Ha ka bynta kaba 10 jong ka International Day of Yoga (IDY) ha ka 21tarik u Jylliew 2024, u Myntri Rangbah Duh, Narendra Modi un ialam ia ka jingrakhe ia ka International Yoga Day ha SKICC hangne lashai ka sngi. Ka phang jong ka IDY mynta u snem “Yoga na ka bynta lade bad ka imlang sahlang,” ka pyni ia ka bynta kaba kongsan jong ka yoga ban wanrah ia ka bha ka miat jong ki briew bad ka jingiasuk ha ka imlang sahlang. U Lieutenant Governor jong ka UT J&K, Manoj Sinha, Myntri Khynnah (Independent Charge) jong ka tnat Ayush bad Myntri Khynnah jong ka tnatka Koit Khiah, Prataprao Ganpatrao Jadhav bad kiwei kiwei ki kynrem ki lyndan kin wan iashim bynta ha kane ka prokram ba ialam da u Myntri Rangbah Duh.

Kane ka prokram ka thmu ban wanrah lang da ki hajar ngut ki briew kiba iashim bynta ban rah shakhmat ia ka khubor ban tei ia ka koit ka khiah bad ka bha ka miat ha ka pyrthei lyngba ka jingleh yoga. Ha kane ka sngi, u Myntri Rangbah Duh un ai jingkren ruh ia kiba wan ha kane ka jingleh ia ka Common Yoga Protocol, kaba pyni ia ka bynta ba khraw jong ka Yoga ban kyntiew ia ka met, ka jingmut jingpyrkhat bad ka jingngeit.

Khnang ban ai bynta lang ia baroh ia ki jingmyntoi jong ka Yoga, u Myntri Rangbah Duh Narendra Modi u la thoh shithi sha baroh ki Gram Pradhan ha kaba u la ong, “Nga kyntu ia phi ba phin ia pynkylla ia ka koit ka khiah kaba pura sha ka jingiakhih ba ialam lynti da ki briew da kaba ai jingtip shuh shuh shaphang ka Yoga bad ki krai.” Kumba ju long ha ki bynta ba la dep jong ka IDY, ka shithi jong u Myntri Rangbah Duh khlem pep kan sa wanrah ia ka jingbun ki prokram kiba iadei bad ka Yoga ha ka IDY ha ki Panchayat, Anganwadi bad Community Health Center ha ryngkat kiwei kiwei.

U Myntri Khynnah (Independent Charge) jong ka tnat Ayush, Prataprao Ganpatrao Jadhav ha ryngkat bad u Secretary AyushVaidya Rajesh Kotecha bad ki ophisar na ka J&K, ki la leit sha ka SKICC ha Srinagar mynta ka sngi, ha kaba yn long ka prokram ha ka 21 tarik u Jylliew bad ki la peit ia ki jingpynkhreh ha kane ka jaka. Kine ki jingpynkhreh ki dang iaid shakhmat ban pynlong ba ka prokram IDY ha kane ka jaka kan long kaba ai mynsiem ia baroh kiba sngewtynnad ia ka Yoga.

Naduh ba la sdang ia ka IDY ha u snem 2015, u Myntri Rangbah Duh u la don ka bynta kaba khraw ha ka jingpynsaphriang ia ka, ka jingpynlong ia ki jingrakhe ha ki jaka bapher bapher ha kylleng ka pyrthei kiba kynthup ia ka Kartavya Path ha Delhi, Chandigarh, Dehradun, Ranchi, Lucknow, Mysuru bad ka United Nations Headquarters ha New York.

Ka jingrakhe mynta u snem kan long ha kylleng ka ri ha kaba yn don ruh ka prokram ba kyrpang “Yoga for Space”, ha kaba ki centre bad unit jong ka ISRO kin don ia ki prokram halor ka jingiashim bynta ha ki CYP lane Common Yoga Protocol. Ki kynhun ka ISRO kin iashim bynta ruh ha ka jingleh CYP ha ka 21tarik u Jylliew. Ha ryngkat kane, ka jingiashim bynta da ka kynhun Gaganyaan projek kan long ha ka 21 tarik u Jylliew. Ka jingrakhe ia ka IDY ha ka Vivekananda Rock Memorial ha Kanyakumari ruh ka dang iaid shakhmat.

Ha kylleng ka pyrthei ki Embassy bad Indian Mission shabar ka ri kin iasnohktilang ha kane ka jingrakhe kaba pyni ia ka jingpoi ka yoga sha baroh ki jaka. Ka IDY mynta u snem kan don ki bynta kum ka ‘Yoga for Space’, ka sienjam kaba ioh jingkyrshan na ka Indian Space Research Organization (ISRO).

Palat 7,000 ngut ki briew kin ialumlang bad u Myntri Rangbah Duh ha ki rud ka Dal Lake, Srinagar ban rakhe ia kane ka sngi ba kyrpang.

U Vaidya Rajesh Kotecha, Secretary ka Ayush, dang shen u la kren shaphang ka jingiaid lynti jong ka IDY bad u la kdew sha ka bynta jong ka ban kyntiew ia ka koit ka khiah, ki jinglong ba bha ha ka imlang sahlang bad ka jingiasngew kawei.

Ka rukom treikam ‘Baroh Kawei ka Sorkar’ ha kaba iadei bad ka IDY ka kynthup ki jingiatreilang jong ki tnat Sorkar bapher bapher bad ka jingiashim bynta ki Sorkar Jylla bad ki Union Territory. Ka kynhun na ka National Ayush Mission ruh ka dang pynlong ia ki prokram ha kylleng ka ri ban pyni ia ka jingiarap ka yoga ban ioh ka koit ka khiah kaba pura.

Ha Delhi, ka tnat Ayush ka la iatreilang bad ka NDMC (New Delhi Municipal Corporation), ASI (Archaeological Survey of India) bad DDA Delhi Development Authority ban pynlong ia ki prokram paidbah. Khnang ban khring ia ki paidbah ka tnat Ayush ka la sdang ia ki jingiakop bapher bapher bad ki prokram, ba kynthup ka jingiakop "Yoga with Family" Video ha ka jingiatreilang bad ka Indian Council for Cultural Relations (ICCR) ha ki rynsan MyGov bad MyBharat. Kane ka jingiakhun ka pynshlur ia ki longiing na kylleng ka pyrthei ban pyni ia ka jingkmen ba ka yoga ka wanrah bad ruh ka jingpynskhem ia ki jingiadei hapdeng ki dkhot jong ki longing. Ka tarik ba khatduh ban phah ia ki video ka dei ka 30 tarik u Jylliew, 2024.

Kito kiba iashim bynta ha ka jingiakop #YogaWithFamily Video ki lah ban jop ia ki buskit bapher bapher katba ki pynsaphriang ruh ia ka khubor jong ka yoga na ka bynta ka koit ka khiah bad ka jingiatylli. Ka tnat ka la pynmih ruh shibun ki hashtag ba kynthup #InternationalDayofYoga2024, #YogaForSelfAndSociety, #YogaWithFamily, bad #IDY2024. La pynshlur ia ki briew na kylleng ka pyrthei ban pyndonkam ia kine ki hashtag bad iasnoh kti lang ha kane ka kam na kylleng ka pyrthei.

***