বে ওফ বেঙ্গলদা চঙশিল্লক্লিবা নোংলৈ-নুংশিৎকী শেম-শারিবশিং হন্না য়েংশিন্নবা ঙসি কেবিনে সেক্রেতরি শ্রী রজিব গৌবনা লুচিংদুনা নেসনেল ক্রাইসিস মেনেজমেন্ত কম্মিতি(এন সি এম সি)গী মীফম পাংথোকখ্রে।

সেন্ত্রেল বে ওফ বেঙ্গলগী মথক্তা, খেপুপারা(বাংলাদেস)গী সাউথ-ৱেস্ততা কিমি ৮০০ রোম লাপ্না অমসুং কান্নিং(নোংচুপ বেঙ্গল)দগী খাদা কিমি ৮১০ লাপ্না লৈরিবা নোংলৈ-নুংশিৎ অসিগী হৌজিক ওইরিবা ফিবমগী মতাংদা কম্মিতিদা ইন্দিয়ান মেতিওরোলোজিকেল দিপার্তমেন্ত(আই এম দি)গী দিরেক্তরনা পাউদমখি। নোংলৈ-নুংশিৎ অসি অৱাং-নোংপোক লোমদা চঙশিল্লকপা য়ারি অমসুং মে ২৫গী নুমিদাংদা মখা তানা অকনবা নোংলৈ-নুংশিৎ অমা ওইরক্কনি। মসিগী তুংদা, নোংলৈ-নুংশিৎ অসি অৱাংলোমদা চঙশিল্লক্কনি অমসুং মে ২৬গী নুমিদাংদা পুংদা কিমি ১১০-১২০ দগী পুংদা কিমি ১৩০ ফাওবগী চাংদা অকনবা নোংলৈ-নুংশিৎ ওইনা শীৎতুনা সাগর ইথৎ অমসুং খেপুপারাগী মরক্তা বাংলাদেস অমসুং নোংচুপ বেঙ্গলগী নক্নবা সমুদ্র মপানশিং ফাউখিবা য়ানা লৈরি।

নোংলৈ-নুংশিৎ অসিনা লাকপা য়াবা লম্বীশিংদা লৈরিবা মীওইশিং ঙাকথোক্নবা  অমসুং রাজ্য অসিগী লোকেল এদমিনিস্ত্রেসন্না পায়খৎলিবা চেকশিন-থৌরাংশিংগী মতাংদা নোংচুপ বেঙ্গলগী চীফ সেক্রেতরিনা কম্মিতিদা পাউদমখি। ঙা ফাবা ঙামীশিং সমুদ্রদা কুমদনা খঙহনখ্রে অমসুং সমুদ্রদা লৈরিবা মীওইশিং শাফগদবা মফমশিংদা লৈহনখ্রে। দিস্ত্রিক কন্ত্রোল রুমশিং মথৌ পাংথোকহনখ্রে অমসুং ফিবম অসি কুপ্না শেন্নরি। চঙজফমশিং, মৈ, হিদাক-লাংথকশিং অমসুং অথু-অকায়গী থবকশিং থৌরাং তৌদুনা থমখ্রে।

নেসনেল দিজাস্তার রেসপোন্স ফোর্স(এন দি আর এফ)না তিম ১২ অমসুং অহেনবা তিম ৫ থমখ্রে। লান্মী, নেভি অমসুং কোস্ত কার্দকী মী কনবা অমসুং মতেং পাংনবা তিমশিং জহাজশিং অমসুং এয়ারক্রাফশিংগা লোয়ননা থৌরাং তৌদুনা লৈরে। কোলকাতা অমসুং পারাদিপ হিথাংফমশিংদা দি.সি সিপ্পিংনা চাং নাইনা চেকশিনৱাশিং অমসুং পাউতাকশিং পীরে। খুদক্তা মৈ ফংহন্নবা পৱার মিনিস্ত্রিনা ইমর্জেন্সি তিমশিং থম্লে।

কেন্দ্রগী এজেন্সিশিং অমসুং নোংচুপ বেঙ্গলনা সরকারনা শেম-শারিবশিং হন্না য়েংশিল্লদুনা, কেবিনেত সেক্রেতরিনা হায়খি রাজ্য সরকার অমসুং কেন্দ্রগী এজেন্সিশিংনা দরকার ওইবা থবকশিং মাঙজৌননা লৌখৎকদবনি। মীওই অমতগী পুন্সি মাঙদনবা পান্দম থমগদবনি অমসুং পৱার অমসুং তেলিকোম য়াওনা লন-থুমশিং অমসুং ইনফ্রাস্ত্রকচরশিং মাঙহন্দনবা হোৎনগদবনি অমসুং করিগুম্বা অমাং-অতা থোক্লবদি অথুবা মতমদা তঙাইফদবা থবকশিং হান্নগী ফিবমদা হঞ্জিলহনগদবনি।

কেবিনেত সেক্রেতরিনা হায়খি সমুদ্রদা লৈরিবা ঙামীশিং মপুংফানা কৌখৎকদবনি অমসুং খুদোংথিনিঙাই ওইবা মফমশিংদা লৈরিবা মীওইশিং মতম চানা শাফগদবা মফমশিংদা লৈহনখ্রে। নোংলৈ-নুংশিৎনা শোকহনবা য়াবা মফমশিংদা লৈরিবা অচৌবা হোর্দিংশিংগী ফিবম অমুক হন্না য়েংশিন্নবা মহাক্না নোংচুপ বেঙ্গল সরকারদা খঙহনখ্রে। কেন্দ্রগী এজেন্সিশিং মপুংফানা মীকুপ-নাহুম শিংনা লৈরে অমসুং পাংবা য়াবা মতেংশিং পাংগনি হায়না কেবিনেত সেক্রেতরিনা নোংচুপ বেঙ্গল সরকারদা থাজবা পীখি।

মীফম অদুদা নোংচুপ বেঙ্গল সরকারগী চীফ সেক্রেতরি, য়ুনিয়ন হোম সেক্রেতরি, পৱার, তেলিকোম, পোর্তস, সিপ্পিং অমসুং ৱাতরৱেজ, পেত্রোলিয়ম অমসুং নেচরেল গ্যাস মিনিস্ত্রিশিং অমসুং ফিসরি দিপার্তমেন্তগী সেক্রেতরিশিং, নেসনেল দিজাস্তার মেনেজমেন্ত কম্মিতিগী মেম্বর সেক্রেতরি, চিয়ারমেন চীফস ওফ স্তাফ কম্মিতি(সি আই এস সি)গী চীফ ওফ ইন্তগ্রেতেদ দিফেন্স স্তাফ, ইন্দিয়ান মেতিওরোলোজিকেল দিপার্তমেন্তগী দিরেক্তর জেনেরেল, নেসনেল দিজাস্তর রেসপোন্স ফোর্সকী দিরেক্তর জেনেরেল, কোস্ত কার্দকী দিরেক্তর জেনেরেল অমসুং হোম এফেয়ার্স মিনিস্ত্রিগী সেনিয়ার ওফিসারশিং শরুক য়াখি।

****