প্রধানমন্ত্রীগী লোইশঙ
নই দিল্লীদা পাঙথোকপা রিপব্লিক সম্মিত ২০২৪দা পি.এম.না পীখিবা ৱারোল
Posted On:
07 MAR 2024 11:58PM by PIB Imphal
ময়াম পুম্নমকপু খুরুমজরি!
ঐনা রিপব্লিক তীমবু অখন্নবা মীফম অসিদগীদমক নুংঙাইবা ফোঙদোকচরি। অর্নাবনা হায়খিবা পুম্নমক নুমিৎ চুপ্পা খন্ন-নৈনবগী থৌরমসিদগী লাকপা ওইরমগনি হায়না ঐনা থাজৈ। ঐনা থৌরমসি হৌদ্রিঙৈদা ঈশিং থকখি মরমদি ঐনা অসুক য়াম্বসি লৌশিনবা ঙমগদ্রা নৎত্রগা ঙম্লোইদ্রা হায়বা ঐ খঙদে। চহি খরগী মমাঙদা হন্দক্কী দেকেদ অসিদি ভারতকীনি হায়খিবা মতমদা, মীয়াম্না মদু ইচম চম্বা রাজনিতীগী ৱাফম অমনি, রাজনিতিৱালাশিংদি করিনো অমা নৎত্রগা অমা হায়দুনতা লৈবনি খন্নখি। অদুবু মসি অচুম্বা অমনি অমসুং ঙসি মালেম অসিনা দেকেদ অসি ভারতকীনি হায়না য়ানরক্লি। অদুগা অদোম্না “ভারত-দি নেস্ক দেকেদ” হায়বসিনা ৱারী ৱাতায় অমা পাঙথোক্তুনা খোঙথাং অমগা হেন্না মাঙদা থাংজিনবা অসিদা ঐ অপেনবা পোকই। দেকেদ অসি ‘ভিক্সিত ভারত’ (চাওখৎপা ভারত) অমগী মঙলান মঙফাওনহনবদা য়াম্না মরুওই। অদুগা কনাগুম্বনা করি করম্বা রাজনিতীগী ৱাখল্লোন্না ইথিল পীরিবা, মখোয়দা ওন্নবা ৱাখল ফনা লৈরবসু, মরুওইরিবদি চৎলিবা চহি তরা অসিদি শুবা নোম্বা কনবগী চহিশিংনি হায়বসিনি। অদুম ওইনমক মীওই খরদি পেন্দবগী খয়াৎনুংদা কয়া য়াম্না লুনা চঙখ্রবগে হায়ববু মখোয়না মসিগী মতাঙদা খনবা, তাবা অমসুং ৱা ঙাংবা ফাওবা ঙমদ্রে। কনাগুম্বা খরনা নোকপসু য়াওরি। মসিনা তাক্লিবদি ঐগী ৱাফমসি চপ চানা পাল্লে হায়বনি। অদুবু অসিগুম্বা হীরমসিদা য়েৎনবা অমসুং খন্নবা য়াম্না মথৌ তাই হায়না ঐনা থাজৈ।
অদুবু মরূপশিং,
চৎলিবা দেকেদ, হৌখ্রগদবা দেকেদ অসি, ঐনা খনবদা হৌজিক ফাওবগী ওইনা নীংতম্বা ভারতকী খ্বায়দগী মরুওইবা দেকেদনি। মরম অসিননি ঐনা রেদ ফোর্ত্তগী হায়খিবা – হৌজিক চপ চারবা মতম্নি। দেকেদ অসি মতিং লৈবা, অকনবা, অমসুং ‘ভিক্সিত ভারত’ অমগা য়ুম্ফম্নি। দেকেদ অসি ভারতকী মীয়াম্না মতম অমদা ফংবা ঙমগনি থাজরুদবা মঙলানশিং মঙফাওনহনবগী মতম্নি। ৱাখলগী পল অমা নমখায়বা হায়বসি য়াম্না মথৌ তাই। দেকেদ অসি ভারতকী তৌবা ঙম্বশিংগা লোয়ননা ভারতকী মঙলান মঙফাওনহনবগী মতম্নি। অদুগা ঐনা য়াম্না লুনা লৌরগা থম্নিংবা ৱাফম – ভারতকী মঙলানশিং অসি ভারতকী তৌবা ঙম্বশিংসিনা মঙফাওনহনগদৌরিবনি। মথঙগী দেকেদ হৌদ্রিঙৈদা, ঐখোয়না ভারতপু মালেমগী অহুমশুবা খ্বায়দগী চাউবা শেন্মিৎলোন ওইরকপা উরগনিই। মথঙগী দেকেদ হৌদ্রিঙৈদা, ভারত মচা খুদিংনা য়ুম, তোইলেত, গ্যাস, ইলেক্ত্রিসিতী, ঈশিং, ইন্তরনে অমসুং লম্বীনচিংবা তঙায় ফদনা চঙদ্রবা য়াদ্রবা মচাকশিং – মথৌ তাবা পুম্নমক ফংলগনি। দেকেদ অসি মতমগা চুনবা ইনফ্রাস্ত্রকচর, মালেমগী থাক্কী এক্সপ্রেসৱেশিং শেমগৎ শাগৎপা, খোঙজেল য়াঙবা ত্রেন, অমসুং লৈবাক পুম্বগী ঈশিং লম্বীগী নেতৱর্ক ভারত্তা লৈহনগদবা দেকেদনি। দেকেদ অসিদা ভারতনা মাগী অহানবা বুলেত ত্রেন লৈরগনি। দেকেদ অসিদা, ভারত্তা মপুং ফানা মথৌ তৌরবা দেদিকেতেদ ফ্রৈত কোরিদোরশিং লৈরগনি। দেকেদ অসিদা, ভারতকী মরুওইবা ময়োল্লমশিং মেত্রো নৎত্রগা নমো ভারত রেলৱে নেতৱর্ক্কী খুত্থাঙদা শম্নহল্লগনি। অতোপ্পা ৱাহৈদা, দেকেদ অসি ভারতকী খোঙজেল য়াঙবা কন্নেক্তিবিতী, খোঙজেল য়াঙবা মোবিলিতী, অমসুং খোঙজেল য়াঙবা নুংঙাই য়াইফবগী দেকেদ ওইরগনি হায়বনি।
মরূপশিং,
হৌজিক্কী মতম অসি মালেমগী ওইনা করি ওইরক্কদগে খঙদবা অমসুং তংদু লৈতাদবা মতম্নি হায়বা অদোমসু খঙই। অখঙ অহৈশিংনা মতম অসি অনিশুবা মালেমগী লাঞ্জাও মতুংদা শাথিবা অমসুং পাক শন্না শন্দোকপগী লমদা য়েংবদা খ্বায়দগী তংদু লৈতাদবা মতম্নি হায়নরি। মালেম পুম্বদা লৈঙাক কয়ানা এন্তি-ইস্তাব্লিসমেন্তকী ইথক ইপোম থেংনরি। অদুবু পুম্নমক অসিগী মরক্তা, ভারতনা মপাঙ্গল কনবা দিমোক্রেসীগী শক্লোন্দা থাজবগী মঙাল মশেক অমা ওইনা থোরক্লি। ঐনা হায়রিবসি মঙলানগী মশেক হায়বা নত্তে; ঐনা হায়বদি থৌদাং চাউবা থাজবগী মঙাল মশেক হায়বনি। অমদি মতম অসি ঐখোয়না লৈবাকসিদা অওনবা কয়া পুরক্লিবা মতমদুনি। ভারতনা অফবা শেন্মিৎলোনগা অফবা রাজনিতীগা খুৎশম্ননা চৎমিন্নবা য়াই হায়বা উৎলে।
মরূপশিং,
ঙসি, ভারতনা পুম্নমক অসি কমদৌনা ফংবা ঙম্লিবনো হায়বসিদা মালেমসিনা ঙক্নরি। মসি ঐখোয়না শেনয়েক অমগী মমায় অমত্তা মীরায়রুদবনা ওইরকপনি। মসি ঐখোয়না লৈবাকসিগী মথৌ তাবা লোয়ননা মঙলানশিং মঙফাওনহন্বদুনা ওইরক্লিবনি। মসি ঐখোয়না নুংঙাই য়াইফবা অমদি মপাঙ্গল হাপ্পা অনিমক্তা মীৎয়েঙ থমখিবদুনা ওইরক্লিবনি। খুদম ওইনা, ঐখোয়না কোর্পোরেত তেক্স রেকোর্দ ওইবা চাংদা হন্থহল্লে, অদুবু ঐখোয়না লনাই শেন্থোক্তা লৌরিবা খাজনাসু হন্থহল্লি। ঙসি, ঐখোয়না হায়ৱে, রেলৱে, এয়রৱে, অমসুং ৱাতরৱে শেম্বদা রেকোর্দ ওইবা ইনভেস্তমেন্ত তৌরি, অদুগা অমুকসু, ঐখোয়না লায়রবশিংগীদমক য়ুম বিলিয়ন কয়া শারি, মখোয়দা হেল্থকেয়র অমসুং চেঙ হৱায় লেম্না ফংহল্লি। ঐখোয়না মেক ইন ইন্দিয়াগী PLI স্কীমদা খরা কোমথোকপগা লোয়ননা, ঐখোয়না লৌমীশিংদা ইন্স্যুরেন্সকী খুত্থাঙদা ঙাক্লৌ পীদুনা মখোয়গী শেন্থোক হেনগৎনবা পাম্বৈ পীরি। ঐখোয়না তেক্নোলোজী অমসুং ইনোভেসন্দা ইনভেস্তমেন্ত মশক থোক্না তৌরি, অদুগা মসিগা লোয়ননা, ঐখোয়না নহাশিংগী স্কিল দিভেলপমেন্ততসু লুপা বিলিয়ন কয়া থাদরি।
মরূপশিং,
নীংতম্লবা মতুংগী দেকেদশিংদা, ভারতনা মতম কয়া অরানবা লম্বীদা লমজিংদুনা মাঙহনখ্রে। ইমুং অমখক্তা মীৎয়েঙ পুম্নমক থম্বনা মরম ওইরগা, লৈবাকসসিগী চাওখৎ থৌরাংদা মীৎয়েঙ চঙবা ৱাৎখি। ঐনা মসিগী মতাঙদা মখা তানা চঙশিনবা পামদে। অদুবু ঐখোয়না ‘ভিক্সিত ভারত’ অমা ওইরক্নবগীদমক মাঙখ্রবা মতম অদু অমুক ফুক্কৎপা মথৌ তাই হায়বসিদি অদোমসু য়ানিংগনি। মরম অদুনা, ঐখোয়না মসি ফংবা ঙম্নবগীদমক হান্না খন্নরুদবা থাক অমসুং খোঙজেলদা থবক তৌবা তাই। ঙসি, অদোম্না থৌওং অসি ভারতকী মফম খুদিংদা উবা ফংবিরমগনি। ঐনা গুজরাত্তা (মুখ্য মন্ত্রী ওইনা) লৈরিঙৈদা, ঐনা মীয়ামদা করিগুম্বা অদোম্না মায়কৈ অমা হেক্তদা কিলোমিতর ২৫ চৎলবদি, অদোম্না চাওখৎ থৌরাংগী নৎত্রগা ইনফ্রাস্ত্রকচরগী থবক অমা নৎত্রগা অমা পায়খৎপা থেংনগনি হায়না হেক হেক হায়রম্মি। মফম অমদগী হেক্তা হৌবিয়ু, মায়কৈ অমদা হেক্তা কিলোমিতর ২৫ চৎপিয়ু। ঙসিদি ঐনা কিলোমিতরদা হায়দ্রে, অদুবু ঐনা হায়গদবদি অদোম্না ভারতকী মচি অমদা হেক্তা য়েংবদা, করিগুম্বা অফবা খরদি অদুমক তৌরমগনি। বি.জে.পি.না অহুমশুবা তর্মদা ৩৭০দগী সীত মশিং কয়া হেন্না ফংবা ঙমগদগে হায়না য়েৎনবিরমগনি। মতাঙদুদা ঐহাক ময়ামগী মরক্তা য়াওরবনি, চুমবরা? অদুবু ঐনা থম্লিবা মীৎয়েঙদি লৈবাকসিগী চাওখৎ থৌরাংগী খোঙজেল অমসুং থাক অদুনি। করিগুম্বা ঐনা নুমিৎ ৭৫৫নিগী ৱাফম পুথোক্লবদি রিপব্লিক য়েংলিবশিংনা ফাওবা ঙক্কনি। লৈবাকসিদা করম্বা খোঙজেলদা চাওখৎ থৌরাংগী থবক পায়খৎলিবগে হায়বা নীংথিনা খঙবা মীওই খরা মফমসিদা শোয়দনা লৈরমগনি। হৌখিবা নুমিৎ ৭৫সিদা, ঐনা লুপা করোর লাখ ৯ ময়াগী প্রোজেক্তশিং শঙ্গাখ্রে অমসুং হৌদোকখ্রে। মসি দোলর বিলিয়ন ১১০দগী হেল্লিবনি। মসি মালেমগী লৈবাক কয়াগী চহিগী চাদিং ফাওবা হেল্লিবনি, অমদি ঐখোয়না মসিদগী হেনবা শেনফম নুমিৎ ৭৫সিখক্তদা মতমগা চুনবা ইনফ্রাস্ত্রকচরদা থাদখ্রে।
হৌখিবা নুমিৎ ৭৫সিদা, অনৌবা এইম্স ৭ লৈবাকসিদা শঙ্গাখ্রে। মেদিকেল অমসুং নর্সিং কলেজ মরি, নেস্নেল রিছর্চ লেব তরুক হৌখ্রে। IIM ২, IIT ১০, অমসুং NIT ৫গী পর্মেনেন্ত কেম্পস নৎত্রগা ফেসিলিতীশিং শঙ্গাখ্রে অমসুং উরেপ উয়ুং তমখ্রে। মসিগী মথক্তাIIIT ৩, ICAR ২, অমসুং কেন্দ্রগী ইন্সতিত্যুৎ ১০ শঙ্গাখ্রে অমসুং হৌদোকখ্রে। স্পেস ইনফ্রাস্ত্রকচরগা মরী লৈনবা লুপা করোর ১৮০০গী ওইগদবা প্রোজেক্তশিং শঙ্গাখ্রে। নুমিৎ ৭৫সিখক্তদা, পৱার প্রোজেক্ত ৫৪ শঙ্গাখ্রে নৎত্রগা উরেপ উয়ুং তমখ্রে। কক্রাপার ন্যুক্লিয়র পৱার প্লান্তকী অনৌবা রিএক্তর অনি লৈবাক্কী মফমদা কত্থোকখ্রে। কলপক্কমদা লৈরিবা ইন্দিজিনস ফাস্ত ব্রীদর রিএক্তরগী “কোর লোদিং” হৌখ্রে, মসি য়াম্না চাউবা য়াওলগী থবক অমনি। তেলঙ্গনাদা, মেগাৱাত ১৬০০গী থর্মেল পৱার প্লান্ত অমা শঙ্গাখ্রে। ঝার্খন্দদা, মেগাৱাত ১৩০০গী থর্মেল পৱার প্লান্ত অমা শঙ্গাখ্রে। উত্তর প্রদেশতা মেগাৱাত ১৬০০গী থর্মেল পৱার প্লান্ত অমগী উরেপ উয়ুং তমখ্রে। উত্তর প্রদেশ খক্তদা, মেগাৱাত ৩০০গী সোলার পৱার প্লান্ত অমগী উরেপ উয়ুংসু তমখ্রে। হায়রিবা মতমসিমক্তদা, উত্তর প্রদেশতা অল্ত্রা মেগা রিনিউএবল পার্ক্কী উরেপ উয়ুংসু তমখ্রে। হিমাচল প্রদেশতা হায়দ্রো পৱার প্রোজেক্ত অমগী উরেপ উয়ুংসু তমখ্রে। তামিল নাদুদা, লৈবাকসিগী অহানবা গ্রীন হায়দ্রোজেন ফ্যুল সেল ভেসেল হৌদোকখ্রে। উত্তর প্রদেশতা মীরুত-সিম্ভাবলি ত্রান্সমিসন লাইনশিং শঙ্গাখ্রে। কর্নাতকাগী কোপ্পলদা, ৱিন্দ ইনর্জী জোন্দগী ত্রান্সমিসন লাইনশিং শঙ্গাখ্রে। নুমিৎ ৭৫সিখক্তদা, ভারতকী খ্বায়দগী শাংবা কেবল-স্তেদ থোং শঙ্গাখ্রে। লক্সদ্বীপ্তা সমুদ্র ঈরোন্নুংগী ওপ্তিকেল কেবলগী থবক মপুং ফানা লোইশিন্দুনা শঙ্গাখ্রে। লৈবাক শিনবা থুংনা রেলৱে স্তেসন ৫৫০ মতমগা চুনহন্নবা থবক পায়খৎপা হৌখ্রে। অনৌবা ত্রেন ৩৩ লমথাখ্রে। লম্বী, ওভরপাস, অমসুং অন্দরপাস প্রোজেক্ত ১৫০০সু শঙ্গাখ্রে। লৈবাকসিগী ময়োল্লম ৪দা মেত্রো প্রোজেক্ত ৭ শঙ্গাখ্রে। কোলকতানা লৈবাকসিগী অহানবা অন্দরৱাতর মেত্রোগী খুদোল ফংখ্রে। হিথাংফম শেমগৎপগী লুপা করোর ১০,০০০গী ওইগদবা প্রোজেক্ত ৩০ শঙ্গাখ্রে অমদি উরেপ উয়ুং তমখ্রে। হৌখিবা নুমিৎ ৭৫সিখক্তদা, মালেমগী খ্বায়দগী চাউবা স্তোরেজ স্কীম লৌমীশিংগীদমক্তা হৌদোকখ্রে। কোওপরেতিব ১৮,০০০গী কম্প্যতরাইজেসনগী থবক লোইশিনখ্রে। লুপা করোর ২১,০০০ হেনবগী শেনফম লৌমীশিংগী বেঙ্ক একাউন্ততা থাজিনখ্রে। অদুগা ঐনা রিপব্লিক তিভি য়েংলিবশিংগী মফমদা নীংশিংজনিংবা ৱাফম অমনা, হায়রিবশিং অসি ঐ ইশামক য়াওখিবা প্রোজেক্তশিংনি। অদুগা ঐনা শঙ্গাবা অমদি হৌদোকপগী প্রোজেক্তশিংখক্তমক্নি পল্লিবা, অতৈ কয়া অমসু লৈরি, মদুগী মতাঙদদি ঐ হৌজিক হায়ররোই। মসিগী মথক্তা, ঐনা ঐগী লৈঙাক্কী অতৈ মন্ত্রালয়শিংগী থবকশিং পুথোক্লবদি, বি.জে.পি.-এন.দি.এ.গী অতৈ লৈঙাকশিংগী থবকশিং পুথোক্লবদি, অদোম্না অয়ুক্কী চা থৌরাং তৌবরা তৌদবরা খঙদে। অদুবু ঐনা ঐখোয়গী লৈঙাক্কী থাক অমসুং খোঙজেল, মসিনা করম্না থবক তৌবগে হায়বগী অতোপ্পা খুদম অমগা পীজগে। হন্দক্তা মায়খুম হাংদোকখিবা চহিসিগী বজেত্তা সোলার পৱারগা মরী লৈনবা অচৌবা স্কীম অমা লাউথোকখিবা অদোমসু খঙবিরমগনি। বজেত্তা মসি লাউথোকখিবদগী মন্ত্রী মন্দলনা পি.এম. সুর্য়া ঘর মুফ্ত বিজ্লী য়োজনা অয়াবা পীখিবদা চয়োল মরি য়ৌদনা চঙখি। হৌজিক্তি সোলার পৱার্দ য়ুম করোর অমা শাননবা সর্ভে হৌখ্রে। স্কীম অসিগী মখাদা, লৈঙাক্না য়ুনিৎ ৩০০ ফাওবগী সোলার পৱার পীননবা অমদি মীয়ামদা অহেনবা সোলার য়ুনিৎশিংদগী শেল তান্নবা খুদোংচাবা পীননবা পান্দম থম্লি। ঙসি, লৈবাকসিগী মীয়াম্না ঐখোয়গী লৈঙাকসিগী খোঙজেল অমসুং থাক্কী মরমদা হকথেংননা খঙনরে, মরমসিননি মখোয়না ‘এক বার, ৪০০ পার; ফির এক বার, ৪০০ পার’ (অমুক্কা হন্না, সীত ৪০০ হেন্না) হায়না খোল্লাউ লাউরিবা।
মরূপশিং,
“অদোমগী মায়োক্তা চত্থরিবা নেগেতিব কেম্পেন অসিনা অদোমদা শোকহন্দবরা? লেপ্পা লৈতনা অদোমদা লান্দারকপসিনা অদোম হৈনদবা পোক্তবরা?” হায়না মীয়াম্না হেক হেক হংই। করিগুম্বা ঐনা নেগেতিব কেম্পেন অসিদা পুক্নিং চঙদুনা লৈরবদি, ঐনা তৌগদবা থবক্তা পুক্নিং চঙবা ঙম্লক্লোই হায়না ঐনা মখোয়দা হাপ্পি। ঐনা ময়ামগী মাঙদা হৌখিবা নুমিৎ ৭৫নিগী রিপোর্ত কার্দ থমখ্রে, অদুগা অমুকসু, ঐ মথঙগী চহি ২৫গী লম্বী য়াৎপদা থৌ চিল্লি। ঐগী ইফমদা মীৎকুপ খুদিং মমল য়াম্মি। মীখলগী মতমসিদা ফাওবা, ঐখোয়না মীয়ামগী মফমদা ঐখোয়গী মায় পাকপশিং পুদুনা চৎলি। অদুগা অমরোমদা, ঐখোয়না ওপোজিসনগী রেঙ্কশিংদা করি উবা ফংই? মখোয়দা অশাওবা, তাথি তাওইবা ৱাহৈ, অমসুং নীংবা কায়বা থল্লি। মখোয়দা ইসুসু লৈতে পাম্বৈসু লৈতে। মসি করিগীনো? মসিগী মরমদি হায়রিবা পার্তীশিং অসিনা দেকেদ তরেৎ খোল্লাউখক্তদা মীখল থেংনদুনা লাকখিবনি। মখোয়না ‘গরিবি হতাও’ (লায়রবা মুত্থৎলু) হায়দুনা লাক্লি … হায়রিবা খোল্লাউশিং অসিনা মখোয়গী তাইবংনি। হৌখিবা চহি ১০সিদা, মীয়াম্না খোল্লাউ নত্তবা পাম্বৈ উবা ফংলি। ফুদ সিক্যুরিতী, হারগী ফেক্তরী অমুক হৌদোকপা, মৈ ফংহনবা, ঙমখৈগী ইনফ্রাস্ত্রকচর মপাঙ্গল কনখিহনবা, নৎত্রগা মীয়ামগী হাউজিং স্কীম শেম্বা, নৎত্রগা আর্তিকল ৩৭০ মুত্থৎপা ওইরবসু ঐখোয়গী লৈঙাক অসিনা মরুওইবা হীরমশিং অসিদা মতম অমত্তদা থবক পায়খত্তুনা লাক্লি।
মরূপশিং,
রিপব্লিক তিভিগা অরুবা ৱাহং হংবগা মতম শাংলবা মরী লৈ। লৈবাক্না খঙনিংই… হায়বা ৱাহৈসিগা লোয়ননা, অদোম্না খ্বায়দগী নমথবা ঙমদবা মীওই ফাওবা হুমাং তাহল্লি। মমাঙদা, লৈবাকসিদা হংনরম্বা ৱাহংদি: ঙসি লৈবাকসি কদায়দা লৈরি, করম্বা ফীভমদা লৈরি হায়বসিনি! অদুবু য়েংবিয়ু, হায়রিবা ৱাহংশিং অসি হৌখিবা চহি ১০সিদা কমদৌনা হোংখ্রবগে হায়বা য়েংবিয়ু! চহি তরাগী মমাঙদা, ঐখোয়গী শেন্মিৎলোন্দা করি ওইরক্কনি হায়না মীয়াম্না হংনরম্মি। ঙসিদি মালেমগী অহুমশুবা খ্বায়দগী চাউবা শেন্মিৎলোন কয়াম থুনা ওইবা ঙমগনি হায়না মীয়াম্না হংনরে। চহি তরাগী মমাঙদা করম্বা মতমদা ঐখোয়দা চাওখৎপা লৈবাকশিংগা মান্নবা তেক্নোলোজী লৈরক্কনি হংনরম্মি। ঙসিদি মপান্দগী লাকপা মীওইশিংদা নখোয়গীদুদা দিজিতেল পেমেন্ত সিস্তেম লৈতবরা হায়না হংনরে। চহি তরাগী মমাঙদা অদোম্না থবক অমা ফংদ্রবদি করি তৌগনি হায়না নহাশিংদা হায়নরম্মি। ঙসিদি, মীয়াম্না নহাশিংদা নহাক্কী স্তার্ত-অপতু কমদৌরে হংনরে। চহি তরাগী মমাঙদা এনালিস্তশিংনা ইনফ্লেসন করিগী অসুক য়াম্না ৱাংলিবনো হংনরম্মি। ঙসিদি মালেমগী লাংফম অমগী মতুংদসু ভারত্তা কমদৌনা ইনফ্লেসন লাকশিন্দুনা থম্লিবনো হায়না হায়রিবা মীওইশিংদুনা হংনরি। চহি তরাগী মমাঙদা, চাওখৎপা পুরক্ত্রিবসি করিগীনো হংনরম্মি। ঙসিদি ঐখোয় কমদৌনা অসুক থুনা খুমাঙ চাওশিল্লিবনো হংনরে। মমাঙদা হন্দক্তি করম্বা স্কেম থোরক্লে হংনরম্মি। হৌজিক্ত করম্বা স্কেম তৌবা মীওইগী মথক্তা থবক লৌখৎখ্রে হংদরে। মমাঙদা মীদিয়াগী মরূপশিংনা বিগ বাং রিফোর্ম কদায়দা লৈখ্রে হংনরম্মি। ঙসিদি মীখল মতমদসু কমদৌনা রিফোর্ম পুরক্লিবনো হংনরে। চহি তরাগী মমাঙদদি জম্মু অমসুং কাস্মিরদগী আর্তিকল ৩৭০বু মুত্থৎকদৌরিবরা হায়না হংনরম্মি। ঙসি হংলিবা ৱাহংদি, কাস্মিরদা লমকোয়বা কয়া লাকখ্রে? কাস্মিরদা শেল কয়াম থাদখ্রে হায়বসিনি। ৱাফম অমনা, ঐ ঙসি অয়ুক স্রিনগরদা চৎলুই। ঐনা অনৌবা প্রোজেক্ত কয়া শঙ্গারম্মি অমসুং হৌদোক্ললম্মি, অমদি ঙসিগী ফীভম অদু তোপ তোপ্পা অমনি মরূপশিং। ঐগা লম অসিগা চহি ৪০গী মরী অমা লৈ। ঙসি, ঐনা তোঙানবা ইহুল অমা, খেন্নবা মওং অমা, মঙলানশিং, অমসুং থাজবনা থনবা মীয়ামশিং উরকখি।
মরূপশিং,
দেকেদ কয়া, লৈঙাক্না অশোনবা অমদি খুরৌ চেনগদবা কাঙবুনি খল্লম্বশিংবু নাথৈদুনা থম্বিরম্মি। হৌখিবা চহি ১০সিদা, ঐখোয়না মখোয়গীদমক থৌদাং য়াদুনা লাকখি। মরম অদুননি– মোদীনা কনানসু লেপ্পিদ্রবা মীওইশিংগীদমক লেপ্লি – হায়না ঐনা হায়রিবা। এস্পিরেস্নেল দিস্ত্রিক্তকী খুদম য়েংবিয়ু। চহি কয়া, হায়রিবা দিস্ত্রিক্তশিং অসি, মীওই মিলিয়ন কয়াগী ময়ুমশিং অসি, থৌশাবিদনা মখোয় মশাগী মরাইবক্তা থাদোক্তুনা থম্লম্মি অমদি মখোয়বু শোত্থবা মফম হায়না কৌবিরম্মি। ঐখোয়গী লৈঙাক্না ৱাখল্লোন অসি হোংদোকপখক্তা নত্তনা থৌওংসু হোংদোক্তুনা মখোয়গী মরাইবকসু হোংদোক্লে। ঐখোয়গী ঙমখৈগী দিস্ত্রিক্তশিংগী মীওইশিংসু মসিগা মান্নবা ফীভমদনি লৈরম্লিবা। মমাঙগী লৈঙাকশিংগী থৌরাংদি ঙমখৈ ময়াগী মফমশিংদা শেমগৎপা য়ারোই হায়বসিনি। ওফিসিএলশিংনা “নো দিভেলপমেন্ত” হায়রম্মি। থৌরাং অসিনা মরম ওইরগা, মফমদুদা লৈরিবা মীয়াম্না খুদোংচাদবা কয়া থেংনরম্মি, মদুনা খুল হোংনরকখি। ঐখোয়না মীয়ামদা মপাঙ্গল হাপ্নবা লঅমসুং মফমশিংদুগী ফীভমদা অহোংবা পুরক্নবা ভাইব্রেন্ত ভিলেজ প্রোগ্রাম হৌদোকখি। দিব্যং মীওইশিংগী খুদম য়েংবিয়ু। চহি কয়া, কনামত্তনা মখোয়দা মীৎয়েঙ চঙবিরমদে মরমদি মখোয়বু ভোত বেঙ্ক ওইনা লৌরমদে। ঐখোয়না হীরম খুদিংদা দিব্যং মীওইশিংদা মরুওইবা মীৎয়েঙ থম্বতা নত্তনা মীয়ামগী ৱাখল্লোনসু হোংদোক্লে। অদোম খঙবদা ঙকপা ফাওবসু য়াই অমদি মফমসিদা তিল্লিবা মীয়ামগী মফমদা লাংতক্নবা ৱাফম অমা ওইবসু য়াই। ঐখোয়গী স্তেতশিংদা, লোলশিং মখোয় মখোয়গী ওইবা মওংদা শেমগৎলকখিবনি, অমদি খেন্নবনা চাউথোকচনিংঙাইবী ৱাফম অমনি। অদুবু, তাবা অমসুং ঙাংবদা খুদোংচাদবা মায়োক্নরিবা ঐখোয়গী স্পিসিএল্লী এবল্দ মীওইশিংগী মফমদদি ইঙ্গিৎ অসি মরুওই। ঐখোয়গী লৈবাকসিদা ইঙ্গিৎ অসি য়াম্না খেন্নৈ হায়বা অদোম খঙদবা ঙক্কনি। ময়ামসু হায়বিয়ু, দিল্লীঈদগী মীওই অমনা জয়পুরদা চৎলে হায়না লৌরসি অমদি অতোপ্পা মীওইদুনা খেন্নবা মখলগী ইঙ্গিৎ শীজিন্নদুনা পাউ ফাওননবা হোৎনরবদি করি ওইগনি? নীংতম্বগী চহি কয়াগী মতুংদা, ঐনা মসি লাকশিনবা ঙমখি। থবকসিগীদমক ঐনা কম্মিতী অমা শেমখি, অমদি ঙসিদি, লৈবাক শিনবা থুংনা দিব্যং মীওইশিংদা চপ মান্নবা ইঙ্গিৎ তম্বিরে। মসি অপীকপা থবক অমা ওইনা মীয়াম্না লৌরম্বা য়াই। অদুবু ইহুল খঙবা লৈঙাক অমা লৈরবদি, মসিগী ৱাখল্লোন অমদি থৌওংশিং মীয়ামগা মরী শম্নদুনা লৈ। য়েংবিয়ু, ঙসিদি দিব্যংশিংগী মফমদা লৈরম্বা মীৎয়েঙসু হোংলে।
পব্লিক ইনফ্রাস্ত্রকচর অমসুং আর্কিতেকচরশিংগী দিজাইনশিংসু দিব্যং মীওইশিংগী মথৌ তাবশিং মাঙদা থম্লগা শেমগৎ শাগৎলি। নীংখা তম্লকপদগী হৌদা মখোয়দা মরুওইবা মীৎয়েঙ য়েংবিরমদবা অখন্নবা মীওই কাঙলুপ অমসুং ফুরুপ কয়া লৈরি। ঐখোয় অসিগুম্বা কোয়না চত্তুনা লৈবা ত্রাইবশিংগীদমক অখন্নবা ৱেলফ্যার বোর্দশিং শেম্লে। ঐখোয়গী লম্বী মতাইগী পোৎফম ফম্বশিংগীদমক্তা কনামত্তনা খনবিরমদে। অদুবু ঐখোয়গী লৈঙাক্না কোরোনাগী মতমদা মখোয়গীদমক পি.এম. স্বানিথী স্কীম শেমখি। ঐখোয়না হৌজিক বিস্বকর্ম হায়না কৌনরিবা, ঐখোয়গী স্কিল্দ আর্তিস্তশিংগী মরমদা কনানসু থৌশাবিরমদে। কাঙলুপ অসিদা স্কিল্লিংদগী ফন্দিং ফাওবদা খুদোংচাদবা অমত্তা মায়োক্নদনবা ঐখোয়না হোৎনখি। হৌজিক্তি কেন্দ্র লৈঙাক্না থৌরাং অসিদা লুপা করোর ১৩,০০০ চাদিং তৌরি।
মরূপশিং,
রিপব্লিক তিভি তীম্না মায় পাকপা খুদিংগী মরুমদা হোৎনবা কনবা, মীৎয়েঙ, অমসুং অচেৎপা ফিরেপকী খোঙচৎ অমা লৈ হায়বা খঙই। অর্নাবনা মসিগী মতাঙদা ত্রেলর মচা অমসু ঐখোয়দা উৎখ্রে। ভারতসু মাগী খোঙচত্তা খোঙলৈ থুনা মাঙদা চঙশিল্লি। মথঙগী দেকেদতা, ভারতনা ৱাখলনা লাম্বা ফংলুদবা, হান্না খন্নরুদবা থাক য়ৌরগনি। মসিসু মোদীগী ৱাশক্নি।
মরূপশিং,
অদোমসু মালেমগী ওইবা ৱাখল্লোন অমদা মাঙদা চঙশিল্লিবসি ঐ নুংঙাই। ঐহাক্না থাজবা থম্লি, অদুবু অদোম্না হায়খিবা অদুদা ঐহাক্না শেল তিংদবা ৱাফম অমা নৎত্রগা অনি হায়নিংই। ঐ শেল লৌবগী মথৌ তাদে। অদোম্না স্তেতশিংগীদমক শেম্বা পাম্লিবা চেনেলশিংদু য়েংবিয়ু। করিগুম্বা অদোম্না মদু মথং মথং লেপ্তনা তৌরবদি, মদু কয়া ফবা ওইরোই। শেংনা হায়রবদা, ঐগী ৱাখল খনবগী মওংদি খেন্নৈ, মরম অসিননি ঐনা হায়রিবা। অদোম্না গুজরাতী পাউগী পুং অনি, বেঙ্গালি পাউগী পুং অনি, মলয়ালম পাউগী পুং অনি কাইথোকপা চেনেল অমা শেম্লে। হৌজিক্তি গুগল গুরুনসু অদোমদা ৱাহন্থোক পীরি। অদুগা ঐনা লৈবাক অসি আর্তিফিসিএল ইন্তলিজেন্সকী (AI) লমদা খরা খুমাঙ চাওশিনহল্লি। হৌজিক ঐগী ৱারোলসি লোল নিপান্দগী মাপন ফাওবদা অদোমগী মফমদা ইরায় লায়না য়ৌরি। ঐনা ঙাংবগা লোয়ননা মতম ইচঙ চঙদনা ঐগী ৱারোল লোল খুদিংদা ফংলগনি। তামিলদা ওইরবসসু নৎত্রগা পঞ্জাবীদা ওইরবসু। মসিনা করি ওইরক্কদগে হায়ববু অদোমগী কোর তীম থৌওং অসিদা শেম শাদুনা লৈরগনি। কোর তীম অদু হেন্না শেম শাদুনা লৈরিবমখৈ, শেল হেন্না চঙদবা ওইগদরিবনি, অদুদগী মদু নুমিৎ ১৫নিগী মতুংদা পুক্নিং চঙবিয়ু। অদোম্না স্তেত তরেৎকী চেনেলশিং নোংমদা চলাইদ্রিবনো? মতম শেম্বিয়ু। মসি তেক্নোলোজীদা অরুবা ৱাফম অমা নত্তে। অতোপ্পা অমনা অদোম্না মালেমগী ওইবা চেনেল অমা শেম্বা পাম্লি। অদোমগী চেনেল মীপুম খুদিংমক্না য়েংগনি হায়বগী ৱাফম লৈতে। হৌরকপদা সার্ক লৈবাকশিংগী পাউগী এজেন্সী অমা ওইনা হৌদোকপা য়াই। মদুনা মাল্দিব্সতা লৈবা মীয়ামদা মতেঙ ওইগনি। নাসিদ ঐগী কুইরবা মরুপ্নি, মরমসিনা ঐনা মঙোন্দা ৱাফম অমা হেক্তা হায়বা য়াগনি। অদোম্না হৌদোকপগী ওইনা সার্ক লৈবাকশিংদা মীৎয়েঙ থমগদবনি মরমদি মফমদুদা লৈরিবা মীওইশিংনা ভারতকা মরী লৈনবা পাউশিং পামগনি। অদোম্না মখোয়গী লোলদা য়ুম্ফম ওইবা থৌরমশিং শন্দোকপা য়াই। অসুম্না তপ্না তপ্না অদোম্না তৌবা (অদোমগী মঙলান মঙফাওনহনবা) ঙমগনি। ঐনা চহি মঙাসিদা MGNREGA তৌরগা, চহি মঙা চুপ্না MGNREGA গী মায় পাকপবু শিংথাদুনা লৈগদবা নত্তে। লৈবাকসিনা মদুগুম্বা মওংদা থবক তৌদে। লৈবাকসিনা খোঙজেল য়াঙনা চঙশিল্লিব, লৈবাকসিনা অচৌবা থবক কয়া পায়খৎকদবা লৈ। অদোমদি মীখল থেংনগদবসু নত্তে হায়না ঐনা থাজৈ, অদু ওইরবদি করিগী মিপাইরিবনো? ঐদি মীখল থেংনগদৌরিবনি, অদুবু ঐদি মিপাইদে। ফরে, য়াইফবতা ওইবিয়ু, ময়ামবু হন্না হন্না থাগৎচরি।
দিসক্লেমর: মসি পি.এম.গী ৱারোলগী চাউরাকপা ৱাহন্থোক্নি। অশেংবা ৱারোলদি হিন্দীদা পীখিবনি।
*****
(Release ID: 2014043)
Visitor Counter : 34
Read this release in:
English
,
Urdu
,
Hindi
,
Marathi
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam