ঙসি হোম অমসুং কোওপরেসনগী য়ুনিয়ন মিনিস্তর শ্রী অমিত সাহনা লুচিংদুনা নিউ দিল্লিদা ঈশিং ইচাউ থেংন্নবা শেম-শারিবশিং হন্না য়েংশিনবগী অৱাংবা থাক্কী মীফম অমা পাংথোকখ্রে। লৈবাক অসিদা ঈশিং ইচাউগী অৱাবা কোকহন্নবা অপুনবা থৌশিল অমা শেম্নবা তুংকোইনা চৎনবা য়াবা থবকশিংশু হোম মিনিস্তরনা য়েংশিনখি।

মীফম মনুংদা, হোম মিনিস্তরনা হৌখিবা চহিদা পাংথোকখিবা মীফমগী ৱারেপশিং থবক ওইনা পাংথোকপগী মতাংদা য়েংশিনখি। মসিগা লোয়ননা, মীফম মনুংদা, এজেন্সিশিংনা শীজিন্নরিবা অনৌবা তেক্নোলোজিশিং অমসুং ঈশিং ইচাউ থেংন্নবা মখোয়গী নেতৱার্ক পাকথোক-চাউথোকপগী মতাংদশু খন্নখি। গ্লাসিএল লেক আউতব্রস্ত ফ্লদ( জি এল ও এফ) থেংন্নবা থৌরাং তৌরিবশিং য়ুনিয়ন হোম মিনিস্তরনা হন্না য়েংশিনখি। ইচাউ থেংন্নবা অমসুং ঈশিং শেন্নবগী মতাংদা তোঙান-তোঙানবা এজেন্সিশিংনা ইসরোগী সেতেল্লাইত মমিশিং মপুংফানা শীজিন্ননবা মহাক্না তকশিনখি।

য়ুনিয়ন হোম মিনিস্তরনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা, ভারতকী দিজাস্তর মেনেজমেন্ত অসি ‘অশি-অনা অমতা য়াওহন্দবা থৌরাং’ অমগী মাইকৈদা চঙশিল্লি। ইচাউ থেংনবগী মতাংদা এন.দি.এম.এনা পীবা পাউতাকশিং মতম চানা থবক ওইনা পায়খৎনবা হোম মিনিস্তরনা রাজ্যশিং অমসুং য়ু.তিশিংদা পাউতাক পীখি। ঈশিং ইচাউ মাংজৌননা লাউথোকপদা শীজিন্নরিবা খুৎলায়শিং অমুক হন্না ফগৎহনবগী থবকশিং লোইশিন্নবা মহাক্না ইন্দিয়ান মেতিওরোলোজিকেল দিপার্তমেন্ত(আই এম দি) অমসুং সেন্ত্রেল ৱাতর কম্মিসনদা পাউতাক পীখি। সিক্কিম অমসুং মনিপুরগী ঈশিং ইচাউশিং কুপ্না থিজিন্নবা অমসুং হোম এফেয়ার্স মিনিস্ত্রিদা রিপোর্ত অমা পীখৎলক্নবা হোম মিনিস্তরনা এন.দি.এম.এ অমসুং জল শক্তি মিনিস্ত্রিদা খঙহনখি। অচৌবা দামশিংগী ফ্লদগেতশিং ফিবম ফনা থম্নবা মহাক্না পাউতাক পীখি। শ্রী সাহনা হায়খি সেন্ত্রেল ৱাতর কম্মিসনগী ফ্লদ মোনিতরিং সেন্তরশিং ঐখোয়গী দরকার ওইবশিং ফংনবা অমসুং মালেমগী থাকশিংগা চুন্নবা থবক তৌগদবনি।

য়ুনিয়ন হোম মিনিস্তরনা হায়খি চহি চুপ্পা ঈশিং চেন্দবা তুরেলশিং অসি লৈবাক নিংখায়গনবা অমসুং খোঙনুং থেনগৎপা য়াম্না তোইনা থোকই অমসুং মসিনা ঈশিং ইচাউ থোকহল্লি। ইচাউ নিংথিনা থেংননবা তুরেলশিংগী ঈশিং ইমায়গী চাং মাংজৌননা লাউথোকপগী থবকশিং ফগৎনবা থবকশিং পায়খৎকদবনি। ইচাউ মতমদা লম্বীশিংদা ঈশিং থুমজিন্দনবা লম্বী শেম্বা মতমদা মহৌশাদগী লৈজরক্লবা খোঙবালশিং তঙাইফদবা শরুক অমা ওইহনগদবনি। ব্রাহ্মাপুত্রা তুরেলগী ঈশিং থৈদোক্নবা অৱাং-নোংপোক্তা য়ামদ্রবদা অচৌবা ইকোন ৫০ তৌগদবনি, মসিনা ইচাউ থেংনবা অমসুং লৌউ-শিংউ, ইথৈ-লৌখোং অমসুং তুরিজম চাউখৎহনবদা মতেং পাংগনি অমসুং মফম অদুগী শেন-থুমগী ফিবম ফগৎহনগনি।

শ্রী অমিত সাহনা হায়খি এন.দি.এম.এ অমসুং ইনভাইরোনমেন্ত, ফোরেস্ত অমসুং ক্লাইমেত চেঞ্জ মিনিস্ত্রিনা লান্মৈ চাকপা থিংনবা মাংজৌননা থবকশিং পায়খৎকদবনি। মসিগীদমক,  চাং নাইনা মৈরমশিং শেম্নবা, অকংবা উনাশিং খুন্দোক্নবা অমসুং লৈকায়গী মীওইশিং অমসুং ফোরেস্ত পর্সোনেলশিংগা লোয়ননা মতম মতমগী মোক দ্রিলশিং পাংথোক্কদবনি। মসিগা লোয়ননা, মফম অমদা হঞ্জিন-হঞ্জিন লান্মৈ চাকপগী থৌদোকশিং থোক্লিবা অসি নৈনগদবনি। লান্মৈ চাকপগী থৌদোকশিং থেংননবা অকুপ্পা মেনুএল অমা শেম্নবা মহাক্না এন.দি.এম.এদা খঙহনখি।

য়ুনিয়ন হোম মিনিস্তরনা হায়খি আই.এম.দিনা ব্রাজ তাবাগী মতাংদা মীয়ামদা এস.এম.এস, তি.ভি, এফ.এম রেদিও অমসুং অতোপ্পা পাম্বৈশিংগী মতাংদা খঙহনগদবনি। তোঙান-তোঙানবা দিপার্তমেন্তশিংনা শেম্বা অইং-অশা, নোংজু অমসুং ইচাউগা মরী লৈনবা এপ্পশিং অমতা ওইনা পুনশিনবগী তঙাইফদবা লৈ অমসুং মীয়ামদা কান্নবা পীগনি। ঈশিং ইচাউ য়াওনা খুদোংথিবা অমা হেক থোক্লকপা মতমদা মীয়াম্না অহানবা ওইনা থেংনরি, মরম অদুনা তোঙান-তোঙানবা এজেন্সিশিংনা মীয়াম ৱাখল তাহনবগী থবকশিং মীয়ামগা লোয়ননা পাংথোকমিন্নগদবনি।

মীফম মনুংদা, আই.এম.দি, সি.দব্লিউ.সি, এন.দি.আর.এফ অমসুং এন.দি.এম.না অকুপ্পা মরোলশিং উৎখি। হৌখিবা চহিদা পাংথোকখিবা ঈশিং ইচাউগী ফিবম হন্না য়েংশিনবা মীফমদা লৌখিবা ৱারেপশিং থবক ওইনা পাংথোকপগী মতাংদা মরী লৈনবা দিপার্তমেন্তশিংনা মরিক চুম্না খঙহনখি। চহি অসিগী কুমগী নোং অমসুং তুংগীদমক মখোয়না শেম-শারিবশিংগী মতাংদশু মখোয়না পাউদমখি।

মীফম অদুদা জল শক্তিগী য়ুনিয়ন মিনিস্তর শ্রী সি.আর পতিল, হোম এফেয়ার্সকী রাজ্য মন্ত্রী শ্রী নিত্যনন্দ রাই, য়ুনিয়ন হোম সেক্রেতরি, রিভর দিবলপমেন্ত অমসুং গঙ্গা রিজুবিনেসন দিপার্তমেন্ত, আর্থ সাইন্সেস, ইনভাইরোনমেন্ত, ফোরেস্ত অমসুং ক্লাইমেত চেঞ্জ, রোদ ত্রান্সপোর্ত অমসুং হায়ৱেজ মিনিস্ত্রিশিং অমসুং দিপার্তমেন্তশিংগী সেক্রেতরিশিং, রেলৱেজ বোর্দকী চিয়ার্পসন, এন.দি.এম.এ দিপার্তমেন্তগী মেম্বরশিং অমসুং লুচিংবশিং, এন.দি.আর.এফ অমসুং আই.এম.দিগী দিরেক্তর জেনেরেলশিং, এন.ঐচ.এ.আইগী চিয়ার্মেন অমসুং সি.দব্লিউ.সি য়াওনা মরী লৈনবা দিপার্তমেন্তশিংগী সেনিয়ার ওফিসারশিং শরুক য়াখি।

****