୨୦୨୪ ସାଧାରଣ ନିର୍ବାଚନର ପଞ୍ଚମ ପର୍ଯ୍ୟାୟ ନିମନ୍ତେ ମତଦାନ ଆଜି ସକାଳ ୭ଟା ବେଳେ ୪୯ ଗୋଟି ଆସନରେ ଏକାସଙ୍ଗେ ଆରମ୍ଭ ହୋଇଥିଲା ଏବଂ ସନ୍ଧ୍ୟା ୭ଟା ୪୫ ମିନିଟ ସୁଦ୍ଧା ୫୭.୪୭ ପ୍ରତିଶତ ମତଦାନ ହୋଇଥିବା ରେକର୍ଡ କରାଯାଇଛି । ବିଭିନ୍ନ ରାଜ୍ୟରେ ଏକା ସଙ୍ଗେ ହେଉଥିବା ମତଦାନରେ ସାମିଲ ହେବାକୁ ଭୋଟରମାନେ ଖରାକୁ ଖାତିର ନକରି ମତଦାନ କେନ୍ଦ୍ରକୁ ଯାଉଥିବାର ଲକ୍ଷ୍ୟ କରାଯାଇଥିଲା । ସନ୍ଧ୍ୟା ୬ଟାବେଳେ ମତଦାନ ଶେଷ ହୋଇଥିଲା, କିନ୍ତୁ ବିପୁଳ ସଂଖ୍ୟକ ମତଦାତା ଯେଉଁମାନେ କି ପୂର୍ବରୁ ଭୋଟ ଦେବାପାଇଁ ଧାଡ଼ିବାନ୍ଧି ଠିଆ ହୋଇଥିଲେ ସେମାନଙ୍କୁ ଭୋଟ ଦେବାର ସୁଯୋଗ ଦିଆଯାଇଥିଲା । ଜମ୍ମୁ ଓ କାଶ୍ମୀରର ବାରାମୁଳାରେ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ଭାବେ ମତଦାନ ଶେଷ ହୋଇଛି ଏବଂ ସେଠାରେ ସନ୍ଧ୍ୟା ୭ଟା ୪୫ ମିନିଟ ସୁଦ୍ଧା ୫୪.୪୯ ପ୍ରତିଶତ ମତଦାତା ଭୋଟ ଦେଇଛନ୍ତି ଯାହାକି ଗତ ୩୫ ବର୍ଷ ମଧ୍ୟରେ ସର୍ବାଧିକ ରେକର୍ଡ ବୋଲି ଜଣାପଡ଼ିଛି । ବିହାର, ଜମ୍ମୁ ଓ କାଶ୍ମୀର, ଲଦାଖ, ଝାଡ଼ଖଣ୍ଡ, ମହାରାଷ୍ଟ୍ର, ଓଡ଼ିଶା, ଉତ୍ତର ପ୍ରଦେଶ ଓ ପଶ୍ଚିମ ବଙ୍ଗ ଭଳି ରାଜ୍ୟ ଏବଂ କେନ୍ଦ୍ରଶାସିତ କ୍ଷେତ୍ରରେ ଏହି ପର୍ଯ୍ୟାୟରେ ମତଦାନ ଅନୁଷ୍ଠିତ ହୋଇଛି । ଏହି ପର୍ଯ୍ୟାୟରେ ମୋଟ ୬୯୫ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି ।

ସମସ୍ତ ନିର୍ବାଚନ ମଣ୍ଡଳୀରେ ମତଦାନ ଅତି ସ୍ୱାଭାବିକ ଓ ଶାନ୍ତିପୂର୍ଣ୍ଣ ଭାବେ ସମ୍ପୂର୍ଣ୍ଣ ହୋଇଛି । ମୁଖ୍ୟ ନିର୍ବାଚନ ଆୟୁକ୍ତ ଶ୍ରୀ ରାଜୀବ କୁମାରଙ୍କ ନେତୃତ୍ୱାଧୀନ ଏବଂ ନିର୍ବାଚନ ଆୟୁକ୍ତ ଶ୍ରୀ ଜ୍ଞାନେଶ କୁମାର ଓ ଶ୍ରୀ ସୁଖବୀର ସିଂହ ସାନ୍ଧୁଙ୍କୁ ନେଇ ଗଠିତ ନିର୍ବାଚନ ଆୟୋଗ ଦେଶର ନିର୍ବାଚନ ପ୍ରକ୍ରିୟାର ପ୍ରତିଟି କାର୍ଯ୍ୟ ଉପରେ ତୀକ୍ଷ୍ଣ ନଜର ରଖିଛନ୍ତି ଏବଂ ତତ ସଂକ୍ରାନ୍ତ ଆବଶ୍ୟକ ନିର୍ଦ୍ଦେଶାବଳୀ ଦିନ ତମାମ ଦେଇଥିବା ଜଣାପଡ଼ିଛି । ମତଦାତାମାନେ ଯେଭଳି ନିର୍ଭୟରେ ଏବଂ ସହଜ ଭାବରେ କୌଣସି ପ୍ରକାର ବାଧାବିଘ୍ନ ବିନା ମତଦାନ କେନ୍ଦ୍ରକୁ ଯାଇ ସେମାନଙ୍କର ମତାଧିକାର ସାବ୍ୟସ୍ତ କରିପାରିବେ ସେଥିପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା । କେତେଗୋଟି ପକେଟରେ ଗ୍ରୀଷ୍ମ ପ୍ରବାହ ବ୍ୟତୀତ ଅନ୍ୟ ସବୁ ସ୍ଥାନରେ ପାଗ ପ୍ରାୟତଃ ଅନୁକୂଳ ଥିଲେ ।

ବର୍ତ୍ତମାନ ସୁଦ୍ଧା ମତଦାନ ହାର ଆନୁମାନିକ ଭାବେ ପ୍ରକାଶ ପାଇଛି, ତେବେ ଏହାର ସଂଶୋଧିତ ହାର ନିର୍ବାଚନ ଆୟୋଗଙ୍କ ଭୋଟର ଟର୍ଣ୍ଣଆଉଟ୍ ଆପରେ ଉପଲବ୍ଧ ହେବ । ଏଥିରେ ମୋଟାମୋଟି ଭାବେ ପର୍ଯ୍ୟାୟ କ୍ରମିକ ମତଦାନ ହାର ସହିତ ରାଜ୍ୟ/ସଂସଦୀୟ କ୍ଷେତ୍ର/ବିଧାନସଭା କ୍ଷେତ୍ରୱାରୀ ପରିସଂଖ୍ୟାନ ପ୍ରକାଶ ପାଇବ । ଏହା ଅତିରିକ୍ତ, ବିଭିନ୍ନ ହିତଧାରକମାନଙ୍କ ଅଗବତି ନିମନ୍ତେ ଆଉ ଏକ ପ୍ରେସ୍ ନୋଟ୍ ୨୩୪୫ଟା ବେଳେ ଜାରି କରିବେ ଏବଂ ସେଥିରେ ମତଦାନ ହାର ପରିସଂଖ୍ୟାନ ପ୍ରକାଶ ପାଇବ ।

ପଞ୍ଚମ ପର୍ଯ୍ୟାୟରେ ରାଜ୍ୟୱାରୀ ହାରାହାରି ମତଦାନ ହାର (ସନ୍ଧ୍ୟା ୭.୪୫ସୁଦ୍ଧା)

ପ୍ରଚଳିତ ବିଧି ବ୍ୟବସ୍ଥା ଅନୁସାରେ, ପ୍ରାର୍ଥୀ କିମ୍ବା ସେମାନଙ୍କର ଦ୍ୱାରା କ୍ଷମତାପ୍ରାପ୍ତ ପୋଲିଂ ଏଜେଣ୍ଟମାନଙ୍କ ଉପସ୍ଥିତିରେ ମତଦାନର ଗୋଟିଏ ଦିନ ପରେ ମତଦାନ କାଗଜାତର ତନଖି କରାଯାଇଥାଏ । ଯଦି କୌଣସି ସ୍ଥାନରେ ସାନି ନିର୍ବାଚନ କରିବାର ଥାଏ, ଏହି ତନଖି ପରେ ସେଥିଲାଗି ସିଦ୍ଧାନ୍ତ ନିଆଯାଇଥାଏ । ଭୌଗୋଳିକ ଅବସ୍ଥିତି ଏବଂ ପରିବହନ ସାଧନକୁ ଦୃଷ୍ଟିରେ ରଖି ପୋଲିଂ ପାର୍ଟିମାନେ ମଧ୍ୟ ମତଦାନର ଗୋଟିଏ ଦିନ ପରେ କିଛି କିଛି ସ୍ଥାନରେ ପହଂଚିଥାନ୍ତି । ତେଣୁ ଆୟୋଗ ଏଭଳି ଯାଞ୍ଚ କରିବା ପରେ ଏବଂ ସାନି ନିର୍ବାଚନର ସଂଖ୍ୟା/କାର୍ଯ୍ୟସୂଚୀ ଆଧାରରେ ସଂଶୋଧିତ ମତଦାନ ହାର ଏବଂ ଲିଙ୍ଗ ଆଧାରିତ ହିସାବ ୨୪.୦୫.୨୦୨୪ ତାରିଖ ଦିନ ଜାରି କରିବେ ।

୨୦୧୯ ସାଧାରଣ ବେଳେ ସହରାଞ୍ଚଳ ଭୋଟରମାନଙ୍କ ମଧ୍ୟରେ ମତଦାନ ପ୍ରତି ବିମୁଖ ଭାବ ପରିଲକ୍ଷିତ ହୋଇଥିଲା । ମୁମ୍ବାଇରେ ସିନେ ତାରକାମାନେ ସାଧାରଣ ନାଗରିକଙ୍କ ଭଳି ଧୈର୍ଯ୍ୟର ସହ ମତଦାନ କେନ୍ଦ୍ର ସାମ୍ନାରେ ଧାଡ଼ିବାନ୍ଧି ଭୋଟ ଦେବାକୁ ଠିଆ ହୋଇଥିବାର ଲକ୍ଷ୍ୟ କରାଯାଇଥିଲା ଏବଂ ମତଦାନ ପରେ ସେମାନେ ନିଜର କାଳି ଚିହ୍ନିତ ଆଙ୍ଗୁଠିକୁ ଗର୍ବର ସହ ପ୍ରଦର୍ଶନ କରିଥିଲେ । ସେହିଭଳି ସମାଜର ବିଭିନ୍ନ ସ୍ତରର ଗଣ୍ୟମାନ୍ୟ ବ୍ୟକ୍ତିବିଶେଷ ଚଳିତ ଥର ୨୦୨୪ ସାଧାରଣ ନିର୍ବାଚନରେ ଜନସାଧାରଣଙ୍କୁ ଭୋଟଦାନ ପାଇଁ ପ୍ରୋତ୍ସାହିତ କରିବା ସକାଶେ ଆୟୋଗଙ୍କ ସହିତ ଅନୁବନ୍ଧିତ ହୋଇଛନ୍ତି । ସେମାନେ ନିଜ ନିଜ ସୋସିଆଲ୍ ମିଡ଼ିଆ ପ୍ଲାଟଫର୍ମରେ ଏଥି ନିମନ୍ତେ ବିଭିନ୍ନ ପ୍ରକାର ପ୍ରୋତ୍ସାହନ ସଙ୍ଗୀତମାନ ଅପଲୋଡ୍ କରିଥିବା ଦେଖିବାକୁ ମିଳିଛି ।

୨୦୨୪ ସାଧାରଣ ନିର୍ବାଚନ ପାଇଁ ହେଉଥିବା ଭୋଟରେ ପଞ୍ଚମ ପର୍ଯ୍ୟାୟ ମତଦାନ ଶେଷ ହେବା ସହିତ ଦେଶର ୨୫ ଗୋଟି ରାଜ୍ୟ ଏବଂ କେନ୍ଦ୍ରଶାସିତ କ୍ଷେତ୍ରରେ ଏବଂ ୪୨୮ଗୋଟି ଆସନରେ ମତଦାନ ପ୍ରକ୍ରିୟା ଶେଷ ହୋଇଛି ।

ଏଥି ସହିତ ଅରୁଣାଚଳ ପ୍ରଦେଶ, ସିକିମ, ଆନ୍ଧ୍ର ପ୍ରଦେଶ ଏବଂ ଓଡ଼ିଶାର ୬୩ଟି ବିଧାନସଭା ଆସନ ପାଇଁ ମଧ୍ୟ ମତଦାନ ପ୍ରକ୍ରିୟା ହେଶଷ ହୋଇଛି । ହାଇରିଜୋଲ୍ୟୁସନଯୁକ୍ତ ଫଟୋକୁ ନିମ୍ନଲିଖିତ ୱେବ୍ସାଇଟ୍ https://www.eci.gov.in/ge-2024-photogallery ମାଧ୍ୟମରେ ଉପଲବ୍ଧ ।

ପରବର୍ତ୍ତୀ ପର୍ଯ୍ୟାୟ ( ଷଷ୍ଠ ପର୍ଯ୍ୟାୟ) ମତଦାନ ମେ ୨୫, ୨୦୨୪ ତାରିଖ ଦିନ ଆଠଟି ରାଜ୍ୟ ଏବଂ କେନ୍ଦ୍ରଶାସିତ କ୍ଷେତ୍ରର ୫୮ ଗୋଟି ସଂସଦୀୟ କ୍ଷେତ୍ର (ସେଥି ମଧ୍ୟରେ ଅନନ୍ତନାଗ- ରାଜୌରୀ ସଂସଦୀୟ କ୍ଷେତ୍ର ସାମିଲ)ରେ ଅନୁଷ୍ଠିତ ହେବ ।

SS/DD