল্লি‍।

ঙসি, ভারতনা ITদগী তুরিজম ফাওবা অমসুং হকশেলদগী হৌরগা তিঞ্জং কায়জঙদনা লৈবা ফাওবদা সেক্তর খুদিংদা মাঙজিল থারক্লি‍।

অদুগা মসিনা থবক পীনবগী অমসুং মশানা মশাবু থবক পীজনবগী অনৌবা খুদোংচাবা মশিং য়াম্না শেম্লি‍।

ইকায়খুম্নরবা মেম্বরশিং,

৭. হৌখিবা চহি ১০সিদা, ঐগী লৈঙাক্না খুঙ্গংগী শেন্মিৎলোন্গী হীরম খুদিংদা মরুওইবা মীৎয়েঙ থম্লি‍।

লৌউ-শিংউদা য়ুম্ফম ওইবা ইন্দস্ত্রী, শঙ্গোম অমসুং ঙাদা য়ুম্ফম ওইবা ইন্দস্ত্রীশিং খুঙ্গংশিংদা পাকথোক চাউথোকহল্লি‍।

মসিদসু, কোওপরেতিবশিংদা মরুওইবা মীৎয়েঙ থম্লি‍।

লৈঙাক অসিনা ফার্মর প্রদ্যুসর ওর্গনাইজেসন (FPOs) অমসুং PACS কুম্বা কোওপরেতিবকী লুপশিংগী অচৌবা নেৎৱর্ক অমা শেমগৎলি‍।

অপীকপা লৌমীশিংগী মরুওইবা খুদোংচাবদা ৱাফম অমদি থম্ফমগা মরী লৈনৈ‍।

মরম অদুনা, ঐগী লৈঙাক্না কোওপরেতিব সেক্তরদা মালেমগী খ্বায়দগী চাউবা পোৎ থম্ফমগী কেপাসিতী শেমগৎনবা স্কীম অমগী থবক হৌখ্রে‍।

লৌমীশিং মখোয়গী অপীকপা শেঞ্জৎ পুবা ঙম্নবা, পি.এম.-কিসান সম্মান নিধীগী মখাদা লৌমীশিংগী মফমদা লুপা করোর ৩,২০,০০০ হেন্বগী শেনফম থাদোকখ্রে‍।

অনৌবা তর্মসিগী হৌরকপগী নুমিৎশিংদা, ঐগী লৈঙাক্না লৌমীশিংগী মফমদা লুপা করোর ২০,০০০ হেনবগী শেনফম থাখ্রে‍।

লৈঙাক অসিনা খারিপ মহৈ মরোংশিংগী MSP রেকোর্দ ওইবা মওংদসু হেনগৎহনখ্রে‍।

ইকায়খুম্নরবা মেম্বরশিং,

৮. ঙসিগী ভারতনা হৌজিক মথৌ তারিবসিগী চুননা মাগী লৌউ-শিংউগী থৌওংদা অহোংবা পুরক্লি‍।

ঐখোয় হেন্না ইশানা পুবা ঙমজবা ওইরে অমসুং মপান্দা থাদোকপা হেনগৎহন্দুনা লৌমীশিংগী শেন্থোক হেনগৎহন্বা হায়বা ৱাখল্লোনসিনা মাঙ থারগা খুজিল থৌরাংশিং শেমখ্রে অমসুং ফিরেপশিং লৌখি‍।

খুদম ওইনা, লৈঙাক অসিনা অতোপ্পা লৈবাকশিংদা হৱায় চেঙৱাই অমসুং থাউ মরূশিংগীদমক তাংবা হন্থহন্নবগীদমক লৌমীশিংগী মফমদা পাংবা য়াবা মতেং পাংলি‍।

মালেমগী কৈথেলদা দিমান্দ য়াম্না লৈবা চীঞ্জাক্কী পোত্থোক মখলশিংদা মীৎয়েঙ থম্লগা অনৌবা লাল্লোংশিং শেম্লি‍।

হৌজিক্কী মতমসিদা, ওর্গানিক পোত্থোকশিংগী দিমান্দ মালেমসিদা খোঙজেল য়াঙনা হেনগৎলক্লি‍।

ভারতকী লৌমীশিংগী মফমদা দিমান্দ অসি ফংহন্নবগী মতিং চপ চানা লৈ‍।

মরম অদুনা, লৈঙাক অসিনা মহৌশাগী লৌউ পথাপ অমসুং মসিগা মরী লৈনবা পোত্থোকশিংগী সপ্লাই চেন মপাঙ্গল কনখৎহল্লি‍।

হোৎনরিবশিং অসিগা লোয়ননা, লৌউ-শিংউগী থবক থৌরমশিংদা লৌমীশিংনা চঙলিবা শেনফম হন্থরগনি অমসুং মখোয়গী শেন্থোক মখা তানা হেনগৎলক্কনি‍।

ইকায়খুম্নরবা মেম্বরশিং,

৯. ঙসিগী ভারত মালেমসিনা থেংনরিবা খুদোংচাদবা ফীভমশিং হাপচিন্দবা, মদুগী মহুত্তা মালেমসিগী পাম্বৈশিং পীবগীদমক খঙনরি‍।

বিস্ব-বন্ধু অমা ওইনা, ভারতনা মালেমগী খুদোংচাদবা ফীভম কয়াগী পাম্বৈ ফংহন্নবগী থবক থৌরাংশিং পায়খৎলি‍।

ঐখোয়না অইং—অশাগী খল হোংলকপাদগী হৌরগা চীঞ্জাক্কী সিক্যুরিতী অমসুং মচি ওইবা মচলদগী হৌরগা তুং কোইবা য়াবা লৌউ-শিংউগী লমশিংদা লৈরিবা খুদোংচাদবা ফীভমশিংগী মখল মখাগী পাম্বৈশিং পীরি‍।

ঐখোয়না শ্রী অন্ন হায়রিবা ঐখোয়গী কোর্র গ্রেনবু মালেম শিনবা থুংনা সুপর ফুদ অমা ওইনা মমিং চৎহন্নবা কেম্পেন অমসু পাঙথোক্লি‍।

ভারতকী থৌরাংদা, ইং ২০২৩বু মালেম পুম্বদা ইন্তরনেস্নেল ইয়র ওফ মিল্লেত হায়না পাঙথোক্নখি‍।

অদোম্না হন্দক্তা মালেমগী থৌরম অমা ওইনা মালেমগী য়োগ নুমিৎ পাঙথোকখিবা উবিখ্রে‍।

ভারতকী অথোইবা পাথাং পুথাংগী লন অসিগী লেমজনিংঙাই ওইবা মশক মালেমসিদা লেপ্পা লৈতনা হেনগৎলক্লি‍।

য়োগ অমসুং অয়ুস য়োকখত্তুনা, ভারতনা মশা মউ ফবা মালেম অমা শেম্বদা মতেং পাংলি‍।

ঐগী লৈঙাক্না রিনিউএবল ইনর্জীগী মতিংসু শরুক কয়া থোক্না হেনগৎহল্লে‍।

ঐখোয়না ঐখোয়য়গী অইং-অশাগা মরী লৈনবা পান্দমশিং থাখিবা মতমদগী য়াম্না ঙনখৎনা ফংলি‍।

নেত জিরোগী মায়কৈদা ঐখোয়না লৌখৎলিবা থৌরাংশিংনা লৈবাক কয়াগী পুক্নিং থৌগৎনফম ওইরি‍।

ইন্তরনেস্নেল সোলার এলাইন্সকুম্বা ঐখোয়গী থৌরাংশিংদা রেকোর্দ ওইবা মশিংদা লৈবাক কয়ানা পুনশিল্লি‍।

ইকায়খুম্নরবা মেম্বরশিং,

১০. তুংলমচৎ অসি হরিত য়ুগ নৎত্রগা অশঙ অমানগী চক ওইগদৌরি‍।

ঐগী লৈঙাক্না মায়কৈ অসিদা পায়খৎফম থোকপা খোঙথাঙ খুদিংমক পায়খৎলি‍।

ঐখোয়না গ্রীন ইন্দস্ত্রীশিংদা শেল থাদবা হেনগৎহন্দুনা গ্রীন জোব মশিং হেনগৎহল্লি‍।

গ্রী ইনর্জী নৎত্রগা গ্রীন মোবিলিতী ওইরবসু, ঐখোয়না হীরম পুম্নমক্তা মঙলান চাউবা পান্দমশিংগা লোয়ননা থবক পায়খৎলি‍।

ঐগী লৈঙাক্না ঐখোয়গী ময়োল্লমশিংগী মালেমগী খ্বায়দগী ফবা লৈফম চাফম ওইহন্নবগীদমক খোঙফম চেৎনা লেপ্লি‍।

অমোৎ অকায় লৈতবা, তরু তরুবা অমসুং মচাক পুম্নমক ফংবা ময়োল্লমশিংদা লৈবা হায়বসি ভারত মচাশিংগী ফংফম থোকপা মঙম্নি‍।

হৌখিবা চহি ১০সিদা, অখন্ননা অপীকপা ময়োল্লমশিংদা হান্না পানরুদবা চাংদা শেল থাদরি‍।

ভারতনা মালেমগী অহুমশুবা খ্বায়দগী চাউবা দোমেস্তিক এভিএসন কৈথেল ওইরি‍।

এপ্রিল ২০১৪দা, ভারত্তা এয়রলাইন লম্বী ২০৯ খক্তমক লৈরম্মি‍।

মশিং অসি এপ্রিল ২০২৪দা ৬০৫দা হেনগৎলে‍।

এভিএসন লম্বী হেনগৎলক্লিবা অসিনা তিয়র-২ অমসুং তিয়র-৩ ময়োল্লমশিংদা হকথেংননা কান্নবা পীরি‍।

চহি ১০সিদা, মেত্রোনা ময়োল্লম ২১ য়ৌরে‍।

বন্দে মোত্রোগুম্বা স্কীম কয়াগী থবক পায়খৎলি‍।

ঐগী লৈঙাক্না ভারতকী পব্লিক ত্রান্সপোর্ত সিস্তেমবু মালেমগী খ্বায়দগী ফবা ওইহন্নবা থবক পায়খৎলি‍।

ইকায়খুম্নরবা মেম্বরশিং,

১১. ঐগী লৈঙাক্না ভারতপু চাওখৎলবা লৈবাকশিংগা থোং মান্নবা থাক্তা লেপ্পা ঙমহনগদবা মতমসিগী ওইবা পেরামিতরশিংদা থবক পায়খৎলি‍

মায়কৈ অসিদা, ইনফ্রাস্ত্রকচর দিভেলপমেন্তনা অওনবা ভারতকী অনৌবা মায়থোঙ ওইরক্লি‍।

ঐগী লৈঙাক্না, চহি ১০সিদা, পি.এম. গ্রাম সরক য়োজনাগী মখাদা খুঙ্গংগী লম্বী কিলোমিতর ৩,৮০,০০০ হেন্না শেমখ্রে‍।

ঙসি, ঐখোয়গী লৈবাকসিদা নেস্নেল হায়ৱে অমসুং এক্সপ্রেসৱেশিংগী অসুম অসুম পাকথোক চাউথোরক্লিববা নেতৱর্ক অমা লৈরে‍।

নেস্নেল হায়ৱেশিং শেমগৎপগী খোঙজেল শরুক অনি হেনগৎলে‍।

অহমদবাদ অমসুং মুম্বাইগী মরক্তা হায়-স্পীদ রেল ইকোসিস্তেম অমা শেমগৎপগী থবকসু খোঙজেল য়াঙনা পায়খৎলি‍।

ঐগী লৈঙাক্না লৈবাকসিগী অৱাং, খা অমসুং নোংপোক মায়কৈদা বুলেত ত্রেন কোরিদোরশিং শেমগৎপগী ফীজিবিলিতী স্তদীশিং পাঙথোক্নবা ফিরেপ লৌরে‍।

অহান্বা ওইনা, কংফাল মনুংগী ঈশিং লম্বীগী থবক অচৌবা থাক্তা পায়খৎপা হৌরে‍।

থৌরাং অসিদগী অৱাং-নোংপোক লমদম্না চাউনা কান্নবা ফংগনি‍।

ঐগী লৈঙাক্না হৌখিবা চহি ১০সিদা অৱাং নোংপোক লমদমগী চাওখৎ থৌরাংগী চাকথুং শরুক মরি হেন্না হেনগৎহনখ্রে‍।

লৈঙাক অসিনা লমদম অসিবু মাগী এক্ত ইস্ত পোলিসীগী মখাদা মরুওইবা হোজঙ অমা ওইহন্নবা থবক পায়খৎলি‍।

অৱাং নোংপোক্তা মখল পুম্নমক্কী কন্নেক্তিবিতীশিং পাকথোক চাউথোকহল্লি‍। মহৈ মশিং, হকশেল, তুরিজম অমসুং থবক পীবা য়াওনা হীরম খুদিংদা চাওখৎ থৌরাংগী থবকশিং পায়খৎলি‍।

অসামদা লুপা করোর ২৭,০০০ চঙনা সেমি-কন্দক্তর প্লান্ত অমা শেমগৎলি‍।

অৱাং নোংপোকপুসু ভারত্তা শাবা চিপশিংগী মকোল অমা ওইহনগনি‍‍।

ঐগী লৈঙাক্না অৱাং নোংপোক্তা তুং কোইগদবা ইং তপ্পা পুরক্নবা লেপ্পা লৈতনা হোৎনরি‍।

হৌখিবা চহি তরাসিদা, অরিবা য়েৎনবা কয়া ৱাখৈনখ্রে, মরুওইবা য়ানচে কয়া পুরকখ্রে‍।

অৱাং নোংপোক্কী ঈরাং লৈবা মফমশিংদগী AFSPA লৌথোকপগী থবকসু হায়রিবা মফমশিংদুদা চাওখৎপগী খোঙজেল হেনগৎহন্দুনা তাঙ্কক নাইনা পায়খৎলি‍।

লৈবাক্কী চাওখৎপগী হীরম খুদিংদা পায়খৎলিবা হায়রিবা অনৌবা থৌরাংশিং অসিনা ভারতকী তুংলমচৎকী লম্বীঈ য়াৎলি‍।

ইকায়খুম্নরবা মেম্বরশিং,

১২. নুপীনা লমজিংবা চাওখৎপদা খোঙফম চেৎনা লেপ্লিবা ঐগী লৈঙাক্না নুপী মপাঙ্গল হাপ্পগী অনৌবা চক অমা হৌদোক্লে‍।

ঐখোয়গী লৈবাক্কী নুপীশিংনা মতম কয়াদগী হৌনা লোক সভা অমসুং বিধান সভাদা মশিং হেন্না শরুক য়াননবা ৱাফম তান্দুনা লাক্লি‍।

ঙসিদি, নারী শক্তী বন্দন অধিনিয়ম চৎনদুনা মখোয় মপাঙ্গল হাপ্লে‍।

হৌখিবা দেকেদ অসিদা, তোঙান তোঙানবা লৈঙাক্কী স্কীমশিংনা নুপীশিংববু শেন্মিৎলোনগী লমদা হেন্না মপাঙ্গল হাপ্লি‍।

অদোমসু খঙবিরিবদুনি, হৌখিবা চহি ১০সিদা, পি.এম. অৱাস য়ুম করোর ৪গী অয়াম্বা শরুক্তি নুপী বেনিফিসরীশিংদা ফংহল্লিবনি‍।

হৌজিক, ঐগী লৈঙাক্কী অহুমসুবা তর্মগী অহৌবমক্তদা, অনৌবা য়ুম করোর ৩ শাননবগী অয়াবা পীখ্রে‍।

হায়রিবা য়ুমশিং অসিগী অয়াম্বা শরুক নুপী বেনিফিসরীশিংদা ফংহনগনি‍।

হৌখিবা চহি ১০সিদা, নুপী করোর ১০ সেল্ফ হেল্প গ্রুপশিংদা পুশিনখ্রে‍।

ঐগী লৈঙাক্না নুপী করোর ৩বু লাখপতি দিদী ওইহন্নবা মপুং ফাবা কেম্পেন অমা হৌখ্রে‍।

মসিগীদমক, সেল্ফ হেল্প গ্রুপশিং অসিদা পীবা শেলগী তেংবাংসু হেনগৎহল্লি‍।

লৈঙাক অসিনা হোৎনরিবসি নুপীশিংগী হৈশিংবা অমসুং শেন্থোক্কী মফমশিং, অমসুং ইকায়খুম্নবা হেনগৎহন্নবনি‍।

নমো দ্রোন দিদী স্কীম্না পান্দম অসি ফংনবগী লমদা থৌদাং য়ারি‍।

স্কীম অসিগী মখাদা, সেল্ফ হেল্প গ্রুপ লিশিং কয়াদা লৈরিবা নুপীশিংদা দ্রোন ফংহল্লি অমসুং দ্রোন পাইলতকী ত্রেনিংসু পীরি‍।

ঐগী লৈঙাক্না হন্দক্তা ক্রিসী শখি ইনিসিএতিবসু হৌদোকখ্রে‍।

থৌরাং অসিগী মখাদা, হৌজিক ফাওবদা, সেল্ফ হেল্প গ্রুপশিংদা য়াওবা নুপী লিশিং ৩০দা ক্রিসি শখি সর্তিফিকেতশিং ফংহনখ্রে‍।

ক্রিসি শখিশিং অসি লৌউ-শিংউবু মতমগা চুনবা থাক্তা পুখৎলকপদা লৌমীশিংগী মফমদা মতেং পাংবা ঙমহন্নবগীদমক মতমগী ওইবা লৌউ-শিংউগী থবক থৌওংশিংদা ত্রেনিং পীরি‍।

ইকায়খুম্নরবা মেম্বরশিং,

১৩. ঐগী লৈঙাক্না হোৎনরিবশিং অসি নুপীশিংগী তুংশিঞ্জবা শেল হেনগৎহন্নবনি‍।

ঐখোয় পুম্নমক্না নুপীমচাশিংদা মখোয়গী বেঙ্ক দিপোজিত্তা হেন্না ৱাংবা শেন্দোয়গী চাং ফংহল্লিবা সুকন্যা সমৃদ্ধী য়োজনা মীয়াম্না পাম্নরিবা অসি নীংথিনা খঙই‍।

চেঙ-হৱায় লেম্না ফংহন্বা অমসুং অতাবা মমলদা গ্যাস সিলিন্দর ফংহল্লিবা স্কীমশিংদগী নুপীশিংনা চাউনা কান্নবা ফংলি‍।

হৌজিক ঐগী লৈঙাক্না মৈগী বিল জিরোদা হন্থহন্নবা অমসুং মৈ য়োন্দুনা শেন্থোক লৈহন্নবা স্কীম অমসু পুরক্লে‍।

পি.এম. সুর্য় খর মুফ্ত বিজ্লী য়োজনাগী মখাদা য়ুমশিংগী য়ুমথক্তা সোলার পেনেলশিং খিল্লি‍।

মসিগীদমক, ঐগী লৈঙাক্না ইমুং অমদা লুপা ৭৮,০০০ ফাওবগী তেংবাং ফংহল্লি‍।

ইমুং করোর ১ হেন্বনা অতেন্বা মতমগী মনুংদা স্কীম অসিগী মখাদা রেজিস্তর তৌখ্রে‍।

য়ুমথক্কী সোলার খিল্লবা য়ুমশিং অসিগী মৈগী বিল জিরোদা হন্থরে‍।

ইকায়খুম্নরবা মেম্বরশি,

১৪. চাওখৎপা ভারতকী পান্দম অসি লৈবাকসিগী লায়রবা, নহা, নুপী অমসুং লৌমীশিংবু মপাঙ্গল হাপ্লবা মতমদখক্তা ফংবা ঙমগনি‍।

মরম অদুনা, হায়রিবা য়ুম্বী মরিসিদা ঐগী লৈঙাক্কী স্কীমশিংনা খ্বায়দগী মরুওইবা মীৎয়েঙ থম্লি‍।

ঐখোয়না হোৎনরিবসি, লৈঙাক্কী স্কীম খুদিংমক্কী কান্নবশিং মখোয়দা য়ৌহন্নবনি‍। মসি সেচুরেসনগী খোঙজঙ অদুনি‍।

লৈঙাক্কী স্কীমশিংদগী মীশক অমত্তা চিত্থহৌদনবা হায়বা পান্দমদা লৈঙাক্না থবক তৌরকপদা মসিদা মীপুম খুদিংদা কান্নহল্লি‍।

হৌখিবা চহি ১০সিদা সেচুরেসনগী খোঙজঙগা লোয়ননা লৈঙাক্কী স্কীমশিং পায়খৎপনা মরম ওইরগা ভারত মচা করোর ২৫না লায়রবগী পনখৈনুংদগী থোরকপা ঙম্লিবনি

মসিদা সিদ্যুল কাস্ত, সিদ্যুল ত্রাইব, বেকৱার্দ ক্লাস অমসুং অতৈ খুন্নাই অমসুং লম-লমগী কাঙলুপশিংগী ইমুংশিং য়াওরি‍।

হৌখিবা চহি ১০সিদা, লাস্ত মাইল দেলিভরীদা মীৎয়েঙ থমদুনা লাকপনা হায়রিবা কাঙলুপসিগী পুন্সিদা অহোংবা পুরকপা ঙম্লি‍।

হোংবা অসি ত্রাইবেল ফুরুপশিংদা হেন্না মশক থোক্না উবা ফংই‍।

লুপা করোর ২৪,০০০ হেনবগী চাকথুং লৈবা পি.এম. জনমনগুম্বা স্কীম অমনা খ্বায়দগী শোত্থরবা ত্রাইবেল ফুরুপশিংগী চাওখৎনবগী পাম্বৈ অমা ওইরি‍।

লৈঙাক অসিনা পুন্সি হিংনবগী পাম্বৈশিং ফংহন্নবগীদমক পি.এম.-সুরজ পোর্তেলগী খুত্থাঙদা খুদোংচাদবা কাঙলুপশিংদা সোফ্ত লোনশিংসু ফংহল্লি‍।

ঐগী লৈঙাক্না মীমান্নদ্রবা ইচিল ইনাওশিংগীদমক লমদমসিগী ওইবা অতাবা মমলগী তেঙবাং খুৎলায়শিং শেমগৎলি‍।

পি.এম. দিব্যসা কেন্দ্রশিংসু লৈবাক্কী মফম পুম্বদা লিংখৎলি‍।

চাকথুং ফিথুংদ্রবশিংগী থৌগলগীদমক লেপপ্লিবা খোঙফম অসি অশেংবা খুন্নায়গী ৱায়েলনি‍।

ইকায়খুম্নরবা মেম্বরশিং,

১৫. লৈবাকসিগী শিন্মীশিংগী মফমদা ইকায়খুম্নবা উৎপা ওইনা, শিন্মীশিংগী য়াইফনবা অমসুং মপাঙ্গল হাপ্নবা হোৎনবদা ঐগী লৈঙাক্না মরুওইবা মীৎয়েঙ থম্লি‍।

ঐগী লৈঙাক্না শিন্মীশিংগী সোসিএল সিক্যুরিতী স্কীম পুম্নমক পুনশিল্লি‍।

এক্সিদেন্ত অমসুং লাইফ ইন্স্যুরেন্সকী কভরেজ দিজিতেল ইন্দিয়া অমসুং পোস্ত ওফিসশিংগী নেতৱর্কশিং শীজিন্নদুনা পাকথোক চাউথোকহল্লি‍।

পি.এম. স্বানিধীগী ঙমখৈ  পাকথোক চাউথোকহনগনি অমসুং রুরেল অমসুং সেমি-অঅর্বান মফমশিংদা লৈবা লম্বী মতাইগী পোৎফম ফম্বশিংসু মসিগী মখাদা পুশিল্লক্কনি‍।

ইকায়খুম্নরবা মেম্বরশিং,

১৬. বাবা সাহেব দোক্তর ভিমরাও অম্বেদকরনা খুন্নাই অমগী খোঙজেলনা খুন্নাইদুগী মখা থাবদা লৈরিবা কাঙলুপকী খোঙজেলগী মখা পোল্লি হায়না থাজবা থম্লম্মি‍।

লায়রবশিং মপাঙ্গল হাপ্পনা হৌখিবা চহি ১০সিদা লৈবাকসিনা তানফংলিবা অমসুং খুমাঙ চাওশিল্লিবসিগী য়ুম্ফম ওইদুনা লাক্লি‍।

অহান্বা ওইনা ঐগী লৈঙাক্না লায়রবশিংগী মফমদা লৈঙাক অসিনা মখোয়গী থৌগলগীদমক লৈরি হায়বা ফাওহল্লে‍।

কোরোনা লাইচৎকী খুদোংথিরবা মতমদা, মীওই করোর ৮০দা চেঙ হৱায় লেম্না ফংহন্নবা লৈঙাক অসিনা পি.এম. গরিব কল্য়ান অন্ন য়োজনা হৌদোকখি‍।

স্কীম অসিগী কান্নবশিং লায়রবগী পনখৈনুংদগী থোরক্লবা ইমুংশিংদসু মখোয়বু অমুক হন্না লায়রবগী পনখৈনুংদা চঙহনখিদনবা ফংহল্লি‍।

স্বচ্ছ ভারত মিসন্না লায়রবশিংগী ইকায়খুম্নবা অমসুং মখোয়গী হকশেলবু লৈবাক্কী মরুওইবা ৱাফম অমা ওইহল্লে‍।

অহান্বা ওইনা, লৈবাকসিদা লায়রবা মীওই করোর কয়াগী খোঙহাম খুৎহাম্ফম শাখ্রে‍।

হোৎনখিবশিং অসিনা ঙসি ঐখোয়গী ইফমদা লৈবাকসিনা মহাত্মা গান্ধীগী ৱাখল্লোন্বু তশেং তশেংনা ইন্দুনা চৎলি হায়বগী থাজবা পীরি‍।

ঐগী লৈঙাক্না অয়ুস্মান ভারত য়োজনাগী মখাদা বেনিফিসরী করোর ৫৫দা লেম্না হকশেলগী সর্ভিসশিং পীরি‍।

লৈবাকসিদা জন ঔসধী কেন্দ্র ২৫,০০০ হাংদোকপগী থবকসু খোঙজেল য়াঙনা পায়খৎলি‍।

মখা তানা, লৈঙাক অসিনা হীরম অসিদা অতোপ্পা ফিরেপ অমসু লৌগদৌরি‍।

হৌজিক্তি চহি ৭০গী মথক্তা লৈবা অহলশিংসু কোনশিন্দুনা অয়ুস্মান ভারত য়োজনাগী মখাদা লেম্না লায়েংবগী খুদোংচাবা ফংহল্লগনি‍।

ইকায়খুম্নরবা মেম্বরশিং,

১৭. য়াম্না তোয়না, য়েক্নবগী ৱাখল্লোন অমসুং পুকচেল পীকপা মতৌনা, দিমোক্রেসীগী ৱাখল্লোনবু চাউনা নমথদুনা থম্লি‍।

মসিনা পার্লিয়ামেন্তরী সিস্তেম লোয়ননা লৈবাকসিগী চাওখৎ খোঙচত্তা অকায়বা পীরি‍।

দেকেদ কয়া শাংনা লৈখিবা লৈবাকসিগী মরা চেত্তবা লৈঙাকশিংগী মতমদা, লৈঙাক কয়ানা, ফনা পাম্লবসু, অওনবা পুরকপা অমদি মরুওইবা ফিরেপ লৌবা ঙমখিদে‍।

হৌজিক্তি ভারতকী মীয়াম্না মখোয়গী ফিরেপ চেৎপা খোঙফম্না ফীভম অসিদা অহোংবা ‍পুরক্লে‍।

হৌখিবা চহি ১০সিদা ঙসি লৈবাকসিনা চাওনা কান্নবা ফংবা রিফোর্ম কয়া পুরকখ্রে‍।

হায়রিবা রিফোর্মশিং অসি পুরক্লিঙৈ মতমদা ফাওবা, মখোয়না মসিগী মায়োক্তা লৈখি অমসুং অরান্বা ৱাখল্লোন শন্দোক্নবা হোৎনখি‍।

অদুবু হায়রিবা রিফোর্মশিং অসি মতমগী চাংয়েংদা মায় পাকখি‍।

চহি তরাগী মমাঙদা, ভারতকী বেঙ্কিং সেক্তর কায়থখিবদগী কন্ননবা লৈঙাক্না বেঙ্কিং রিফোর্মশিং পুরকখি অমসুং IBC গুম্বা লোশিং শেমখি‍।

ঙসিদি, হায়রিবা রিফোর্মশিং অসিনা ভারতকী বেঙ্কিং সেক্তরবু মালেমগী খ্বায়দগী মপাঙ্গল কনবা বেঙ্কিং সেক্তর অমা ওইহল্লে‍।

ঐখোয়গী পব্লিক সেক্তর বেঙ্কশিং ঙসিদি য়াম্না চাউরে অমসুং শেন্দোং লৈরে‍। পব্লিক সেক্তর বেঙ্কশিংগী শেন্দোং মমাঙ চহিদগী ৩৫% হেন্না ৱাংদুনা ২০২৩-২৪দা লুপা করোর লাখ ১.৪ হেনখি‍। ঐখোয়গী বেঙ্কশিংগী মপাঙ্গলনা মখোয়গী ক্রেদিত বেজ পাকথোক চাউথোকহন্বা অমসুং লৈবাক্কী শেন্মিৎলোন চাওখৎহনবদা থৌদাং য়াবা ঙমহল্লি‍।

পব্লিক সেক্তর বেঙ্কশিংদা লৈরিবা NPA শিং লেপ্পা লৈতনা হন্থরক্লি‍।

ঙসিদি SBI না রেকোর্দ ওইবা শেন্দোং তাল্লি‍।

ঙসিদি LIC হান্নদগী হেন্না মপাঙ্গল কল্লে‍।

ঙসিদি, HAL নসু লৈবাকসিগী ঙাকশেলগী ইন্দস্ত্রীদা মপাঙ্গল হাপ্লি‍।

ঙসিদি, GST না ভারতকী শেন্মিৎলোন ফোর্মেলাইজ তৌনবা পাম্বৈ অমা ওইরে অমসুং লল্লোন ইতিকশিং হান্নদগী হেন্না লায়থোকহন্বদা মতেং পাংলি‍।

অহান্বা ওইনা এপ্রিল থাদা, GST খোমগৎপগী চাং লুপা করোর লাখ ২ হেল্লে‍। মসিনসু স্তেতশিংবু শেন্মিৎলোনগী লমদা মপাঙ্গল কনখৎহল্লে‍।

ঙসি মালেম পুম্বনা দিজিতেল ইন্দিয়া অমসুং দিজিতেল পেমেন্তকী মরমদা মথুম মরাং হৌনরি‍।

ইকায়খুম্নরবা মেম্বরশিং,

১৮. ঐখোয়গী খুৎলায় পায়বা লান্মী মতমগা চুনহনবা হায়বসি অকন্বা ভারত অমগীদমক মরুওই‍।

ঐখোয়গী লান্মীশিং লানগী মতমদা মখোয়গী মকোক থোংবা ফিভম ঙাক্না লৈনবগীদমক লান্মীগী লমদা তৌবা রিফোর্ম অসি লেপ্পা নাইদবা থৌওং অমা ওইগদবনি‍।

মসিনা লমজিং ওইরগা, ঐগী লৈঙাক্না হৌখিবা চহি ১০সিদা দিফেন্স সেক্তরদা রিফোর্ম কয়া পুরকখ্রে‍।

CDS কুম্বা রিফোর্মশিংনা ঐখোয়গী ঙাকশেল লান্মীশিংদা অনৌবা মপাঙ্গল হাপ্লে‍।

ঐগী লৈঙাক্না দিফেন্স সেক্তরবু মরোমদোম লেপ্পা ঙমহন্নবগীদমক মরুওইবা খোঙথাং কয়া লৌখৎলে‍।

ওর্দনান্স ফেক্তরীশিংদা রিফোর্মশিং পুরকপনা দিফেন্স সেক্তরদা চাউনা কান্নবা ফংলি‍।

ওর্দনান্স ফেক্তরী ৪০ হেন্ববু দিফেন্স সেক্তর এন্তরপ্রাইজেজ ৭তা নৌনা শেমদোক শেমজিন তৌদুনা মখোয়গী মঙম অমসুং মতিং হেনগৎহল্লে‍।

মসিগুম্বা রিফোর্মশিংননি ভারতনা হৌজিক লুপা করোর লাখ ১ হেন্বগী ঙাকশেললগী খুৎশু খুৎলায়শিং পুথোক্লিবা‍।

হৌখিবা দেকেদ অসিদা, ঐখোয়গী দিফেন্স এক্সপোর্ত শরুক ১৮ হেন্না হেনগৎলক্তুনা লুপা করোর ২১,০০০গী চাংদা লৈরে‍।

ফিলিপিন্সকা তৌনবা ব্রহ্মোস মিসাইল দিফেন্স দীলনা দিফেন্স এক্সপোর্ত সেক্তরদা ভারতকী খোঙফম চেৎশিনহল্লে‍।

নহাশিং অমসুং মখোয়গী স্তার্তঅপশিংদা পুক্নিং থৌগত্তুনা, লৈঙাক অসিনা মরোমদোম লেপচবা ঙম্বা দিফেন্স সেক্তরগী মপাঙ্গল কনবা য়ুম্ফম অমা থোন্বা ঙম্লি‍।

ঐগী লৈঙাক্না উত্তর প্রদেশ অমসুং তামিল নাদুদা দিফেন্স কোরিদোর অনিসু শেমগৎলি‍।

ঙাকশেল লান্মীশিংগী অপুন্বা পোৎ লৌবগী চাদা ৭০ গী ময়াদি ভারত্তা পুথোকপা পোৎলমশিংখক্তদগী লৌবনি হায়বসি ঐখোয় পুম্নমক হরাওগনি‍।

ঐখোয়গী ঙাকশেল লান্মীশিংনা ঙাকশেলগী পোৎলম ৫০০ হেন্ববু মপান্দগী পুশিল্লক্তনবা ফিরেপ লৌরে‍।

খুৎলায় অমসুং ঙাকশেলগী মরী লৈনবা পোৎলম পুম্বসি ভারতকী কম্পেনীশিংখক্তদগী লৌরি‍।

ঐগী লৈঙাক্না মতম পুম্বদা লান্মীশিংগী মথৌ তাবশিংদা মরুওইবা মীৎয়েঙ থমদুনা লাক্লি‍।

মরম অসিননি দেকেদ ৪গী মতুংদা ৱন রেঙ্ক ৱন পেন্সন চৎনহনখিবা‍।

মসিগী মখাদা, হৌজিক ফাওবদা লুপা করোর ১,২০,০০০ থাদোকখ্রে‍।

ঐখোয়গী অথৌবশিংবু ইকায়খুম্নবা ওইনা, লৈঙাক অসিনা কর্তব্য পথকী অরোয়বদা নেস্নেল ৱার মেমোরিএলসু শেমগৎলে‍।

হোৎনরিবশিং অসি তৌবিমল খঙবা লৈবাক অমনা মাগী থৌনা ফরবা লান্মীশিংগী মফমদা ইকায়খুম্নবা উৎপখক নত্তনা লৈবাক্না মাঙদা থম্বা হায়বা ৱাখল্লোনগী লোইনাইদবা পুক্নিং থৌগৎনফম অমসু ওইরি‍।

ইকায়খুম্নরবা মেম্বরশিং,

১৯. ঐগী লৈঙাক্না লৈবাকসিগী নহাশিংবু মঙলান অচৌবা মঙহন্নবা অমসুং মঙলানশিংদুবু মঙফাওনহন্বা ঙমহনগদবা ফীভম অমা শেমগৎপদা শরুক য়াখি‍।

হৌখিবা চহি ১০সিদা, ঐখোয়গী নহাশিংদা খুরৌ ওইগদবা খুদিংমক লৌথোখ্রে‍।

মমাঙথক্তা নহাশিংনা মখোয়গী সর্তিফিকেতশিং এতেস্ত তৌনবগীদমক মফম অমদগী মফম অমদা চেন্নরম্মি‍। হৌজিক্তি মশানা এতেস্ত তৌজবনা য়ারে‍।

কেন্দ্র লৈঙাক্কী গ্রুপ-সি অমসুং গ্রুপ-দি পোস্তশিংগী থবক লৌবদা ইন্তরভিউ মুত্থৎখ্রে‍।

মমাঙদা, ভারতকী লোলশিংদা মহৈ মশিং তম্লকপা মহৈরোয়শিংদা থোং মান্নদবা ফীভম মায়োক্নরম্মি‍।

অনৌবা নেস্নেল এজুকেসন পোলিসী চৎনহনখিবগা লোয়ননা, ঐগী লৈঙাক্না হায়রিবা অরান্বা ৱায়েল অসিবু লৌথোকখ্রে‍।

হৌজিক্তি মহৈরোয়শিংনা ভারতকী লোলশিংদা ইঞ্জিনিয়রিং কোর্সশিং তম্বা য়ারে‍।

হৌখিবা চহি ১০সিদা অনৌবা IIT ৭, IIIT ১৬, IIM ৭, অনৌবা AIIMS ১৫, মেদিকেল কলেজ ৩১৫ অমসুং য়ুনিভর্সিতী ৩৯০ লিংখৎখ্রে‍।

হায়রিবা ইন্সতিত্যুসনশিং অসি মখা তানা মপাঙ্গল কনখৎহন্নবা অমসুং মথৌ তাবগী মতুং ইন্না মখোয়গী মশিং হেনগৎহন্নবা লৈঙাক অসিনা হোৎনরি‍।

লৈঙাক অসিনা দিজিতেল য়ুনিভর্সিতী অমসু লিংখৎনবগী থবক পায়খৎলি‍।

অতল তিঙ্করিং লেব, স্তার্ত-অপ ইন্দিয়া, অমসুং স্তেন্দ-অপ ইন্দিয়ানচিংবা প্রোগ্রামশিংনা লৈবাকসিগী নহাশিংগী মতিং হেনগৎহন্বদা মতেং পাংলি‍।

হোৎনরিবশিং অসিননি ঙসি ভারতনা মালেমগী অহুমশুবা খ্বায়দগী চাউবা স্তার্ত-অব ইককোসিস্তেম ওইবা ঙম্লিবা‍।

ইকায়খুম্নরবা মেম্বরশিং,

২০. লৈবাকসিগী নহাশিংগী মফমদা মখোয়গী হৈথোই শিংথোইবা উত্থোক্নবা চুনবা খুদোংচাবশিং ফংহন্নবা লৈঙাক অসিনা লেপ্তনা হোৎনরি‍।

কম্পিতিতিব একজামিনেসন নৎত্রগা লৈঙাক্কী থবক লৌবগী ওইরবসু অপন্বা পীনবগী মরম অমত্তা লৈহল্লোইদবনি‍। থৌওং অসিদা মপুং ফানা মনুং মপান ফাওনা উবা অমসুং থিজিন হুমজিনবা য়াবগী ফীভম মথৌ তাই‍।

চাংয়েং খরদা হন্দক্তা থোকখিবা পেপর লীক ওইবগী মতাঙদা, ঐগী লৈঙাক্না চুম্না থিজিন্নবা অমসুং মরাল লৈবা মীওইশিংদা অকন্বা চৈরাক পীননবা লেপ্লি‍।

মমাঙদসু, ঐখোয়না তোঙান তোঙানবা স্তেতশিংদা পেপর লীক ওইবগী থৌদোক কয়া থেংনখ্রে‍।

ঐখোয়না পার্তীগী ওইবা রাজনিতীদগী ৱাংমা লান্দুনা লৈবাক পুম্বগী ওইবা অকন্বা থৌরাংশিং লৌখৎবা মরুওই‍।

পার্লিয়ামেন্তনসু চাংয়েংশিংদা অরান্বা পাম্বৈ শীজিন্নবগী মায়োক্তা অকন্বা চৎন-কাঙলোন চৎনহনখ্রে‍।

ঐগী লৈঙাক্না চাংয়েংগা মরী লৈনবা লোয়শঙশিং, মখোয়গী থৌওং অমসুং চাংয়েংগী থৌওংগী মশক মওং পুম্নমক্তা চাউনা অওন্বা পুরক্নবা থবক পায়খৎলি‍।

ইকায়খুম্নরবা মেম্বরশিং,

২১. লৈবাক শেম্বদা নহাশিং শরুক য়াবগী চাং মখা তানা হেনগৎহন্নবগীদমক, ঐগী লৈঙাক্না ‘মেরা য়ুবা ভারত (মাই ভারত)’ কেম্পেন হৌদোকখ্রে‍।

হৌজিক ফাওবদা, মসিদা নহা করোর ১.৫ হেন্বনা রেজিস্তর তৌরকখ্রে‍।

থৌশিল অসিনা নহাশিংগী মরক্তা লুচিংবগী হৈ-শিংবা লৈহনগনি অমসুং থৌগলগী মরু হুনগনি‍।

ঙসি ঐখোয়গী নহাশিংনা শান্ন-খোৎনবগী লমদসু মাঙদা চঙশিন্নবগী অনৌবা খুদোংচাবশিং ফংলি‍।

ঐগী লৈঙাক্না মতিং লৈনা হোৎনরিবশিং অসিনা মরম ওসরগা, নহা ওইরিবা ভারতকী শান্নরোয়শিংনা মালেমগী ফম্পাক্তা রেকোর্দ ওইবা মশিংদা মেদলশিং ফংলি‍।

পেরিস ওলিম্পিক্সসু নুমিৎ খরনিগী মনুংদা হৌগদৌরে‍।

ঐখোয়না ওলিম্পিক্সতা ভারতকী মহুৎ শিন্দুনা শরুক য়াগদৌরিবা শান্নরোয় খুদিংমক্কীদমক চাউথোকচ‍ৈ‍। মখোয়গী মফমদা ঐনা য়াইফ-পাউজেল পীজরি‍।

হায়রিবা মায় পাকপশিং অসিবু মখা তানা চত্থনবগীদমক, ইন্দিয়ন ওলিম্পিক এসোসিএসন্নসু ২০৩৬ ওলিম্পিক গেম্স য়ুম্বু ওইনা পাঙথোক্নবা শেম শারি‍।

ইকায়খুম্নরবা মেম্বরশিং,

২২. ভারতিয় ন্যায় সন্হিতা লৈবাকসিদা জুলাই অহৌবা নুমিত্তগী চৎনবা হৌরগনি‍।

ব্রিতিস লৈঙাক্কী মতমদা, মনাই মশলশিং চৈরাক পীবগী চৎনবী অমা লৈরম্মি‍।

লাইবক থিবদি, হায়রিবা লোইলম মতমগী চৈরাক পীবগী চৎনবী অদু নীংতম্লবা মতুংদসু দেকেদ কয়া মখা শমথদুনা লাকখি‍।

মসিদা অহোংবা পুরক্নবগী ৱাফম অসসি দেকেদ কয়া ঙাঙনদুনা লাকখি,, অদুবু মদু তশেংনা তৌনবগী থৌনা উৎখিবদুদি ঐগী লৈঙাক্ননি‍।

হৌজিক্তি অচুম্বা ৱায়েলনা চৈরাক পীবদগী হেন্না মরুওইবা মফম কল্লগনি, মসিনা ঐখোয়গী সংবিধানগী ৱাখল্লোনগসু চুনবা ওইরি‍।

হায়রিবা অনৌবা লোশিং অসিনা ৱায়েলগী থবক থৌওংসু খোঙজেল য়াঙখৎহল্লগনি‍।

ঙসিদি, তোঙান তোঙানবা হীরমশিংদা লৈবাকসিনা লোইলম লৈঙাক্কী ৱাখল্লোন্দগী মনিং তম্লকপা মতমসিদা, মসিনা মায়কৈ অসিদা থাংজিনবা অচৌবা খোঙথাঙ অমা ওইরি‍।

মসি ঐখোয়গী নীংতম লান্মীশিংগী মফমদা কৎচবা তশেংবা শ্রদ্ধাঞ্জলি অমসু ওইগদৌরিবনি‍।

ঐগী লৈঙাক্না CAA গী মখাদা রিফ্যুজীশিংদা সিতিজনসিপ পীবা হৌরে‍।

মসিনা পার্তিসন্না মরম ওইরগা অৱাবা তাখিবা ইমুং কয়াদা ইকায়খুম্নবা ঙাক্না হিংবা ঙমহল্লে‍।

CAA গী মখাদা সিতিজনসিপ ফংলবা ইমুংশিংদা মফমদা ঐহাক্না হেন্না ফবা তুংলমচৎ অমগীদমক য়াইফরোল পীজরি‍।

ইকায়খুম্নরবা মেম্বরশিং,

২৩. তুংলমচৎ শেম্বা মতমদা, ঐগী লৈঙাক্না ভারতকী নাৎগী ফজবা অমসুং পারী পুরীগী লনশিং অমুক হন্না শেমগৎলি‍।

হন্দক্তা, নলন্দা য়ুনিভর্সিতীগী অচৌবা কেম্পসকী মওংদা, মসিগী মতাঙদা অনৌবা পন্দুপ অমা হাপচিনখ্রে‍।

নলন্দা য়ুনিভর্সিতী অমখক্তা নত্তে, মসি মালেমগী ৱাখল লৌশিংগী মকোন অমা ওইবগী ভারতকী অথোইবা মাঙলমচৎকী খুদম অমনি‍।

অনৌবা নলন্দা য়ুনিভর্সিতী অসিনা ভারতপু মালেমগী লৌশিংগী পুক্কৈ অমা ওইহন্বদা মতেং পাংগনি হায়না ঐনা থাজৈ‍।

ঐখোয়গী চহি লিশিং কয়াগী লিক্লমচৎনা তুংগী মীরোলশিংবু লেপ্তনা পুক্নিং থৌগৎনবা ঐগী লৈঙাক্না হোৎনরি‍।

মরম অসিননি লৈবাক শিন্বা থুংনা লাইনিং খোঙচৎ চৎফম অমসুং লাইনিং লাইশোলগী মফমশিং শেমগৎলক্লিবা‍।

ইকায়খুম্নরবা মেম্বরশিং,

২৪. ঐগী লৈঙাক্না চাওখৎ থৌরাংগীদমক হোৎনরিবা অসিগা চপ মান্ননা পারী পুরীগী লনশিং শেমগৎপদসু চাওথোকচবগা লোয়ননা হোৎনরি‍।

পারী পুরীগী লন্দা চাউথোকচবা পোকপগী ফিরেপ অসিনা সিদ্যুল কাস্ত, সিদ্যুল ত্রাইব, শোত্থহৌরবা অমসুং ফুরুপ পুম্নমক্কী ইকায়খুম্নবগী খুদম অমা ওইরক্লি‍।

ঐগী লৈঙাক্না ভগবান বির্সা মুন্দাগী মপোক কুমওনবু জন জাতিয় গৌরব দিবস হায়না পাঙথোকপা হৌরে‍।

ভগবান বির্সা মুন্দাগী ১৫০শুবা মপোক কুমওন মথঙ চহিদা লৈবাক শিন্বা থুংনা হরাও তয়াম্না পাঙথোক্নগনি‍।

লৈবাক অসিনা রানী দুর্গাবতীঈগী ৫০০শুবা মপোক কুমওনসু চাউনা পাঙথোক্লি‍।

মমাঙ থাদা, লৈবাক অসিনা চহি অমা চত্থগদবা রানী অহিল্যবাই হোলকরগী ৩০০শুবা মপোক কুমওন থৌরম হৌদোকখি‍।

মমাঙদা, লৈঙাক অসিনা গুরু নানক দেব জীগী ৫৫০শুবা প্রকাস পর্ব অমসুং গুরু গোবিন্দ সিংহগী ৩৫০শুবা প্রকাস পর্ব চীং লেম্না পাঙথোকখি‍।

‘এক ভারত শ্রেস্থ ভারত’কী ৱাখল্লোন্দা কাসি তামিল সঙ্গমম অমসুং সৌরাস্ত্র তামিল সঙ্গমমগুম্বা কুমহৈশিং পাঙথোকপগী চৎনবী অসিসু ঐগী লৈঙাক্না হৌদোকখিবনি‍।

অনৌবা মীরোলশিংনা অসিগুম্বা থৌওংশিংদগী লৈবাক শেমগৎপগী পুক্নিং থৌগৎনিংঙাইগী মচাকশিং ফংলি অমসুং লৈবাক্কীদমক চাউথোকচবগী ৱাখল্লোন মপাঙ্গল কনখৎহল্লি‍।

ইকায়খুম্নরবা মেম্বরশিং,

২৫. ঐখোয়গী মায় পাকপশিং অসিনা ঐখোয়গী অপুন্বা লীক্লম্নি‍।

মরম অসিনা, ঐখোয়না মখোয়বু লৌশিন্বদা চাউথোকচবা পোক্কদবনি, হৈনিংদবা পোক্লোইদবনি‍।

ঙসি, ভারতনা তোঙান তোঙানবা সেক্তরশিংদা থবক নীংথিনা চঙশিল্লি‍।

তানফংলিবশিং অসিনা ঐখোয়গী খোঙজেল অমসুং মায় পাকপশিংগীদমক ঐখোয়দা চাউথোকচবা পোক্নবগী অচৌবা খুদোংচাবশিং পীরি‍।

ভারতনা মালেমগী ওইনা দিজিতেল পেমেন্তকী লমদা নীংথিনা থবক তৌরকপদা ঐখোয়না চাউথোকচবা পোক্কদবনি‍।

ঐখোয়গী সাইন্তিস্তশিংনা থাগী থা থংবা চিদাইদা চন্দ্রয়ান মায় পাক্না তাহন্বদা ঐখোয়দা চাউথোকচবা পোক্কদবনি‍।

ভারতনা মালেমদা খ্বায়দগী খোঙজেল য়াঙনা চাউখৎলক্লিবা শেন্মিৎলোন ওইরকপদা ঐখোয়দা চাউথোকচবা পোক্কদবনি‍।

অচৌবা হাৎন-শুনবা অমসুং চরাংনবগী থৌদোকশিং য়াওদনা চাউখ্রবা মীখল অমা ভারতনা পাঙথোকপগীদমক ঐখোয়দা চাউথোকচবা পোক্কদবনি‍।

ঙসি, মালেম পুম্বনা ঐখোয়বু দিমোক্রেসীগী মমা হায়না ইকায়খুম্নরি‍।

ভারতকী মীয়াম্না মতম পুম্বদা দিমোক্রেসীদা মপুং ফানা থাজবা উৎলি অমসুং ইলেক্তোরেল ইন্সতিত্যুসনশিংদা চপ চানা থাজবা ফোঙদোক্লি‍।

ঐখোয়গী অচৌবা দিমোক্রেসীবু মাঙহন্দনা থম্নবগীদমক ঐখোয়না মসিববু কায়হন্দনা অমসুং ঙাক্তুনা থম্বা মথৌ তাই‍।

দিমোক্রেতিক ইন্সতিত্যুসনশিং অমসুং ইলেক্তোরেল প্রোসেসতা লৈরিবা মীয়ামগী থাজবা মাঙহনবা হায়বসি ঐখোয় ইশানা তোংলিবা উশাদু ককথৎচবগা পাঙ্খক্নি হায়বা ঐখোয়না খঙজগদবনি‍।

ঐখোয়না ঐখোয়গী দিমোক্রেসীগী ক্রেদিবিলিতী নমথনবা হোৎনরকপা খুদিংমক পুন্না য়ানিংদবা ফোঙদোকমিন্নগদবনি‍।

ঐখোয় পুম্নমক্না বোলোত পেপরশিং মুন্বা অমসুং লাকখিবা মতম নীংশিংনরি‍।

ইলেক্তোরেল প্রোসেসকী অশেংবা শক্তম ঙাক্নবগীদমক EVM শীজিন্ননবা ফিরেপ লৌখিবনি‍।

EVM অসি, হৌখিবা দেকেদ খরসিদা সুপ্রীম কোর্ততগী হৌরগা মীয়ামগী ৱায়োলশঙ ফাওবদা চাংয়েং খুদিংদা মায় পাক্লে‍।

ইকায়খুম্নরবা মেম্বরশিং,

২৬. ঐনা ময়ামগী মফমদা ঐঙোন্দা ফাওরকপা ৱাফম খরসু তমজগে‍।

ঐহাক্না ময়ামগী মফমদা হায়রিবা ৱাফমশিং অসিদা অমুক্তং খন্থদুনা নৈনবিয়ু অমসুং লৈবাকসিদা মশক থোকপা অমসুং অফবা পাম্বৈশিং পীবিয়ু হায়জরি‍।

কম্ম্যুনিকেসন রিভোলুসনগী মতমসিদা, অয়েৎ-অপন পীবা শাফুশিংনা দিমোক্রেসী মপাঙ্গল শোন্থহন্নবা অমসুং খুন্নাইদা ময়ি চৎহন্নবা শরৌ শিল্লি‍।

শাফুশিং অসি লৈবাক মনুংসিদা লৈ অমসুং লৈবাক্কী মপান্দগীসু থবক তৌরি‍।

হায়রিবা শাফুশিং অসিনা তোকঙা শন্দোকপা, মীয়ামবু লান্না লমজিংবা অমসুং অরান্বা ঈ-পাউ শন্দোকপগী থবক চত্থরি‍।

ফীভম অসি হন্না য়েংশিন্দনা মখা চত্থহনবা য়ারোই‍।

ঙসি, নুমিৎ খুদিং তেক্নোলোজী খুমাঙ চাউশিল্লি‍।

অসিগুম্বা ফীভম অসিদা, মীওইবা খুন্নাইগী মায়োক্তা মসিবু লান্না শীজিন্নবা হায়বসি য়াম্না মাঙনিংঙাইনি‍।

ভারতনা হায়রিবা নুংনাংবা ৱাফমশিং অসি মালেমগী ফোরমশিংদসু ফোঙদোকখ্রে অমসুং মালেমগী ওইবা ফ্রেমৱর্ক অমা শেম্নবা ৱাফমসু হৌদোকখ্রে‍।

অসুম্না তৌগনবা মতৌ অসি লেপ্পা অমসুং হায়রিবা শিংনবশিং অসি থেংননবা অনৌবা লম্বী অমসুং পাম্বৈশিং থিবা হায়বসিনা ঐখোয়গী থৌদাংনি‍।

ইকায়খুম্নরবা মেম্বরশিং,

২৭. মালেমগী ওর্দর অসি ২১শুবা চহিচাগী অহুমশুবা দেকেদ অসিদা অনৌবা মওং অমা ওইরক্লি‍।

ঐগী লৈঙাক্কী হোৎনজমলনা, ভারতনা বিস্ব-বন্ধু অমা ওইনা মালেমদা অনৌবা থাজবা অমা পীরি‍‍।

মীওইবগী য়াইফনবা পরিংদা চঙশিন্বনা মরম ওইরগা, ভারতনা ঙসি ৱাথোক অমা হেক্তদা হান্না পাউখুম পীবা অমা ওইরি অমসুং মালেমগী খা থংবা শরুক্কী অকন্বা খোঞ্জেল ওইরি‍।

ভারতনা মীওইবা খুন্না ঙাক শেন্বগী লমদা মাঙজিল থারি; কোরোনা লাংফম ওইরবসু নৎত্রগা য়ুহা হাবা নৎত্রগা লান ওইরবসু‍।

হৌজিক মালেম্না ভারত্তা য়েংলিবা মীৎয়েঙ অসি ইতলীদা পাঙথোকখিবা G-7 মীফমদা উখ্রে‍।

ভারতনা মাগী G-20 প্রেসিদেন্সী মনুংদা তোঙান তোঙানবা ৱাফমশিংদা মালেমবু পুনশিন্নহনখি‍।

ভারতকী প্রেসিদেন্সী মতমদনি অফ্রিকান য়ুনিয়নবু G-20গী মতম চুপ্পগী ওইবা মেম্বর ওইহনখিবা‍।

মসিনা অফ্রিকা অমসুং মালেমগী খাথংবা শরুক পুম্বগী থাজবা হেন্না চেৎশিনহল্লে‍।

য়ুমলোন্নবনা মাঙদা থম্বা হায়বা থৌরাংগী মতুং ইন্না, ভারতনা মাগী য়ুমলোন্নবা লৈবাকশিংগা লৈনরিবা মরী চেৎশিনহল্লি‍।

য়ুনিয়ন কাউন্সিল ওফ মিনিস্তরশিংগী জুন ৯দা পাঙথোকখিবা ৱাশক লৌবগী থৌরমদা য়ুমলোন্নবা লৈবাক তরেৎকী লুচিংবশিংনা শরুক য়াখিবা অদুদা ঐগী লৈঙাক্না মরুওইবা মীৎয়েঙ থম্লিবসিগী মমি তারি‍।

ভারতনা সবকা সাথ সবকা বিকাসকী ৱাখল্লোন্দা ইন্দো-পোসিফিক রীজনগী লৈবাকশিংগগী মরক্তা তেংবাংনবগী থৌওংসু হেনগৎহল্লি‍।

ইস্ত এসিয়া নৎত্রগা মিদ্দল ইস্ত অমসুং য়ুরোপ ওইরবসু, ঐগী লৈঙাক্না লম্বী থোং শেমগৎপদা চাউনা মীৎয়েঙ থম্লি‍।

ইন্দিয়া মিদ্দল ইস্ত য়ুরোপ ইকনমিক কোরিদোর ওইহল্লকখিবসি ভারতকী মঙলান্নি‍।

কোরিদোর অসিনা ২১শুবা চহিচাগী খ্বায়দগী চাউনা অহোংবা পুরক্কদবশিংগী মরক্তা অমা ওইরক্কনি‍।

ইকায়খুম্নরবা মেম্বরশিং,

২৮. থা খরসিদা, ভারতনা রিপব্লিক অমা ওইবগী চহি ৭৫ মপুং ফারগনি‍।

ভারতকী সংবিধান্না হৌখিদা দেকেদশিংদা শিংনবা খুদিং অমসুং চাংয়েং খুদিং মায়োক্নদুননা লাকখি‍।

সংবিধান শেম্লিঙৈ মতমদসু, ভারতপু মায় পাকহন্দবা পাম্বা শাফুশিং মালেমসিদা লৈখি‍।

সংবিধান চৎনরক্লবা মতুংদসু লৈবাকসিদা কয়ারক হন্না লান্দারকখি‍।

ঙসি অসি জুন ২৭নি‍।

জুন ২৫, ১৯৭৫দা ইমর্জেন্সী লাউথোকখিবা অদুনা সংবিধান্দা হকথেংননা লান্দারকপগী খ্বায়দগী চাউবা অমসুং খ্বায়দগী মম্বা পন্দুপ ওইখি‍।

লৈবাক পুম্বা শাওনখি‍।

অদুবু ভারতকী লু-তোংদা মীয়ামগী লৈঙাক্কী চৎনবী চঙদুনা লৈখিবনা লৈবাকসিনা অসিগুম্বা শাফুশিংদগী মায় পাক্লকখি‍।

ঐগী লৈঙাক্না সংবিধান অসি লৈঙাক্লোনগী পাম্বৈ অমখক ওইনা লৌদে; মদুগী মহুত্তা ঐখোয়না সংবিধানবু মীয়ামগী ৱাখল লৌশিংগী শরুক ওইন্নবা থবক পায়খৎলি‍।

হায়রিবা পান্দম অসি পুক্নিংদা থমদুনা, ঐগী লৈঙাক্না নবেম্বর ২৬পু কন্সতিত্যুসন দে হায়না পাঙথোকপা হৌখি‍।

হৌজিক্তি, আর্তিকল ৩৭০না মরম ওইরগা খেন্নবা ফীভম লৈরম্বা ভারতকী অদুগুম্বা মফম, ঐখোয়গী জম্মু অমসুং কাস্মিরদসু সংবিধান মপুং ফানা চৎনরে‍।

ইকায়খুম্নরবা মেম্বরশিং,

২৯. লৈবাক্কী মায় তানফংলিবশিং অসি ঐখোয়গী থৌদাং পাঙথোকপদা লৈরিবা পুকচেল শেংবনা লেপ্পি‍।

১৮শুবা লোক সভাদা, অহান্বা ওইনা অনৌবা মেম্বর কয়া অমা পার্লিয়ামেন্তরী সিস্তেমগী শরুক ওইরক্লি‍।

অরিবা মেম্বরশিংসু অনৌবা ৱাখল্লোনগা লোয়ননা হল্লক্নরি‍।

অদোম পুম্নমক্না খঙবিরে মদুদি হৌজিক্কী মতম অসি হীরম খুদিংদা ভারতকীদমক্তা য়াম্না চানবা মতম্নি‍।

লাক্কদৌরিবা চহিশিংদা লৈঙাক্না অমসুং ভারতকী পার্লিয়ামেন্তনা লৌখিবা ফিরেপশিং অমসুং শেমখিবা খুজিল থৌরাংশিং মালেম পুম্বনা মুন্না য়েংগদৌরিবনি‍।

হায়রিবা মতম অসিদগী লৈবাকসিনা কান্নবা হেক য়ারিবমখৈ লৌহৌনবা হোৎনবা হায়বসিনা পার্লিয়ামেন্তকী মেম্বর খুদিংমক অমসুং লৈঙাক্কী থৌদাংনি‍।

হৌখিবা চহি ১০সিদা পুরকখিবা রিফোর্মশিং অমসুং লৈবাকসিদা হাপচিনখিবা অনৌবা থাজবশিংগা লোয়ননা, ঐখোয়দা ভারতপু চাওখৎপা লৈবাক অমা ওইহন্নবগীদমক অনৌবা খোঙজেল অমা পীরি‍।

ভরতপু চাওখৎপা লৈবাক অমা ওইহনবনা লৈবাকসিগী মীপুম খুদিংমক্কী অপাম্বা অমসুং ফিরেপ্নি হায়বা ঐখোয় পুম্নমক্না নীংশিংবা মথৌ তাই‍।

হায়রিবা ফিরেপ অসি ফংনবগী লম্বীদা খুরৌ অমত্তা লৈহন্দনবা ঐখোয় পুম্নমক্তা থৌদাং লৈ‍।

খুজিল থৌরাংদা য়ানিংদবা ফোঙদোকপা অমসুং পার্লিয়ামেন্তকী মথৌ পাঙথোকপদা অয়েৎ অপন পীবা অনিসি খেন্নবা ৱাফমশিংনি‍।

পার্লিয়ামেন্তনা মাগী মথৌ অয়েৎপা লৈতনা পাঙথোক্লবা মতমদা, অফবা মওংদা খন্ন-নৈনরবা মতমদা, মীৎয়েঙ শান্বা ফিরেপশিং লৌরবা মতমদা, মীয়াম্না লৈঙাকখক্তদা নত্তনা সিস্তেম পুম্বদা থাজবা থম্লক্কদৌরিবনি‍।

মরম অদুনা, পার্লিয়ামেন্তকী মীৎকুপ খুদিংমক মপুং ফানা শীজিন্নগনি অমসুং মীয়ামগী অপাম্বদা অহেন্বা মীৎয়েঙ থমগনি হায়না ঐনা থাজজৈ।

ইকায়খুম্নরবা মেম্বরশিং,

৩০. ঐখোয়গী ভেদশিংদা, ঐখোয়গী লাইনিংবশিংনা ঐখোয়দা “সমানো মন্ত্রহ সমিতিহ সমানি” হায়না পাউজেলনা পুক্নিং থৌগৎলি‍।

হায়বদি ঐখোয়না মান্নবা ৱাখল্লোন অমসুং পান্দম অমগা লোয়ননা পুন্না থবক পায়খৎমিন্নবা হায়বনি‍।

মসি পার্লিয়ামেন্ত অসিগী লৈজরিবা ৱাখল্লোনদুমক্ননি‍।

মরম অদুনা, ভারতনা মালেমগী অহুমশুবা খ্বায়দগী চাউবা শেন্মিৎলোন ওইরক্লবা মতমদা, অদোমসু তানফংলিবা অসিগী খোঙবু ওইগদৌরিবনি‍।

ঐখোয়না ২০৪৭দা চাওখৎলবা ভারত অমা ওইনা নীংতম্বগী চাম্মশুবা কুমওন থৌরম পাঙথোকপা মতমদা, ঙসিগী মীরোল অসিববু থাগৎনগদৌরিবনি‍।

ঙসি ঐখোয়গী নহাশিংদা লৈরিবা মতিং,

ঙসি ঐখোয়গী ফিরেপশিংদা লৈরিবা কত্থোকপগী মশক,

ঐখোয়গী ফংবা ঙম্লোইদবা মান্বা মায় পাকপশিং,

পুম্নমকসিনা তাক্লি মদুদি লাক্কদৌরিবা চক অসি ভারতকী চকনি‍।

চহিচা অসি ভারতকী চহিচানি, অমসুং মসিগী শাফু লাক্কদৌরিবা চহি লিশিং অমসিদা ফাওগনি‍।

ঐখোয় পুনশিন্সি, ঐখোয়গী থৌদাংদা মপুং ফানা কত্থোকপগা লোয়ননা, লৈবাক্কী ফিরেপশিং ফংহন্বদা ইচং থৌনা শরুক য়াসি অমসুং ভারতপু চাওখৎপা লৈবাক অমা ওইহল্লসি‍।

ময়াম পুম্নমক্কী মফমদা য়াইফরোল পীজরি!

ময়ামবু থাগৎচরি,

জয় হিন্দ!

জয় ভারত!

***