প্রধান মন্ত্রী শ্রী নরেন্দ্র মোদীনা জুন ১৮দা বরানসীদা পি.এম-কিষানগী ১৭শুবা ইন্সতোলমেন্ত য়েন্থোক্কনি অমসুং মসিদা লৌমী করোর ৯.২৬ হেন্না লুপা করোর ২০,০০০ হেনবগী শেনফম কান্নবা ফংলগনি। পেরা এক্সতেন্সন ৱার্করশিং ওইনা থবক তৌনবা কৃষি শখিশিং ওইনা ত্রেনিং পীরবা সেল্ফ হেল্প গ্রুপ ৩০,০০০ হেনবদা প্রধান মন্ত্রীনা শক্তাকচেশিং য়েন্থোক্কনি। 

থৌরম অদুদা উত্তর প্রদেসকী রাজ্যপাল শ্রীমতি অনন্দিবেন পতেল, উত্তর প্রদেসকী চীফ মিনিস্তর শ্রী য়োগী অদিত্যনাথ, এগ্রিকলচর অমসুং ফার্মরস ৱেলফিয়ারগী য়ুনিয়ন মিনিস্তর শ্রী সিবরাজ সিংহ চৌহান, তোঙান-তোঙানবা রাজ্য মন্ত্রীশিং অমসুং উত্তর প্রদেস সরকারগী তোঙান-তোঙানবা মিনিস্তরশিং শরুক য়াগনি। লৈবাক শীনবা থুংবগী লৌমী করোর ২.৫ রোম থৌরম অসি শরুক য়াগদৌরিবা অসিগী মনুংদা লৌমীশিংগী মরক্তা ৱাখল তাহন্নবা লৈবাক শীনবা থুংনা লৈরিবা কৃষি বিগ্যান কেন্দ্র(কে ভি কে) ৭৩২, প্রাইমারি এগ্রিকলচর কোওপরেতিপ সোসাইতি লাখ ১ হেনবা অমসুং কম্মন সর্বিস সেন্তর লাখ ৫ হেন্না য়াওরি।

খনগৎলবা কৃষি বিগ্যান কেন্দ্র ৫০দা অখন্নবা থৌরম পাংথোক্তুনা মফম অদুদা মশিং য়াম্লবা লৌমীশিং থৌরম অসি শরুক য়াগনি। হায়রিবা মফমশিং অসিদা, তোঙান-তোঙানবা য়ুনিয়ন মিনিস্তরশিং চৎকনি অমসুং লৌমীশিংগা ৱারি শান্নগনি। লৌমীশিংগী অফবা লৌউ-শিংউগী থবকশিং, লৌউ-শিংউগী লমদা থোক্লক্লিবা অনৌবা তেক্নোলোজিশিং অমসুং নোংজু-নুংশা মায়োক্নবা ঙম্বা লৌউ-শিংউগী থবকশিং পায়খৎপগী মতাংদা লৌমীশিংদা খঙহনগনি। লৌমীশিংদা কমদৌনা মখোয়গী পি.এম-কিষানগী ফিবম চেক তৌগনি, শেন ফংবগী চেক তৌনবা, কমদৌনা কিষান-ইমিত্রা শীজিন্নগনি হায়বগী মতাংদা তাকপী-তম্বীগনি অমসুং মফম অদুগী ত্রেন তৌরবা কৃশি শখিশিংদা শক্তাকচেশিং য়েন্থোক্কনি।

হৌখিবা জুন ১৫ দা পাংথোকখিবা পাউমীশিংগা উনবা অমদা য়ুনিয়ন এগ্রিকলচর মিনিস্তর শ্রী সিবরাজ সিংহ চৌহান্না হায়খি চাউখৎলবা লৈবাক অমগী পান্দম ফংবা ঙম্নবা এগ্রিকলচর অসি য়াম্না মরুওই। লৌউ-শিংউ অসি ভারতকী শেন্মিৎলোনগী য়াংলেন শরুনি। লৌমীশিংগী য়াইফনবা প্রধান মন্ত্রী মোদীনা লেপ্পা লৈতনা থবক কয়া পায়খৎলি। ২০১৯ দা হৌদোকখিবা পি.এম কিষান্না লৌমীশিংগী বেঙ্ক একাউন্তশিংদা হকথেংননা শেন হাপচিন্দুনা লৌমী কয়া কান্নবা পীরে। মরুওইবা এগ্রিকলচর দিপার্তমেন্ত অসি মঙোন্দা শীন্নবগীদমক মহাক্না প্রধান মন্ত্রী শ্রী নরেন্দ্র মোদীগী মফমদা তৌবীমল খঙবা উৎখি।

মহাক্না হায়খি ঙসি ফাওবদা, লৌউ-শিংউগী থবকশিংনা থবক ফংনবগী খুদোংচাবশিং য়াম্না পীরি অমসুং লৈবাক্কী চীঞ্জাক পৈশীন্দুনা থম্বদা লৌমীশিংনা মরুওইবা থৌদাং লৌরি। লৌউ-শিংউ অমসুং লৌমীশিংগী য়াইফনবা থবক তৌবা অসি লাই নিংবগা চপ মান্নৈ। সরকারনা কৎথোকপগা লোয়ননা থবক তৌবদগী লৌউ-শিংউগী থবক চাউখৎলকপা অসি সরকারগী থবকশিং লেপ্তনা পায়খৎলিবা অসিনা খুদম্নি অমসুং মসিগী মনুংদা অহানবা নুমিৎ ১০০গী থৌরাং য়াওরি।

কিষান সম্মান নিধি অসি শেন্থোক য়াম্না লৈবা লৌমী খর নত্তনা লম লৈজবা লৌমীশিংগী দরকার ওইবা শেনফমশিং মতেং পাংনবা ফেব্রুৱারি ২৪,২০১৯দা লিংখৎখিবা কেন্দ্র সরকারগী স্কিম অমনি। হৌজিক ফাওবদা ভারত সরকারনা লৌমী করোর ১১ হেনবদা লুপা করোর লাখ ৩.০৪ হেন্না য়েন্থোকখ্রে অমসুং স্কিম অসি হেক হৌদোকপদগী লৌমীশিংদা পীখিবা শেনফম লুপা করোর লাখ ৩.২৪ হেল্লে।

কৃষি শখিশিং অসি লৈকায়গী অখঙ-অহৈ ওইনা মীয়াম্না থাজবা অমসুং মখোয় মশামক হৈথোই-শিংথোইবা লৌমীশিং ওইবদগী এগ্রিকলচর পেরা-এক্সতেন্সন ৱার্করশিং ওইনা খনবনি। কৃষি শখিশিং অসি মাঙজৌননা তোঙান-তোঙানবা লৌউ-শিংউগী থবকশিংদা অকনবা ত্রেনিং ফংখ্রবনি অমসুং মখোয়না অতোপ্পা লৌমীশিং মতেং পাংনবা অমসুং লমজিংনবা মতিক চাবা লৌশিং লৈরবনি। হৌজিক ফাওবদা, কৃষি শখি ৭০,০০০গী মনুংদা কৃষি শখি ৩৪,০০০ হেন্না পেরা-এক্সতেন্সন ৱার্করশিং ওইনা শক্তাকখ্রে।

*******